Lajmet

Nitaj: AAK-ja e ka ndarë mendjen e vet, Ramush Haradinaj për president

Published

5 years ago

September 14, 2020

Nënkryetari i Aleancës për Ardhmërinë e Kosovës (AAK), Muharrem Nitaj, ka thënë se ky subjekt politik e ka ndarë mendjen e vet sa i përket çështjes së presidentit të vendit.

Nitaj ka thënë se AAK-ja e ka vlerësuar Ramush Haradinajn si personin më të përshtatshëm dhe më unifikues për president në këtë kohë.

Në këtë intervistë dhënë gazetës “Epoka e re”, Nitaj ka pohuar se tash “mbetet t’i bindim të tjerët për mbështetje se propozimi është serioz dhe i duhuri”.

Ai ka thënë se deri më tash në Qeverinë e Kosovës ka pasur një klimë konstruktive bashkëpunimi.

Nitaj ka thënë se partnerët e koalicionit qeverisës kanë pasur disa dallime në qëndrime vetëm sa i përket mënyrës se si ka filluar të organizohet e të rrjedhë procesi i dialogut me Serbinë.

“Epoka e re”: Z. Nitaj, cili është vlerësimi juaj si nënkryetar i AAK-së për këtë koalicion qeverisës?
Nitaj: E kam vënë re tash e sa kohë një interesim të jashtëzakonshëm të politikës e të medias, për të parë nëse po krisë koalicioni. Një pjesë u lë përshtypje e u interesojnë vetëm mospajtimet e kundërshtimet. Kjo nuk do të ishte aspak e pazakontë sikur të mos vërehej edhe ana pozitive e mospajtimeve e, pse jo, edhe e kundërshtive brenda koalicionit, nëse për synim kanë gjetjen e zgjidhjeve më të mirë. Në qeveritë demokratike ka edhe zëra ndryshe, edhe votë kundër, edhe përplasje argumentesh, edhe mospajtime. Në Qeverinë e Kosovës, të paktën deri më tash, ka pasur një klimë konstruktive bashkëpunimi. Kemi pasur disa dallime në qëndrime vetëm për sa i përket mënyrës se si ka filluar të organizohet e të rrjedhë procesi i dialogut. Por, edhe këto aspekte po diskutohen hapur e pa dorëza dhe kjo është pozitive, vlerësoj unë.

“Epoka e re”: A është i nevojshëm zgjerimi i këtij koalicioni, sepse kohët e fundit është folur për mundësinë e inkuadrimit të PDK-së në këtë koalicion?
Nitaj: Ne kemi marrëveshje koalicioni me LDK-në. Kjo e fundit e ka marrë mandatin për krijimin e qeverisë. Ajo duhet ta vlerësojë nëse është i nevojshëm zgjerimi i koalicionit ose jo, e jo Aleanca. Tani, nëse ndodh zgjerimi i koalicionit, me këdo qoftë tjetër, dhe nëse kjo nuk nënkupton shkeljen e parimeve tona mbi të cilat e kemi ndërtuar koalicionin, ne nuk do të kishim asnjë arsye për ta kundërshtuar.

“Epoka e re”: Marrëveshja e Uashingtonit ka “përplasur” LDK-në dhe AAK-në sa i përket çështjes së Liqenit të Ujmanit, ku kemi dy deklarata të ndryshme. Njëra palë thotë se pati ndërhyrje në marrëveshje (AAK-ja) e tjetra palë (LDK-ja) thotë se marrëveshja nuk është prekur në këtë pikë.
Nitaj: Unë këtë çështje e konsideroj të tejkaluar tashmë. Secili e ka pasur të vërtetën e tij dhe një ditë do të merret vesh përfundimisht se kush e ka ndërtuar narrativën e së vërtetës me hile. Opinionit publik në Kosovë i janë shpërfaqur dy versione të ndryshme dhe e vërteta absolute ndoshta do të mund të merret vesh, nëse ndonjë ditë publikohen farë kabllogramesh, por e thashë kjo tashmë s’ka rëndësi. E rëndësishme është që Kosova të mos gjendet edhe një herë tjetër në një situatë të ngjashme, ku për çështje jetike flasim në orët e fundit, sepse pasojat për vendin mund të jenë të pariparueshme. Jemi tepër të brishtë për të mos u pajtuar ndër vete.

