Lajmet

Nga hedhja e dokumenteve në tualet deri tek vërejtjet homofobike, “Confidence Man” shfaq detajet më interesante për Trump

Libri përcjell Trumpin, që nga koha e tij si biznesmen nga Nju Jorku deri në jetën e tij pas presidencës.

Published

3 years ago

on

Ish-presidenti i SHBA-së, Donald Trump, për pak sa nuk e pushoi nga puna vajzën e tij.

Ky detaj dhe shumë të tjerë zbulohen në librin e shumëpritur të gazetares së New York Times, Maggie Haberman, “Confidence Man”, i cili do të dalë sot.

Libri përcjell Trumpin, që nga koha e tij si biznesmen nga Nju Jorku deri në jetën e tij pas presidencës. Ai bazohet në intervista me më shumë se 200 burime, duke përfshirë ish ndihmës, si dhe tre intervista me vetë Donald Trump.

Ish-presidenti ka sulmuar Haberman, duke shkruar në platformën e tij të mediave sociale se libri përmban “shumë histori të sajuara me kontroll zero faktesh”.

Këtu janë tetë nga zbulimet më të mëdha të “Confidence Man”:

1) Trump donte të shkarkonte Ivanka Trump dhe Jared Kushner
Në një takim me shefin e atëhershëm të shtabit John Kelly dhe më pas këshilltarin e Shtëpisë së Bardhë Don McGahn, Haberman shkruan se zoti Trump ishte afër të shkruante në Twitter se vajza e tij, Ivanka dhe dhëndri Jared Kushner – të dy ndihmës të lartë të Shtëpisë së Bardhë – po largoheshin nga pozicionet e tyre.

Ai u ndalua nga Kelly, i cili e këshilloi të fliste me vajzën e tij dhe Kushner së pari, përpara se ta bënte postimin në Twitter. Trump nuk foli kurrë me ta dhe ata të dy mbetën ndihmës të Shtëpisë së Bardhë deri në fund të presidencës së tij.

Libri zbulon gjithashtu se Trump fliste shpesh për dhëndrin e tij dhe një herë komentoi se Kushner “duket si një fëmijë” pasi dëgjoi një fjalim publik që ai mbajti në 2017.

Trump ka mohuar të ketë dashur ndonjëherë të shkarkojë Ivankën dhe bashkëshortin e saj. “Fiksion i pastër. Nuk më ka shkuar kurrë në mendje”, tha ai.

2) Trump kishte vlerësuar bombardimin e laboratorëve të drogës në Meksikë
Haberman shkruan se Trump ngriti disa herë mundësinë e bombardimit të laboratorëve meksikanë të drogës – gjë që habiti ish-sekretarin e mbrojtjes së SHBA-së, Mark Esper.

Ideja buroi nga një bisedë që Trump pati me Brett Giroir, oficer i shëndetit publik.

Z. Giroir hyri në Zyrën Ovale i veshur me një uniformë – siç është zakon për oficerët e shëndetit publik në trup – dhe i tha Trump-it se objektet që prodhojnë droga të paligjshme në Meksikë duhet të trajtohen duke vendosur “një plumb drejt objektivit”, për të ndaluar hyrjen e substancave të paligjshme përtej kufirit.

Duke ngatërruar z. Giroir për një oficer ushtarak, Trump më pas sugjeroi bombardimin e objekteve të drogës.

3) Trump kishte frikë se do të vdiste nga Covid-19
Kur zoti Trump u prek nga Covid-19 në tetor të vitit 2020, gjendja e tij në Shtëpinë e Bardhë po përkeqësohej dhe ai kishte frikë se mos vdiste.

Në një moment, zëvendës shefi i tij i kabinetit, Tony Ornato, paralajmëroi presidentin se nëse shëndeti i tij përkeqësohej më tej, ai do të duhej të vinte në lëvizje procedurat për të siguruar vazhdimësinë e qeverisë.

