Lajmet nga UBT

Në UBT u shënua Dita Botërore e Lirisë së Shtypit

Paneli i diskutimi ishte i përbërë nga rektori i UBT-së, Prof. Dr. Edmond Hajrizi, dekani i Fakultetit Media dhe Komunikim, Prof. Dr. Ferid Selimi, drejtoresha e portalit “KultPlus”, Ardiana Pajaziti, gazetari nga “Betimi në Drejtësi”, Betim Musliu, profesorët e UBT-së, Gjylije Rexha, Musa Sabedini, Safet Zejnullahu dhe ish-studentja e UBT-së dhe gazetarja, Albina Zeneli.

Published

2 years ago

May 3, 2023

Betim Gashi

Në Ditën Botërore të Lirisë së Shtypit, në Parkun Shkencor Inovativ të UBT-së në Lipjan, Fakulteti Media dhe Komunikim organizoi një debat rreth temës: “Gazetaria e sotme në Kosovë – Sfidat dhe ballafaqimi”.

Rektori i UBT-së, Prof. Dr. Edmond Hajrizi tha se UBT ka krijuar dy elementë të rëndësishëm, një program arsimor për gazetarinë dhe një platformë të integruar brenda UBT-së, media grupin, duke nxitur kështu motivimin e studentëve, duke i ofruar një përvojë industriale para përfundimit të studimeve.

“Meqë UBT ka krijuar dy komponentë të rëndësishme, pjesën e edukimit për gazetarinë dhe qasjen në media të integruara brenda UBT, natyrisht është motivimi i parë është se kemi një sjellje industriale për studentët përpara se ata t’i kryejnë studimet. Mendoj që teknologjia e ka lehtësuar shumë pjesën e reagimit dhe për këtë arsye profesioni i gazetarisë e rrit nivelin. Gazetaria është një nga profesionet më komplekse, dhe një nga sfidat më të mëdha është të ngritet niveli i përgjegjësisë dhe ndërgjegjësimit. Gazetarët ende edhe sot kanë nevojë për përmirësime, që nga aspekti ekonomik, e deri te ai politik”, u shpreh rektori Hajrizi.

Dekani i Fakulteti Media dhe Komunikim në UBT, Prof. Dr. Ferid Selimi gjatë diskutimit me të pranishmit potencoi se me zhvillimin e teknologjisë kemi të bëjmë me robotizimin e gazetarisë dhe gazetarinë hulumtuese-automatizuese e cila nuk është e verifikueshme ose mund të jetë joprofesionale.

“Aktivitetet e informimit janë: mbledhja, vlerësimi, krijimi e paraqitja. Dy të parat kanë të bëjnë me besueshmërinë e burimeve gazetareske ndërsa dy të dytat me besimin aktual të perceptimit të përdoruesve të lajmit. Prandaj gazetaria e besueshme përmes Inteligjenca Artificiale duhet të ketë parasysh si prodhuesit edhe konsumatorët. Si audiencën e rregullt ashtu edhe kundërshtarët”, tha dekani Selimi.

Drejtoresha e portalit “KultPlus”, Ardiana Pajaziti, duke treguar për përvojën e saj si themeluese e një portali dhe angazhimin e saj për gazetarinë profesionale shprehu se gazetarët nuk duhet të udhëhiqen nga opinioni i masës.

“Ndjekja e trendit të mediave për të futur në një ombrellë të vetme edhe lajmin edhe showbizin është duke e bërë median jo të qëndrueshme. Duhet të mendojmë pak se çfarë po mbjellim në masë apo në opinionin publik dhe ju t’iu përshtatemi masës. Përderisa masa na udhëheq dihet rezultati”, potencoi Pajaziti.

Ndër të tjera, në kuadër të këtij diskutimi, profesoresha Gjylije Rexha potencoi se gazetarët duhet të fokusojnë vëmendjen te ushtrimi i të drejtës së lirisë së shtypit.

“Nga një perspektivë pak më ndryshe, sot më ka tërhequr shumë një konstatim i sekretari i Përgjithshëm i OKB-së, Antonio Guterres, që në titullin e materialit për shënimin e kësaj dite, lirinë e të shprehurit e vlerëson si shtytës për të gjitha të drejtat e tjera. Përderisa është e lidhur me to ajo mundëson realizimin e tyre. Për askënd prej nesh nuk paraqet as lajm e as risi nëse themi se sa të fuqishme e të rëndësishme janë mediat, gazetarët dhe roli i tyre shoqëror, gjithsesi në vendet në tranzicion pa traditë të lirisë së shtypit dhe pavarësinë e shtypit edhe në datat e rëndësishme ne duhet të fokusojmë vëmendjen te ushtrimi i kësaj të drejte”, ka thënë Rexha.

