Lajmet

Nis mbyllja e furrave të bukës në Greqi, shkak rritja e çmimeve

Federata e furrave të bukës argumenton se 10 deri në 15% e anëtarëve të saj po luftojnë për të mbijetuar.

Published

4 years ago

November 10, 2022

Betim Gashi

Furrat e bukës në Greqi kanë pësuar një goditje të fortë, për shkak të rritjes së lartë të faturave të energjisë elektrike dhe gazit natyror.

Tassos Vazakas ka në pronësi një furrë buke në Athinë dhe ka 28 punonjës. Gjatë vitit të fundit sipërmarrësi dhe bukëpjekësi është përballur me një situatë të paprecedentë. Dikur paguante rreth 1 mijë euro për gazin natyror, por tani fatura i kalon 5 mijë euro.

“Kjo është fatura e fundit. Shuma totale i kalon 5 mijë euro dhe po të mos kishte subvencionim nga shteti do të arrinte në 6 mijë euro. Një vit më parë kam paguar rreth 1 mijë euro për gazin natyror. Kjo është një rritje që nuk mund ta përballojmë, që nuk mund të paguajmë. Sinqerisht nuk di çfarë të bëj. E gjithë kjo, është përtej durimit tim”, u shpreh Tasos Vazakas, bukëpjekës, pronar i furrës.

Qeveria subvencionon 40 cent për çdo kilovat orë energji elektrike të konsumuar nga një furrë buke. Profesionistët njohin mbështetjen e shtetit, por kërkojnë edhe rritjen e subvencionit të gazit natyror dhe uljen e TVSH-së nga 13% në 6%.

Siç argumentojnë ata, përveç kostove të larta të energjisë, ata duhet të përballen edhe me rritjen e kostos së lëndëve të para.

“Rritjet e çmimeve të mallrave dhe lëndëve të para në disa raste arrijnë në 100%. Për shembull çmimi i miellit është dyfishuar, të gjitha produktet e qumështit janë rritur me 60%. Edhe çmimi i vezëve është dyfishuar. Ku do të shkojë kjo?”, tha më tej bukëpjekësi.

Përveç bukës dhe disa ëmbëlsirave, kjo furrë buke ofron edhe ushqime të tjera.

Vaia Chroni ka kaluar 35 vite në kuzhinë. Si kuzhiniere profesioniste dhe si amvise, kjo është rritja më e lartë e çmimit që mund të kujtojë. Çdo javë në supermarket, ajo shpenzon gjithnjë e më shumë para për të blerë mallra bazë.

“Gjithçka është bërë kaq e shtrenjtë! Është rritur çmimi i vajit të ullirit dhe nuk mund të blejmë më mish. Fileto pule ka arritur 10 euro, viçi është mbi 12 euro. Kush mund të blejë me çmime të tilla? Asnjë familje nuk mund ta mbushë frigoriferin”, u shpreh kuzhinieri Vagia Chroni.

Federata e furrave të bukës argumenton se 10 deri në 15% e anëtarëve të saj po luftojnë për të mbijetuar. Sindikalistët pretendojnë se rreth 300 furra buke do të mbyllen menjëherë pas Krishtlindjeve.

Lajmet

Krimet e luftës në Prekaz: Dorëzohet aktakuza, prokuroria sot në konferencë

Published

7 minutes ago

September 4, 2026

UBTNews

Prokuroria Speciale e Republikës së Kosovës ka njoftuar se sot do të mbajë një konferencë për media lidhur me dorëzimin e aktakuzës për krimet e luftës të kryera në lagjen e Jasharajve, në Prekaz të Skenderajt.

Sipas njoftimit zyrtar, konferenca do të zhvillohet në ambientet e Prokurorisë Speciale (kati VI), me fillim nga ora 13:30.

