Fakulteti i Shkencave të Sportit në UBT, nën udhëheqjen e Dekanit Agron Thaqi, po realizon aktivitetet e internshipit në Vjenë të Austrisë, në kuadër të projektit ndërkombëtar SHAPE.

Ky program po zhvillohet në bashkëpunim me partnerët ndërkombëtarë të projektit, duke bashkuar studentë dhe staf akademik nga universitete të ndryshme evropiane për të shkëmbyer njohuri, përvoja dhe praktika bashkëkohore në fushën e sportit, shëndetit dhe aktivitetit fizik.

Përgjatë javës, pjesëmarrësit janë të angazhuar në një sërë aktivitetesh profesionale, përfshirë punëtori praktike, vizita studimore, sesione trajnimi dhe ligjërata të udhëhequra nga ekspertë të Universitetit të Vjenës. Këto aktivitete synojnë avancimin e kompetencave profesionale të studentëve, zgjerimin e njohurive të tyre akademike dhe përgatitjen për sfidat e tregut ndërkombëtar të punës.

Internshipi në Vjenë paraqet një mundësi të jashtëzakonshme për studentët e UBT-së që të aplikojnë në praktikë njohuritë e fituara gjatë studimeve, të krijojnë rrjete të reja bashkëpunimi me kolegë nga vende të ndryshme të Evropës dhe të njihen nga afër me modelet më të avancuara të edukimit dhe praktikës profesionale në fushën e shkencave të sportit.

UBT shpreh mirënjohjen e saj për partnerët e projektit SHAPE dhe në veçanti për ekipin e Universitetit të Vjenës për mikpritjen, profesionalizmin dhe mbështetjen e vazhdueshme në organizimin e këtij aktiviteti me rëndësi të veçantë për zhvillimin akademik dhe profesional të studentëve dhe stafit të Fakultetit të Shkencave të Sportit.

Përmes pjesëmarrjes në projekte të tilla ndërkombëtare, UBT vazhdon të forcojë dimensionin ndërkombëtar të arsimit, duke krijuar mundësi të reja mobiliteti, bashkëpunimi dhe zhvillimi profesional për studentët dhe stafin e saj.

UBT pati kënaqësinë të mirëpresë një delegacion të nivelit të lartë nga India, të udhëhequr nga Dr. Asif Iqbal, President i Indian Economic Trade Organisation (IETO), i shoqëruar nga përfaqësues të disa prej kompanive dhe organizatave më të rëndësishme të sektorit privat indian.

Gjatë vizitës, UBT dhe IETO nënshkruan një Marrëveshje Bashkëpunimi, e cila synon forcimin e lidhjeve ndërmjet komunitetit akademik dhe atij të biznesit në Kosovë dhe Indi. Marrëveshja parashikon zhvillimin e iniciativave të përbashkëta në fushat e arsimit, kërkimit shkencor, inovacionit, sipërmarrjes, tregtisë dhe investimeve, duke krijuar mundësi të reja bashkëpunimi për studentët, akademikët dhe komunitetin e biznesit të të dy vendeve.

Në kuadër të takimeve, Presidenti i IETO-së i adresoi një ftesë zyrtare Rektorit të UBT-së, Prof. Dr. Edmond Hajrizi, për të realizuar një vizitë në New Delhi, me qëllim thellimin e partneritetit institucional dhe zgjerimin e rrjetit të bashkëpunimit ndërmjet Kosovës dhe Indisë.

Vizita u vlerësua si një hap i rëndësishëm në avancimin e diplomacisë ekonomike dhe publike të Kosovës, duke kontribuar në krijimin e urave të reja të bashkëpunimit me një nga ekonomitë më të mëdha dhe më dinamike në botë. Ky angazhim merr rëndësi të veçantë duke pasur parasysh potencialin e madh për zgjerimin e kontakteve ndërmjet institucioneve, bizneseve dhe shoqërisë civile të dy vendeve.

