Kryebashkiaku i New Yorkut, Zohran Mamdani, ka publikuar të martën një video në platformën X, në të cilën e ka quajtur kryeministrin izraelit, Benjamin Netanyahu, “kriminel lufte”.

Në video, ai ka shprehur pajtimin me qëndrimin e Gjykatës Ndërkombëtare Penale (ICC) se Netanyahu “duhet të arrestohet dhe të gjykohet”, si dhe ka treguar se administrata e tij kishte shqyrtuar mundësinë nëse qyteti i New Yorkut mund ta zbatonte urdhërarrestin e ICC-së nëse Netanyahu do të vizitonte qytetin, megjithatë, është konstatuar qartë se ata nuk e kanë autoritetin ligjor për ta zbatuar atë urdhër.

Një ditë më parë, presidenti amerikan, Donald Trump, ka deklaruar se Netanyahu nuk do të arrestohej gjatë vizitës së tij në SHBA.

Ai ia ka dhënë këtë garanci kryeministrit izraelit pasi Mamdani i kishte thënë gazetës “New York Times” se Netanyahu “e ka vendin në Hagë” dhe se ishte në “diskutime aktive” me departamentin ligjor të qytetit lidhur me mundësinë e arrestimit të tij, nëse ai do të vinte në New York për Asamblenë e Përgjithshme të OKB-së në shtator.

“Benjamin Netanyahu nuk do të arrestohet, në asnjë mënyrë apo formë, ndërsa ndodhet në Shtetet e Bashkuara të Amerikës”, ka thënë Trumpi të hënën në një postim në rrjetet sociale, ku nuk e përmendi drejtpërdrejt Mamdanin.

Gjatë fushatës së tij zgjedhore vitin e kaluar, Mamdani kishte deklaruar se do të urdhëronte policinë e qytetit të arrestonte Netanyahun në bazë të urdhërarrestit të lëshuar nga Gjykata Ndërkombëtare Penale për shkak të rolit të tij në luftën në Gaza.

Ambasadori i Izraelit në Kombet e Bashkuara, Danny Danon, e ka kritikuar të martën postimin e Mamdanit në X, duke thënë “mjaft më” dhe “ju jeni zgjedhur për t’u shërbyer banorëve të New Yorkut”. /A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Rexhep Bislimi vdiq nga torturat e organeve serbe

22 korrik 1994

“The New York Times”: Së paku 30% të popullsisë në Maqedoni janë shqiptarë

Gazeta e njohur “The New York Times” botoi këto ditë një artikull për gjendjen në ish-Republikën jugosllave të Maqedonisë. Shkrimin e vet me titull “Regjistrimi i popullsisë në Maqedoni veçsa ndez sherrin” autori Roxher Koen (Roger Cohen) e nis me konstatimin: “Në rivalitetet etnike në ish-Jugosllavi mbretëron një rregull e thjeshtë: sa më shumë njerëz që një grup etnik deklaron t’i ketë, aq më të mëdha do të jenë pretendimet për tokë dhe pushtet”.

Pasi e ilustron konstatimin me Bosnjë-Hercegovinën dhe rrezikun për luftë që bartin shifrat nga regjistrimet e popullsisë (“Maqedonia është vend me potencial që luftën e Bosnjës ta bëjë të duket veçse nxemje”), autori vë re se loja e numrave etnikë ka kohë që është egërsuar në Maqedoni: “Shqiptarët etnikë, që simbas regjistrimit të vitit 1991 përbënin 21 përqind të popullsisë, pohojnë se përfaqësojnë 40 përqind të nja dy milionë banorëve. Serbët, hiç më shumë se 4.000 simbas regjistrimit të fundit, thonë se ata në të vërtetë janë 400.000, apo rreth 20 përqind të popullatës. Maqedonët sllavë, që thonë se rrjedhin nga sllavët që janë vendosur këtu në shekullin e shtatë apo të tetë, ngulin këmbë se përbëjnë më shumë se 60 përqind të popullsisë – një pamundësi matematike po qe se pohimet e tjera janë fare të sakta. E ku janë pastaj pohimet e turqve, vllehëve, grekëve, bullgarëve, magjupëve, etj.”.

Gazeta amerikane citon fjalët e Zherar Kalotit, një statistikan francez që është angazhuar në punë të regjistrimit të ri në Maqedoni: “Po qe se u besoni vlerësime të popujve të ndryshëm, popullsia e Maqedonisë do të ishte disa herë më e madhe se që është në të vërtetë”.

Rrethanat në vetë Maqedoninë dhe pozita e saj në mes fqinjësh armiqësorë, simbas analitikëve që “New York Times” nuk i përmend me emër, përbëjnë recetën për një luftë të përgjithshme ballkanike. Regjistrimin e popullsisë në ish-Republikën jugosllave të 0Maqedonisë autori i shkrimit e sheh si përpjekje të vendeve perëndimore për ta parandaluar shpërbërjen e kësaj republike. Mirëpo, 2.5 milionë dollarët e akorduar nga Unioni Evropian dhe Këshilli i Evropës për regjistrimin e paradokohshëm të popullsisë, simbas gazetës amerikane, nuk ndihmuan të zgjidhin grindjet. “I menduar si ndihmë për zgjidhje të grindjeve, regjistrimi në të vërtetë i ka ndezur ato. Shqiptarët dhe maqedonasit janë të zemëruar keq në mes veti në lidhje me këtë regjistrim, një parti e ndikuar nga Bullgaria ka thënë se regjistrimi qe i parregullt, dhe qeveria e Maqedonisë ka zemëruar ekspertët perëndimorë duke i pasë akuzuar ata se janë përzier në punët e tyre dhe se kanë qenë të njëanshëm”, shkruan “The New York Times”, dhe citon fjalët e një diplomati perëndimor: “Regjistrimi i popullsisë nuk do të përmbushë atë që duhej ta bënte. Ai nuk do të konstatojë shifrat njëherë e mirë”.

