Katër ditë pas përfundimit të zgjedhjeve lokale, Komisioni Qendror i Zgjedhjeve (KQZ), ka tërhequr mbi 13 mijë pako të supozuara me fletëvotime, të cilat i takojnë votimit me postë, për raundin e dytë të zgjedhjeve për kryetarë të 18 komunave.

Ndërkohë, të enjten në mesditë ka filluar edhe procesi i vlerësimit dhe verifikimit të tyre.

Zëdhënësi i KQZ-së, Valmir Elezi, ka bërë të ditur për KosovaPress se këto 13 mijë pako, u përkasin votuesve nga 22 shtete të ndryshme të botës, raporton KosovaPress.

“Gjatë ditës së martë dhe të mërkurë, nga kutitë postare të KQZ-së në 22 shtete të ndryshme të botës, është bërë tërheqja e më shumë se 13 mijë pakove të supozuara me fletëvotime, të cilat i takojnë votimit me postë jashtë Kosovës në raundin e dytë të zgjedhjeve për Kryetarë të 18 komunave”, tha Elezi.

Elezi ka thënë se të enjten në mesditë, para numërimit të fletëvotimeve nga votimi jashtë vendit, ka filluar edhe procesi i vlerësimit dhe verifikimit të tyre, që ka për qëllim të vërtetojë nëse këto pako janë dërguar nga shtetasit e Kosovës që janë të regjistruar si votues jashtë Kosovës.

“Para numërimit të fletëvotimeve nga votimi jashtë vendit, të enjten në mesditë ka filluar procesi i vlerësimit dhe verifikimit i tyre, që ka për qëllim të vërtetojë nëse këto pako janë dërguar nga shtetasit e Kosovës që janë të regjistruar si votues jashtë Kosovës. Pra, procesit të vlerësimit do t’i nënshtrohen 13 mijë pako dhe në fund do të kemi më shumë detaje lidhur më këtë proces”, tha Elezi.

KQZ i referohet këtyre pakove si “pako të supozuara me fletëvotime” pasi në këtë fazë nuk mund të dihet me saktësi nëse brenda tyre ka fletëvotime dhe nëse të njëjtat janë dorëzuar nga votuesit e regjistruar.

Gjatë periudhës së regjistrimit 23 korrik – 29 gusht 2025, numri i shtetasve të regjistruar për të votuar përmes postës në raundin e dytë të zgjedhjeve ishte 29 mijë e 725.

Me 9 nëntor është mbajtur raundi i dytë i zgjedhjeve për kryetarë të 18 komunave në Kosovë, ku qytetarë me të drejtë vote ishin 1 milion e 316 mijë e 672, ndërkaq 432 mijë e 107 qytetarë apo 32.82 për qind e shfrytëzuan të drejtën e votës.

Pas numërimit të votave jashtë Kosovës, do të numërohen edhe ato me nevoja të veçanta dhe votat me kusht./KP

Ndeshja mes Sllovenisë dhe Kosovës pritet të ketë një atmosferë e zjarrtë në stadiumin “Stožice”, ku sipas portalit sportiv slloven “Sport-TV”, të gjitha biletat për këtë ndeshje janë shitur, duke e bërë takimin tërësisht të ezauruar.

Ky interes i lartë tregon rëndësinë e madhe që ka kjo përballje për tifozët sllovenë, të cilët do të mbushin stadiumin për të përkrahur kombëtaren e tyre në duelin e rëndësishëm të kualifikimeve për Kupën e Botës 2026.

Përfaqësuesja e Kosovës, nga ana tjetër, pritet të ketë mbështetje të fortë edhe nga tifozët “Dardanë” që do të udhëtojnë drejt Ljubljanës për të ndjekur ndeshjen.

Sllovenia e pret Kosovën në një sfidë vendimtare për ecurinë në grup, ndërsa atmosfera në kryeqytetin slloven pritet të jetë elektrizuese.