Gazetari nga emisioni “Betimi në Drejtësi”, Betim Musliu përmendi disa raste nga përvoja e tij dhe sfidat me të cilat ai është përballur gjatë ushtrimit të profesionit të gazetarisë, njëherit potencoi se sfidë e gazetarisë së sotme është zhvillimi i mediave alternative.

“Sot, për fat të mirë gjendja ka ndryshuar dhe nëse e shohim aspektin ligjor, Kosova është një ndër vendet që ka një legjislacion të avancuar për sa i përket lirisë së medias dhe ushtrimit të profesionit të gazetarisë. Sfidë në gazetarinë e sotme është zhvillimi i mediave alternative”, u shpreh Musliu.

Profesori Musa Sabedini tha se koncepti për ditën e 3 majit duhet të ndryshojë në kuptimin pozitiv duke u marrë me sfidat, pakënaqësitë dhe telashet reale që ka një gazetar apo një media për të kryer me sukses misionin e saj.

“Kjo në fakt edhe është arsyeja kryesore pse data 3 maj duhet të jetë datë e sensibilizimit, datë e përpjekjeve të vazhdueshme për ta ndryshuar media në kuptimin pozitiv, për të parë gabimet dhe të metat tona dhe për të ndikuar që kjo gjendje të ndryshojë gradualisht. Media e ka të drejtën të bëjë kritika, të merret me të tjerët, të flasë e shkruaj për të gjitha temat, të jap vlerësime, opinione, komente e këndvështrime nga më të ndryshmet, por gjithashtu media, mediat dhe gazetarët duhet edhe të jenë vetëkritik për punën e tyre të përditshme”, tha Sabedini.

Në linjë me këtë, edhe profesori Safet Zejnullahu në fjalën e tij porositi studentët dhe ushtruesit e profesionit të gazetarisë së të jenë dëgjues aktiv për të qenë profesionistë të kësaj fushe.

“Një porosi të shkurtër për ata që ushtrojnë dhe do të ushtrojnë profesionin e gazetarisë është se kurrë nuk dihet te cili folës në një panel do të dalë kreu i lajmit, për këtë një gazetar profesionist duhet të jetë dëgjues aktiv. Mendoj se sot, me gjithë ndryshimet teknologjike mediat duhet të jenë të profilizuara në të gjitha fushat”, potencoi Zejnullahu.

Ish-studentja, njëherit gazetarja Albina Zeneli tregoi rreth përvojave të saj gjatë ushtrimit të profesionit të gazetarisë dhe tha së është përpjekur gjithnjë të jetë në shërbim të komunitetit.

“Jam përpjekur që gjatë kësaj kohe të jem në shërbim të komunitetit. Të raportojë dhe të bëj gazetari profesionale. I falënderoi profesorët dhe rektorin e UBT-së për mbështetjen e parezervë dhe besoj se gjeneratat e reja do të jenë të gatshëm për sfidat e fushës së gazetarisë”, tha Zeneli.

Up Next

Studentët e UBT-së realizojnë vizitë studimore në KEK

Don't Miss

Studentët e Shkencave dhe Teknologjisë së Ushqimit në UBT zhvillojnë eksperimente të suksesshme në laboratorin e shkencave të ushqimit

Aktualitet

UBT prezanton modelin e parë Digital Twin të Kampusit Smart City në aktivitetin përmbyllës të projektit Evropian IoT-ECO në Sofia

Published

22 hours ago

September 25, 2025

Driton Iseni

Rektori i UBT-së, Prof. Dr. Edmond Hajrizi, së bashku me Prof. Dr. Besnik Qehaja, dekan i Fakultetit të Shkencave Kompjuterike dhe Inxhinierisë, dhe ekipin e UBT-së, po marrin pjesë në aktivitetin përmbyllës të projektit IoT-ECO, pjesë e programit Erasmus-LS, ERASMUS-EDU-2022-CBHE, i cili po mbahet në Technical University of Sofia, në Bullgari.

