Lajmet nga UBT

Në UBT nisi punimet Konferenca Ndërkombëtare për Shkencë, Teknologji, Biznes dhe Inovacion

Rektori i UBT-së, Prof. Dr. Edmond Hajrizi në fjalën e tij hyrëse tha se ky organizim për të 11-tën herë tregon punën dhe angazhimin e gjithsecilit për të kontribuuar në shkencë, teknologji, biznes dhe inovacion, përmes hulumtimeve, punimeve dhe botimeve shkencore.

Published

on

Në një ceremoni solemne në Parkun Shkencor Inovativ të UBT-së është bërë hapja e edicionit të 11-të të Konferencës Ndërkombëtare për Shkencë, Teknologji, Biznes dhe Inovacion, në të cilën përmes sesioneve për fusha të ndryshme do të prezantohen punime shkencore të ekspertëve, profesorëve dhe studentëve vendorë dhe ndërkombëtarë.

Rektori i UBT-së, Prof. Dr. Edmond Hajrizi në fjalën e tij hyrëse tha se ky organizim për të 11-tën herë tregon punën dhe angazhimin e gjithsecilit për të kontribuuar në shkencë, teknologji, biznes dhe inovacion, përmes hulumtimeve, punimeve dhe botimeve shkencore.

“Ne kemi krijuar një kornizë të mirë për arsimin, kemi krijuar kornizë moderne të infrastrukturës, kemi një numrim të madh të njerëzve, ajo që na duhet është që të bëjmë më shumë drejt gjenerimit më të madh të punimeve dhe botimeve për fusha të ndryshme në vitet e ardhshme. Kjo konferencë është dëshmia më e mirë për kontributin dhe punën tonë në produktivitetin dhe kualitetin në dije përmes publikimeve dhe gjetjeve shkencore”, ka thënë rektori Hajrizi.

Rektori Hajrizi prezantoi rreth të arriturave të UBT-së në këtë drejtim, duke treguar potencialin e të gjeturave dhe hulumtimeve të ndryshme nga profesorët dhe studentët, si dhe radhitjen e punimeve të tyre në organizata dhe revista shkencore e inovative.

Profesori ndërkombëtar nga Universiteti i shkencave të Aplikuara në Vjenë, Ëerner Hadiger, duke vlerësuar këtë konferencë bëri një prezantim rreth ekonomisë dhe politikës së zhvillimit të qëndrueshëm, duke potencuar dallimet epistemologjike dhe hendekun midis ekonomisë dhe politikës së zhvillimit të qëndrueshëm.

“Zhvillimi i qëndrueshëm ka një rëndësi të madhe dhe plotëson nevojat e së tashmes dhe aftësinë e brezave të ardhshme për të përmbushur nevojat e tyre. Një proces në të cilin shfrytëzimi i përsëritjeve, drejtimi i investimeve, orientimi i zhvillimit teknologjik dhe ndryshimi institucional janë të gjitha në harmoni, e që rritin kështu potencialin aktual dhe të ardhshëm për të përmbushur nevojat dhe aspiratat njerëzore”, ka thënë profesori Hadiger.

Ndër të tjera, profesoresha Dr. Shannon Bruce – Ramaka, përmes një adresimi online foli dhe prezantoi rëndësinë e unifikimit të ekipeve për hulumtime të ndryshme dhe krijimit të proceseve që prodhojnë produkte më cilësore.

“Ekipet janë të vlefshme për punën në hulumtime dhe është shumë e dobishme që të kontribuohet në këtë drejtim. Ekipet krijojnë procese që e bëjnë më të sigurt dhe më cilësor prodhimin, duke bërë kështu që personat që përbëjnë ekipin të mësojnë nga njëri-tjetri”, ka thënë profesoresha Bruce – Ramaka.

Konferenca Ndërkombëtare për Shkencë, Teknologji, Biznes dhe Inovacion po vazhdon punimet dhe si qëllim kryesor ka lidhjen dhe ndërveprimin e shkencëtarëve me praktikues nga disiplina të ndryshme, në mënyrë që t’i bëjë ata të vetëdijshëm për arritjet e fundit në fusha të ndryshme kërkimore, si dhe t’iu ofrojë një vend dhe forum unik për të ndarë përvojat dhe idetë e tyre.

Aktualitet

UBT DO TË ORGANIZOJË FORUM AKADEMIK TË VEÇANTË NË KOSOVË NË NDER TË 250-VJETORIT TË AMERIKËS: “Nga Çlirimi te Lidershipi: Edukimi i Gjeneratës së Ardhshme përmes Partneritetit Kosovë–SHBA”

Published

on

By

Washington, DC — Projekti “America Inspires Freedom – The Kosovo Story” ka kënaqësinë të njoftojë se UBT, Partneri Kryesor Akademik i projektit, do të organizojë një forum akademik të veçantë më 29 qershor 2026 në Prishtinë, si pjesë e programimit zyrtar ndërkombëtar që shënon 250-vjetorin e Shteteve të Bashkuara të Amerikës.