Kjo frikë ekzistonte pavarësisht disa përpjekjeve të Trump për të minimizuar rëndësinë e pandemisë, pasi ai shqetësohej se virusi po ndikonte negativisht në imazhin e tij dhe motivet politike. Haberman shkruan se ai u kërkoi ndihmësve përreth tij që të hiqnin maskat e tyre dhe se ai këshilloi guvernatorin e atëhershëm të Nju Jorkut, Andrew Cuomo, të mos fliste për virusin në TV.

4) Trump përmendi pronën e tij në takimin e kryeministrit të Mbretërisë së Bashkuar
Libri i Haberman detajon disa takime mes z. Trump dhe liderëve botërorë.

Për shembull, në takimin e tij të parë me kryeministren e tanishme të Mbretërisë së Bashkuar, Theresa May, Trump foli për abortin, duke thënë se“disa njerëz janë pro jetës, disa janë pro zgjedhjes. Imagjinoni sikur disa kafshë me tatuazhe të përdhunojnë vajzën tuaj dhe ajo të mbetet shtatzënë?”

Ai më pas ndryshoi temën për të diskutuar se si të bllokohej ngritja e një projekti të erës në det të hapur pranë pronës së tij në Irlandën e Veriut.

5) Trump i kërkoi Giulianit të “bëjë gjithçka” për të përmbysur zgjedhjet e vitit 2020
Kur u bë e qartë se z. Trump po humbiste zgjedhjet e vitit 2020, ai thirri ish-kryebashkiakun e qytetit të Nju Jorkut dhe avokatin e tij personal Rudy Giuliani.

“Në rregull, Rudy, ti je në krye. Tërbohu, bëj çfarë të duash. Nuk më intereson”, tha Trump, pasi avokatët e tjerë refuzuan të shkojnë aq larg sa ai ka kërkuar në përpjekjen e tij për të përmbysur rezultatet e zgjedhjeve.

“Avokatët e mi janë të tmerrshëm”, i tha ai z. Giuliani, sipas librit. Ai gjithashtu qortoi shpesh këshilltarin e Shtëpisë së Bardhë, Pat Cipollone.

6) Trump doli menjëherë me një justifikim për taksat
Në një aeroplan gjatë fushatës në vitin 2016, z. Trump iu kërkua nga drejtuesi i fushatës zgjedhore të tij, Corey Lewandowski dhe sekretarja e tij e shtypit Hope Hicks të adresonin refuzimin e tij për të publikuar deklaratat e tij tatimore – çështje që ata e panë si problem për kandidaturën e tij.

Haberman shkruan se Trump u përgjigj duke u përkulur para një mendimi të papritur:“Epo, ju e dini që taksat e mia janë nën kontroll, unë gjithmonë kontrollohem”, tha ai.

Që nga Richard Nixon, çdo president i SHBA-së ka treguar vullnetarisht deklaratat e tyre tatimore. Një hetim i New York Times i vitit 2020 ka zbuluar që atëherë se Trump pagoi 750 dollarë në taksat federale të të ardhurave vitin që u bë president.

7) Trump hodhi dokumentet në një tualet të Shtëpisë së Bardhë
Kur Donald Trump ishte në detyrë, stafi i Shtëpisë së Bardhë zbuloi periodikisht se tualeti ishte i bllokuar me letër dhe besonte se ai i kishte hedhur dokumentet.

Ai dyshohet gjithashtu se grisi dokumente, gjë që bie ndesh me Aktin e Regjistrimeve Presidenciale – ligj ky që thotë se dokumentet e krijuara ose të marra nga një president janë pronë e qeverisë amerikane dhe do të trajtohen nga Arkivi Kombëtar i SHBA-së sapo të përfundojë presidenca.

8) Trump mendonte se punonjësit e pakicave etnike ishin kamerierë
Në një takim të kongresit menjëherë pas inaugurimit të tij në 2017, Haberman shkruan se Trump iu drejtua një grupi të ndryshëm racor të punonjësve demokratë dhe u kërkoi atyre të merrnin ca copa ushqimi, duke i ngatërruar ata me kamerierë.