Një fokus i veçantë i diskutimeve ishte edhe industria kreative dhe kinematografike, duke pasur parasysh pozicionin global të Indisë si një nga qendrat më të mëdha të prodhimit filmik në botë. Pjesë e delegacionit ishte edhe një nga producentët e njohur të industrisë Bollywood, me të cilin u diskutuan mundësitë e bashkëpunimit në fushën e filmit, mediave kreative, shkëmbimit kulturor dhe promovimit ndërkombëtar të talenteve të reja.

UBT mbetet i përkushtuar në ndërtimin e partneriteteve strategjike ndërkombëtare që kontribuojnë në zhvillimin e arsimit, inovacionit, ekonomisë dhe dialogut ndërkulturor, duke e pozicionuar Kosovën si një partner të besueshëm në arenën globale.

Programi i Studimeve Juridike në UBT është i ndërtuar për të ofruar një edukim të avancuar dhe cilësor në fushën e së drejtës, me qëllim formimin e profesionistëve të aftë për të vepruar në mjedise juridike kombëtare dhe ndërkombëtare. Misioni i këtij programi është të kontribuojë në forcimin e sundimit të ligjit, zhvillimin ekonomik dhe ndërtimin e një shoqërie të qëndrueshme përmes mësimdhënies inovative, kërkimit shkencor dhe përgatitjes profesionale të studentëve.

Gjatë studimeve, studentët pajisen me njohuri të thelluara në fushat kryesore të së drejtës, duke përfshirë të drejtën civile, penale, administrative, tregtare dhe kushtetuese, si dhe të drejtën ndërkombëtare. Ata mësojnë të kuptojnë dhe analizojnë legjislacionin vendor dhe ndërkombëtar sipas hierarkisë së normave juridike, të interpretojnë kornizën ligjore të Kosovës dhe doktrinën juridike, si dhe të zbatojnë normat juridike në fusha të ndryshme të së drejtës. Gjithashtu, zhvillojnë aftësi për hartimin e dokumenteve ligjore dhe argumenteve profesionale sipas metodës IRAC, përmbledhjen dhe analizimin e vendimeve gjyqësore, si dhe aftësi të avancuara kërkimore dhe analitike për trajtimin e çështjeve komplekse juridike.

Programi i kushton rëndësi të veçantë praktikës profesionale, duke i mundësuar studentëve angazhim në klinika juridike, simulime gjyqësore dhe vizita studimore në institucione të drejtësisë si gjykata dhe prokurori, ku ata fitojnë përvojë direkte në praktikën reale juridike. Po ashtu, studentët zhvillojnë aftësi komunikimi profesional me shkrim dhe me gojë dhe aftësi pune në ekipe multidisiplinare me institucione të zbatimit të ligjit, OJQ dhe sektorin privat.

Një komponent i rëndësishëm i programit është edhe bashkëpunimi me institucione vendore dhe ndërkombëtare, i cili përfshin institucione si Gjykata Themelore e Prishtinës, Prokuroria e Shtetit, Agjencia e Kosovës për Forenzikë, Agjencia Kosovare e Konkurrencës dhe Agjencia e Regjistrimit të Bizneseve të Kosovës. Këto bashkëpunime u mundësojnë studentëve zhvillim të praktikave profesionale dhe qasje në përvojë reale institucionale, duke rritur ndjeshëm gatishmërinë e tyre për tregun e punës.

UBT gjithashtu ka ndërtuar një rrjet të gjerë bashkëpunimi me rreth 280 universitete në mbarë botën, duke mundësuar shkëmbime akademike, mobilitet studentor dhe të stafit, si dhe pjesëmarrje në projekte dhe aktivitete ndërkombëtare kërkimore e shkencore. Këto bashkëpunime kontribuojnë në rritjen e cilësisë së arsimit të lartë dhe në zgjerimin e përvojës akademike dhe kulturore të studentëve.