“Epoka e re”: Këto “përplasje” LDK – AAK a mund ta rrezikojnë koalicionin qeverisës?
Nitaj: Unë dua të besoj në arsyen, racionalitetin dhe përgjegjësinë e liderëve të këtij koalicioni. Mospajtimet janë kollaj të kapërcyeshme dhe nëse s’ka motive të tjera, nuk shoh se kjo mund ta rrezikojë koalicionin. Më ka ra këto ditë të dëgjoj lloj-lloj analizash e opinionesh, për njëfarë nevoje të Aleancës për protagonizëm në procesin e dialogut. Unë ju garantoj se është e kundërta. Aleanca edhe vetë kur e ka drejtuar qeverinë, nuk ka vrapuar pas tryezave të dialogut. Ajo që kërkojmë ne është që gjithçka të jetë e koordinuar, paraprakisht e diskutuar, e harmonizuar dhe bashkërisht e negociuar. Ne jemi partnerë në këtë qeveri dhe është krejt e natyrshme të jemi pjesë, edhe e punës, por edhe e përgjegjësive në këtë proces, që është më i rëndësishmi që prej shpalljes së pavarësisë. Unë po shpresoj ta shoh edhe përfshirjen e të tjerëve që nuk janë pjesë e qeverisë në dialog.

“Epoka e re”: Cili është opinioni juaj për marrëveshjen e Uashingtonit?
Nitaj: Është një marrëveshje e mirë sepse është arritur në Shtëpinë e Bardhë. Është një marrëveshje ku Kosovës i hapet një perspektivë ekonomike. Natyrisht ajo ka edhe një peshë politike sepse ka prodhuar një njohje tejet të rëndësishme për Kosovën nga Izraeli dhe sikur e ka rikthyer Kosovën në vëmendjen ndërkombëtare. Nuk është krejt sa kemi pritur por, sidoqoftë, ne në Aleancë kemi besuar se në momentin kur pala serbe ka kërkuar heqjen e pikës për njohje të ndërsjellë, delegacioni i Kosovës në Uashington ka mundur të kishte kërkuar, pa asnjë hezitim, heqjen e pikës për Ujmanin, e cila, megjithëse siç është përpiluar në fund, nuk e paragjykon rezultatin përfundimtar, prapë mbetet me ilet.

Aktualitet

Rektori i UBT-së, Prof. Dr. Edmond Hajrizi pranohet anëtar në Akademinë Evropiane të Shkencave (EurASc)

Published

11 hours ago

August 1, 2025

Driton Iseni

Themeluesi dhe Presidenti i UBT-së, Rektori, Prof. Dr. Edmond Hajrizi, është pranuar si anëtar në Akademinë Evropiane të Shkencave (European Academy of Sciences – EurASc).

European Academy of Sciences (EurASc) është një nga akademitë më prestigjioze në Evropë, që bashkon shkencëtarë dhe studiues të shquar nga e gjithë bota, me qëllim promovimin e ekselencës shkencore dhe teknologjike për të adresuar sfidat më të mëdha globale. Anëtarët e saj janë emra të njohur që kanë dhënë kontribute të mëdha në fushat përkatëse, përfshirë shumë fitues të çmimeve ndërkombëtare dhe nobelistë.

Ky është një vlerësim i rëndësishëm ndërkombëtar që njeh kontributin e jashtëzakonshëm të Prof. Hajrizit në fushën e arsimit të lartë, kërkimit shkencor, inovacionit dhe politikëbërjes në nivel rajonal dhe evropian.

