Lajmet

Mungon ministri Aliu, deputetët përplasen në Komisionin për mbikëqyrjen e financave publike

Në anën tjetër, deputetët e mazhorancës e arsyetuan mosprezencën e ministrit Aliu.

Published

1 year ago

February 20, 2024

Betim Gashi

Mungesa e ministrit të Infrastrukturës, Liburn Aliu për raportim në Komisionin për mbikëqyrjen e financave publike ka bërë që deputetët e pozitës dhe opozitës të përplasen në mbledhjen e së martës. Anëtarët e komisionit nga opozita e konsideruan papërgjegjësi të madhe mungesën e ministrit Aliu, siç thanë për të dytën herë radhazi, derisa e vlerësuan si shqetësues, madje ftuan prokurorinë të hetojë kontratat njëburimore në Ministrinë e Mjedisit, Planifikimit Hapësinor dhe Infrastrukturës. Në anën tjetër, deputetët e mazhorancës e arsyetuan mosprezencën e ministrit Aliu, megjithatë potencuan se nëse i njëjti nuk vjen javën e ardhshme, raportin do të dërgojnë për shqyrtim në seancë plenare.

Kryetarja e komisionit, deputetja e LDK-së, Hykmete Bajrami, tha se edhe në bazë të Raportit për Vendin nga BE-ja është vënë në pah se mbi 20 për qind të kontratave të prokurimit publik janë më tender një burimor.

“Unë po i referohem raportit të vendit të Komisionit Evropian, i cili është publikuar në fund të vitit 2023 dhe thotë se 20 për qind e kontratave të prokurimit publik nga qeveria, janë pa publikim të njoftimit për kontratë. Kjo nënkupton se janë tender njëburimor apo tender të negociuar”, tha ajo.

Megjithatë, deputetja e LVV-së, Mirlinda Tishukaj-Sadiku, tha se raporti i auditimit është i rëndësishëm dhe duhet të diskutohet në praninë e ministrit Aliu.

“Nuk është e vërtet se nuk iu është përgjigjur ftesave të komisionit tonë. E dyta, mendoj se është një raport i rëndësishëm për shkak se diskutohet për projekte që kanë filluar qysh në vitin 2018-2019, siç është rruga Plavë-Deçan, rruga Dollc-Gjakovë që është shumë me rëndësi me u përfundua. Do të kemi shumë pyetje për këto çështje sepse janë të rëndësishme dhe këto projekte duhet njëherë e përgjithmonë të përfundojnë. Po ashtu një çështje tjetër që është evidente në raport të Zyrës Kombëtare të Auditimit tek komentet e kam pa se ka shumë mospajtime nga ministria në lidhje me të gjeturat, që janë kontestuar në një masë të madhe”, theksoi ajo.

Më kritik u shfaq deputeti i PDK-së, Rashit Qalaj, i cili tha se në bazë të raportit shihen qartazi dobësitë në sistem sa i përket menaxhimit të punimeve në ndërtimin e rrugëve si dhe, siç tha legjitimitetit që po i bëhet keqpërdorimit të parasë publike.

“Është një papërgjegjësi e madhe e ministrit, pikërisht për shkak të arsyeve që përdorët ju edhe kryetarja, por edhe deputeti Korenica. Realisht kur ofrohen mundësitë për disa data të takimit dhe konfirmohet nuk mund të flasim për asnjë gjë tjetër, përveç se një dështim i ministrit që të jetë këtu. Ai mund të ketë arsye dhe takime të tjera, por çdo ministër e ka për obligim që t’i formalizojë agjendat në bazë të mbledhjes së komisionit…Raporti në mënyrë të qartë tregon praktikën që është duke u bërë, sidomos për çështjen e rrugëve që ndërtohen të reja, për dobësitë në sistem sa i përket menaxhimit të punimeve dhe një legjitimim që i bëhet keqpërdorimit parasë publike”, deklaroi Qalaj.