Kjo ndeshje do të zhvillohet më 15 nëntor me fillim nga ora 20:45 dhe Kosova me një barazim do ta siguronte fazën e playoff-it të Botërorit 2026./S.K/KP/

Roberto Mancini është trajneri i ri i Al Sadd i cili u lidh edhe me pozicionin e Juventusit që do të fillojë një përvojë të re në krye të klubit të Katarit. Ai synon kualifikimin në finalet e Ligës së Kampionëve të Azisë dhe rikthimin e një trofeu që i ka munguar për gati pesëmbëdhjetë vjet.

Marrëveshja midis palëve është e vlefshme për dy vjet e gjysmë me një pagë neto prej rreth 5 milionë eurosh.

Stafi i Mancinit do të përfshijë gjithashtu dy veteranë të Serie A: ish-lojtarin e Empolit, Maccarone, dhe Cesar, një ish-mbrojtës të Interit dhe Lazios.

Mancini do të trajnojë në Katar pasi priti një rikthim në Itali, gjë që dështoi pavarësisht shkarkimeve të Tudor dhe Juric nga Juventus dhe Atalanta.

Në javët e fundit, është folur edhe për një zgjidhje të mundshme në Premier League, me Nottingham Forest që thuhet se është përpjekur pa sukses ta bindë ish-trajnerin italian./S.K/KP/

Edhe 11 bileta të tjera për Kupën e Botës 2026 do të shpërndahen duke filluar nga sonte, ku 12 ekipe do të kualifikohen për play-off-et e marsit, por përveç Malit të Zi.

Kosova luan të shtunën ndeshjen e parafundit kualifikuese kundër Sllovenisë, të cilën kombëtarja jonë synon ta fitojë në mënyrë që të sigurojë vendin e dytë në grup që e çon në play-off.

“Dardanët” aktualisht janë në vendin e dytë me 7 pikë, 3 më pak se Zvicra në vendin e parë me të cilën Kosova luan të martën.

Sllovenia ndërkaq është në vendin e tretë me 3 pikë. Suedia në të fundit me vetëm 1 pikë nga katër ndeshje të zhvilluara. Në këtë grup, beteja është e tëra e hapur.

Mali i Zi është më i ulët për momentin në rajon pasi do do të ulë perden e kualifikimeve katastrofike me ndeshjet kundër Gjibraltarit (nesër në orën 20:45) dhe Kroacisë të hënën. Ajo që është edhe më zhgënjyese është se “Skifterët” e dinin edhe para ndeshjeve të tetorit se nuk kishin më asgjë për të luftuar.

Gjashtë pikë nga gjashtë ndeshje dhe asnjë triumf që nga marsi ndoshta ilustrojnë më së miri se si luajti Mali i Zi në kualifikueset dhe sa shumë punë do të duhet bërë për të ndryshuar gjithçka në të ardhmen.

Dhe ndërsa “skifterët” tashmë janë matematikisht jashtë garës, të gjitha skuadrat tjera të ish-Jugosllavisë, plus Shqipëria, ende mund të luftojnë për një biletë.

Nga rajoni, Kroacia tashmë praktikisht e ka siguruar pjesëmarrjen në Kupën e Botës, teksa të tjerat janë nëpër faza të ndryshme.

Maqedonia e Veriut do të luajë ndeshjen vendimtare të martën në Cardiff kundër Uellsit, me të cilin ka tre pikë më shumë, por edhe një ndeshje më shumë, kështu që një barazim në Ishull ndoshta do t’i mjaftojë për t’u kualifikuar në fazën eliminatore. Në atë grup,

Belgjika duhet të konfirmojë vendin e saj në Kupën e Botës me fitoret ndaj Kazakistanit dhe Lihtenshtajnit.

Shqipëria bëri një hap të madh drejt fazës eliminatore në tetor, duke mposhtur Serbinë në Leskovc, dhe tani ka një pikë më shumë se Serbia, e cila shpreson se me trajnerin e ri Velko Paunoviq mund të bëjë një mrekulli në fund të kualifikimeve.

Të dyja ekipet presin ndeshje me një Angli të relaksuar (serbët në Wembley, shqiptarët në Tiranë), dhe përveç kësaj, ndeshje në shtëpi kundër Letonisë dhe Andorrës.

Kosova është një hap larg një mrekullie, por do të duhet të përballet në betejë me një tjetër anëtar të ish-Jugosllavisë – Slloveninë./S.K/EO/