“Pjesëmarrja ime si anëtar në Akademinë Evropiane të Shkencave është një vlerësim personal, por mbi të gjitha është një njohje për punën dhe përkushtimin afatgjatë të UBT-së në ndërtimin e një ekosistemi akademik dhe shkencor në përputhje me standardet evropiane. Ky është një hap i rëndësishëm drejt fuqizimit të rolit të Kosovës në hartën ndërkombëtare të dijes dhe inovacionit”, tha Rektori Hajrizi.

Akademia Evropiane e Shkencave (EurASc), në publikimin e saj në rrjetet sociale, ka vlerësuar lart kontributin e Prof. Dr. Edmond Hajrizi për përvojën e tij mbi dydekadëshe në ndërthurjen e akademisë me ekosistemet e inovacionit dhe zhvillimit ekonomik.

Nën udhëheqjen e tij strategjike dhe vizionare, UBT është konsoliduar si një nga institucionet më të avancuara të arsimit të lartë në Evropën Juglindore, duke u shndërruar në një qendër të rëndësishme për zhvillimin e inovacionit, teknologjisë dhe sipërmarrjes.

Si pjesë e angazhimeve të tij profesionale, Prof. Hajrizi ka udhëhequr me sukses dhjetëra projekte të financuara nga Bashkimi Evropian, si dhe ka kontribuar si këshilltar për institucione prestigjioze ndërkombëtare, duke promovuar transformimin digjital, prodhimin inteligjent dhe arsimin e orientuar drejt së ardhmes.

Ky pranim përfaqëson jo vetëm një sukses personal për Rektorin Hajrizi, por një arritje të rëndësishme për UBT-në dhe Kosovën në tërësi. Ai dëshmon se përkushtimi ndaj inovacionit, cilësisë akademike dhe vizionit global mund të sjellë njohje ndërkombëtare dhe ta vendosë Kosovën në hartën e qendrave të rëndësishme të dijes dhe teknologjisë.

Lajmet

Liga e Kampionëve 2025-2026, 29 klube të kualifikuara

Published

12 hours ago

August 1, 2025

UBT News

Ka ende kohë deri në fillimin e sezonit të ri të Ligës së Kampionëve, megjithatë vështirë se ka ndonjë garë që gjeneron aq shumë pritje sa ky kompeticion. Edhe para se faza e ligës të fillojë më 16 shtator, ka disa data të rëndësishme në axhendë.

UEFA ka planifikuar tashmë shortin për fazën e ligës. Ai do të zhvillohet më 28 gusht në Nyon. Siç ndodhi vitin e kaluar, një program kompjuterik do ta kryejë procesin, pasi një short manual në formatin revolucionar do të ishte përtej mundësive.

Klubet do të ndahen në katër vazo me nga tetë ekipe secila sipas koeficientit të klubit të tyre, me Paris Saint-Germain, si fitues të Ligës së Kampionëve, që tashmë janë të vendosur në vazon e parë. Bayern (i 2-ti), Leverkusen (i 7-ti) dhe Dortmund (i 8-ti) nga Bundesliga janë midis tetë ekipeve të para. Një ekip nga vazoja e parë duhet të luajë kundër një ekipi tjetër nga vazoja e parë dhe klubeve të dyta secila nga vazot e dyta, të treta dhe të katërta në fazën e ligës.

Liga e Kampionëve 2025/26: Cilat klube janë gati për shortin?

Anglia : Liverpool , Arsenal , Manchester City, Chelsea, Tottenham, Newcastle

Spanjë : Barcelona , Real Madrid , Atlético Madrid, Athletic Club, Villarreal

Italia : Napoli, Inter, Atalanta, Juventus

Gjermani : Bayern Munich, Bayer Leverkusen, Eintracht Frankfurt , Dortmund

Francë : Paris Saint-Germain, Marseille, Monaco

Holanda : PSV, Ajax

Portugalia : Sporting CP

Belgjikë : Union Saint-Gilloise

Turqi : Galatasaray

Republika Çeke : Slavia Pragë

Greqi : Olimpiakosi

29 klube janë kualifikuar tashmë për shortin e fazës së ligës. Anglia dhe Spanja kanë siguruar secila nga një vend shtesë përmes renditjes vjetore të UEFA-s, kështu që Newcastle dhe Villarreal do të përfaqësohen. Tottenham është kualifikuar si fitues i Europa League, që do të thotë se Premier League do të ketë gjashtë klube.

