Lajmet

Njohja e diplomave të Luginës – Nagavci: Jemi të angazhuar maksimalisht për të gjetur zgjidhje

Nagavci: Jemi duke e trajtuar me prioritet njohjen e diplomave.

Published

5 years ago

on

Ministrja e Arsimit, Shkencës, Teknologjisë dhe Inovacionit (MASHTI), Arbërie Nagavci, tha se janë duke punuar për njohjen e diplomave të studentëve nga Lugina e Preshevës, duke shtuar se nuk do ta neglizhojnë këtë çështje, raporton Ekonomia Online.

 Në një intervistë për Ekonomia Online, Nagavci, tha se janë duke i trajtuar me prioritet njohjen e diplomave për të gjithë studentët që kanë përfunduar studimet jashtë vendit.

“Po njohja e diplomave është një proces i cili menaxhohet nga Ministria e Arsimit dhe kjo është jo vetëm për studentët e Luginës por këtu tek ne edhe për studentët e tjerë që i kanë kryer studimet në vendet e ndryshme të Botës apo edhe ata që në të kaluarën kanë pasur disa vështirësi. Janë probleme te kamotshme të cilat ne jemi duke i trajtuar me prioritet, besoj do angazhohemi fort që të gjejmë një zgjidhje ashtu që për të gjitha ato çështje dhe studentët mos të pësojnë që pa fajin e tyre kanë ardhur në një situatë ku për shkak të neglizhencës, pakujdesisë apo edhe dështimit të qëllimshëm të personave që kanë pasur përgjegjësi, t’i vuajnë pasojat tashmë studentët”, tha ajo.

Tutje, Nagavci ka folur edhe rreth mësimit plotësues që po mbahet nëpër shkolla për kompensimin e ngecjeve në mësimnxënie.  Ajo tha se ka qenë sfidë, pasi ka qenë përvojë e re për mësimdhënësit.

“Po mund të jetë, por përveç që është sfidë, është më tepër angazhim për mësimdhënësit, dhe ka shumë shkolla që edhe ashtu shumë mësimdhënës kanë mbajtur mësimin plotësues për nxënësit që kanë pasur vështirësi në nxënie, ashtu edhe për pjesën tjetër, pra ka qenë një përvojë e re për mësimdhënësit, por në anën tjetër ajo se çfarë pajtohem është se ka qenë vendosja e nxënësve nëpër klasë të ndryshme që ka sjell nevojë për kujdes më të shtuar dhe që duhet të menaxhohet më mirë në të ardhmen”.

Ministrja Nagavci tha se do duhet një kohë e gjatë që të kompensohen dëmet e shkaktuar nga pandemia në arsim.

“Po ka qenë mjaft sfiduese, nuk është se janë bërë hulumtime të sakta edhe të plota, por që pandemia ka sjell mjaft pasoja dhe do të na duhet një kohë e gjatë që t’i plotësojmë dëmet e shkaktuara nga pandemia”, theksoi tutje ajo.

Tutje, ajo tha se janë duke punuar maksimalisht që të kompensojnë humbjet nga pandemia dhe të përmirësojnë gjendjen në arsim.

“Po pranimi i detyrës time ka qenë edhe ashtu në një gjendje jo të mirë, ku përveç sfidave që ballafaqohet arsimi ndër vite e me dekada tashmë kemi filluar punën me kohën kur jemi përballë edhe me kushtet e pandemisë kështu që jemi munduar për sa është e mundur të kompensojmë edhe humbjet që janë krijuar nga pandemia dhe të sigurohemi për shëndetin e nxënësve dhe të mësimdhënësve që të mos na mungojnë edhe rezultatet në mësimdhënie dhe mësimnxënie”, deklaroi Nagavci për Ekonomia Online.

Related Topics:
Continue Reading

Vendi

Kryeministri Kurti pret ministrin e Jashtëm belg: Diskutohet bashkëpunimi ekonomik dhe integrimi evropian

Published

8 hours ago

on

April 16, 2026

By

Kryeministri i Republikës së Kosovës, Albin Kurti, priti në takim zëvendëskryeministrin dhe ministrin e Punëve të Jashtme të Belgjikës, Maxime Prévot, të cilin e falënderoi për mbështetjen e vazhdueshme të shtetit belg në të gjitha etapat e shtetndërtimit të Kosovës.

Gjatë bashkëbisedimit, Kurti veçoi kontributin historik të Belgjikës në strehimin e refugjatëve gjatë luftës dhe angazhimin e tyre brenda forcave të KFOR-it.

Fokus i veçantë i takimit ishte thellimi i marrëdhënieve dypalëshe, me theks te bashkëpunimi ekonomik dhe krijimi i lehtësirave për investime, duke marrë parasysh edhe praninë e një mërgate të mirë-integruar në Belgjikë.

Kryeministri përmendi marrëveshjen e fundit për eliminimin e tatimit të dyfishtë, të nënshkruar në Washington DC, si një hap pozitiv që hap rrugën për marrëveshje të reja sektoriale në të ardhmen.

