Instituti Kombëtar i Shëndetësisë Publike të Kosovës (IKShPK), ka dhënë udhëzime lidhur me Metapneumovirusin Njerëzor (hMPV), pas një rritje të mundshme të rasteve në disa rajone.

IKShPK në bashkëpunim me Zyrën e Organizatës Botërore të Shëndetësisë, në Kosovë ka ndarë informacione bazike me qytetarët me qëllim që të jenë të informuar dhe të rrisin masat e kujdesit parandalues.

Sipas IKSHPK-së hMPV ka më shumë gjasa të përhapet nga personi i infektuar tek të tjerët përmes: Pikave gjatë kollitjes dhe teshtitjes, kontaktit të ngushtë personal, si puthja, prekja ose shtrëngimi i duarve, prekja e objekteve ose sipërfaqeve që kanë virusin mbi to dhe më pas prekja e gojës, hundës ose syve.

Derisa IKSHPK thotë se simptomat përfshijnë kollë, ethe, kongjestion nazal dhe fishkëllimë.

“Shumica e rasteve të hMPV janë të lehta, me simptoma të ngjashme me të ftohtin e zakonshëm. Patogjenët respiratorë, përfshirë gripin sezonal, RSV dhe hMPV, mund të paraqesin rreziqe për personat më të ndjeshëm, përfshirë fëmijët e vegjël, personat me imunitet të dobësuar dhe të moshuarit”, thuhet tutje.

Ministri i Jashtëm i Turqisë, Hakan Fidan, deklaroi se eliminimi i luftëtarëve të Partisë së Punëtorëve të Kurdistanit (PKK) dhe të Njësive Kurde të Mbrojtjes së Popullit (YPG) në veri të Sirisë është “çështje kohe”. Gjatë një konference të përbashkët për shtyp me homologun jordanez, Ayman Safadi, ai theksoi se Ankaraja nuk do të tolerojë ekzistencën e këtyre grupeve në kufijtë veriorë të Sirisë.

“Situata në Siri ka ndryshuar. Eliminimi i PKK/YPG-së është një domosdoshmëri strategjike për sigurinë kombëtare të Turqisë dhe vetëm çështje kohe”, tha Fidan, duke konfirmuar përkushtimin e Turqisë për të vazhduar operacionet kundër këtyre grupeve.

Deklarata e tij vjen në një kohë tensionesh të rritura në rajon, ku fraksionet e mbështetura nga Turqia janë në përleshje të vazhdueshme me forcat kurde në veri të Sirisë. Ankaraja e konsideron YPG-në si një degë të PKK-së, grup i cilësuar si terrorist nga Turqia, BE-ja dhe SHBA-ja.

Fidan nënvizoi se Turqia nuk do të tolerojë asnjë politikë ndërkombëtare që do të lejonte ruajtjen e pranisë së YPG-së në rajon, duke shtuar: “Ne jemi të vendosur jo vetëm të shikojmë, por të veprojmë për të larguar çdo kërcënim të mundshëm nga kufijtë tanë.”

Kjo retorikë e ashpër reflekton strategjinë e Turqisë për të ruajtur një zonë të sigurt në kufirin e saj jugor, ndërkohë që përleshjet vazhdojnë të destabilizojnë Sirinë veriore./UBTNews/

Lideri i Partisë Demokratike, Sali Berisha, u paraqit sot në ambientet e SPAK për të zbatuar masën “Detyrim Parqitje” të vendosur nga Gjykata e Apelit e GJKKO. Berisha u prit nga mbështetës të shumtë, të cilët shprehnin solidaritetin e tyre, ndërsa lideri demokrat shfrytëzoi rastin për të akuzuar SPAK si një organizatë kriminale që, sipas tij, mbulon korrupsionin dhe krimet zgjedhore të qeverisë Rama. Në fjalën e tij, Berisha denoncoi neglizhencën ndaj dosjeve si ajo e McGonigal, aferat e inceneratorëve dhe përfshirjen e kryebashkiakut Erion Veliaj.

Berisha publikoi dokumente që, sipas tij, dëshmojnë implikime të rënda të ministrit socialist Taulant Balla në bashkëpunim me bandat e Elbasanit gjatë zgjedhjeve të vitit 2021. Ai akuzoi SPAK për amnistimin e këtyre rasteve dhe për mungesën e hetimeve ndaj krimeve të supozuara të përfshira në këto afera. Gjithashtu, ai përmendi mos hetimin e Ymer Lalës, të akuzuar për vrasje, duke e cilësuar këtë si një tjetër provë të dështimit të drejtësisë së pavarur.

Në përfundim, Berisha i drejtoi thirrje qytetarëve të bashkohen kundër, siç e quajti ai, kapjes së shtetit dhe drejtësisë nga qeveria Rama. Ai kritikoi kryeprokurorin Altin Dumani dhe prokurorët e tjerë të SPAK, duke kërkuar ndëshkimin e korrupsionit dhe hetime të paanshme. Deklaratat e Berishës vijnë në një kohë të tensionuar politike, duke ndezur më tej debatin për pavarësinë dhe integritetin e SPAK.

Qendra Kombëtare për Menaxhim Kufitar ka njoftuar se po vazhdojnë pritjet e gjata në pikë kalimin kufitarë në Merdarë.

Sipas të dhënave të publikuara në faqen e Ministrisë së Punëve të Brendshme, pritjet për dalje nga Kosova në pikën kufitare në Merdarë janë 180 deri në 200 minuta, derisa për të hyrë në Kosovë pritjet janë 03-05 minuta.

Pritje për dalje nga Kosova ka edhe te Dheu i Bardhë 50-60 minuta, derisa për hyrje në këtë pikë kufitare pritjet janë 05 minuta.

Sipas të dhënave të publikuara në faqen e Ministrisë së Punëve të Brendshme, në të gjitha pikat për hyrje në Kosovë janë të qeta ku pritjet janë 03 – 0-5 minuta.