Liga e Kampionëve 2025/26: Si do të luhen vendet e mbetura?

Vendet e mbetura do të përcaktohen përmes fazës kualifikuese dhe eliminatoreve.

Raundi i 1-rë kualifikues: 8/9 dhe 15/16 korrik 2025

Raundi i dytë kualifikues: 22/23 dhe 29/30 korrik 2025

Raundi i 3-të kualifikues: 5/6 dhe 12 gusht 2025

Playoff-et: 19/20 dhe 26/27. Gusht 2025

Raundi i parë kualifikues është tashmë në kulmin e tij. Megjithatë, vetëm klubet nga ligat më të ulëta do të garojnë atje. Megjithatë, në raundin e dytë kualifikues do të marrin pjesë klube të njohura si FC Copenhagen dhe RB Salzburg.

Vendimi se cilat klube do të avancojnë në fazën e ligës do të merret më 26 dhe 27 gusht me ndeshjet e kthimit të fazës eliminatore.

Lajmet

Laporta për Yamalin: Ka personalitet të fortë si Messi, është i rrallë

Published

13 hours ago

August 1, 2025

UBT News

Presidenti i Barcelonës, Joan Laporta, ka bërë një deklaratë të fuqishme në lidhje me talentin e jashtëzakonshëm të Lamine Yamal, duke e krahasuar atë me Lionel Messin jo vetëm për cilësitë teknike, por edhe për karakterin e tij të veçantë.

Në një prononcim për mediat, Laporta u shpreh: “Lamine Yamal ka një personalitet shumë të fortë, njësoj siç kishte edhe Messi në kohën e tij. Ai nuk është thjesht një lojtar i talentuar, por është i rrallë, një prej atyre futbollistëve që lindin rrallëherë.”

Presidenti katalanas vazhdoi me vlerësimet duke theksuar nivelin elitar në të cilin tashmë ndodhet adoleshenti spanjoll:

“Yamal është një gjeni i vërtetë i futbollit. Ka arritur një nivel shumë të lartë për moshën që ka dhe kjo e bën edhe më të jashtëzakonshëm. Ne te Barcelona jemi shumë krenarë që kemi një lojtar si ai në radhët tona.”

Lamine Yamal, vetëm 18 vjeç, ka shpërthyer me paraqitjet e tij për Barçën dhe përfaqësuesen e Spanjës, duke u bërë një ndër emrat më premtues në futbollin botëror. Krahasimi me Messin nga vetë presidenti Laporta vetëm sa e forcon imazhin e tij si trashëgimtar potencial i legjendës argjentinase në “Camp Nou”.

Lajmet

Drita prezanton përforcimin e ri

Published

14 hours ago

August 1, 2025

UBT News

Drita ka bërë një goditje të rëndësishme në merkato duke siguruar shërbimet e sulmuesit të njohur Kristal Abazaj. Lojtari me përvojë të madhe dhe cilësi të spikatura do të jetë tashmë pjesë e repartit ofensiv, duke i shtuar më shumë forcë dhe alternativë skuadrës nga Gjilani.

Pas një pune të përkushtuar dhe negociatash të suksesshme, drejtori sportiv Valon Zymberi arriti të finalizojë marrëveshjen me Abazajn, i cili ka firmosur një kontratë dyvjeçare me klubin.

Abazaj pritet të jetë një armë e fuqishme në dispozicion të trajnerit Ramadani, duke sjellë me vete jo vetëm eksperiencë, por edhe potencial për të bërë diferencën në fushë.