Kupa e Botës 2026 pritet të mbledhë në Shtetet e Bashkuara të Amerikës, Kanada dhe Meksikë disa nga emrat më të mëdhenj të futbollit botëror. Megjithatë, turneu më prestigjioz i futbollit do të zhvillohet pa praninë e disa prej yjeve më të spikatur të momentit.

Sipas një renditjeje të publikuar nga Score 90, në mesin e 25 futbollistëve më të mirë që nuk do të marrin pjesë në Botërorin e ardhshëm gjenden emra të njohur si Khvicha Kvaratskhelia, Dominik Szoboszlai, Victor Osimhen, Gianluigi Donnarumma, Alessandro Bastoni, Rodrygo Goes, Sandro Tonali, Robert Lewandowski dhe Jan Oblak.

Arsyeja kryesore e mungesës së tyre lidhet me dështimin e kombëtareve përkatëse për të siguruar kualifikimin në turneun më të madh të futbollit. Kombëtare me traditë dhe cilësi si Italia, Polonia, Sllovenia, Nigeria, Gjeorgjia, Hungaria dhe Serbia nuk arritën të prenotojnë një vend në Botërorin 2026, duke lënë jashtë skenës më të madhe futbollistë që prej vitesh janë protagonistë në arenën ndërkombëtare.

Lista përfshin edhe disa prej talenteve më premtuese të futbollit aktual. Emra si Hugo Ekitike, Dean Huijsen, Estevao Willian dhe Joao Pedro po kalojnë një periudhë të shkëlqyer në nivel klubesh, por do të duhet të presin një tjetër mundësi për të realizuar ëndrrën e pjesëmarrjes në një Kupë Bote.

Mungesa e këtyre futbollistëve dëshmon edhe një herë se talenti individual nuk garanton gjithmonë praninë në një Botëror. Në futbollin e kombëtareve, suksesi varet nga performanca kolektive dhe rruga e gjatë e kualifikimeve, ku edhe yjet më të mëdhenj mund të mbeten jashtë nëse përfaqësueset e tyre nuk arrijnë objektivin.

Pavarësisht mungesës së tyre, emrat e përfshirë në këtë listë vazhdojnë të konsiderohen ndër futbollistët më të mirë në botë dhe pritet të mbeten protagonistë në arenën evropiane dhe ndërkombëtare edhe gjatë viteve në vazhdim.

Kapiteni i Zvicrës, Granit Xhaka, dhe bashkëlojtari i tij Ricardo Rodriguez kanë tërhequr vëmendjen e mediave zvicerane pas një momenti interesant gjatë qëndrimit të Kombëtares helvetike në Shtetet e Bashkuara të Amerikës.

Futbollistët zviceranë ndoqën një ndeshje bejsbolli në San Diego, ku në një moment u shfaqën në ekranin gjigant të stadiumit. Pikërisht atëherë, Xhaka dhe Rodriguez realizuan gjestin e shqiponjës dykrenare, simbol që lidhet ngushtë me shqiptarët.

Ky veprim nuk kaloi pa u vënë re nga mediat zvicerane. Mediumi Bluewin i kushtoi vëmendje të veçantë momentit, duke e lidhur gjestin me prejardhjen shqiptare të disa futbollistëve të përfaqësueses së Zvicrës dhe me rastet e mëparshme kur simboli i shqiponjës ka qenë në qendër të diskutimeve.

Lidhur me këtë situatë reagoi edhe Federata Zvicerane e Futbollit, e cila sqaroi rrethanat e gjestit dhe theksoi lidhjen e fortë që disa prej lojtarëve kanë me komunitetin shqiptar.

“Edhe në ndeshjen ndaj Australisë, një numër i madh tifozësh me rrënjë shqiptare ishin të pranishëm në stadium dhe mbështetën me entuziazëm Granit Xhakën dhe Kombëtaren e Zvicrës. Pas ndeshjes, Xhaka dhe disa lojtarë të tjerë ndanë autografe dhe realizuan fotografi me tifozët”, thuhet në komunikatën e federatës.

Federata shtoi se kapiteni zviceran shfrytëzoi rastin edhe më vonë për të përshëndetur komunitetin shqiptar.

“Në mbrëmje ai shfrytëzoi mundësinë për të përshëndetur sërish komunitetin shqiptar. Kjo nuk ndodhi në fushë dhe nuk ishte pjesë e ngjarjes sportive”, theksohet në reagimin e Federatës Zvicerane.

Xhaka, i cili prej vitesh mbetet një nga figurat më të rëndësishme të futbollit zviceran dhe një nga sportistët shqiptarë më të suksesshëm në arenën ndërkombëtare, vazhdon të gëzojë mbështetje të madhe nga komuniteti shqiptar kudo që luan.