Gazeta pastaj përshkruan situatën në Tetovë, qendër etnike shqiptare, ku mbretëron “zemërim i ngjashëm me atë në Kosovë”. Bashkësia shqiptare që tani është e bindur se rezultatet do të jenë thellësisht të shtrembëruara, transmeton gazeta disponimin e shqiptarëve në Maqedoni, bashkë me fjalët e Menduh Thaçit (‘nënkryetar i krahut radikal të forcës kryesore politike shqiptare, Partisë për Prosperitet Demokratik’): “Regjistrimin e popullsisë e politizoi qeveria maqedone dhe ka krijuar veçse konfuzion. Përfaqësimi i shqiptarëve në komitetet për regjistrim ishte vetëm 12.8%, ndonëse ne jemi rreth 40% e popullsisë. Dikush do të dënohet për këtë, sepse Perëndimi nuk paguan mbi 2 milionë dollarë për një akt manipulimi”.

As në krahun e moderuar të PPD-së, që merr pjesë në koalicionin qeveritar në ish-Reublikën jugosllave, pakënaqësia nuk është më e vogël, vë re gazeta amerikane, dhe citon fjalët e Mersim Pollozhanit: “Ne tashmë jemi të bindur se ky regjistrim i popullsisë as nuk do të jetë i drejtë, as i saktë”.

Pasi që transmeton parashikimin e një ministri maqedon se regjistrimi do të konstatojë se shqiptarët nuk bëjnë më shumë se 20% të popullsisë së Maqedonisë, “The New York Times” nxjerr vlerësimet e diplomatëve perëndimorë: “Diplomatët perëndimorë besojnë se shqiptarët në të vërtetë përbëjnë së paku 30% të popullsisë dhe se çfarëdo rezultati nën këtë shifër do të çojë drejt atij që njëri syresh e quajti ‘shpërthim i zemërimit'”.

Kryeministri maqedon, Branko Cërvenkovski, citohet të ketë thënë në një intervistë të veçantë, se “serbët do të dëshprohen keq me rezultatet e këtij regjistrimi”.

Gazeta amerikane vë re se rezultatet e regjistrimit kanë rëndësi shumë të madhe për shqiptarët, që “që zemërohen kur i quajnë pakicë kombëtare, dhe kërkojnë të studiojnë në gjuhën shqipe në dy universitetet e Maqedonisë. Ata kërkojnë përfaqësim më të madh në administratë, ushtri dhe organe gjyqësore dhe duan ose vetadministrim të kufizuar, ose autonomi të plotë”.

Për sa i përket për vetë ligjit për regjistrim të popullsisë nw ish-republikën jugosllave, gazeta shpalos qëndrimin e vëzhguesve perëndimorë. Simbas tyre, ligji është larg së qeni i përkryer. Ministri maqedon Ivanov i damkosi para disa ditësh këta vëzhgues, duke i akuzuar se “u kanë dhënë këshilla partive ekstremiste; aluzioni ka të bëjë ashiqare me disa grupe shqiptare”. Zoti Kalo (Calot), statistikani freng, dhe njëri prej 50 ekspertëve që mbikëqyrën regjistrimin, ilustroi për gazetën amerikane disa nga problemet, duke përmendur nenin 30 të ligjit për regjistrim. Në fjalinë e parë thuhet se “do të emërohet një regjistrues për secilën njësi regjistrimi”. ” ‘Kjo duket gjë e thjeshtë'”, tha zoti Kalo, por në të vërtetë doli sikur ajo nënkuptonte se regjistruesi duhej të ishte maqedon sllav. Në disa rrethana, regjistrues nga nacionalitetet e tjera u emëruan si shtesë. Por kishte mungesë simetrie në disa vende dhe zemërim ndër minoritete”, thuhet ndër të tjera në shkrimin e “New York Times”-it.

 22 korrik 1995

Veprimtarët e funksionarët komunalë të Gjilanit mbahen tash katër muaj në paraburgim

Beqir Hoxha, Ibrahim Morina, Ukshin Zajmi, Bejtullah Ismaili, Rexhep Hamiti, Milaim Zeqiri, Halim Halimi e Raif Sylejmani, po mbahen në paraburgim në Gjilan nga 29 marsi i këtij viti.

Edhe Gjyqi Suprem i Serbisë refuzoi këto ditë ankesën e mbrojtësve kundër vendimit të gjykatës serbe në Gjilan për vazdimin e paraburgimit.

Këta veprimtarë në Gjilan janë akuzuar për gjoja formimin e “Shoqatës së Eprorëve Ushtarakë Rezevë me qëllim të formimit të formacioneve paramilitare në komunë, si dhe hartimit të planit të vetëmbrojtjes dhe të mbrojtjes territoriale”.

Avokatët Shemsedin Piraj e Faredin Ymeri i thanë gazetës “Bujku” se zvarritja e procedurës bëhet me qëllim që të akuzuarit të mbahen sa më gjatë në paraburgim.