Në anën tjetër, deputeti tjetër i LVV-së, Halil Thaçi kërkoi që mos t’i bëhet gjyqi publik ministrit Aliu, mirëpo të pritet javën e ardhshme kur të jetë ai prezentë të sqarohen të gjitha paqartësitë.

“Unë jam ardhur këtu me shqyrtua raportin e auditimit, jo me ia bërë gjyqin ministrit. Jo me ia bërë gjyqin”, theksoi Thaçi, deputet i mazhorancës.

Mirëpo, atij i reagoi deputeti i PDK-së, Hajdar Beqa, i cili ftoi prokurorinë ta marrë këtë raport dhe siç tha t’ia bëjnë gjyqin ministrit Aliu për të gjitha keqpërdorimet në dikasterin që drejton.

“Unë nuk jam me ia bërë gjyqin ministrit. Por nëse ky raport shkon në prokurori. Fatmirësisht se pushtetet janë të ndara dhe jam shumë optimist se ky raport ka me shkua në prokurori dhe ftoj të merren me këtë raport dhe jam optimist se gjyqin kanë me ia bërë ata që duhet me ia bërë”, tha ai.

Pas debatit, anëtarët e komisionit u pajtuan që ta ftojnë sërish ministrin Aliu për raportim me datën 27 shkurt.

Related Topics:Hykmete Bajrami ldk seanca plenare

Up Next

KEK reagon ndaj protestës së ish-punëtorëve të sigurimit fizik: Nuk kanë kontratë pune

Don't Miss

Sanduloviq thotë se Vuçiq po punon kundër BE-së dhe NATO-s

Lajmet

MAShTI heton vendimin për drejtorin e ri të Institutit Albanologjik

Published

2 minutes ago

June 24, 2025

UBTNews

Ministria e Arsimit, Shkencës, Teknologjisë dhe Inovacionit (MAShTI) ka reaguar lidhur me një vendimmarrje të fundit të Këshillit Drejtues të Institutit Albanologjik, për të cilën shpreh shqetësim për procedurat e ndjekura.

Sipas MAShTI-t, më 23 qershor 2025, pa një njoftim paraprak, përmes emailit zyrtar ka pranuar njoftimin nga Instituti Albanologjik se më 20 qershor 2025 është mbajtur një mbledhje e Këshillit Drejtues. Në këtë mbledhje, përveç pikave të tjera, është vendosur për caktimin e ushtruesit të detyrës së drejtorit të Institutit Albanologjik në Prishtinë.

Ministria ka konfirmuar gjithashtu pranimin e një njoftimi zyrtar nga dy anëtarë të Këshillit Drejtues, të cilët kanë ngritur shqetësime për procedurën. Sipas tyre, mungesa e materialeve paraprake për shqyrtim ka bërë që ata të kërkojnë shtyrjen e mbledhjes, por kjo kërkesë nuk është marrë parasysh. Më tej, ata kanë theksuar se mbledhja është mbajtur pa kuorumin e nevojshëm, duke vënë në pikëpyetje legjitimitetin e vendimeve të marra.

MAShTI ka bërë të ditur se do të shqyrtojë me kujdes të gjitha informacionet dhe dokumentet zyrtare të pranuara lidhur me këtë proces dhe, në përputhje me kompetencat dhe mandatin ligjor, do të ndërmarrë veprimet e nevojshme. Ministria ka premtuar se për vendimin përfundimtar do të njoftohen institucionet përkatëse dhe zyrtarët përgjegjës./kp/

Lajmet

Tërmet në Shqipëri

Published

22 minutes ago

June 24, 2025

UBTnews

Lëkundje të forta tërmeti janë ndjerë në Shqipëri në orët e para të mëngjesit të sotëm.

Sipas Qendrës Sizmologjike (EMSC), tërmeti i parë me magnitudë 4.5 është regjistruar në ora 05:04, 16 kilometra në veriperëndim të Tiranës.

Pas këtij tërmeti janë regjistruar edhe lëkundje të tjera, por me magnitudë më të vogël, 2.2, 2.6 pastaj 3.0 dhe 3.4.

Ky i fundit është regjistruar në ora 05:45, 20 kilometra në veriperëndim të Tiranës.

