Lajmet

“1 Tetori”: Rreth 1 mijë e 500 persona të vaksinuar

Published

5 years ago

April 16, 2021

Betim Gashi

Deri më tani vetëm në qendrën “1 Tetori” në Prishtinë, janë vaksinuar rreth 1 mijë e 500 persona.

Nga sot ka filluar edhe vaksinimi i personave nga 75 deri në moshën 79-vjeçare, ku është vërejtur edhe fluks më i madh i qytetarëve. Me dozën “AstraZeneca”, deri në mesditë janë vaksinuar 170 të moshuar, profesionistë shëndetësorë dhe ata me sëmundje kronike.

Koordinatori i kësaj qendre, Niman Bardhi ka thënë se sot ka fluks më të madh të personave, ndërkohë që thekson se ka pasur edhe profesionistë shëndetësorë të vaksinuar.

“Është një fluks që deri në orën 12:20, sipas statistikave që më kanë ofruar kolegët këtu nga tavolinat e vaksinimit, deri më tani janë të vaksinuar 170 persona. Ku prej tyre të sëmurë kronik janë 154. Ndërsa të tjerët janë profesionistët dhe prapë që kemi një grupmoshë dhe katër pacientë që janë në dializë. Aktualisht, sot procesi më voluminoz, por çdo gjë po ec mbarë e mirë. Akoma nuk kemi pasur dhe urojmë që të mos kemi ndonjë shqetësim prej këtyre personave që po vaksinohen”, theksoi Bardhi.

Bardhi ka treguar edhe për numrin e personave të cilët janë vaksinuar për gati tri javë në këtë qendër.

“Nga periudha kur kemi filluar me të moshuarit dhe tani me të sëmurit kronik, numri po shkon te 1 mijë e 500”, ka shtuar ai.

Ani pse nuk është duke trajtuar ndonjë sëmundje kronike, 77-vjeçarja Lirie Hana thotë se ishin fëmijët që e bindën për të marrë dozën e parë të vaksinës.

“Fëmijët shko nënë se unë nuk kisha ardhur se jam biologe, jam me shëndet të mirë. Vetëm me reumë jam, për atë nuk kisha ardh, të drejtën me thënë. Por kur më thanë që as në Shqipëri nuk mundesh me shkuar në deti, atëherë vendosa. E ndiej vetën shumë mirë”, tregon ajo.

Dikush tjetër ka vendosur vet që të sigurohet kundër COVID-19. Ilaz Berisha, i cili është 79-vjeçar tregon se nuk është frikësuar nga kjo vaksinë.

“Unë jam lajmëruar kaherë, e kam parë që e kanë publikuar adresën. Sot erdha e mora, mirë jam. Të shohim këtu e tutje”, tregon ai.

E 76-vjeçarja, Rabë Drenica para disa muajve ishte ballafaquar me koronavirusin. Ani pse nuk kishte pasur komplikime, thotë se ka vendosur që të sigurohet.

“Mirë, pasi po e marrin krejt edhe ne po marrim. Pak, shumë pak. As nuk kam pas temperaturë, as kam pas ethe. Veç kolli që më ka mbërthye”, thotë Drenica.

Në njoftimin e Ministrisë së Shëndetësisë thuhet se më 16, 17 dhe 18 prill në Prishtinë dhe komunat tjera do të vaksinohen personat e moshës 75-79 vjeç me sëmundje kronike, sipas listës së diagnozave të pacientëve me këto sëmundje.

Lajmet

Sekuestrohen armë dhe narkotikë në aksione policore në Kosovë

Published

17 minutes ago

June 4, 2026

UBTNews

Policia e Kosovës ka sekuestruar armë dhe substanca narkotike në disa aksione të zhvilluara në Graqanicë, Ferizaj dhe Vushtrri.

Në Graqanicë, gjatë një tentimi për kontroll policor, një i dyshuar është larguar duke ikur nëpër oborre shtëpish dhe duke hedhur sende gjatë arratisjes. Në vendngjarje, policia ka gjetur dhe sekuestruar një pistoletë me një fishek, si dhe një sasi të vogël të substancës së dyshuar narkotike. I dyshuari është arrestuar dhe më pas është liruar në procedurë të rregullt me vendim të prokurorit.

Në Ferizaj, njësitë policore kanë identifikuar një person të dyshuar për shitblerje të narkotikëve, i cili është larguar me veturë sapo ka vërejtur policinë. Në afërsi të vendit të ngjarjes është gjetur dhe sekuestruar 188.9 gramë substancë e dyshuar narkotike e llojit marihuanë, me vlerë rreth 2 mijë euro. I dyshuari është në kërkim policor dhe hetimet po vazhdojnë.