Në vitin 2026, UBT është vlerësuar si i pari në botë në kategorinë “University Brand and Reputation” në rangimin global WURI, gjë që vërteton reputacionin dhe ndikimin e tij të jashtëzakonshëm në arsimin e lartë. Ndër sukseset më madhore, UBT ka fituar titullin “Engaged University of the Year”, duke u pozicionuar si universiteti më i mirë në botë në këtë kategori dhe duke lënë pas institucione prestigjioze nga Suedia, Kanadaja, Australia dhe Arabia Saudite.

Me mbi 25 vite traditë, inovacion të vazhdueshëm dhe ekselencë akademike, UBT mbetet një nga alternativat më të fuqishme dhe më të sigurta për të gjithë ata që synojnë një karrierë të suksesshme dhe me ndikim në fushën e drejtësisë dhe shkencave sociale.

/A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Ethet hemorragjike marrin jetë në malishevë

13 qershor 1994

Fon Kol: Shkelja e të drejtave të shqiptarëve në Kosovë – spastrim etnik

Federata Ndërkombëtare e Helsinkit për të Drejtat e Njeriut, me seli në Vjenë, dënoi me forcë vazhdimin e shkeljes së të drejtave të shqiptarëve në Kosovë. Në një deklaratë që lëshoi këto ditë Federata Ndërkombëtare e Helsinkit vlerëson se autoritetet serbe kanë ashpërsuar fushatën kundër punonjësve të institucioneve arsimore shqiptare.

Në emisionin e transmetuar të shtunën shefi i Seksionit shqiptar të “Zërit të Amerikës”, Elez Biberaj, bëri një bisedë me Kristinë fon Kolin, zyrtare e Federatës Ndërkombëtare të Helsinkit.

Tekstin e kësaj bisede po e dhëmë në vazhdim.

“Organizata e njohur për mbrojtjen e të drejtave të njeriut u bën thirrje autoriteteve serbe të lejojnë hapjen e të gjitha institucioneve arsimore shqiptare, nga shkollat fillore e deri te Universiteti.

Kristinë fon Kol tha se Federata Ndërkombëtare e Helsinkit është shumë e shqetësuar nga fakti se Serbia ka shtuar shtypjen e shqiptarëve. Ajo përmendi veçanërisht incidentin e 30 majit kur policia serbe vërshoi në Universitetin e Prishtinës dhe ndaloi apo arrestoi shtatë drejtues dhe profesorë të këtij Universiteti. Qindra mijëra të rinjve shqiptarë, thotë Fon Kol, u është marrë e drejta e një zhvillimi normal intelektual. Ajo thotë se autoritetet po shtojnë trysni ndaj sistemit paralel që e kanë krijuar shqiptarët.

Zonja Fon Kol i cilëson veprimet serbe kundër studentëve dhe mësuesve në shkollat dhe Universitetin, si dhe shkeljen e të drejtave të tjera të shqiptarëve si spastrim etnik, pasi shqiptarëve, thotë ajo, po u mohohen kushtet elementare të jetesës. Ajo shton se serbët synojnë që t’i detyrojnë shqiptarët të ikin nga Kosova.

Veprimtarja e të drejtave të njeriut thotë se Serbia po përfiton nga përqendrimi i vëmendjes botërore në Bosnjë për të shtuar shtypjen e shqiptarëve.

Zonja Fon Kol thotë se Federata Ndërkombëtare e Helsinkit i bëri thirrje Beogradit që të heqë dorë nga kjo politikë dhe të fillojë bisedimet me përfaqësuesit shqiptarë. Ajo thotë se bisedimet shqiptaro-serbe mund të japin rezultat vetëm nëqoftëse zhvillohen në prani të palës së tretë.