Ky projekt ndërkombëtar synon zhvillimin e modeleve inovative për Internet of Things (IoT) në fushën e ekonomisë së gjelbër, duke bashkuar ekspertë dhe akademikë nga universitete të ndryshme të rajonit dhe Evropës.

Në këtë aktivitet u prezantua modeli i parë real i Digital Twin Smart City Kampus në UBT, një inovacion unik i zhvilluar mbi infrastrukturën Smart City dhe teknologjitë e avancuara nga ekipi i UBT-së. Ky model digjital funksionon si një pasqyrim virtual i kampusit dhe qytetit, duke mundësuar ndërveprim në kohë reale.

Kjo teknologji rrit ndërveprimin dhe aftësinë për të reaguar shpejt ndaj situatave, si dhe kontribuon në përmirësimin e cilësisë së jetës, efikasitetit dhe sigurisë.

Rektori Hajrizi prezantoi gjithashtu UBT Hub, duke theksuar kontributin dhe avancimet e universitetit në integrimin e IoT në mjedisin akademik dhe industrial. Ai diskutoi rëndësinë e zhvillimit të infrastrukturës digjitale dhe bashkëpunimeve ndërkombëtare për fuqizimin e inovacionit dhe edukimit teknologjik në Kosovë, me theks të veçantë te modelet inovative që janë zhvilluar dhe implementuar në fushat e IoT, inteligjencës artificiale, smart cities, smart education, mjekësisë, etj.

Programi i ngjarjes përfshin prezantime mbi modelet virtuale të IoT, integrimin me cloud, aplikimet praktike në industri, si dhe sfidat e sigurisë kibernetike në rrjetet moderne inteligjente. Përveç pjesës akademike, aktiviteti ofron edhe vizita kulturore dhe ture në Sofia, duke krijuar hapësirë për shkëmbim përvojash dhe rrjetëzim ndërkombëtar.

Aktualitet

Në UBT diplomon ushtaraku i FSK-së, Major Vilson Musaj

Published

23 hours ago

September 25, 2025

Driton Iseni

Ushtaraku i FSK-së, Major Vilson Musaj, student në nivelin Master në Fakultetin e Politikave Publike dhe Menaxhimit në UBT, mbrojti me sukses tezën e tij me temë: “Rëndësia e regjimenteve të këmbësorisë në Forcën e Sigurisë së Kosovës – Një perspektivë strukturore: studim krahasimor (FSK, Ushtria Amerikane dhe NATO)”.

Ky punim, i cili u realizua me përkushtim të madh, i siguroi Major Musajt diplomën dhe gradën shkencore “Master në Politika Publike dhe Menaxhim”.

Komisioni vlerësues, i përbërë nga Prof. Dr. Hajdi Xhixha (kryetare), Prof. Dr. Arian Kadriu (anëtar) dhe Prof. Dr. Bahri Gashi (mentor), e vlerësuan këtë hulumtim si të parë në format dhe strukturën e tij në këtë fushë, duke e konsideruar si një punim serioz shkencor dhe mjaft kompleks.

Prezantimi i të gjeturave, argumentimi dhe krahasimi i hipotezave u vlerësuan me performancë të lartë akademike dhe notë maksimale, duke reflektuar një strukturë të qartë operacionale ushtarake dhe qasje profesionale në trajtimin e temës.

Major Vilson Musaj, i cili u gradua në këtë gradë më 1 korrik 2025, është emëruar Oficer për Bashkëpunim me ODC dhe Iowa (Office for Defense Cooperation – Zyra për Bashkëpunim të Mbrojtjes në Ambasadën Amerikane) në Departamentin për Bashkëpunim Ndërkombëtar dhe Integrime Euro-Atlantike në Ministrinë e Mbrojtjes. Ai vazhdon të shërbejë aktualisht në këtë departament të rëndësishëm, duke kontribuar në zhvillimin dhe integrimin e Forcës së Sigurisë së Kosovës.

Aktualitet

Policia, FSK-ja dhe Shërbyesit Civilë përfitojnë bursë 20 për qind në programet Master Shkenca Politike dhe Studime të Sigurisë në UBT

Published

1 day ago

September 25, 2025

Driton Iseni

UBT po ofron bursë 20 për qind në nivelin Master në programet Shkenca Politike dhe Studime të Sigurisë, për të gjithë kandidatët nga Akademia e Policisë, Forca e Sigurisë së Kosovës (FSK) dhe Shërbyesit Civilë.