Forumi, me titull “Nga Çlirimi te Lidershipi: Edukimi i Gjeneratës së Ardhshme përmes Partneritetit Kosovë–SHBA”, do të mbledhë studiues të njohur amerikanë, ekspertë të politikave publike, përfaqësues të komunitetit të veteranëve, studentë, profesorë universitarë dhe zyrtarë publikë për të diskutuar marrëdhënien e qëndrueshme ndërmjet Kosovës dhe Shteteve të Bashkuara, si dhe rolin e arsimit në formësimin e lidershipit demokratik për gjeneratat e ardhshme.

Ky aktivitet është pjesë e projektit më të gjerë “America Inspires Freedom: The Kosovo Story”, i cili u njoh zyrtarisht më herët gjatë këtij viti përmes Memorandumit të Mirëkuptimit të nënshkruar ndërmjet Fondacionit Shqiptaro-Amerikan dhe America250, Komisionit Amerikan për Shënimin e Çerek-shekullit të Pavarësisë së Amerikës. Përmes kësaj marrëveshjeje, Kosova u bë vendi i parë dhe i vetëm jashtë Shteteve të Bashkuara i përfshirë zyrtarisht në programimin ndërkombëtar të America250.

Rektori i UBT-së, Prof. Dr. Edmond Hajrizi, mirëpriti partneritetin dhe mundësinë për të organizuar këtë forum në UBT.

“UBT-ja është e nderuar të shërbejë si Partneri Kryesor Akademik i Projektit për Shënimin e 250-vjetorit të Amerikës në Kosovë dhe të organizojë këtë forum akademik të veçantë. Marrëdhënia ndërmjet Kosovës dhe Shteteve të Bashkuara është ndër partneritetet më të rëndësishme në historinë moderne të vendit tonë, ndërsa institucionet e arsimit të lartë kanë përgjegjësi të veçantë për të ruajtur dhe avancuar vlerat mbi të cilat është ndërtuar ky partneritet. Ne jemi krenarë që UBT do të kontribuojë në këtë iniciativë historike dhe do të ndihmojë në forcimin e themeleve intelektuale të partneritetit Kosovë–SHBA për vitet që vijnë”.

Faton Bislimi, Themelues dhe Drejtor i Projektit “America Inspires Freedom: The Kosovo Story”, theksoi rëndësinë e aktivitetit dhe rolin udhëheqës të UBT-së.

“250-vjetori i Amerikës ofron një mundësi të jashtëzakonshme jo vetëm për të festuar historinë amerikane, por edhe për të reflektuar mbi ndikimin e thellë që lidershipi, vlerat dhe miqësia amerikane kanë pasur për popullin e Kosovës. Pak kombe në botë mund të flasin për rolin e Amerikës në historinë e tyre me aq shumë mirënjohje dhe respekt sa Kosova. Jemi thellësisht të nderuar që kemi UBT-në si Partnerin tonë Kryesor Akademik në këtë iniciativë historike. Duke sjellë së bashku folës të shquar amerikanë dhe pjesëmarrës të tjerë të rëndësishëm, ky forum do të ndihmojë që gjeneratat e reja të kuptojnë si sakrificat që siguruan lirinë e Kosovës, ashtu edhe vlerat demokratike që duhet të udhëheqin të ardhmen e saj”.

Si partner i projektit, UBT do të organizojë një nga aktivitetet më të rëndësishme intelektuale dhe edukative të kësaj nisme, duke riafirmuar përkushtimin e kahershëm të universitetit ndaj inovacionit, vlerave demokratike, bashkëpunimit ndërkombëtar dhe ekselencës akademike.

Forumi do të trajtojë tema që lidhen me lirinë, demokracinë, lidershipin, përgjegjësinë qytetare, partneritetin transatlantik dhe mësimet që përvoja e Kosovës mund t’u ofrojë gjeneratave të ardhshme.

Continue Reading

Aktualitet

UBT në qendër të artit bashkëkohor: Ekspozitë me karakter ndërkombëtar në Austri në kuadër të Ditëve të Artit dhe Dizajnit

Published

on

By

Në kuadër të Ditëve të Artit dhe Dizajnit në UBT, është prezantuar një ekspozitë me karakter ndërkombëtar, e realizuar në Boden, Tirol të Austrisë, si pjesë e festivalit Mediafrische, në bashkëpunim me UBT.

Ekspozita vjen si rezultat i bashkëpunimit artistik ndërmjet profesorëve të UBT-së, Uran Krasniqit dhe Besfort Salihut, duke sjellë një qasje bashkëkohore që ndërthur artin, dizajnin dhe hulumtimin urban.