Zonja Kristinë fon Kol thotë se gjendja në Kosovë është keqësuar dukshëm pas dëbimit të vëzhguesve të huaj vitin e kaluar. Federata Ndërkombëtare e Helsinkit i bën thirrje bashkësisë ndërkombëtare që të dënojë veprimet e fundit të policisë serbe kundër studentëve dhe mësuesve shqiptarë dhe ta përfshijë çështjen e Kosovës në rendin e ditës në përpjekjet e fuqive të mëdha për zgjidhjen e krizës në ish-Jugosllavi.

Lidhur me çështjen e shqiptarëve në Maqedoni zonja Fon Kol thotë se nuk ka asnjë dyshim se shqiptarët në atë vend, pavarësisht nga deklaratat zyrtare, nuk janë të barabartë me maqedonasit. Por ajo shton se qëndrimi maqedonas, veçanërisht ai i intelektualëve ndaj shqiptarëve, po ndryshon dhe shumë maqedonas janë të vetëdijshëm se shqiptarët duhet t’i gëzojnë të gjitha të drejtat dhe të jenë të barabartë me shtetasit tjerë të kësaj ish-republike jugosllave.

Zonja Fon Kol thotë se, pas një vizite kohët e fundit në Maqedoni, ajo krijoi përshtypjen se pala shqiptare nuk po u përgjigjet gjithmonë propozimeve të palës maqedonase për dialog. Ajo tha se përvoja në të kaluarën ka shkaktuar që shqiptarët të vetizolohen dhe që propozimet maqedonase t’i shikojnë si jo të sinqerta.

Megjithatë, ajo tha se shpreson se marrëdhëniet midis shqiptarëve dhe maqedonasve do të përmirësohen në të ardhmen”.

13 qershor 1995

Nga ethet hemorralogjike në Kosovë sivjet vdiqën 3 vetë

Prej muajit prill e deri më tash në Kosovë është shënuar një rritje e numrit të të sëmurëve nga ethet hemorralogjike. Nga ethet e minjve dhe të rriqrës janë sëmurë 8 vetë, prej të cilëve 3 kanë vdekur, shkruan gazeta “Jedinstvo”. Sipas fjalëve të dr. Komnen Tmushiqit rastet e evidentuara gjenden në komunat e Suharekës, Rahovecit, Gllogovcit dhe Klinës. Vitin e kaluar janë shënuar 19 raste nga kjo sëmundje.

Për shkak të dimrit të butë edhe sivjet ka shumë minj dhe rriqra, prandaj rekomandohet një kujdes i shtuar, sidmos tek artikujt ushqimorë, kur është fjala për minjtë dhe qëndrimi në natyrë për rriqrën.

13 qershor 1997

Poetët për fëmijë në mesin e shkollarëve të Malishevës

Në sallën e SHF “M. Bakija” të Carrallukës së Malishevës, dje, në kuadër të shënimit të 119-vjetorit të Kuvendit të LSH të Prizrenit, u mbajt një orë letrare, me ç’rast, krijimet e tyre, i prezentuan nxënë të kësaj shkolle fillore dhe të gjimnazit “A. Frashëri” të Malishevës. Krijimet më të mira nga radha e nxënësve ishin ato të krijueseve të reja, si Shehide dhe Kade Hotit, Vlorë Mazrrekut dhe Suzanë Paçarizit, proza e së cilës për Mirko Gashin, shkaktoi emocione të shumta.

Paraqitja e poetëve për fëmijë, si Hajro Ulçinaku, Rifat Kukaj, Ymer Elshani dhe Riza Greiçevci, në skenë, ku shumica ishin të vegjël, krijoi po ashtu çaste të kënshme për të pranishmit.

Poeti Rifat Kukaj, me këtë rast, shkollës së Carrallukës i dhuroi 10 ekzemplarë të dy librave të tij të fundit “Njëherit, prezentimi në skenë para spektatorëve të shumtë e aktivit të Teatrit të kukullave ishte një pikë interesante në vete.