Gjatë këtij takimi me gazetarë, prokurorët e çështjes pritet të shpalosin detaje rreth përmbajtjes së aktakuzës dhe personave të akuzuar për masakrën dhe krimet e kryera në këtë ngjarje historike. /E.A/

Lajmet

Britani: Dënohet familja shqiptare që drejtonte rrjetin e kokainës në Mançester

Published

16 minutes ago

September 4, 2026

UBTNews

Gjykata “Manchester Crown Court” në Britaninë e Madhe ka dënuar me burgim anëtarët e një grupi të organizuar kriminal që merrej me shpërndarjen e kokainës. Në krye të rrjetit ndodhej 44-vjeçari Rezart Balesi, i cili u dënua me 7 vite e 6 muaj burg, ndërsa në burg përfunduan edhe djali i tij 22-vjeçar, Joshua Balesi (4 vite burg) dhe vëllai Refail Balesi (5 vite e 3 muaj burg).

Sipas hetimit të kryer nga njësia rajonale kundër krimit të organizuar (NWROCU), grupi përdorte një lokal në zonën e Bury-t si bazë operative, ndërsa porositë e drogës merreshin përmes aplikacionit WhatsApp dhe u shpërndaheshin klientëve nga korrierë të besuar. Hetimet treguan se rrjeti, i cili funksiononte nga maji i vitit 2024 deri në mars të vitit 2026, gjeneronte deri në 9,000 paund në një natë të vetme.

Gjatë dhënies së vendimit, gjykatësja e çështjes kritikoi ashpër kryetarin e grupit, Rezart Balesi, për futjen e djalit të tij në rrugën e krimit që në moshën 18-vjeçare.

Përveç anëtarëve të familjes Balesi, gjykata dënoi edhe pesë persona të tjerë të përfshirë në këtë rrjet kriminal: Fatos Vrenezi (53 vjeç) – u dënua me 4 vite burg, Imanuel Lumaj (30 vjeç) – u dënua me 3 vite e 9 muaj burg, Fjoraldo Lukaj (31 vjeç) – u dënua me 3 vite e 6 muaj burg dhe përballet me dëbim nga Britania, Lorenzo Canovi (48 vjeç) – u dënua me 37 muaj burg, Antonino Precaj (33 vjeç) – u dënua me 27 muaj burg për përfshirje në kultivim kanabisi.

Lajmet

Tri raste të dhunës në familje brenda një dite

Published

46 minutes ago

September 4, 2026

UBTNews

Policia e Kosovës ka regjistruar tri raste të dhunës në familje gjatë 24 orëve të fundit në Fushë Kosovë, Prishtinë dhe Pejë.

Në Fushë Kosovë, një grua ka raportuar se bashkëshorti i saj ka ushtruar dhunë fizike dhe psikike ndaj saj. I dyshuari ndodhet në arrati, ndërsa hetimet për kapjen e tij po vazhdojnë.

Një tjetër rast i dhunës ndaj gruas është raportuar në Prishtinë. I dyshuari është shoqëruar në polici dhe, pas intervistimit, me vendim të prokurorit është liruar në procedurë të rregullt.

Ndërkaq në Pejë, një burrë ka raportuar në polici se bashkëshortja e tij ushtron dhunë psikike ndaj tij, duke e ofenduar atë dhe anëtarët e familjes së tij. Lidhur me rastin është njoftuar prokurori kompetent dhe hetimet po vazhdojnë. /E.A/

Lajmet

Hapet Festivali i 14-të Kombëtar i Filmit Shqiptar

Published

59 minutes ago

September 4, 2026

UBT News

Pas 14 vitesh mungesë, në Tiranë është rikthyer Festivali Kombëtar i Filmit Shqiptar, në edicionin e tij të 14-të.

Festivali u hap me një mbrëmje gala në Akademinë e Arteve të Bukura, ku u mblodhën artistë, aktorë dhe kineastë shqiptarë.

Përgjatë 10 ditëve, publiku do të ketë mundësi të shohë mbi 100 filma të realizuar nga viti 2013 deri më sot, duke sjellë një pasqyrë të zhvillimit të kinemasë shqiptare ndër vite.

Festivali synon gjithashtu të krijojë hapësirë për bashkëpunim mes kineastëve të brezave të ndryshëm dhe të promovojë prodhimet e reja shqiptare./A.K/