Ekspozita përbëhet nga dy projekte qendrore me koncept të thellë kritik dhe reflektues:

Projekti “Wear your city (Collective memory of Prishtina)” përfaqëson një hulumtim vizual dhe konceptual mbi arkitekturën e zhdukur dhe simbolet urbane të fshirë të Prishtinës. Përmes këtij projekti dokumentohet memoria kolektive e qytetit, duke i transformuar objektet dhe hapësirat e humbura në një narrativë artistike mbi identitetin urban dhe kujtesën historike.

Ndërkohë, projekti “Truth Absorbed” trajton temën e mjegullimit të së vërtetës në epokën bashkëkohore, duke reflektuar mbi mënyrën se si qytetari përballet me një realitet të transformuar, të fragmentuar dhe shpesh të paqartë në kontekstin e shoqërisë moderne.

Pjesëmarrja e studentëve dhe artistëve të lidhur me UBT-në në një festival ndërkombëtar si Mediafrische në Austri, dëshmon angazhimin e institucionit për ndërkombëtarizimin e artit dhe dizajnit, si dhe për krijimin e platformave ku talentet e reja mund të shprehin idetë e tyre në skenën globale.

Ky aktivitet konfirmon edhe një herë rolin e UBT-së si një qendër e rëndësishme e kreativitetit, inovacionit dhe bashkëpunimit ndërkombëtar në fushën e artit dhe dizajnit bashkëkohor.

Continue Reading

Lajmet

Profesori i UBT-së, Arian Kadriu pjesë e një publikimi shkencor në Fondazione Machiavelli mbi misionet e paqes

Published

on

By

Profesori i UBT-së dhe Prodekan i Fakultetit të Studimeve të Sigurisë, Arian Kadriu, ka publikuar një punim shkencor në bashkautori me gjeneralin Giuseppe Morabito, të titulluar “Gli italiani nella KFOR in Kosovo: un modello per le missioni di pace”, i botuar në Fondazione Machiavelli.

Punimi analizon rolin e misionit të KFOR-it në Kosovë pas luftës së vitit 1999, me fokus të veçantë kontributin e Italisë në operacionet e paqes, stabilitetit dhe rindërtimit institucional në Kosovë. Studimi trajton gjithashtu dimensionin civil-ushtarak (CIMIC), si dhe rëndësinë e bashkëpunimit me komunitetet lokale në ndërtimin e besimit dhe sigurisë afatgjatë.

Autori thekson se modeli italian në kuadër të KFOR-it paraqet një qasje të suksesshme të ndërthurjes së forcës ushtarake me ndjeshmërinë humanitare dhe bashkëpunimin civil, duke ofruar një shembull të rëndësishëm për misionet paqeruajtëse në të ardhmen.

Pjesëmarrja dhe kontributi akademik i Prof. Arian Kadriut në këtë publikim ndërkombëtar dëshmon angazhimin e tij në fushën e studimeve të sigurisë dhe rolin aktiv të UBT-së në debatet shkencore globale mbi paqen dhe sigurinë ndërkombëtare.

Continue Reading

lajme

Studentja e UBT-së, Adile Jashari, fiton çmimin e parë në Itali në ngjarjen prestigjioze të modës “Sotto il Cielo di Genzano 2026”

Published

on

By

Pesë studente të Departamentit të Dizajnit të Modës në UBT, të cilat përfaqësojnë gjeneratën e re të dizajnereve të Kosovës, prezantuan me sukses kreativitetin, talentin dhe vizionin e tyre në ngjarjen prestigjioze ndërkombëtare të modës “Sotto il Cielo di Genzano 2026”, të mbajtur në Romë, Itali. Përmes koleksioneve dhe koncepteve të tyre unike, ato përfaqësuan denjësisht UBT-në dhe Kosovën para një audience ndërkombëtare, duke dëshmuar potencialin e dizajnit kosovar në skenën globale.

Suksesi më i madh i kësaj pjesëmarrjeje u shënua nga studentja e UBT-së, Adile Jashari, e cila fitoi vendin e parë në kategorinë “Ricerca Stilistica” (Kërkim Stilistik), një çmim që vlerëson origjinalitetin, hulumtimin kreativ dhe qasjen inovative në dizajn.

Ky vlerësim i rëndësishëm e veçoi Adilen mes pjesëmarrësve nga vende të ndryshme të botës, duke konfirmuar nivelin e lartë profesional dhe kreativ të studentëve të UBT-së në arenën ndërkombëtare.

Në këtë aktivitet morën pjesë edhe katër studente të tjera të Departamentit të Dizajnit të Modës në UBT, të cilat prezantuan punimet e tyre para profesionistëve dhe dashamirëve të modës nga vende të ndryshme, duke promovuar talentin, kulturën dhe identitetin krijues të Kosovës.

Pjesëmarrja dhe suksesi i studentëve të UBT-së në “Sotto il Cielo di Genzano 2026” dëshmojnë përkushtimin e institucionit në zhvillimin e talenteve të reja dhe krijimin e mundësive që studentët të prezantohen dhe të vlerësohen në ngjarjet më prestigjioze ndërkombëtare të artit dhe dizajnit.

Continue Reading

Të kërkuara