Avokati Isa Mustafa, që mbron Rexhep Hamitin, 65-vjeç, ish-delegat i ish-Kuvendit Federativ dhe punëtor shoqëror e politik në komunë, tha se nuk ekzistojnë arsye ligjore për vazhdimin e paraburgimit, ngase nuk ekziston rreziku që të akuzuarit mund të arratisen apo se mbrojtja e tyre nga “liria” mund të shkaktojë shqetësim te qytetarët.

22 korrik 1997

Gjenevë: Një i ri shqiptar u vra pas vjedhjes në aeroport

Azilkërkuesi 19 vjeçar nga Kosova, identiteti i të cilit nuk dihet, vdiq pasi që në të shtiu polici, pas një vjedhjeje që ndodhi në aeroportin e Gjenevës, me ç’rast u vodhën disa mijëra dollarë, njofton “Koha ditore”.

Incidenti ndodhi në parkingun nëntokësor të terminalit ndërkombëtar Cointrin pak minuta pas orës shtatë në mëngjes, tha zëdhënësi Jacques Volary në një konferencë për gazetarë.

Ai tha se polici ksihte shkuar në parking pasi që një çantë zyrtare ishte rrëmbyer nga duart e një udhëtari arab – i cili më vonë tha se ksithe disa mijëra dollarë – vetëm pak kohë pasi që ai kishte arritur në aeroport me taksi për të zënë fluturimin.

“Polici pa tre persona me çantën e tij dhe i thirri ata që të dorëzohen”, tha Volery, “por njëri prej tyre u duk se nxorri një gjësend të zi nga beli dhe e drejtoi nga polici”.

Polici me atë rast hapi zjarr, duke e goditur personin në gjoks, përderisa, dy të tjerët ikën, me siguri së bashku me të hollat në çantë, e cila më vonë u gjet e zbrazët. Personi i plagosur vdiq menjëherë pasi që u dërgua në spital. Volery nuk e identifikoi njeriun e vdekur. Ai tha se ky person ishte paraqitur për azil në shkurt pasi që kishte arritur në Zvicër në janar, por personi në fjalë po priste depërtimin, për shkak se edhe më parë kishte qenë i burgosur nga policia për shkak të lidhjeve me vjedhjet që kishin ndodhur në aeroporte.

Sipas fjalëve të zëdhënësit, në vendin e ngjarjes nuk u gjet kurrfarë arme. Pasagjeri arab, i cili gjithashtu nuk u identifikua, lajmëroi për paratë e tij të humbura.

Volery tha se ka pasur edhe raste të tjera të vjedhjeve këtë vit në aeroportin Cointrin, njërin nga dy aeroportet kryesore ndërkombëtare zvicerane.

Vetëm këtë vit, në këtë aeroport kanë ndodhur 246 vjedhje të bagazhit, prej të cilave 188 ishin çanta.

22 korrik 1998

Dyshohet për qindra të vrarë e të plagosur në Rahovec

Dëshmitarët kanë treguar se kanë parë njerëz të varur nëpër shtylla elektrike. Disa të tjerë janë lidhur në dy autoblinda dhe janë tërhequr. Ka njerëz të masakruar, me gjymtyrë të prera e me sy të nxjerrë. Thuhet se disa njerëz janë nxjerrë nga shtëpitë në oborr dhe pastaj janë detyruar të shtrihen mbi kashtë, ndërsa pjesëtarët e forcave serbe pasi u kanë vënë edhe për mbi kashtë, kanë hedhur benzinë dhe u kanë dhënë zjarrin

Një drejtues i Degës së LDK-së në Rahovec, i cili arriti t’i afrohej të hënën qytetit të vet, i tha QIK-ut se në rrugë prej Prishtine, kishte takuar në Malishevë grupe njerëzish, sidomos gra, fëmijë, e pleq, por edhe burra e të rinj nga Rahoveci.

Ai përkujtoi se sulmi i forcave serbe dhe pastaj përleshjet në qytet filluan të premten. Atë pasdreke, afër vendit të quajtur Te Rrasat, ishte gjetur një trup i pajetë. Në drejtim të këtij vendi u nisën ushtarë dhe policë. Me atë rast filluan të shtënat, të cilët u zgjeruan me të shpejtë në gjithë qytetin.

Forcave shqiptare u shkuan në ndihmë pjesëtarë të UÇK-së nga anë të tjera. Policia serbe ishte tërhequr. Të shtënat atë natë kishin vazhduar deri rreth orës 01 pas mesnatës.

Të shtunën herët në mëngjes, në orën 05, vazhduan përleshjet. Forcave serbe u kishin arritur përforcime të shumta. Pjesëtarë të njësive speciale ishin sjellë në pika të caktuara të qytetit edhe me helikopterë. Me të arritur forcat speciale serbe filluan të shtënat.

Të shtunën qyteti ishte përplot njerëz. Askush nuk ishte evakuuar nga qyteti. Njerëzit gjendeshin në mëngjes në shtëpitë e veta. Me shtimin e intensitetit të sulmeve, njerëzit filluan të kërkojnë mundësi për t’u larguar nga shtëpitë. Mirëpo në rrugë e sipër, forcat serbe filluan të shtijnë mbi ta.

Në mëngjesin e të shtunës filluan granatimet edhe nga ana e Rogovës, nga Landovica dhe nga ana e Gjakovës. U qëlluan dhe u shkatërruan shumë shtëpi.

