Një dokumentar i ri pretendon se ka zbuluar identitetin e vërtetë të shpikësit të Bitcoin, një mister që ka mahnitur internetin që nga lansimi i monedhës dixhitale në 2009 nga personi ose personat e panjohur që e quanin veten Satoshi Nakamoto. Krijuesit e dokumentarit, “Money Electric: The Bitcoin Mystery”, thonë se eksperti kanadez i kriptomonedhës, Peter Todd, është Satoshi.

Sidoqoftë, zoti Todd e ka hedhur poshtë këtë teori si “qesharake”. Ai u përball me regjisorin Cullen Hoback, i cili i paraqiti provat e tij dhe e pyeti nëse ai ishte personi pas shpikjes së kësaj monedhe me vlerë trilion dollarësh. Pas këtij takimi, Todd postoi në rrjetet sociale: “Unë nuk jam Satoshi Nakamoto.”

Peter Todd – fotografi nga faqja e tij në GitHub.

Intriga rreth Satoshit është e fortë jo vetëm për shkak të misterit të identitetit të tij, por edhe për pasurinë e madhe që ai ka grumbulluar. Nëse Satoshi do të kishte ende kontroll mbi portofolin e tij të Bitcoin-it, sot ai do të kishte rreth 69 miliardë dollarë, duke e renditur atë si personin e 20-të më të pasur në botë, përcjellë UBTNews.

Peter Todd është një zhvillues i njohur i Bitcoin-it dhe ka kontribuar në shumë inovacione për këtë kriptomonedhë. Megjithatë, ai kurrë nuk është përmendur si një kandidat kryesor për identitetin e Satoshit deri tani.

Përpara publikimit të dokumentarit, më shumë se 44 milionë dollarë ishin vendosur në baste në uebsajtin Polymarket mbi identitetin e Satoshit. Cullen Hoback, i cili ka tentuar më parë të demaskojë figura anonime si Q nga Q Anon, arriti në përfundimin e tij pas vitesh kërkimesh. Një nga provat që ai paraqet është një postim në forum nga Peter Todd që duket se lidhet me Satoshi.

Një teori kryesore është se Satoshi ka shkatërruar qëllimisht aksesin në sasinë e tij të madhe të Bitcoin-it, e cila kurrë nuk është shpenzuar ose transferuar. Megjithatë, Todd ka thënë se ishte “shumë i zënë me shkollën dhe punën” për të qenë i përfshirë në shpikjen e Bitcoin-it.

Në të kaluarën, disa individë janë cilësuar si krijues të Bitcoin-it. Në 2014, një artikull në Newsweek identifikoi Dorian Nakamoto si Satoshi, por ai e mohoi këtë. Një vit më vonë, Craig Wright pretendoi se ishte Satoshi, por pretendimet e tij u përjashtuan nga komuniteti.

Edhe miliarderi i teknologjisë Elon Musk mohoi se kishte ndonjë lidhje me Bitcoin-in. Për disa nga zhvilluesit e Bitcoin-it, mbajtja e identitetit të Satoshit të fshehtë është një pjesë e rëndësishme e tërheqjes dhe fuqisë së kësaj kriptomonedhe. Adam Black, një zhvillues tjetër dhe kandidat i mundshëm për Satoshi, postoi para dokumentarit: “Askush nuk e di se kush është Satoshi, dhe kjo është një gjë e mirë.”