Lajmet

Ministrja gjermane e Evropës bën vizitën e parë në Maqedoninë e Veriut dhe Shqipëri

Në qendër të bisedimeve do të jetë integrimi i dy vendeve në BE, por edhe mbrojtja e klimës.

Published

on

Ministrja gjermane e Evropës, Anna Lührmann, viziton për herë të parë Maqedoninë e Veriut dhe Shqipërinë. Siç bëhet e ditur nga një njoftim të ministrisë së jashtme gjermane, politikania e gjelbër do të takohet të hënën (17.01)  në Shkup me presidentin e Maqedonisë së Veriut, Stevo Perandovski, kryeministrin e emëruar, Dimitar Kovaçevski (LSDM), zëvendëskryeministrin e emëruar, Bojan Mariçiq, ministrin e jashtëm, Bujar Osmani (BDI), si edhe me përfaqësues të shoqërisë civile. Në Shqipëri, ministrja e re gjermane do të takohet të martën (18.01) me kryeministrin Edi Rama (PS) dhe me zëvendësministren e jashtme, Megi Fino. Veç përfaqësuesve të shoqërisë civile, ministrja do të takohet edhe me Albert Hanin, kryetarin e Byrosë Rajonale të Bashkëpunimit Rinor (RYCO).

Vijimësi me fokus të ri

Në qendër të bisedimeve do të jetë integrimi i Maqedonisë së Veriut dhe Shqipërisë në rajon si edhe reformat e brendshme. Sipas një deklarate të ministrisë së jashtme gjermane, Lührmann u shpreh para nisjes për çeljen e negociatave: “Të dyja vendet i kanë plotësuar kushtet, prandaj duhet të fillojnë menjëherë konferencat ndërqeveritare. Ne e mbajmë fjalën. Për vijimin e rrugës drejt BE-së mbetet vendimtare që të vijojnë reformat dhe mirëqeverisja”, citohet në njoftimin e lartëpërmendur të ketë thënë ministrja të dielën (16.01.) në mbrëmje në Berlin. Në Tiranë, ministrja gjermane do të bisedojë edhe për rolin e Shqipërisë si anëtare e Këshillit të Sigurimit të OKB-së.

Lührmann mbetet kështu tërësisht në vijën e paraardhësit të saj, Michael Roth, nga Partia Socialdemokrate, i cili tashmë është kryetar i Komisionit Parlamentar për çështje të Bashkimit Evropian, Roth ia dorëzoi postin Lührmann-it, pas formimit të koalicionit të ri, kur Ministria e Jashtme gjermane kaloi në dorë të të Gjelbërve. 

Ashtu sikurse paraardhësi i saj, edhe Lührmann pritet të jetë avokate e fortë e rajonit në BE, por edhe të adresojë në biseda dypalëshe problemet e mundshme. Një nga çështjet që do të jetë temë e bisedimeve me shoqërinë civile në Tiranë është mbrojtja e klimës, i thanë DW burime të Ministrisë së Punëve të jashtme të Gjermanisë.

Hidrocentrali i Fierzës në Shqipëri – Një nga temat e politikës së jashtme të Gjermanisë do të jetë edhe mbrojtja e klimës

Maqedonia e Veriut dhe Shqipëria janë dy vendet e para, pas Francës në dhjetor, që ministrja gjermane e Evropës i viziton që kur ka ardhur në detyrë në dhjetor të vitit të kaluar. Një dëshmi kjo, që qeveria e re mes të gjelbërve, socialdemokratëve dhe liberalëve, sikurse e ka shprehur dhe në marrëveshjen e koalicionit, e merr seriozisht perspektivën evropiane të rajonit.Qysh në pjesëmarrjen e saj të parë në takimin e rregullt të Këshillit të Ministrave të Evropës, që u mbajt në 14 dhjetor në Bruksel, Lührmann kërkoi fillimin e konferencave ndërqeveritare me dy vendet.