Deri tani nuk është raportuar për të lënduar ose dëme materiale.

Lajmet

KQZ: Më 3 korrik fillon afati për përmirësimin e Listës Votuese dhe largimin e personave të vdekur

Published

19 hours ago

June 23, 2025

UBTnews

Komisioni Qendror i Zgjedhjeve ka njoftuar se periudha për kundërshtimin e pasaktësive në Listën Preliminare të Votuesve për Zgjedhjet Lokale për Kryetarë të Komunave dhe për Kuvende Komunale, do të fillojë më 3 korrik dhe do të përfundojë më 31 gusht 2025.

Gjatë kësaj periudhe 60 ditore, çdo person me të drejtë vote që nuk figuron në Listën Votuese, është caktuar gabimisht në qendër tjetër të votimit apo ka të dhëna të tjera të pasakta, mund të kërkojë nga KQZ rishikimin e saj: përmes platformës elekronike: https://qv.kqz-ks.org/sq, oseduke u paraqitur në Komisionin Komunal të Zgjedhjeve në komunën përkatëse.

Po ashtu, gjatë kësaj periudhe votuesi mund ta kundërshtojë pasaktësinë e Listës Preliminare të Votuese edhe për ndonjë emër të votuesit për të cilin pretendon se nuk duhet të figurojë në këtë listë, përfshirë edhe rastet kur në këtë listë figuron emri i ndonjë personi të vdekur. Në këtë rast, ankesa duhet të parashtrohet në Panelin Zgjedhor për Ankesa dhe Parashtresa.

Për të kundërshtuar pasaktësitë për Listën Preliminare të Votuesve, votuesi duhet të indentifikohet me njërin nga tri dokumentet: Letërnjoftim i vlefshëm; pasportë e vlefshme; leje e vozitjes e vlefshme.

Lajmet

Njësia A5 e TC Kosova A rikthehet në operim

Published

19 hours ago

June 23, 2025

UBTnews

Korporata Energjetike e Kosovës (KEK) njofton opinionin publik se sot, më 23.06.2025, njësia A5 e Termocentralit Kosova A është sinkronizuar me rrjetin elektroenergjetik rreth orës 10:03 të mëngjesit, duke shënuar një rikthim të suksesshëm në operim, pas realizimit të një sërë ndërhyrjesh dhe sanimesh teknike të domosdoshme.

Procesi i startimit të njësisë kishte filluar këtë mëngjes, pasi kishin përfunduar me sukses të gjitha ndërhyrjet e planifikuara, në kohë dhe me cilësi të lartë teknike.

Punimet e realizuara përfshijnë:

Sanimin e rrjedhjeve në ritejnxehëse (i përfunduar të premten);
Sanimin e rrjedhjeve në ekonomajzer (ngrohës i ujit) dhe në ekranet e kaldajës (i përfunduar të dielën);
Pastrimin me pompë presioni të ftohësve të hidrogjenit;
Pastrimin e komorave në hyrje të kondenzatorit;
Punime mirëmbajtëse në pajisjet e sistemit MRRK;
Pastrimin e kuotave rreth kaldajës nga materiale të huaja – për rritje të sigurisë dhe efikasitetit operacional.

Ky rikthim në operim konfirmon edhe një herë kapacitetin dhe gatishmërinë e ekipeve tona teknike, të cilat, me përkushtim profesional dhe koordinim të vazhdueshëm, siguruan një proces të suksesshëm dhe të qëndrueshëm të rikthimit të njësisë A5.

Kryeshefi Ekzekutiv i KEK sh.a., z. Gramos Hashani, ka falënderuar të gjithë punonjësit për angazhimin dhe përkushtimin e tyre:

“Edhe ky rast tregon përgjegjësinë që bartin punonjësit e KEK-ut, të cilët, edhe në ditë pushimi, nuk kursejnë as përpjekjet e as profesionalizmin për të mbështetur sistemin energjetik të vendit. Ju falënderoj për angazhimin dhe jam krenar për punën që keni bërë!”