Shefi i Zyrës së BE-së, Tomas Szunyog, ka njoftuar se ka marrë një letër nga një grup qytetarësh, të cilët kanë marrë urdhra për dëbim në fund të muajit maj dhe kanë kërkuar ndihmë nga Zyra e BE-së dhe EULEX-i.

Përmes pltaformës ‘X’, Szunyog, bëri të ditur se ka shprehur gatishmërinë për të lehtësuar një seancë informuese me Agjencinë për Krahasimin dhe Verifikimin e Pronës në Kosovë dhe personat e prekur.

Sipas tij, ky sesion do të ofronte një mundësi për të diskutuar rastet individuale dhe për të identifikuar zgjidhjet e duhura për banorët e prekur.

“Përderisa këto raste janë gjykuar me vendime të formës së prerë që janë të detyrueshme dhe ligjërisht të zbatueshme, ekipi im është angazhuar me KPCVA për të siguruar që çdo rast të trajtohet në përputhje me standardet evropiane në fuqi në mënyrë që të gjithë të interesuarve t’u sigurohen zgjidhje konkrete për strehim”, ka shkruar Szunyog në ‘X’.

Me rastin e 34-vjetorit të okupimit të Radio Televizionit të Prishtinës (RTP), është mbajtur konferencë për media, me ç’rast u evokuan kujtime dhe sfidat e asaj kohe nën pushtimin serb.

Aty u tha se RTP ishte i vetmi burim informacioni dhe se tendencat e Serbisë ishin ta mbanin shqiptarët në terr informacioni.

Ish-drejtori i produksionit të edicionit të lajmeve Qemail Sokoli ka treguar sfidat e mbijetesës së këtij televizioni në kohën kur kanë qenë pushtuesit serbë në Kosovë.

“Me 5 shkurt te vitit 1945, ne Prizren është themeluar radiostacioni i parë profesional me program të rregullt ditor në gjuhën shqipe, dhe në atë serbe – Radio Prizreni. Ishte ky, një sukses i madh i shoqërisë sonë të atëhershme në lëmin radiodivizive. E, me kalimin e administratës në Prishtinë, nga vjeshta e vitit 1946, funksionon si Radio Prishtina (RP). Zhvillimi i Radio Prishtinës ka shkuar krahas zhvillimit të kërkesave të shoqërisë sonë, dhe bëhet pjesë e pandashme e jetës dhe e gjenesise sonë. Pas, mposhtjes të forcave shoviniste serbomadhe në Plenumin e IV të Brioneve, në vitin 1996 krijohen kushtet e favorshme politiko-shoqërore për ne. Ashtu që, me 26 nëntor, nga studentët e Televizionit te Beogradit, për herë të parë ekrani televiziv foli – shqip”, tha ai.

Kurse ish-redaktori i emisionit “Ditari”, Enver Maloku ka thënë se qëllimi i okupuesit ka qenë që të mbyllet televizioni dhe të jetë në terrin informativë. Mirëpo sipas tij, u gjetën mënyra alternative për ta vazhduar.

“Qëllimi ishte se ne ishim i vetmi burim informativ ishte Radio Televizioni i Prishtinës, i besohej vetëm këtij televizioni. Qëllimi ishte ta pengojë të vërtetën. Por në kohën e okupimit u mbyll televizioni, mirëpo u gjetën alternative që të tregohet e vërteta sepse qëllimi i pushtuesit ishte të mbretërojë terri informativ”, tha Maloku.

Instituti i Kosovës për Drejtësi (IKD), sot ka publikuar raportin “Gjykimi brenda afatit të arsyeshëm”, (Problemet kushtetuese të Projektligjit për Realizimin e të Drejtës për Gjykim brenda një Afati të Arsyeshëm Kohor).

Në një konferencë për media u tha se përkundër qëllimit legjitim të Projektligjit për të adresuar çështjen e gjykimit brenda një afati të arsyeshëm kohor, përmbajtja e projektligjit nuk e adreson këtë çështje, madje, ky projektligj, me këtë përmbajtje, rrezikon që më tepër të krijojë kaos në sistemin gjyqësor.

Sipas hulumtuesit të lartë të IKD-së, Gzim Shala, projektligji që synon të rregullojë të drejtën për qytetarët për një gjykim në kohë të arsyeshme ka shumë probleme. Ai tha se në gjykatat themelore mbetën 112 mijë e 623 lëndë të pazgjidhura.

Sipas tij, një kohëzgjatje jo e arsyeshme cenon një prej kompetenteve kyçe të gjykimit të drejtë, e që është gjykimi brenda një afati të arsyeshëm kohor, për të cilën tha se IKD në vazhdimësi ka ngritur si shqetësim.

“Qeveria e Kosovës duhet të ndërmarrë masa për ta kthyer gjyqësorin në binarë. Kuptohet, masat në asnjë rrethanë nuk duhet të tejkalojnë kompetencat e Qeverisë dhe të ndërhyjnë në punën e institucioneve të sistemit të drejtësisë”, tha Shala.

Shala tha se neni 5 i Projektligjit ka përcaktuar se në gjykimin në shkallën e parë, përfundimi i procesit të kryhet brenda tri vjetëve nga fillimi i tij, në shkallë të dytë brenda 2 dhe në hetimin e veprave penale vlen afati maksimal i paraparë në Kodin e Procedurës Penale.

Sipas Shalës, përcaktimi i këtyre afateve si kritere për përllogaritjen e afatit të arsyeshëm kohor, është në kundërshtim të hapur me standardet e vendosura nga GjEDNj në lidhje me gjykimin brenda një afati të arsyeshëm kohor.