Rreth orës 17:00, forca të reja serbe ishin nisur drejt Rahovecit. Në rrugë e sipër ato shkatërruan mbi 80% të shtëpive në fshatin Carrallukë.

Drejt Rahovecit pastaj shkuan forca të mëdha serbe të policisë e të ushtrisë dhe forca paramilitare, me autoblinda, me tankse e me topa.

Forcat vetëmbrojtëse kanë qëndruar derisa ka arritur në qytet ushtria. Pastaj forcat serbe kanë shkatërruar çdo gjë para vetes. Popullsia ka filluar të tërhiqet, mirëpo por me vonesë. Forcat serbe vranë e masakruan këdo që gjetën në qytet. Ata dogjën shumë shtëpi. Hynë nëpër lagje dhe pastaj nëpër të gjitha shtëpitë, duke thyer dyert. Janë marrë të gjithë njerëzit që kishin mbetur brenda nëpër shtëpi e strehimore. Shumë prej njerëzve që janë zënë, janë vrarë e masakruar dhe pastaj shtëpitë janë djegë me benzinë dhe me bomba.

Sipas dëshmitarëve në pika të ndryshme të qytetit, mund të thuhet se rreth 80 për qind e qytetit është shkatërruar.

Drejtuesi i LDK-së në Rahovec thotë se numri i të vrarëve është shumë i madh. Numri i të vrarëve që është përmendur në mjetet e informimit ka të bëjë vetëm me ata të vrarë që janë identiifkuar.

Mirëpo të vrarë të paidentifikuar ka nëpër rrugë, nëpër shtëpi, nëpër vreshta e nëpër livadhe. Shumë njerëz janë vrarë duke ikur. Disa prej atyre që kanë shpëtuar kanë thënë se kanë ikur nëpër trupa të vrarëve. As nuk kanë mundur t’i identifikojnë, e as t’i tërheqin. Në mesin e të vrarëve ka gra shtatzëna, fëmijë, të rinj, burra, pleq.

Dëshmitarët kanë treguar se kanë parë njerëz të varur nëpër shtylla elektrike. Disa të tjerë janë lidhur në dy autoblinda dhe janë tërhequr. Ka njerëz të masakruar, me gjymtyrë të prera e me sy të nxjerrë. Thuhet se disa njerëz janë nxjerrë nga shtëpitë në oborr dhe pastaj janë detyruar të shtrihen mbi kashtë, ndërsa pjesëtarët e forcave serbe pasi u kanë vënë edhe për mbi kashtë, kanë hedhur benzinë dhe u kanë dhënë zjarrin.

Njerëzit që kanë mundur të ikin, janë strehuar në komunën e Malishevës, në disa fshatra të Rahovecit dhe në fshatrat e komunave të tjera përreth. Vetëm në komunën e Malishevës janë strehuar rreth 13 mijë veta.

Supozohet se në qytet kanë mbetur nja 5. 000-6. 000 qytetarë, në një gjendje të pasigurisë së plotë.

Drejtuesi i Degës së LDK-së supozon se në qytet janë disa qindra të vrarë dhe qindra të plagosur. Të plagosurve nuk mund t’u ofrohet kurrfarë ndihme.

Ka informacione gjithashtu për shumë të arrestuar. Ata janë dërguar me kamiona të ndryshëm në drejtim të Prizrenit. Në një kamion të policisë ishin 40 ose 41 veta, të gjithë meshkuj. Në një kamion tjetër, që thuhet se ka qenë i ndërmarrjes “Progres” ishin 37 meshkuj dhe femra. Ata transportoheshin me duar të lidhura. Në kamionit e tretë gjithashtu kishte plot të arrestuar, gra dhe burra. Ndërsa në Prizren janë dërguar trupat e 12 shqiptarëve të vrarë.

Në qytet janë dëgjuar edhe dje të shtëna. Mirëpo nuk mund të thuhet asgjë se për çka është fjala. Më parë bëhet fjalë për sulme të pjesëtarëve të forcave serbe kundër njerëzve që kanë mbetur brenda, duke pritur se do t’u ndihmojë ndokush për të shpëtuar jetën.

Drejtuesi i Degës së LDK-së në Rahovec tha se kishte parë disa njerëz që mbërritën në Malishevë me një kamion dhe një motokultivator. Ata kishin bërë rrugë të gjatë e me plot rreziqe derisa ishin larguar nga qyteti. Ata kishin rrëfyer për masakrën e bërë nga forcat serbe në çdo shtëpi të lagjes së tyre. Nuk ka fjalë që mund të përshkruajë tmerrin që e kishin përjetuar dhe parë ata.

Dëshmitarë të tjerë kanë thënë se një grup prej 400-500 vetash ka hyrë në teqen e Sheh Myhedinit në qytet dhe kanë kërkuar ndihmë. Gjatë natës ata kanë dalë nga teqja me qëllim që të largoheshin nga qyteti, mirëpo pas disa metrash atyre u kishte dalë përballë një autoblindë. Pjesëtarët e forcave serbe kishin shtënë në ajër dhe kishin kërkuar nga njerëzit që të shtriheshin për toke. Në ndërkohë, aty kishin shkuar edhe dy autoblinda. Prej aty arriti të ikte vetëm një qytetar, i cili ka thënë se ka dëgjuar të shtëna armësh, britma dhe lemerinë e njerëzve, për të cilët nuk di se çfarë ka ndodhur. Nëse forcat serbe kanë shtënë në atë masë, aty ka ndodhur një masakër e vërtetë.