Politikë që në moshën 10-vjeçare

Anna Lührmann është 38 vjeçe dhe emërimi i saj në postin e Ministres së Evropës, një post ky pa portofol, ishte vendim i ministres së Jashtme Annalena Baerbock. Më parë ajo ishte profesore në Gëteborg, por politikën e ka nisur qysh në moshë të re. Në vitin 2002, në moshën 19-vjeçare, ajo ka qenë deputetja më e re në moshë e Bundestag-ut Gjerman. Në një intervistë të asaj periudha ajo kishte thënë se kishte marrë pjesë në diskutime politike qysh në moshën 10-vjeçare. Anna Lührmann, ka qenë në vitin 2002, deputetja më e re e Bundestagut

Lührmann e ka filluar karrierën politike që në moshë të re, dhe në vitin 2002, në moshën 19 vjeçare ajo ka qenë deputetja më e re në moshë e Bundestag-ut Gjerman.

Pas dy legjislaturash të suksesshme për partinë e gjelbër, në njërën prej të cilave si anëtare e Komisionit Parlamentar për Çështje të Jashtme, në vitin 2009 ajo shkoi në Sudan, së bashku me të bijën dhe të shoqin, i cili është ambasador. Në këtë periudhë iu përkushtua më shumë karrierës shkencore, si politologe. Ndër të tjera doktoroi në Universitetin e Gëteborgut, në institutin “Varieties of Democracy” (V-Dem), ku më pas do të merrte edhe titullin profesore junior dhe docente. DW

Continue Reading

Lajmet

Krasniqi: Letra e Abdixhikut nuk është në frymën multietnike të Kosovës

Published

on

By

Partitë e komuniteteve jo-shumicë në Kosovë kanë kritikuar propozimin e kreut të LDK-së, Lumir Abdixhiku për qeveri tranzicionale. Deputeti Elbert Krasniqi tha se ai i ka ftuar vetëm subjektet politike shqiptare, duke i përjashtuar përfaqësuesit e komuniteteve jo shumicë në Kosovë. Sipas tij, kjo është qasje përjashtuese dhe jo në frymën multietnike të Kosovës.

Ne përfaqësuesit e subjekteve politike të komuniteteve jo-shumicë në Kosovë, jemi si zakonisht për formimin e institucioneve sa më parë dhe sa më shpejt, në mënyrë që të ketë stabilitet dhe qëndrueshmëri përfaqësimi edhe në Kuvendin e Kosovës por edhe në Qeverinë e Kosovës. Po i përcjellim me vëmendje krejt këto zhvillimet e fundit edhe na duhet t’i themi dy gjëra që ne si parti politike të bashkuar në një grup politik kemi një vërejtje të madhe në deklaratën për media të zotëri Lumir Abdixhiku i cili i bën thirrje vetëm subjekteve politike shqiptare edhe përjashton përfaqësuesit e komuniteteve jo shumicë në Kuvendin e Kosovës. Jo nga fakti që po presim një ftesë për të ju përgjigj, mirëpo kjo qasje përjashtuese nuk është në frymën e Republikës së Kosovës, nuk është frymën multietnike të Kosovës dhe për këtë duhet të kemi një vërejtjeje të drejtpërdrejt”, tha ai.

Ai kritikoi edhe stagnimin që e ka përmendur Abdixhiku në këtë letër, për çka tha se për herë të parë ka gjithëpërfshirje të komuniteteve në qeveri.

Lidhja Demokratike e Kosovës (LDK) ka refuzuar koalicionin qeverisës me Lëvizjen Vetëvendosje, derisa ka kërkuar një qeveri tranzicionale deri në zgjedhjen e presidentit të vendit në vitin 2026.

Continue Reading

Lajmet

Limaj: Ka lëvizje, të shohim se si po shkojnë zhvillimet në seancë

Published

on

By

Kryetari i Nismës Socialdemokrate, Fatmir Limaj tha se fillimisht do të shohin se si po shkon seanca  marr parasysh lëvizjet e fundit që kanë ndodhur.

