Një grua ka raportuar në Policinë e Kosovës se është ngacmuar seksualisht nga një i moshuar në Lipjan. Sipas policisë, i dyshuari është larguar me veturë të panjohur.

“Ankuesja femër kosovare ka raportuar se është ngacmuar seksualisht nga një person i moshuar, i cili më pas është larguar me një veturë në drejtim të panjohur”, thuhet në raportin 24-orësh të policisë.

Rasti është regjistruar më 29.05.2024, rreth orës 12:25 dhe i njëjti është në procedurë hetimore.

Prokuroria Themelore e Prishtinës ka dhënë detaje rreth rastit të grupit “Albkings”, që shpërndante fotografi dhe ua merrte identitetet qytetarëve të Kosovës.

Kryeprokurori i Prokurorisë Themelore të Prishtinës, Zejnullaj Gashi, ka bërë të ditur se është mbyllur përfundimisht ky grup dhe deri me tani lidhur me këtë rast, janë arrestuar shtatë persona.

“Ju njoftoj se Prokuroria Themelore në Prishtinë në bashkëpunim me Policinë e Kosovës, Drejtorinë e Hetimeve të Krimeve Kibernetike ka arritur me sukses të gjurmojë, zbulojë dhe t’i arrestojë të gjithë kryerësit e veprës penale të vjedhjes së identitetit dhe kredencialeve nga neni 277 të Kodit Penal të Kosovës. Andaj, falë bashkëpunimit të ngushtë me qytetarët e Republikës së Kosovës kemi arritur që këtë rast delikat sa i përket identifikimit të kryerësve të veprës penale, kemi arritur t’i arrestojmë brenda një afati të shkurtër kohor dhe ky rast si i tillë, target i së cilës kanë qenë qytetarët e Republikës së Kosovës, duke cenuar rëndë integritetin moral të tyre sa i përket shpërndarjes së fotove, video-incizimeve intime të cilat kanë krijuar pasiguri tek qytetarët e Republikës së Kosovës. Sot i kemi diku shtatë persona të cilët i kemi në ndalim dhe jemi në fazën tjetër të vazhdimit edhe të zgjerimit të hetimit edhe për personat tjerë”, ka thënë Gashi në një konferencë për media.

Ndërsa edhe zëvendëskryeprokurorja, Elza Bajrami-Kastrati, e cila ka qenë edhe prokurore e këtij rasti, ka dhënë detaje rreth hetimeve dhe arrestimin e personave përgjegjës.

“Me 14 prill është lëshuar aktvendim për ndalimin e njërit prej administratorëve të AlbKings. I njëjti dyshohet për veprën penale vjedhja e identiteteve dhe kredencialeve. Me 23 prill, është ndaluar edhe personi i dytë i gjinisë femër, e përfshirë në këtë rast, duke qenë njëra nga administratoret e këtij grupi, ka kryer të njëjtën vepër si personi i parë. Me 23 maj, pas hetimeve të vazhdueshme, prokuroria ka arritur të lëshojë aktvendim për ndalimin e personit të tretë, saktësisht administratorit kryesor dhe themeluesit të grupit. Ndaj të njëjtit prokuroria ka parashtruar kërkesë për paraburgim dhe kjo është miratuar nga Gjykata. Me lejoni të theksoj se në saje të bashkëpunimit të Prokurorisë, Policisë dhe qytetarëve kemi arritur t’i identifikojmë dhe arrestojmë shtatë persona të përfshirë në këtë rast penal”, theksoi Bajrami-Kastrati.

Ajo theksoi se Prokuroria Themelore në Prishtinë është duke hetuar edhe në pista tjera këtë rast.

Qeveria suedeze thotë se do të dhurojë 13 miliardë korona (1.23 miliardë dollarë) ndihmë ushtarake për Ukrainën, ndërsa Kievi po përballet me vonesa të shumta të ndihmës ushtarake perëndimore në vitin e tretë të pushtimit të plotë të Rusisë.

Zëvendëskryeministrja suedeze, Ebba Busch tha të mërkurën se paketa e ndihmës “përbëhet nga pajisje që janë në krye të listës prioritare të Ukrainës” si mbrojtja ajrore, municionet e artilerisë dhe automjetet e blinduara.

Ministri i Mbrojtjes, Pal Jonsson përsëriti se Suedia për momentin e ka përjashtuar mundësinë e dërgimit të ndonjë aeroplani JAS 39 Gripen të prodhimit suedez në Ukrainë, duke thënë se fokusi nga pala ukrainase është në zbatimin e një programi të avionëve luftarakë F-16.

Dhurimi përfshin gjithashtu dy avionë paralajmërues të hershëm dhe kontrollues SAAB ASCC të prodhimit suedez, të cilët Jonsson tha se do të kishin “efektin më të madh në mbrojtjen ajrore të Ukrainës”, sepse do të plotësonin dhe përforconin donacionet e premtuara të F-16-ve amerikanë./UBTNews/

Këshilltari i sigurisë kombëtare i Izraelit thotë se lufta e vazhdueshme në Gaza mund të zgjasë deri në fund të vitit.

Në një intervistë për transmetuesin publik izraelit Kan, të mërkurën Tzachi Hanegbi tha se “ne presim edhe shtatë muaj të tjerë luftë” për të shkatërruar aftësitë ushtarake dhe qeverisëse të Hamasit dhe grupit më të vogël të Xhihadit Islamik Palestinez (PIJ).

Deklaratat e tij erdhën pasi Izraeli po izolohet çdoherë e më shumë në skenën botërore. Hanegbi mbrojti operacionet e vazhdueshme të Izraelit në Rafah, në kufirin e Gazës me Egjiptin, duke thënë se kufiri është bërë një “mbretëri kontrabande” që nga viti 2007, kur Hamasi filloi të qeverisë Gazën.

“Çdo raketë, çdo mjet shpërthyes, çdo e shtënë ndaj Izraelit është për shkak se ai kufi është thyer”, tha ai.

Të mërkurën mbrëma, një zëdhënës ushtarak i Izraelit tha se ushtria ka marrë “kontrollin operacional” mbi korridorin e ngushtë të aksit të Filadelfisë, një zonë tampon midis Egjiptit dhe Gazës që u krijua si pjesë e traktatit të paqes të vitit 1979 midis Izraelit dhe Egjiptit./UBTNews/