Drejtuesi i Degës së LDK-së bën apel që të hapet një korridor për në qytet, në mënyrë që të ndërpritet sulmi i forcave serbe dhe që të tërhiqen nga qyteti të plagosurit që kanë mbetur gjallë.

Rexhep Bislimi vdiq nga torturat e organeve serbe

Mbrëmë në Klinikën Kirurgjike të spitalit të Prishtinës, nga pasojat e torturave të organet e sigurimit serb, vdiq Rexhep Bislimi (32) nga Ferizaj, baba i tre fëmijëve.

I ndjeri ishte ishte arrestuar më 6 korrik. Në Klinikën Kirugjike të spitalit të Prishtinës ishte sjellë në gjendje kome, pas torturave çnjerëzore që ishin ushtruar ndaj tij në organet e sigurimit serb.

Varrimi i Rexhep Bislimit bëhet nesër, më 23 korrik, në varrezat e qytetit në Ferizaj, njofton Kosimioni për Informim i Degës së LDK-së në Ferizaj.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Në Prizren u sollën 12 trupa të pajetë, 5 të plagosur dhe 240 të arrestuar

 21 korrik 1993

“Le Courrier”: Taktika e serbëve është që ta shkatërrojnë gradualisht popullin shqiptar

Gazeta zvicerane “Le Courrier”, sjell një artikull me titull “Delegacioni i Gjenevës që kishte shkuar në Shkup u kthye i shqetësuar”, në të cilin bënë fjalë për iniciativën për binjakëzimin e Prishtinës me Gjenevën.

Brenda pesë ditësh, delegacioni nga Gjeneva, siç shkruan kjo gazetë, takoi përfaqësues të forcave politike dhe të komuniteteve kombëtare nga Kosova. Kësaj radhe gazeta e sipërshënuar sjell bisedën me Elizabet Rës Dekrein, deputete në Këshillin e Madh të Partisë Socialiste dhe Kristof Soliosin, koordinator i projektit për Kuvendin Evropian të Qytetarëve.

Kristof Solios, në deklaratën dhënë kësaj gazete, thotë: “Shqetësimi i shqiptarëve për sa i përket shpërthimit të shpejtë të një konflikti të hapur në Krahinë, ishte i madh. Por, ata kanë hpresa të mëdha lidhur me një prani ndërkombëtare në Prishtinë, për të dëshmuar lidhur me gjendjen e tyre. Ata mbështeten shumë në ndihmat humanitare dhe sidomos te qëllimi për të dalë nga izolimi, që u është bërë atyre në planin ndërkombëtar”.

Pasi konstaton se grupet që i takuam janë pak a shumë të hapur për dialog ndëretnik dhe ndërfetar, Kristof Solios, thotë: “Të bindësh njerëz të revoltuar për të qëndruar të qetë, ky është një problem për organizatat shqiptare, udhëheqësit e të cilave kanë zgjedhur në mënyrë të qartë që të mos provokojnë. Për të dalë nga izolimi, ata kanë vendosur të mbështeten në kontaktet ndërkombëtare. Kjo politikë, ka sjellë frytet e saj. Evolucioni i organizatave joqeveritare evropiane është premtues, kurse ai i organizatave qeveritare është më pak i pranishëm”.

Elizabet Rës Dekrei, konstaton se “aktiviteti ndërkombëtar i shqetëson serbët. Shqiptarët kanë frikë çdo ditë se nuk do të mund të dalin më nga krahina e tyre, kurse të huajt nuk do të mund të hyjnë më atje. Shqiptarët ngulmojnë që në Kosovë, të dërgohen delegacione para shpërthimit të luftës, pasi kam përshtypjen se Evropa nuk e njeh si duhet Kosovën”.

Elizabet Rës Dekrei, është e mendimit se “taktika e serbëve është ta shkatërrojnë gradualisht popullin shqiptar”.

21 korrik 1994

Prof. dr. Ejup Statovci u rizgjodh rektor i UP-së

Dje në Prishtinë u mbajt mbledhja konstituive e Senatit të Universitetit të Prishtinës.

Kryetar i Senatit u zgjodh prof. Fetah Jagxhiu, ndërsa nënkryetar prof. dr. Mensur Raifi.

Senati pastaj njëzëri zgjodhi sërish rektor të Universitetit të Prishtinës prof. dr. Ejup Statovcin.

Në këtë mbledhje Senati bëri gjithashtu edhe vërtetimin e zgjedhjes së shumicës së dekanëve dhe të drejtorëve të shkollave të larta të Universitetit të Prishtinës, njoftoi Rektorati i UP-së.

21 korrik 1995

U ngrit aktakuza kundër “Grupit të Kaçanikut”

Kohë më parë në Prishtinë u ngrit aktakuza kundër 13 të pandehurve, udhëheqësve të pushtetit lokal, përfaqësuesve të degës së LDK-së të Kaçanikut dhe të tjerëve, tre prej të cilëve gjenden në arrati, njoftuan avokatët Fazli Balaj e mr. Hysni Bytyçi.