Deputetët e Kuvendit të Kosovës janë mbledhur sot në përpjekjen e dymbëdhjetë për konstituimin e institucionit ligjvënës.

Derisa partitë politike nuk po arrijnë marrëveshje, procesi ka ngecur për shkak të mospajtimeve mes partisë që doli e para në zgjedhje (koalicioni Lëvizja Vetëvendosje, Guxo dhe Alternativa) dhe të tjerave (PDK, LDK dhe AAK), lidhur me emrin e kryetarit të Kuvendit. Kjo situatë ka bërë që 11 seanca të mëparshme të dështojnë.

Për të zhbllokuar situatën, kryetari i Vetëvendosjes, Albin Kurti, i ka dërguar një letër kryetarit të LDK-së, Lumir Abdixhiku, duke i ‘shtrirë dorën’ për bashkëpunim dhe duke propozuar hyrjen në një koalicion qeverisës.

Ndërkaq, Abdixhiku i është përgjigjur Kurtit gjatë ditës së djeshme përmes një letre, në të cilën propozon formimin e një qeverie tranzicionale me pjesëmarrjen e të gjitha partive politike në vend.

Limaj i pyetur nëse do t’i përgjigjet pozitivisht kërkesës së kreut të LDK-së, Lumir Abdixhiku tha shkurt se prej fillimit janë deklaruar pro takimeve.

Të shohim se si po shkojnë zhvillimet në seancë, a ka lëvizje, të shohim çfarë lëvizje. Nuk do të thotë se të gjitha lëvizjet shkojnë në drejtim të duhur  por megjithatë ka një lëvizje… Ka pasur letra prej pardje, ka pasur komunikime me letra… E kemi thënë prej fillimit, jemi për takime”, tha ai para fillimit të seancës konstituive.

Kreu i Nismës, Fatmir Limaj  theksoi se do ta jap një deklarim më të gjatë për medie pas përfundimit të seancës.

Continue Reading

Lajmet

Ambasada amerikane në Tiranë mesazh për zgjedhjet e 11 majit

Published

on

By

Ambasada amerikane në Tiranë ka shpërndarë një mesazh vetëm 4 ditë para zgjedhjeve të 11 majit në Shqipëri, duke inkurajuar zgjedhësit që të votojnë pa frikë.

Mos lejo të tjerët të flasin për ty. Vota jote është vetëm e jotja. Voto pa frikë”, thuhet në mesazhin e ambasadës amerikane.

Më 11 maj Shqipëria voton për zgjedhjet e përgjithshme nga do të dalë Parlamenti dhe qeveria e re.

Continue Reading

Lajmet

Kuvendi nuk konstituohet as në përpjekjen e 12-të

Published

on

By

Deputetët kanë dështuar të konstituojnë Kuvendin e Kosovës edhe në përpjekjen e 12-të. Kryesuesi i seancës, Avni Dehari i LVV-së, sërish insistoi që zgjedhja e kryetarit të Kuvendit të ndodh përmes votimit të fshehtë.

Dehari kërkoi nga partitë politike të propozojnë emrat për formimin e komisionit verifikues, mirëpo PDK, LDK, Lista Serbe dhe AAK dhe Nisma nuk iu përgjigjen pozitivisht kësaj ftese. Në sallë të pranishëm ishin 113 deputetë.

Seanca konstituive e Kuvendit të Kosovës ka nisur më 15 prill dhe procesi ka ngecur te zgjedhja e kryeparlamentarit pasi LVV-ja nuk po arrin të sigurojë 61 votat e nevojshme për kandidaten e tyre Albulena Haxhiu.

Seanca u ndërpre dhe Dehari tha se vazhdimi do të bëhet më 9 maj.

Continue Reading

Të kërkuara