Lamine Yamal ka folur pas barazimit 3-3 të Barcelonës ndaj Club Brugge në Ligën e Kampionëve, ku shënoi një gol dhe detyroi një autogol për katalanasit.

“Ne jemi Barça dhe gjithmonë duhet të fitojmë. Është e vështirë të fitosh kur pranon tre gola. Kjo është ajo që duhet të përmirësojmë”, tha Yamal pas ndeshjes.

Sulmuesi 18-vjeçar u shpreh i kënaqur me performancën e tij, por i zhgënjyer që skuadra nuk mori fitoren: “U përpoqa të jepja më të mirën. Ishte një lojë e shpejtë, por më vjen keq që nuk fituam. Shpresojmë ta bëjmë herën tjetër.”

Yamal hodhi poshtë zërat për problemet me dëmtimin: “Është folur shumë për pubalgjinë time, por të gjitha ishin gënjeshtra. Po përpiqem të kthehem në formë dhe të shijoj futbollin.”

I pyetur për krahasimet me Lionel Messin, ai u përgjigj me modesti se Messi ka shënuar mijëra gola si ai.

“Messi ka shënuar mijëra gola si ky, nuk mund të krahasohem me të. Dua vetëm të përmirësohem dhe të ec përpara.” tha Yamal.

Barcelona do të përballet tani me Celtën në La Liga përpara pauzës ndërkombëtare, ndërsa pritet që Yamal të grumbullohet nga Kombëtarja e Spanjës./S.K/KP/

Kampionia e Kosovës në basketboll, Trepça, humbi në rezultat shumë të ngushtë në përballjen me PAOK-un grek.

Në momentet e fundit, mitrovicasit nuk ia dolën dhe dueli u mbyll me rezultat 75-77.

Skuadra kosovare nuk ka fituar asnjë duel në edicionin e sivjetshëm të FIBA Europe Cup deri tani, ndërsa nga ana tjetër, grekët kanë pasur dy fitore e një humbje./S.K/KP/

Chelsea pati një kohë të vështirë në Ligën e Kampionëve kundër Karabakh Agdam në Baku dhe arriti të barazojë me rezultat 2:2.

Ndaj kampionëve azerbajxhanas Karabakh Agdam, të cilët kishin arritur në fazën e ligës së Ligës së Kampionëve vetëm nëpërmjet kualifikimit, të kaltrit me vështirësi arritën një barazim.

Estevao solli Chelsea në epërsinë pas 16 minutash. Leandro Andrade barazoi shifrat në minutën e 29-të, ndërsa Marko Jankoviq në minutën 39 nga penalltia solli vendësit në epërsi të papritur.

Alejandro Garnacho, i cili hyri në fushë në pjesën e parë, barazoi për ekipin e Premier Ligës, në minutën e 52-të.

Pafos nga Qipro ka fituar ndeshjen e tyre të parë në Ligën e Kampionëve ndaj Villareal të Spanjës me rezultatin 1:0. Autor i golit të fitores ishte Derrick Luckassen në minutën e 46-të./S.K/KP/

Milani dhe Interi kanë konfirmuar zyrtarisht blerjen e kompleksit të San Siros, që përfshin stadiumin “Giuseppe Meazza” dhe zonën përreth tij. Marrëveshja u finalizua sot pas miratimit nga Këshilli i Qytetit të Milanos në muajin shtator.

Në një deklaratë të përbashkët, klubet thanë se ky është “një hap historik dhe strategjik që shënon fillimin e një kapitulli të ri për qytetin e Milanos dhe për të dy klubet”.

Projekti i ri, i cili do të udhëhiqet nga studiot arkitekturore Foster + Partners dhe MANICA, parashikon ndërtimin e një stadiumi modern me standarde ndërkombëtare dhe rigjenerimin urban të zonës San Siro.

Financimi i marrëveshjes u mundësua nga bankat ndërkombëtare Goldman Sachs dhe JP Morgan, së bashku me Banco BPM dhe BPER Banca.

Ky zhvillim pritet të hapë rrugën për ndërtimin e një stadiumi të ri që do të bëhet simbol i ri i qytetit të Milanos dhe i futbollit italian./KP