Për veprimet inkriminuese sipas neneve 136 e 116 të ligjit penal serb akuzohen: Hebib Shehu, kryetar i Degës së LDK-së, Osman Krasniqi, kryetar i Kuvendit të Komunës, Qamil Ilazi, Mitalip Jezerci dhe Ilaz Loku, që të tre ish-punëtorë të MPP të KK-së, Maksut Hoxha, kryetar i qeverisë komunale, Ibush Vishi, nënkryetar i degës së LDK-së, Xhevat Bela, ish-referent i MPP-së, Raif Dema, kryetar i këshillit të Bashkësisë Islame në Kaçanik, Naser Kuka, kryetar i nëndegës së LDK-së dhe ish-kryetar i KMDLNJ-së në Kaçanik, Idriz Krasniqi, elektricist, Xhemail Metallarai, teknik i Makinerisë dhe Sami Vishi, student i Fakultetit të Bujqësisë, njofton “Bujku”.

Në aktakuzën e ngritur kundër tyre thuhet ndër të tjera se të pandehurit paskan formuar Shtabin e Mbrojtjes territoriale për komunën e Kaçanikut. Theksohet se ata paskan vepruar sipas instruksioneve të Anton Kolajt, anëtar i kryesisë së LDK-së, Hajzer Hajzerajt, etj.

Tre të pandehur, Naser Kuka, Idriz Krasniqi e Ilaz Loku “gjenden në arrati”, Sami Vishi është paraburgosur më 19 maj, ndërsa të pandehurit tjerë janë paraburgosur më 11 prill.

Avokatët F. Balaj e H. Bytyçi njoftuan se ndaj klientëve të tyre, gjatë fazës së hetuesisë është përdorur torturë e egër dhe se ata po mbahen në burgun e Gjilanit.

Në një nga aktvendimet thuhet se paraburgimi kundër të pandehurve vazhdon deri më 5 gusht të këtij viti, ndërsa gjykimi për këtë rast penal pritet të fillojë në shtator të këtij viti, thuhet mes tjerash në njoftim.

 21 korrik 1997

Policia speciale u tërhoq nga rrugët e qyteteve shqiptare në Maqedoninë Perëndimore

Pas “stuhisë” policore më 9 korrik në komunën e Tetovës dhe të Gostivarit, mbrëmë në rrugët kryesore Gostivar – Tetovë – Shkup u vërejtën kolonat e njësive të specializuara të policisë të MPB që largoheshin pas dhjetë ditë qëndrimi në qytetet me shqiptarë të Maqedonisë Perëndimore. Dje nuk u vërejtën më pjesëtarët e kësaj policie në të dy krahët e rrugës që shpie për në ndërtesën e Kuvendit komunal të Tetovës, as autoblinda dhe as automjetet e tjera që qëndronin para objektit. Kjo rrugë edhe dje dukej e shkretë dhe pa frekuencë të zakonshme. Këto forca nuk u vërejtën as në udhëkryqet e tjera të qytetit, njofton “Bujku”.

Tetovarët tashmë marrin frymë më lirshëm. Ata nuk i pret legjitimimi i jashtëzakonshëm në shumë pjesë të qytetit dhe fitohet përshtypja se më e keqja ka kaluar. Përkundër kësaj, tetovarët dhe gostivarasit, sikundër edhe banorët shqiptarë të komunave të reja në Maqedoninë Perëndimore nuk do të mund ta harrojnë aq shpejt dhunën e pushtetit maqedonas mbi ta, dhunë kjo që do të lërë pasoja të rënda në marrëdhëniet ndëretnike.

Ngjarjet e korrikut në Tetovë, Gostivar e më gjerë kanë lënë vragë të rënda jo vetëm në zemrat e tyre, por edhe mbi trupin e shumë shqiptarëve, të cilët nuk u kursyen nga kërbaçi policor jo pse kishin bërë ndonjë faj, por vetëm pse ishin shqiptarë. U maltretuan, u rrahën dhe u plagosën shumë veta. Për policinë kjo nuk mjaftonte, por ngriti ndaj tyre edhe procedurë gjyqësore, që dënimi të jetë i plotë. Sepse vetëm tre të vrarë për një “ngjarje” kaq të madhe për policinë, për “ushtrimin” e forcave të saj ishin pak. Mbetën, pra plagët, personat e arrestuar nëpër burgje dhe gjykimet e montuara politike.

21 korrik 1998

Shumë të vrarë, të plagosur, të arrestuar e të humbur në Rahovec

Sipas informatës së Halit Shalës, sekretar i Bashkësisë Islame në Rahovec, më 20 korrik në Rahovec mbretëronte gjendje terrori. Nëpër rrugë vërehej një numër tejet i madh i të vrarëve dhe i të masakruarve. Vetëm në Teqen e Sheh Mihidinit në Rahovec janë parë gra, pleq e fëmijë, të cilët kishin kërkuar aty strehim, mirëpo ishin të masakruar me metoda më barbare.

Në qendër të qytetit dhe rrugët tjera shiheshin njerëz të lidhur nëpër shtylla elektrike dhe një numër i madh i qytetarëve të masakruar.

Te vendi i quajtur “Tumba” ishte masakruar profesori Haxhi Sharku dhe Ali Percaj, si dhe gjashtë trupa tjerë të cilët janë të karbonizuar, identiteti i të cilëve nuk dihet.

Nëpër rrugët e Rahovecit vërehen të vrarë e shoqja e Ramadan Abaz Ibres (56), Ramadan Abaz Ibra (58), Bula Abaz Ibra (22), Emsale Shala (27), Abdullah Bugari (37), Kadri Cena (43), Sakip Bugari (50), e shoqja e Hysen Bugarit (58), Hasan Shtavica, profesor, profesorët Faik Sylka e Xhemajli Ramqaj.