Shala tha se caktimi i afatit që një çështje të kryhet brenda pesë vjetësh në shkallë të parë dhe të dytë nuk është afat i arsyeshëm kohor, pasi në Ligjin për Procedurën Kontestimore dhe Kodin e Procedurës Penale, afatet janë shumë më të shkurta.

Sipas tij, ka mundësi që ky “dështim” të ketë ardhur si rezultat i rrethanave objektive, për shembull mbingarkesës së tij me lëndë, kompleksitetit të çështjes, mos përgjigjes adekuate nga ana e institucioneve të tjera, e rrethana tjera.

Veç kësaj, Shala theksoi edhe një cenim tjetër në projektligj, e që është moslejim i ankesës ndaj vendimit të kryetarit të gjykatës.

IKD gjatë kësaj konference i ka rekomanduar Ministrisë së Drejtësisë që të bëjë rishikimin e dispozitave ligjore.

Presidenti i Serbisë, Aleksandër Vuçiq duke komentuar opinionin e kryeministrit të Kosovës, Albin Kurti në lidhje me armatosjen e Serbisë dhe afërsinë me Rusinë, ka thënë se Serbia do të vazhdojë të armatosur si shenjë parandaluese ndaj tipave agresiv siç është Albin Kurti dhe disa të tjerë.

Aleksandër Vuçiq tha se Kurti vuan që ta vesh uniformën dhe të aktrojë si një Zelenskiy i vogël në Ballkanin Perendimor.

“Tani ati besoj Albin Kurtit ose këtyre tjerëve apo gënjejnë të dy parët, nëse ne po armatosemi, po pak ma shumë se sa do të donte ai, shumë më pak se sa do të doja unë, ashtu siç armatosen ata, përkatësisht i armatosin nga Turqit përmes gjermanëve deri te amerikanët, shumë më tepër se sa më pëlqen mua, shumë më pak se sa do të donte ai, dhe marrëzitë e tij se kush do luftë, ai është i vetmi që do luftë, pasi gjithë jetën vuan ta veshë uniformën dhe të aktrojë si një Zelenskiy i vogël në Ballkan, por kjo dëshirë nuk do t’i realizohet këtë, meqenëse ai nuk ka lidhje me territorin sovran dhe territorin e pavarur. Ukraina, është një territor i njohur ndërkombëtarishtë, ata nuk janë kështu që ai të mund të vuaj për luftëra, ëndrrat tona janë të ndryshme, ëndrrat e tij janë lufta, ndërsa ëndrrat janë Serbia e suksesshme ekonomikisht e avancuar, Serbia e cila do të jetë bindshëm më e zhvilluara në këtë pjesë të Evropës, dhe ëndrrat tona janë aq të ndryshme sa nuk mund të krahasohen. A do të investojë Serbia në industrinë e saj sigurisht që po, a do të blejë Serbia gjithçka që i nevojitet po natyrisht për të pasur një faktorë parandalues ndaj tipave agresiv si është Albin Kurti dhe disa të tjerë”, tha ai.

Kurti në një opinion të publikuar sot në New York Times, i cili kryesisht i referohej NATO-s, ndër të tjera ka shkruar se edhe pse demokracia e Kosovës është në rritje, kërcënimet ndaj sigurisë së saj janë gjithashtu në rritje.

“Në shtator, trupat paraushtarake serbe të armatosura rëndë, të cilat ne besojmë se vinin nga Serbia, zunë pozicione në Manastirin Ortodoks të Banjskës, në atë që qeveria e SHBA e quajti një përpjekje shumë të organizuar që përfshinte armë të sofistikuara. Forcat ushtarake serbe u mobilizuan pranë kufirit tonë, një veprim i kritikuar nga Shtetet e Bashkuara si “destabilizues”. Vitin e kaluar NATO rriti trupat e saj nga 3,770 në rreth 4,500 mes kërcënimeve në rritje ndaj paqes. Sfidat politike mbeten gjithashtu. Në vitin 2017, Aleksandar Vuçiq, një ish-ministër i propagandës nën udhëheqjen e Millosheviçit, u bë president i Serbisë. Ngritja e tij shënoi një kthim në politikën autoritare, etnonacionaliste të Millosheviçit, veçanërisht në llojin ekspansionist. Politika autoritare e Beogradit ua vështirësoi veçanërisht jetën serbëve etnikë në Kosovë. Atyre iu desh të luanin rolin e tyre si pakicë në një vend të ri me një popullsi prej përafërsisht 93 përqind shqiptarë etnikë dhe 7 përqind të përbërë nga pakica të tjera, duke përfshirë romët dhe turqit. Serbia e ka penguar këtë integrim. U desh trimëri që serbët etnikë t’i bashkoheshin institucioneve dhe të bëheshin pjesëmarrës aktivë në vend”, ka shkruar kryeministri Albin Kurti.

Sipas Kurtit, një front i ri në Ballkan do t’i shërbente Rusisë po aq sa Serbisë.

“Serbia mund të përpiqet të fitojë territor përmes agresionit dhe Rusia mund të fitojë një kontroll më të fortë ndaj Serbisë si një satelit, përveçse të shpërqendrojë botën nga lufta që po bën në Ukrainë. Nën drejtimin e Vuçiqit, Serbia ka investuar shumë në bashkëpunimin e saj ushtarak me Rusinë. Një raport i vitit 2019 nga Departamenti i Mbrojtjes i SHBA-së arriti në përfundimin se “Serbia ofron mjedisin më lejues për ndikimin rus në Ballkanin Perëndimor”. Kosova, përkundrazi, nuk mund të ofronte një mjedis më pak lejues. Ne kemi mbetur pro-perëndimorë të vendosur”, ka shkruar kryeministri Albin Kurti.