Libri detajon se Trump ua bëri komentet stafit të senatorit Chuck Schumer dhe përfaqësueses Nancy Pelosi.

Haberman poashtu dokumenton një histori të vërejtjeve homofobike të supozuara të shqiptuara nga Trump./UBTNews/

Related Topics:
Continue Reading

Lajmet

Kushtetuesja publikon aktgjykimin e plotë

Published

8 hours ago

on

October 8, 2025

By

Gjykata Kushtetuese e Kosovës ka publikuar aktgjykimin e plotë për konstituimin e Kuvendit të Kosovës.

Ajo ka konstatuar se seanca konstituive e Kuvendit, e filluar me 15 prill 2025 nuk ka përfunduar si rezultat i mos zgjedhjes së nënkryetarit të Kuvendit nga radhët e deputetëve të komunitetit serb, dhe Kuvendi nuk është konstituuar në pajtim me përcaktimet e paragrafit 1 të nenit 66 (Zgjedhja dhe mandati) dhe paragrafët 1 dhe 4 të nenit 67 (Zgjedhja e kryetarit dhe nënkryetarëve) të Kushtetutës së Republikës së Kosovës.

Gjykata ka urdhëruar që seanca konstituive e Kuvendit të përfundojë brenda afatit të mbetur prej 12 ditëve nga hyrja në fuqi e këtij Aktgjykimi.

Kushtetuesja ka urdhëruar të gjithë deputetët e zgjedhur të Kuvendit që gjatë procedurës së zgjedhjes së nënkryetarit të Kuvendit nga radhët e deputetëve të komunitetit serb, të ushtrojnë funksionin e tyre kushtetues në interesin më të mirë të Kosovës dhe në pajtim me Kushtetutën dhe rregulloren e Kuvendit./D.B/KP

Continue Reading

Lajmet

Në pritje të aktgjykimit të plotë, Ambasada gjermane bën thirrje për zbatimin e vendimeve Kushtetueses

Published

8 hours ago

on

October 8, 2025

By

I ngarkuari me Punë në Ambasadën e Gjermanisë në Kosovë, Christian Böttcher, është takuar të mërkurën me kryetarin e Gjykatës Kushtetuese, Nexhmi Rexhepi.

Ambasada bënë të ditur se Böttcher ka vlerësuar punën e gjykatës dhe rikonfirmuar mbështetjen e plotë të Gjermanisë për punën e gjykatës, teksa ka bërë thirrje për zbatimin e vendimeve të Gjykatës Kushtetueses.

Ambasada Gjermane kërkon nga të gjithë aktorët politikë të zbatojnë vendimet e Gjykatës, pasi siç thuhet ky është një detyrim kushtetues për deputetët, për konstituimin e Kuvendit.

“Të gjithë aktorët politikë duhet të zbatojnë vendimet e Gjykatës – ky është një detyrim kushtetues për deputetët. Mosveprimi jo vetëm që zgjat, por edhe thellon krizën politike, duke dëmtuar vendin. Siç u tha më parë: Është koha e duhur për ta vënë vendin në vend të parë, jo politikën partiake”, thuhet në njoftim.

Deputetët e Kuvendit të Kosovës janë në pritje të publikimit të aktgjykimit të plotë të Gjykatës Kushtetuese në lidhje me seancën konstituive.

Kushtetuesja më 30 shtator ka dalë me një njoftim ku ka thënë se seanca konstituive e Kuvendit të Kosovës, që ka nisur më 15 prill, nuk ka përfunduar, pasi që nuk është zgjedhur nënkryetari nga komuniteti serb.

Vendimi i Kushtetueses ka ardhur pas ankesës së Listës Serbe, partisë më të madhe të serbëve në Kosovë, lidhur me votimin ndaras të kandidatëve për nënkryetarë të Kuvendit nga radhët e komuniteteve jo shumicë.