Te vendi “Bllata” te liqeni gjenden kufomat e pesë personave të paidentifikuar.

Janë djegë shtëpitë e Xhemajli Mustafës, Gani Jahajt, Hidajte Haxhijahajt, Jusuf Haxhijahajt, Sakip Shehut, Selami Osajt, Latif Mustafës, Hidajte Kasapit, Xhemajli Kadirit, Dervish Lamajt, Xhelal Jupajt, Sali Ramës, Hasan Demës, Haxhi Topallit, Idriz Bytyçit, Ramiz Bytyçit, Sali Shalës, Bashkim Tarës, Qerim Cenës, Hassan Xheminhazerit, Xhemajl Canzibës, ndërtesa pranë postës, hoteli “Park”, moteli dhe pompa e benzinës “Haxhijaha”.

Janë plagosur Shani Sylka (imam i xhamisë), Luan Vuçiterna, Vllaznim Canziba, ndërsa janë zënë robër: Merita Mustafa (25), me foshnjën 2-muajshe, Ali Mustafa (35), Liridon Mustafa (3 vjeç), Veton Mustafa (7), Satkie Mustafa (23), Muharrem Mustafa (42), Vezire Mustafa (35), Xhemile Mustafa (75), Muhidin Mustafa (65), Iliaz Shala (55), Xhemajli Iska me familje, Maliq Kerali me familje, Nait (Sali) Musa me djalin, Abaz Mullauka (42), Rasim Vuçitërna (68), Xhevdet Vuçitërna me dy djem e me gruan, Faredin Merxha (56), Mejreme Merxha (52), Hidajete Merxha me vajzën, Ali Shala me tetë anëtarë të familjes, Mejdin Qemajli (47), Muharrem (37) dhe Bekim (mbiemri nuk dihet) (35) me anëtarët e familjes.

Persona të humbur konsiderohen: Hadi Sokoli (32), Hivzi Shehu (30), Sabit Shehu (26), Sedat Shehu (27), Esat Shehu (20), me familje, Gani Haxhijaha (35), Nijazi Mullauka (68), Nijazi Rama (me dhjetë anëtarë të familjes), Jonuz Jupa (me familje), Muhamet Kolari (me pesë anëtarë të familjes), Hanife Kollari (70), Ilir Hasku (me dy anëtarë të familjes), Osman Mullaabazi me familje (68), Jonuz Jupa (me familje), Muhamet Sulejmani, Eqrem Derguti me grua, Bademe Draga (70), Nesim Shala me familje, Ramadan Dina me familje, Fahredin Dina me familje, Latif Veliu me familje, Qerim Cena (32), Shefqet Derguti (52) me të shoqen, Sadik Derguti (32), Muzair Mjezini, Fatime Kasapi, Qazim Kasapi, Lirie Kasapi, Sanie Kasapi, me dy djem e një vajzë (Bekimi, Burimi dhe Leoreta).

Mbrëmë në Prizren policia serbe ka sjellë nga Rahoveci shqiptarë të arrestuar në dy kamionë. Gratë dhe fëmijët janë liruar, ndërsa meshkujt janë mbajtur në arrest.

Sot më 21. 07. 1998, në ora 7,00 të mëngjesit është sjellë edhe një kamion me 20 të rinjë të arrestuar. Në orën 10,00 një kamion “Tam”, me targa të policisë ka bartur civilë shqiptarë nga stacioni i policisë në Rahovec për në Prizren. Numri i tyre dueht të jetë 30- 40.

Po sot në ora 11,30 me kamion të firmës “Progres” u sollën edhe 31 të arrestuar, të gjithë të lidhur, nga rrethinat e Rahovecit.

Në mesin e të arrestuarve kishte edhe të plagosur. Të gjithë janë vendosur në ndërtesën e zjarrëfikësve (në sallë) që ndodhet ngjitas me stacionin e policisë në Prizren.

Mbrëmë dhe sot në Prizren u sollën 12 trupa të pajetë, 5 të plagosur dhe 240 të arrestuar

Burimet e Komisionit për Informim të Degës së LDK-së në Prizren njoftojnë se në morgun e spitalit të qytetit janë sjellë mbrëmë 12 kufoma, tash për tash të paidentifikuara. Po mbrëmë, rreth orës 20:00, në spitalin e Prizrenit janë sjellë për shërim edhe pesë shqiptarë të plagosur. Jemin (Halit) Hondozi (1974) e Albanore (Vehbi) Hoxha (1981) janë plagosur me plumba, kurse Samere Nurshaba (1991), Abdullah Nurshaba (1994) dhe Rexhep Nurshaba (1953) janë plagosur nga copat e granatave.

Sipas këtyre burimeve, rreth 200 shqiptarë civilë, të cilët janë sjellë me një kamion nga Rahoveci, janë dërguar mbrëmë në burgun e këtij qyteti, kurse sot, në orën 10,40, në këtë burg janë sjellë edhe 38 shqiptarë të tjerë. Dëshmitarët okularë kanë treguar se gratë, fëmijët dhe pleqtë janë zbritur nga automjetet dhe janë futur në lokalet e burgut, ndërsa të rinjtë dhe burrat janë dërguar në stacionin e policisë.