Programi Master në Shkenca Politike ofron një mjedis akademik të avancuar, të orientuar drejt kërkimit shkencor dhe zhvillimit të mendimit kritik. Studentët pajisen me njohuri dhe aftësi për të adresuar sfidat politike në nivel lokal dhe ndërkombëtar, për të kontribuar në zhvillimin demokratik dhe për të ndikuar në politikëbërjen moderne. Ky program përgatit ekspertë, mendimtarë dhe liderë të rinj që promovojnë qeverisje efektive dhe procese demokratike.

Ndërkaq, programi Master në Studime të Sigurisë është i konceptuar për të përgatitur profesionistë të aftë të përballen me sfidat e sigurisë në kontekste kombëtare dhe ndërkombëtare. Ai trajton tema bashkëkohore si siguria kibernetike, kërcënimet hibride, terrorizmi, migrimi, gjeopolitika dhe siguria energjetike. Studentët zhvillojnë aftësi analitike dhe praktike për të krijuar strategji efikase në fushën e sigurisë dhe për të kontribuar në stabilitetin dhe qëndrueshmërinë e shoqërisë.

Të dy programet ofrojnë orare fleksibile, qasje praktike, staf akademik me eksperiencë ndërkombëtare dhe mundësi për mobilitete studimore në universitete partnere në Evropë dhe më gjerë.

UBT thekson se qëllimi i këtyre programeve është të fuqizojnë kapacitetet akademike dhe profesionale të studentëve, duke i pajisur ata me njohuri multidisiplinare që tejkalojnë standardet e industrisë dhe i përgatisin për karrierë ndërkombëtare, punësim në institucione vendore dhe globale, si dhe për vazhdim studimesh në nivel doktorature.

APLIKO TANI ONLINE për të përfituar bursën 20 për qind dhe për të qenë pjesë e gjeneratës së re të ekspertëve të politikës dhe sigurisë në Kosovë.

Aktualitet

UBT hap thirrjen për dorëzimin e abstrakteve për Konferencën Ndërkombëtare mbi Shëndetin Mendor dhe Mirëqenien (PSY 2025)

Published

2 days ago

September 24, 2025

Driton Iseni

UBT ka shpallur hapjen zyrtare të thirrjes për dorëzimin e abstrakteve për Konferencën Ndërkombëtare mbi Shëndetin Mendor dhe Mirëqenien (PSY 2025), e cila do të zhvillohet në kuadër të aktiviteteve të edicionit të 14-të të Konferencës Ndërkombëtare të UBT-së.

Kjo konferencë synon të bashkojë profesionistë, studiues, praktikues dhe studentë të psikologjisë, vendorë dhe ndërkombëtarë, për të ndarë përvoja, njohuri dhe ekspertizë mbi faktorët që ndikojnë në përmirësimin e shëndetit mendor, duke kontribuar si në komunitetin akademik ashtu edhe në praktikën profesionale.

Konferenca Ndërkombëtare mbi Shëndetin Mendor dhe Mirëqenien do të mbahet më 23, 24 dhe 25 tetor 2025, ndërsa tema kryesore e këtij viti është: “Shëndeti Mendor dhe Mirëqenia”. Ajo ka për qëllim të bashkojë studiues, edukatorë dhe profesionistë nga fusha të ndryshme, për të eksploruar dhe shkëmbyer ide mbi lidhjen mes shëndetit mendor dhe proceseve të rezistencës që mbështesin qëndrueshmërinë, inovacionin dhe mirëqenien mendore.

UBT mirëpret abstrakte që lidhen (por jo vetëm) me fushat e mëposhtme:

Aftësitë e rezistencës në komunitetet e margjinalizuara
Avancimet në kërkimin mbi sjelljen
Shëndeti mendor dixhital dhe epoka dixhitale
Baza biologjike e sjelljes njerëzore
Shëndeti mendor dhe pabarazia
Strategjitë e përballimit të stresit
Ndërgjegjësimi për shëndetin mendor

Konferenca do të mbahet në format hibrid, duke u lejuar pjesëmarrësve të marrin pjesë fizikisht në Kampusin e UBT-së ose online, duke ofruar fleksibilitet për kontribuesit vendorë dhe ndërkombëtarë. Pjesëmarrës në këtë ngjarje do të jenë hulumtues shkencorë nga SHBA-ja, Republika Çeke, Turqia, Shqipëria dhe Maqedonia e Veriut.

Datat e rëndësishme: