Pas një fushate jashtëzakonisht të suksesshme në kualifikimet për Kupën e Botës, Kosova vazhdon të mbajë gjallë shpresat për pjesëmarrje në turneun e madh të vitit të ardhshëm.

Trajneri Franco Foda ka bërë të ditur se dëshiron të vazhdojë bashkëpunimin me “Dardanët”, duke lënë të kuptohet se një rinovim i mundshëm i kontratës është në shqyrtim.

“Po, është e vërtetë që po zhvillohen bisedime. Si federata, ashtu edhe unë duhet të jemi të kënaqur – me ambientin dhe profesionalizmin që kemi ndërtuar. Prandaj është krejt e mundur që të qëndroj në Kosovë edhe për një periudhë më të gjatë”, tha Foda për mediat gjermane.

Ish-trajneri i FC Zurich shprehi kënaqësinë  për punën me Federatën e Futbollit të Kosovës e marrëdhënien e mirë me skuadrën. Aktualisht, kontrata e 59-vjeçarit gjerman është e vlefshme deri në fund të korrikut 2026.

Së fundmi, Kosova shënoi një fitore të madhe në udhëtim ndaj Suedisë, rezultat që ka rikthyer besimin dhe optimizmin në kampin “dardan”.

Nëse gjithçka shkon sipas planit në ndeshjet e nëntorit, Kosova mund të sigurojë kualifikimin direkt për Kupën e Botës.

Në rast të kundërt, rruga drejt Botërorit do të vazhdojë në play-off gjatë muajit mars të vitit të ardhshëm.

Në nëntor, Kosova përballet me Slloveninë dhe do të shpresojë që Zvicra të mos mundë Suedinë, për të vendosur vendin e parë në Grupin e saj, në stadiumin “Fadil Vokrri”. /A.Z/UBT News/

Lionel Messi ka publikuar një listë me dhjetë lojtarët më premtues për vitet e ardhshme, ku përfshihet edhe Brajan Gruda, futbollisti shqiptar që luan për Brightonin dhe përfaqëson Kombëtaren e Gjermanisë U21.

Lista përfshin disa emra të njohur të rinj si Nico Paz, Kendry Páez dhe Andrey Santos, ndërsa dy talente të tjerë, Mastantuono dhe Lamine Yamal, nuk janë përfshirë, ndoshta sepse Messi nuk i ka konsideruar më si të rinj premtues për këtë vit.

Top 10 lojtarët më premtues sipas Lionel Messit:

Nico Paz

Kendry Páez

Rio Ngumoha

Mohamed Kader Meite

Clara Serrajordi

Brajan Gruda

Mika Godts

Andrey Santos

Lily Yohannes

Rodrigo Mora

/A.Z/UBT News/

Presidenti i FIFA-s, Gianni Infantino, ka vlerësuar lartë zhvillimin e futbollit në Kosovë, veçanërisht gjatë dhjetë viteve të fundit.

Ai tha se Kosova është shndërruar në një kundërshtar serioz, që shumë ekipe hezitojnë ta kenë përballë.

“Nëse shohim se sa shumë është përparuar futbolli në Kosovë që nga anëtarësimi në UEFA dhe FIFA, është diçka e jashtëzakonshme. Sot askush nuk dëshiron të luajë kundër Kosovës, sepse kanë frikë se do të humbasin. Ekipi është i fortë dhe keni tifozë në çdo cep të botës. Puna që po bëhet është e mrekullueshme,” u shpreh Infantino gjatë një interviste për ‘FFK Podcast’.

Kreu i FIFA-s shtoi se ndihet i nderuar dhe i emocionuar për çmimin që mori nga presidentja e Kosovës, Vjosa Osmani, duke theksuar se këtë vlerësim ia ka dedikuar Fadil Vokrrit, ish-presidentit të Federatës së Futbollit të Kosovës.

Sipas tij, Fadil Vokrri përfaqëson qëndrueshmërinë dhe forcën e popullit të Kosovës, duke lënë një trashëgimi që vazhdon të frymëzojë brezat e rinj të futbollistëve. /A.Z/UBT News/

Kristjan Asllani ka folur pas ndeshjes miqësore që Shqipëria zhvilloi ndaj Jordanisë, ku ai mbajti për herë të parë shiritin e kapitenit në moshën 23-vjeçare. Mesfushori kuqezi, i huazuar te Torino nga Interi me të drejtë blerjeje për 1.5 milionë euro, ndau emocionet e tij dhe foli për vendimin për t’u larguar nga zikaltërit.

“Jam shumë i lumtur për shiritin e kapitenit. Është një ndjenjë e veçantë që më kujton të gjitha sakrificat që kam bërë bashkë me familjen time. Trajneri më thirri në pushim dhe më dha shiritin, një gjest që do ta mbaj mend gjatë.”, tha ai.

Sa i përket miqësores ndaj Jordanisë, Asllani shtoi ishte një vazhdimësi e mirë e punës që bëmë kundër Serbisë.

I pyetur për situatën e tij te Torino, ai tha barazimi me Lazion ishte për t’u ardhur keq, sepse mund ta kishim fituar.

Në fund, Asllani foli edhe për largimin nga Interi.

“Sigurisht që më vjen keq, sepse lashë pas lojtarë të jashtëzakonshëm dhe një klub të madh. Por ishte vendimi i duhur për të dyja palët. Nëse do të kisha luajtur më pak, nuk do të ishte e drejtë as për mua, as për ta. Në Inter mësova shumë, u rrita profesionalisht dhe jam mirënjohës për këtë periudhë. Tani dua të jap gjithçka për Torinon dhe të tregoj se mund të arrij shumë më tepër.”/S.K/KP/