Sa i përket aspiratave ndërkombëtare, Kurti nënvizoi se Brukseli mbetet një qendër jetike për Kosovën, duke ritheksuar se anëtarësimi në Bashkimin Evropian është prioritet strategjik.

Ai kërkoi avancimin e procesit përmes marrjes së statusit të shtetit kandidat, ndërsa konfirmoi përkushtimin e plotë të Republikës së Kosovës për anëtarësim në Këshillin e Evropës dhe në NATO.

Continue Reading

Aktualitet

Konjufca: Dialogu në krizë – Pa burgosjen e terroristëve të Banjskës dhe njohjen e integritetit s’ka mirëbesim

Published

9 hours ago

on

April 16, 2026

By

Kryeparlamentari Glauk Konjufca ka deklaruar se procesi i dialogut me Serbinë ndodhet në një pikë kritike dhe se pa drejtësi për sulmet terroriste e pa respektim të shtetësisë, nuk mund të ketë përparim. Gjatë një konference për media, ai theksoi se Serbia ka treguar sjellje destruktive që synon rrënimin e çdo arritjeje të deritanishme.

Sipas Konjufcës, parakushti kryesor për kthimin e mirëbesimit është ndëshkimi i personave që organizuan sulmin në Banjskë.

“Qysh kthehet një farë lloj atmosfere minimale e mirëbesimit? Minimale e mirëbesimit është që kryesit e këtij akti terrorist në Banjskë, të cilët e vranë Afrim Bunjakun, duhet të përfundojnë në burg. Këta nuk mund të jenë njerëz kryesorë në Serbi edhe dora e djathtë e Vuçiqit qysh janë sot”, tha ai.

Ai gjithashtu u ndal te përfshirja e drejtpërdrejtë e shtetit serb në destabilizimin e Kosovës, duke përmendur dëshmitë e fundit nga proceset gjyqësore për sulmet në kanalin e Ibër-Lepencit:

“Ata e kanë pranuar që janë trajnuar prej Serbisë, në hapësirat e Ministrisë së Mbrojtjes edhe të ushtrisë që mbahen atje… Unë nuk e di çka ka nevojë më shumë për me tregu rolin destruktiv të Serbisë”, shprehet Konjufca.

Për fund, Konjufca e cilësoi letrën e ish-kryeministres serbe, Ana Bërnabiq, si një goditje të rëndë për integritetin territorial të vendit, duke e krahasuar atë me një akt armiqësor.

“Letra e zonjës Bërnabiq ishte katastrofike për mirëbesimin. Ju shkroi 27 shteteve anëtare që nuk e njeh integritetin territorial të Kosovës. Mos me njoh integritetin territorial të një shteti, kjo kuptohet gati si një shpallje lufte.”

Continue Reading

Vendi

MINT gjobit KEDS-in edhe me 30 mijë euro për njehsorë me afat të skaduar

Published

10 hours ago

on

April 16, 2026

By

Ministria e Industrisë, Ndërmarrësisë dhe Tregtisë (MINT) ka gjobitur KEDS-in me 30,000 euro, pasi u identifikuan gjashtë njehsorë elektrikë me afat të skaduar verifikimi.

Gjatë kontrolleve në terren, Agjencia e Metrologjisë ka konstatuar pasaktësi në regjistrimin e orës dhe datës në këta njehsorë.

Si rrjedhojë, MINT ka kërkuar zyrtarisht nga KESCO kompensimin e konsumatorëve të dëmtuar.

Për këtë rast është njoftuar edhe Prokuroria, ndërsa komisionet po vazhdojnë inspektimet në të gjithë Kosovën për të identifikuar parregullsi të tjera.

Continue Reading

Lajmet

Tre të vdekur në Malishevë, në mesin e tyre dy fëmijë

Published

11 hours ago

on

April 16, 2026

By

Një burrë dhe dy fëmijë kanë vdekur në lagjen “Mirdita”, në Malishevë, pas një zjarri në një banesë.

Lajmin për Ekonomia Online e ka konfirmuar zëdhënësi i Policisë për Rajonin e Gjakovës, Sheremet Elezaj.

“Sot, rreth orës 12:55, jemi njoftuar për një incident zjarri në një banesë në lagjen “Mirëdita”, në Malishevë. Menjëherë pas pranimit të informacionit, në vendin e ngjarjes kanë dalë njësitë kompetente policore, zjarrfikësit dhe ekipet emergjente.

Në këtë banesë janë gjetur tre persona të gjinisë mashkullore (një i rritur dhe dy fëmijë), të cilët janë dërguar në Qendrën e Mjekësisë Familjare në Malishevë ku është konstatuar se të njëjtit ishin pa shenja jete. Zjarri është lokalizuar dhe nuk është raportuar për pasoja të tjera”, ka thënë ai.

Sipas Elezajt, lidhur me rastin është njoftuar edhe prokurori i shtetit dhe aktualisht janë duke u ndërmarrë të gjitha veprimet e nevojshme hetimore për të sqaruar rrethanat dhe shkaqet e kësaj ngjarjeje./ Ekonomia online/

Continue Reading

Të kërkuara