Studentët nga Nishi, Novi Sadi dhe Beogradi, të cilët kanë bllokuar fakultetet për dy muaj, kanë nisur një marshim në këmbë drejt Kragujevcit, ku do të mbahet një protestë të shtunën, më 15 shkurt. Kjo veprimtari është pjesë e lëvizjes për të kërkuar përmirësime në arsim dhe kundërshtuar politikat aktuale të arsimit të lartë.

Për të arritur në mitingun që do të mbahet në Kragujevc, studentët nga Nishi do të përshkojnë një distancë prej 151 kilometrash, ndërsa sot do të kalojnë një udhëtim prej 32 kilometrash, deri në Aleksinac, ku do të kalojnë natën dhe do të vazhdojnë marshimin e tyre nesër. Aktiviteti ka shkaktuar shumë reagime dhe mbështetje nga qytetarët, që shprehin solidaritet me studentët për kauzën e tyre./UBTNews/

Instituti Demokratik i Kosovës (KDI) ka njoftuar se Kosova ka shënuar një ngritje të rëndësishme në Indeksin e Perceptimit të Korrupsionit (CPI) për vitin 2024, të publikuar nga Transparency International. Sipas këtij indeksi, Kosova renditet e 73-ta në ranglistën botërore, duke arritur 44 pikë, dhe është e dyta në Ballkanin Perëndimor pas Malit të Zi.

Në këtë raport, ku përfshihen 180 shtete të botës, Kosova është para Shqipërisë, Maqedonisë së Veriut, Serbisë dhe Bosnjë-Hercegovinës, duke treguar një përparim në luftën kundër korrupsionit. Sidoqoftë, rajoni i Evropës Juglindore dhe Azisë Qendrore, ku bën pjesë edhe Kosova, ka mesataren më të ulët të rezultateve në botë, kryesisht për shkak të problemeve të theksuara me sundimin e ligjit, autokracinë në rritje, cenimin e mediave të lira dhe institucionet e dobëta demokratike.

Indeksi është hartuar bazuar në raporte kredibile të organizatave ndërkombëtare si Banka Botërore, Freedom House, World Justice Project dhe Bertelsmann Foundation Transformation Index, shumica e të cilave janë publikuar në vitin 2023. KDI ka kërkuar që luftimi i korrupsionit të jetë një prioritet për institucionet e reja qeverisëse pas zgjedhjeve të fundit dhe të udhëhiqet nga një strategji kombëtare e efektshme.

Në një deklaratë, KDI kërkon që lufta kundër korrupsionit të shoqërohet me resurse të mjaftueshme financiare dhe të përmirësohet llogaridhënia dhe transparenca në sektorin publik, për të parandaluar shpërdorimin e resurseve publike dhe praktikat e nepotizmit dhe disbalancave të pushtetit./UBTNews/

Komisioni Qendror i Zgjedhjeve (KQZ) ka bërë të ditur se 80.1 për qind e pjesëtarëve të diasporës kanë votuar për zgjedhjet parlamentare të 9 shkurtit.

Zëdhënësi i KQZ-së, Valmir Elezi, ka thënë të martën se në përfaqësitë diplomatike kanë votuar 15.352 qytetarë, ndërsa me postë 68.712.

Megjithatë, ai ka tërhequr vërejtjen që kjo përqindje mund të ndryshojë, pas procesit të vlerësimit të votave që janë pranuar me postë.

Mbi 2 milionë shtetas të Kosovës kanë pasur të drejtë të votojnë në zgjedhjet parlamentare të këtij viti. Në mesin e tyre kanë qenë edhe 104.924 votues nga diaspora.

Ky ka qenë procesi i parë zgjedhor kur pjesëtarëve të diasporës u është mundësuar votimi në 19 përfaqësi diplomatike në gjithë botën.

Elezi ka thënë se numërimi i votave nga diaspora do të nisë të bëhet pas disa ditësh në Qendrën e Numërimit dhe të Rezultateve.

Sipas rezultateve preliminare, pas numërimit të mbi 90 për qind të votave, partia në pushtet, Lëvizja Vetëvendosje ka fituar mbi 40 për të votave, e përcjellë nga Partia Demokratike e Kosovës me rreth 22 për qind të votave, Lidhja Demokratike e Kosovës me rreth 17 për qind të votave, dhe koalicioni mes Aleancës për Ardhmërinë e Kosovës dhe Nismës Socialdemokrate, rreth 7 për qind të votave.

Zyra e Kryeprokurorit të Shtetit ka njoftuar se Prokuroria Themelore në Prishtinë dje ka kërkuar marrjen e informatave nga KQZ për të vërtetuar nëse ka elemente të ndonjë vepre penale lidhur me mosfunksionimin e uebfaqes së KQZ-së.

“Zyra e Kryeprokurorit të Shtetit informon opinionin publik se Prokuroria Themelore në Prishtinë, gjatë ditës së djeshme, pasi ka pranuar informacion rreth mos-funksionimit të platformës së KQZ-së, ka kërkuar nga ky institucion marrjen e informatave të nevojshme për të vërtetuar nëse ka elemente kryerjes së ndonjë vepre penale apo jo.”

Paraprakisht, Prokuroria Themelore në Prishtinë në një përgjigje për mediat ka njoftuar se në bashkëpunim me institucionet kompetente, të ndërmarrë veprime hetimore lidhur me çdo abuzim apo keqpërdorim të votave, pas rënies së ueb faqes së Komisionit Qendror të Zgjedhjeve (KQZ) ditën e diel.

“Lidhur me pyetjen tuaj ju informojmë se Prokuroria Themelore në Prishtinë ka autorizuar që Policia e Kosovës, në bashkëpunim dhe koordinim me institucionet kompetente, të ndërmarrë veprime apo masa hetimore për secilin abuzim apo keqpërdorim të votave pas rënies së uebfaqes së KQZ-së,” është thënë në përgjigjen e Prokurorisë.

Natën kur sy e veshë ishin te Komisioni Qendror i Zgjedhjeve në Kosovë, platforma online e këtij institucioni doli nga sistemi për orë të tëra.

Ndërprerja shkaktoi konfuzion te publiku që priste publikimin e rezultatit të zgjedhjeve parlamentare të 9 shkurtit, edhe pse zyrtarët e KQZ-së siguruan se mbledhja manuale e të dhënave, nuk do të ketë ndikim në rezultat.

Gjatë ditës së djeshme, kompania përgjegjëse për paraqitjen e rezultateve të zgjedhjeve në faqen e Komisionit Qendror Zgjedhor, CACTTUS sh.a, ka thënë se faqja e KQZ gjatë ditës së dielës është përballur me sulme kibernetike.

Në deklaratën e tyre kjo kompani fajet i ka hedhur mbi KQZ-në. Nga kjo kompani thanë që problemi ishte i lidhur me infrastrukturën që mbështeste faqen e internetit të qasshme dhe jo me logjikën themelore të aplikacionit të votimit të zhvilluar nga ta.