Kushtetuesja ka urdhëruar deputetët e Kuvendit të konstituojnë legjislaturën e nëntë brenda afatit 12-ditor prej publikimit të aktgjykimit të plotë, por pa specifikuar pasojat juridike në rast se nuk kompletohen trupat e legjislativit./D.B/KP

Continue Reading

Lajmet

​Gërvalla merr pjesë në Takimin e Ministrave të Jashtëm në kuadër të Procesit të Berlinit

Published

8 hours ago

on

October 8, 2025

By

Zëvendëskryeministrja dhe ministrja në detyrë e Punëve të Jashtme dhe Diasporës, Donika Gërvalla, po merr pjesë në Takimin e Ministrave të Jashtëm të Procesit të Berlinit, që zhvillohet më 8 dhe 9 tetor në Belfast të Irlandës së Veriut, me pjesëmarrjen edhe të sekretares së Shtetit për Punë të Jashtme të Britanisë së Madhe, Yvette Cooper.

Takimi bashkon ministrat e punëve të jashtme të vendeve të Ballkanit Perëndimor dhe të shteteve pjesëmarrëse në këtë proces.

Në fokus të diskutimeve të këtij viti janë temat e sigurisë dhe zhvillimit rajonal si dhe domosdoshmëria e bashkëpunimit përballë sfidave dhe kërcënimeve të përbashkëta në një botë gjithnjë e më të paqëndrueshme, raporton KosovaPress.

Gjatë punimeve të këtij procesi, Gërvalla do të zhvillojë një sërë takimesh bilaterale me homologë dhe përfaqësues të lartë të vendeve pjesëmarrëse.

Procesi i Berlinit, i nisur në vitin 2014, mbetet nisma qendrore për bashkëpunim politik, ekonomik dhe shoqëror mes vendeve të Ballkanit Perëndimor dhe partnerëve evropianë./D.B/KP

Continue Reading

Lajmet

Përurohet rruga që lidh zonën e dytë ekonomike të Gllavicës me magjistralen mes Shtimes dhe Ferizajt

Published

9 hours ago

on

October 8, 2025

By

Në komunën e Shtimes sot është përuruar rruga që lidh Zonën e dytë Ekonomike të Gllavicës me rrugën magjistrale mes Shtimes dhe Ferizajt, investim ky që pritet të ndikojë drejtpërdrejt në zhvillimin ekonomik të komunës dhe më gjerë.

Kryetari i Komunës së Shtimes, Qemajl Aliu, tha se kjo rrugë është një hap i rëndësishëm drejt funksionalizimit të zonës ekonomike.

“Jemi në përurimin e rrugës që të dërgon te zona e dytë ekonomike në Gllavicë, rrugë e cila këtë zonë ekonomike e lidh me rrugën magjistrale mes Shtimës dhe Ferizajt. Është investim mbi 600 mijë euro, rrugë me gjerësi shtatë metra, me kanale kulluese, kanalizim atmosferik për ujëra të zeza, trotuar, me ndriçim, me të gjitha normat e një rruge që i lidhë magjistralen mes dy qyteteve”, tha Aliu.

Ai shtoi se rruga është në shërbim të funksionalizimit të zonës ekonomike, ndërsa përveç saj, komuna ka bërë edhe investime të tjera në këtë zonë.

“Kjo rrugë është në shërbim të funksionalizimit të zonës ekonomike dhe përveç kësaj rruge, ne kemi bërë afro gjysmë milioni euro investime në zonën ekonomike dhe presim që pranverën e ardhshme, siç edhe jemi zotuar me fillu funksionalizimin dhe vendosjen e bizneseve në këtë zonë, e cila do të ndihmojë dhe shërbejë në zhvillimin ekonomik të gjithëmbarshëm në Komunën e Shtimes, por edhe përreth. Kjo zonë ekonomike ka diku 37 hektarë dhe pritet me qenë një nga zonat më të mëdha me biznese”, tha Aliu.

Ky investim i ka kushtuar Komunës së Shtimës mbi 600 mijë euro./D.B/KP

Continue Reading

Të kërkuara