Në Vushtrri, është arrestuar një person tek i cili është gjetur një armë e gjatë M48 me tre fishekë. Arma është sekuestruar, ndërsa pas intervistimit, me vendim të prokurorit i dyshuari është liruar në procedurë të rregullt.

Lajmet

Dy të arratisur nga Qendra Edukuese Korrektuese kapen dhe kthehen në qendër

Published

18 minutes ago

June 4, 2026

UBT News

Në Lipjan, më 03.06.2026 rreth orës 21:28, është raportuar arratisja e dy personave nga Qendra Edukuese Korrektuese në Lipjan, pasi zyrtarët korrektues kanë njoftuar për largimin e tyre nga institucioni.

Pas pranimit të informatës, janë ndërmarrë menjëherë veprime taktiko-operative nga autoritetet përkatëse me qëllim lokalizimin dhe kapjen e të dyshuarve.

Si rezultat i veprimeve në terren, të dy personat janë identifikuar, janë kapur dhe më pas janë kthyer sërish në Qendrën Edukuese Korrektuese në Lipjan.

Rasti është menaxhuar nga institucionet përgjegjëse, ndërsa rrethanat e arratisjes mbeten nën trajtim.

Lajmet

Një polic u vra dhe një tjetër u plagos në Maliq të Shqipërisë

Published

28 minutes ago

June 4, 2026

UBTNews

Një ngjarje e rëndë është regjistruar në zonën e Lozhanit, në Bashkinë e Maliqit, në Shqipëri, ku një efektiv policie ka humbur jetën dhe një tjetër ka mbetur i plagosur gjatë një operacioni të forcave të rendit.

Sipas informacioneve paraprake, autori i dyshuar i sulmit është kapur i plagosur. Në vendngjarje kanë mbërritur forca të shumta policore dhe grupet hetimore, të cilat po punojnë për zbardhjen e plotë të rrethanave të ngjarjes.

Autoritetet pritet të japin detaje shtesë lidhur me dinamikën e incidentit dhe identitetin e personave të përfshirë.

Kryeministri i Shqipërisë, Edi Rama, ka reaguar pas ngjarjes së rëndë në Maliq.

Rama njoftoi se polici i vrarë në krye të detyrës, Enea Mekolli, do të shpallet “Dëshmor i Atdheut”, ndërsa shprehu ngushëllimet për familjen e tij dhe uroi shërim të shpejtë për efektivin tjetër të plagosur gjatë aksionit.

“Gjatë një operacioni kurajoz për kapjen e një të shumëkërkuari, që prej vitesh i fshihej ligjit në malet e Korçës, ka humbur jetën një efektiv policie dhe është plagosur një i dytë. Ndërkohë, pasi hapi zjarr ndaj tyre, u plagos dhe u kap edhe krimineli”, ka shkruar Rama.

Kryeministri theksoi se autori duhet të përballet me ndëshkimin maksimal të parashikuar nga ligji dhe vlerësoi angazhimin e Policisë së Shtetit në luftën kundër kriminalitetit.

“Nderim përjetë dëshmorit të atdheut, ngushëllime familjes dhe shërim të shpejtë efektivit tjetër. Ndëshkim maksimal për të shumëkërkuarin dhe respekt maksimal për Policinë e Shtetit, që nuk do të ndalet asnjëherë në misionin e saj”, u shpreh Rama.

Foto: Balkanweb.com

Lajmet

Dyshime për 338 euro të falsifikuara në Prishtinë

Published

32 minutes ago

June 4, 2026

UBT News

Sipas raportit të fundit të Policisë së Kosovës, është iniciuar një rast për falsifikim të parasë në Prishtinë, pas ekspertizës së kryer nga Agjencia e Kosovës për Forenzikë.

Në konsultim me prokurorin, më 3 qershor 2026 është hapur rasti pasi ekspertiza ka konstatuar se 338 euro në monedha dhe kartëmonedha të ndryshme dyshohet se janë të falsifikuara.

Paratë e dyshuara ishin dorëzuar në polici më 8 gusht 2024 nga një zyrtare e një banke private.

Autoritetet kanë bërë të ditur se hetimet po vazhdojnë nga ekipet përkatëse me qëllim të zbardhjes së plotë të rrethanave të rastit.