Përfaqësuesja e Kosovës në volejboll për vajza ka përfunduar paraqitjen në turneun e parë të CEV Volleyball European League 2026, i cili u zhvillua në Bosnje dhe Hercegovinë.

Në ndeshjen e dytë të turneut, vashat e Kosovës u përballën me nikoqirin Bosnjën dhe Hercegovinën, duke treguar një paraqitje solide dhe një ngritje të vazhdueshme të nivelit të lojës gjatë gjithë takimit.

Pavarësisht humbjes me rezultat 3:0 në sete, volejbollistet kosovare rivalizuan denjësisht me kundërshtaret, veçanërisht në setin e tretë, ku luftuan deri në pikët e fundit.

Bosnja dhe Hercegovina – Kosova 3:0
(25:18, 25:22, 25:23)

Nën drejtimin e përzgjedhësit Lorik Ilazi dhe stafit teknik, Përfaqësuesja e Kosovës dëshmoi karakter, përkushtim dhe shpirt garues, duke lënë përshtypje pozitive me paraqitjen e saj në këtë turne.

Pas përfundimit të garave në Bosnje dhe Hercegovinë, “Dardanet” tashmë do ta përqendrojnë vëmendjen te turneu i dytë i CEV Volleyball European League 2026, i cili do të zhvillohet në Greqi.

Kosovën e presin edhe dy sfida të rëndësishme:

Kosova – Greqia
12 qershor 2026, ora 20:00

Portugalia – Kosova
14 qershor 2026, ora 20:00

Federata e Volejbollit e Kosovës ka shprehur mbështetjen e plotë për Përfaqësuesen e vajzave dhe shtabin teknik, duke u uruar suksese në vazhdim të garës dhe një përfaqësim sa më dinjitoz të Kosovës në CEV Volleyball European League 2026.

Skena tronditëse u regjistruan mbrëmjen e së dielës në ndeshjen miqësore mes Danimarkës dhe Ukrainës, kur mesfushori danez Christian Eriksen u rrëzua papritur në fushë, duke shkaktuar shqetësim të madh te bashkëlojtarët, tifozët dhe e gjithë bota e futbollit.

Incidenti ndodhi në minutën e 65-të të takimit, kur Eriksen humbi ekuilibrin dhe mbeti i shtrirë në tokë. Bashkëlojtarët reaguan menjëherë, duke sinjalizuar me urgjencë stafin mjekësor, i cili hyri në fushë për t’i dhënë ndihmën e parë.

Në një moment të mbushur me emocione dhe ankth, futbollistët danezë formuan një rreth rreth shokut të tyre të skuadrës për t’i ofruar privatësi ekipit mjekësor gjatë ndërhyrjes. Në stadium mbizotëroi heshtja, ndërsa mijëra tifozë prisnin me shqetësim lajme për gjendjen e lojtarit.

Sipas raportimeve të mediave daneze, atmosfera ishte jashtëzakonisht e rëndë, me disa lojtarë që nuk arritën t’i fshehin emocionet. Pas minutash pasigurie, erdhi lajmi që solli lehtësim për të gjithë. Federata Daneze e Futbollit konfirmoi se Eriksen ishte i vetëdijshëm dhe po merrte kujdesin e nevojshëm mjekësor.

Njoftimi u prit me duartrokitje të gjata nga tifozët e pranishëm, të cilët shprehën mbështetjen e tyre për futbollistin 34-vjeçar.

Për shkak të situatës së krijuar, ndeshja u ndërpre dhe nuk vazhdoi deri në fund. Në momentin e ndërprerjes, Danimarka ishte në epërsi 2-1 ndaj Ukrainës, por rezultati kaloi plotësisht në plan të dytë përballë shqetësimit për shëndetin e Eriksenit.

Mesfushori danez u transportua me ambulancë drejt spitalit për ekzaminime të mëtejshme, i shoqëruar nga familjarë dhe anëtarë të ekipit kombëtar.

Ngjarja riktheu menjëherë kujtimet e Euro 2020, kur Eriksen pësoi arrest kardiak gjatë ndeshjes mes Danimarkës dhe Finlandës. Rikthimi i tij i suksesshëm në futbollin profesionist pas asaj ngjarjeje dramatike e shndërroi atë në një simbol të forcës, kurajos dhe këmbënguljes në sport.

Bota e futbollit tani pret me shpresë lajme pozitive për gjendjen e njërit prej futbollistëve më të respektuar të gjeneratës së tij.