Denise Richards ka dëshmuar në gjykatë kundër ish-bashkëshortit të saj, Aaron Phypers, gjatë një seance dëgjimore që lidhej me urdhrin e përkohshëm të mbrojtjes që ajo kishte kërkuar ndaj tij.

Gjatë dëshmisë, ajo foli për abuzimin e dyshuar gjatë martesës, duke deklaruar me lot në sy se Phypers shpesh e kishte kërcënuar me jetë.

“Ai më thoshte se do të më hidhte nga dritarja ose nga ballkoni i hotelit. Ai gati sa nuk më vrau,” tha ajo.

Richards shpjegoi rrethanat që çuan në ndarje, duke treguar se gjithçka kishte nisur pasi i kërkoi Phypers të largohej nga shtëpia.

“Ai u zemërua, ishte i paqëndrueshëm. Sapo isha shëruar nga një lifting i fytyrës e kisha ende qepje pas veshëve. Ai më kapi për krahësh, më bërtiti dhe më ofendoi, duke më quajtur ‘mashtruese dhe gënjeshtare’,” dëshmoi aktorja.

Sipas Richards, situata u keqësua ditën pas incidentit, kur Phypers dhe babai i tij hynë në dhomën ku ajo po flinte dhe e kërcënuan se do të publikonin foto nudo të saj.

Ajo pretendon se Phypers e goditi, ndonëse ai e ka mohuar akuzën. Ajo rrëfeu disa episode tjera të dhunshme, duke thënë se ish-bashkëshorti e kishte goditur në fytyrë dhe në kokë, si dhe e kishte kërcënuar me vrasje.

Aktorja shtoi se Phypers e kishte akuzuar për tradhti, pasi pretendonte se kishte gjetur mesazhe në telefonin e saj që tregonin për një lidhje jashtëmartesore diçka që ai nuk e pranoi. /A.Z/UBT News/

Pas më shumë se dy dekadash nga fushata ikonike për Chanel No. 5, e realizuar nga regjisori Baz Luhrmann, Nicole Kidman rikthehet si ambasadore e shtëpisë së modës Chanel.

Aktorja fituese e Oscar-it do të bëjë paraqitjen e saj të parë në sfilatën debutuese të Matthieu Blazy si drejtor kreativ i Chanel, ku do të shfaqet me një këmishë të bardhë mashkullore dhe xhinse të gjera, pjesë e koleksionit shumë të pritur.

Kidman ka qenë figurë e hershme që e ktheu një sfilatë mode në një ngjarje të pop kulturës, kur mori pjesë në shfaqjen e pranverës 2005 të Chanel të organizuar nga Karl Lagerfeld.

Ajo ka mbetur pjesë e pandashme e historisë së Chanel, duke e veshur edhe në Met Gala 2023 fustanin nga fushata e vitit 2004.

Në një deklaratë për WWD, Kidman u shpreh: “Jam e emocionuar që po bashkohem sërish me Chanel, këtë herë nën vizionin e Matthieu Blazy. Chanel ka ditur gjithmonë si të nderojë gratë me inteligjencë dhe elegancë.”

Ndërsa Blazy, i cili më parë e ka veshur aktoren gjatë kohës së tij te Bottega Veneta, shtoi: “Nicole është mishërimi i gruas Chanel, e lirë dhe gjithmonë në ndryshim. Është një ëndërr të punoj sërish me të.”

Presidenti Bruno Pavlovsky, theksoi se marka synon të prezantojë fytyra të reja, pa lënë pas ambasadorët e saj besnikë. /A.Z/UBT News/

Ke Turner Jr., djali i legjendarëve të muzikës Tina dhe Ike Turner, ka ndërruar jetë në moshën 67-vjeçare, vetëm një ditë pas ditëlindjes së tij.

Lajmin e konfirmoi kushërira e tij, Jacqueline Bullock, për TMZ, duke treguar se Ike Jr. ndërroi jetë në një spital në Los Angeles si pasojë e dëmtimit të veshkave.

“Me hidhërim të madh njoftojmë ndarjen nga jeta të kushëririt tim, Ike Turner Jr.,” tha Bullock për “Page Six”.

Ajo shtoi se ai ishte më shumë se një kushëri për të, një vëlla me të cilin rritën së bashku në familjen e famshme Turner. Bullock zbuloi se shëndeti i Ike Jr. ishte përkeqësuar vitet e fundit për shkak të problemeve me zemrën dhe një goditjeje në tru muajin e kaluar.

Kunata e tij, Afida Turner, bëri homazh për të në Instagram: “Pusho në paqe, Ike Jr. Ishe i mrekullueshëm, kunat. Jam e lumtur që fola me ty në telefon para se të ikje. Të dua, u prehtë në paqe.”

Ike Jr. ishte një nga dy djemtë e adoptuar të Tinës nga lidhja me Ike Turner dhe ndjeki hapat e prindërve në muzikë si pjesë e grupit tribut The Love Thang Band, me vokalisten Sweet Randi Love.

Ai fitoi një çmim Grammy për punën në albumin e vitit 2006, “Risin’ With The Blues”, që fitoi kategorinë për Albumin më të Mirë Tradicional të Bluesit.

Tina dhe Ike rritën katër fëmijë, ndërsa Tina ishte nënë e një djali, Raymond Craig, të cilin e ka me muzikantin Raymond Hill. Ke Turner Jr. mbetet pjesë e trashëgimisë së familjes Turner, duke lënë pas talentin dhe ndikimin e tij të pashlyeshëm në muzikë. /A.Z/UBT News/

Aimee Osbourne ka folur për vitet e fundit të jetës së babait të saj, Ozzy Osbourne, gjatë një nga intervistat e saj të rralla.

Ajo u ndal veçanërisht te gjendja e tij shëndetësore, duke kujtuar rënien e parë të babait në shkurt të vitit 2019, e cila e dërgoi atë në spital dhe kërkoi një ndërhyrje kirurgjikale.

Aimee tha se traumës së babait iu shtua një plagë e vjetër nga një aksident në vitin 2003, ku ai kishte thyer qafën, gjë që e bëri shërimin më të vështirë dhe e përkeqësoi gjendjen e tij.

Ozzy po përgatitej për turneun e tij “No More Tours 2”, i cili u anulua dhe, sipas familjes, ishte “dhimbja më e madhe” për të.

Gruaja e Ozzyt, Sharon Osbourne, tha: “Pas tre muajsh e sollëm në shtëpi, por dhimbja nuk po largohej. Ishte e padurueshme.”

Aimee kujtoi se babai i saj kryente vizita të shpeshta për kontrolle mjekësore pas lëndimit dhe operacionit. Intervista e saj është pjesë e dokumentarit “Ozzy: No Escape From Now”, i cili nuk ishte menduar fillimisht si një vepër pas vdekjes së tij.

Ajo shtoi: “Ne jemi rritur duke besuar se mjekët janë disi superhero, edhe pse janë shumë të aftë, disa prej tyre nuk i kanë përgjigjet.”

Ozzy Osbourne ndërroi jetë më 22 korrik në moshën 76 vjeçare, disa javë pas performancës së tij të fundit me Black Sabbath. Dokumentari u krijua për të nderuar jetën dhe karrierën e legjendës së muzikës. /A.Z/UBT News/