Ndërkaq Komisioni për Informim i Nëndegës së LDK-së në Lutogllavë, ka njoftuar se mbrëmë, prej orës 20:30 e deri në orën 23:00, një serb i këtij fshati ka provokuar fqinjët e tij shqiptarë, duke shtënë me automatik.

Ndërkohë, njoftohet se snajperistët e vendosur rreth postbllokut të policisë në Landovicë kanë vëzhguar terrenin përreth ne të gjitha drejtimet.

Njoftimet nga Prizreni flasin për një gjendje shumë të tensionuar në Prizren e rrethinë, të shkaktuar pas sulmeve të forcave serbe në disa vendbanime të kësaj komune dhe në komunën e Rahovecit.

Dëshmi e një të arrestuari në Rahovec: Në qytet ka shumë të vrarë, ndërsa çdo e treta shtëpi është shkatërruar dhe djegur

Forcat serbe liruan sot në Prizren grupe të arrestuarëve gjatë dy ditëve të fundit në Rahovec. Sot janë liruar dy grupe me nga dhjetë persona.

Një i liruar sot i tha QIK-ut se dhjetëra shqiptarë, gra e fëmijë ishin arrestuar dje nëpër shtëpitë dhe strehimoret e qytetit. Ishin arrestuar burra, gra e fëmijë. Ata ishin transportuar me kamionë deri në Prizren. Dëshmitari që deshi të mbetej anonim tha se ishte arrestuar dje në orën 13:00 në një strehimore. Në mesin e të arrestuarëve kishte edhe gra me fëmijë të porsalindur. Në Prizren kishin arritur në orën 18:00. Ai tha se shumicën e të arrestuarëve i kishin ndalur në një hapësirë në Prizren, ndërsa nëntë vetë, në mesin e tyre edhe një aktivist të LDK-së me mbiemrnin Kasapi, i kishin dërguar në drejtim të panjohur.

Ai tha se të gjithë të arrestuarit ishin lënë pa ujë e pa bukë dhe ishin marrë në pyetje gjatë gjithë natës. Nga gjendja e rëndë, lodhja e frika, shumicës së të arrestuarëve u kishte rënë të fikët.

Dëshmitari tha se në qytet dje kishin mbetur gra e fëmijë, ndërsa burrat janë larguar nga qyteti. Nga Rahoveci është dërguar në Prizren sot një kamion me të arrestuar të rinj.

Dëshmitari tha se qytetarët e Rahovecit nuk kishin guxuar të dilnin tri ditë nga shtëpitë e veta. Ai tha se kishte parë të sulmonin edhe ushtarë serbë me fytyra të ngjyrosura dhe me shami të zeza.

Sipas dëshmitarit, në qytet ka shumë të vrarë, ndërsa çdo e treta shtëpi është shkatërruar dhe djegur.

Moti i ligë që përfshiu Kosovën gjatë ditëve të fundit, i shoqëruar me erëra të fuqishme, stuhi dhe breshër, ka shkaktuar dëme të konsiderueshme materiale në shtëpi banimi, prona private, rrjetin energjetik si dhe në dhjetëra hektarë toka bujqësore. Sipas parashikimeve meteorologjike, mot me reshje dhe stuhi pritet të ketë edhe në ditët në vijim, ndërsa autoritetet u bëjnë thirrje qytetarëve për kujdes të shtuar.

Në qytetin e Rahovecit, stuhit e fuqishme dhe erërat e forta kanë shkaktuar dëme të shumta materiale si në qytet, ashtu edhe në lokalitetet rrethuese. Ekipet e emergjencës dhe Drejtoria për Mbrojtje dhe Shpëtim kanë dalë menjëherë në terren për sanimin e dëmeve dhe kthimin e gjendjes në normalitet. Komuna u ka bërë thirrje qytetarëve të shmangin lëvizjet pranë pemëve, shtyllave elektrike apo objekteve të dëmtuara.

Ngjashem edhe në Lipjan reshjet e dendura dhe erërat e forta kanë goditur bujqësinë, rrjetin energjetik dhe infrastrukturën publike.

Dëme janë evidentuar në shkollën e Gadimes, sallën e sportit dhe shtigjet e ecjes ku janë rrëzuar drunj. Si pasojë e rrëzimit të shtyllave elektrike, disa zona kanë mbetur pa energji. Ekipet e shërbimeve publike po punojnë në terren për largimin e pengesave dhe sanimin e gjendjes.

Ndërsa në Skenderaj nga breshëri është goditur rëndë sektori i bujqësisë, veçanërisht në fshatrat Vajnik, Burojë, Likoc dhe Izbicë.

Vetëm në fshatin Vajnik raportohet se janë dëmtuar plotësisht rreth 60 hektarë të mbjella me grurë, përveç dëmeve të mëdha në pemë e perime. Komuna ka nisur pranimin e kërkesave nga fermerët dhe komisionet po bëjnë vlerësimin në terren për të proceduar me kompensim nga niveli qendror.

Dëme të mëdha janë shkaktuar edhe në Suharekë e Istog, ku janë formuar menjëherë komisionet komunale për vlerësimin e dëmeve në bujqësi, institucione arsimore, biznese dhe hapësira publike.

Komisionet kanë dal edhe në terren bashkë me përfaqësues të nivelit qendror për të parë nga afër të mbjellat e shkatërruara pak para vjeljes, ndërsa procesi i vlerësimit të dëmeve synohet të përmbyllet brenda një afati rekord prej 7 ditësh. /E.A/