Një paralajmërim urgjent është lëshuar nga FBI për përdoruesit e telefonave celularë, pas një vale të re mashtrimesh që po qarkullon përmes mesazheve SMS, duke vënë në shënjestër si përdoruesit e iPhone ashtu edhe ata të Android.

Këto mesazhe, që pretendojnë të vijnë nga Departamenti i Transportit, përmbajnë fraza alarmante si “e papaguar” apo kërcënime për pezullimin e lejes së drejtimit. Rritja e këtij lloj mashtrimi është përshkruar si “alarmante”, me rritje prej mbi 700% vetëm në muajin e fundit.

Përdoruesve u kërkohet të klikojnë në një lidhje që të çon në faqe që duken zyrtare, por janë të krijuara për të vjedhur të dhëna personale dhe financiare.

Qendra për Ankesat për Krimet Kibernetike e FBI-së (IC3) ka konfirmuar se termi “ e papaguar” është i zakonshëm në raportimet që ka marrë kohët e fundit, çka tregon për një rrjet mashtruesish të mirëorganizuar që vepron në disa shtete amerikane,Nju Jork, Kaliforni, Florida, Teksa dhe Xhorxhia.

Komisioni i Automjeteve Motorike në Nju Xhersi ka reaguar, duke kujtuar qytetarët se nuk dërgon kurrë SMS apo email për gjoba apo shërbime tjera të lidhura me automjetet. Komunikimet zyrtare kufizohen vetëm në përkujtesa për takime.

Autoritetet rekomandojnë që publiku të mos hapë asnjë lidhje nga mesazhe të pakërkuara e të fshijë menjëherë çdo komunikim të dyshimtë që:

Kërkon pagesa urgjente apo gjoba,

Pretendon të vijë nga institucione shtetërore,

Përmban linke të dyshimta që imitojnë faqet qeveritare,

Përdor tone kërcënuese apo urgjencë të rreme.

Nëse dyshoni për ndonjë mesazh të tillë, mos veproni menjëherë. Verifikoni përmes kanaleve zyrtare dhe mos ndani asnjë informacion personal apo bankar.

Marka suedeze bëhet prodhuesi i parë i makinave që fut çelik të ricikluar me emetim zero në prodhimin serik të automjeteve.

Volvo Cars ka nënshkruar kontratë me prodhuesin suedez të çelikut SSAB, për të furnizuar çelik të ricikluar me emetime zero të dioksidit të karbonit, me dërgesa që fillojnë këtë vit. Materiali i ri do të përfshihet në SUV-in elektrik EX60, si dhe në modele tjera të bazuara në platformën e re mekanike SPA3.

“Çeliku është përgjegjës për rreth 25 përqind të emetimeve totale të materialit në një makinë të re Volvo”, tha Francesca Gamboni, drejtoresha e zinxhirit të furnizimit të kompanisë.

Çeliku i furnizuar nga SSAB zvogëlon emetimet e CO₂ me 100% krahasuar me çelikun konvencional, duke ruajtur të njëjtën forcë dhe siguri. Volvo planifikon të arrijë emetime neto zero të dioksidit të karbonit deri më 2040, qëllimi për 2030 është të zvogëlojë emetimet për automjet me 65 deri në 75 përqind.

30 përqind e materialeve duhet të riciklohen, modelet e reja nga 2030 do përmbajnë 35 përqind komponentë të ricikluar. Volvo forcon më tej pozicionin e saj si lider në transformimin e qëndrueshëm të industrisë së automobilave.

Volkswagen ka zbuluar versionin përfundimtar të taksisë autonome ID. Buzz AD, që pritet të fillojë përdorimin në Evropë dhe SHBA nga viti 2026.

Kjo veturë është e nivelit 4 të autonomisë, duke mundësuar drejtimin vetë pa ndërhyrje të njeriut, por me mundësi kontrolli manual në rast nevoje.

Teknologjia autonome e zhvilluar nga Mobileye përdor 27 sensorë, përfshirë kamera, LIDAR dhe radarë, për të krijuar një pamje 360-gradëshe të ambientit.

ID. Buzz AD përdor platformën MOIA për menaxhimin e flotës dhe asistencën ndaj pasagjerëve.

Volkswagen synon të ofrojë këtë shërbim tek bashkitë dhe operatorët privatë për të zgjeruar rrjetin e taksive autonome.

Aktualisht, shërbimi është në fazën e testimeve në Hanover dhe Hamburg të Gjermanisë.

Gjiganti amerikan i teknologjisë, Intel, ka paralajmëruar se do të shkurtojë 15 deri në 20 për qind të fuqisë punëtore në fabrikat e saj gjatë muajit korrik.

Vendimi u bë i ditur përmes një emaili të brendshëm, ku zyrtari i lartë i prodhimit, Naga Chandrasekaran, tha se masat janë të nevojshme për të përballuar sfidat financiare. Me një total prej 109,000 punonjës globalisht, pritet që të largohen nga puna mes 16,000 dhe 21,000 vetë.

Nuk dihet ende se sa nga këto shkurtime do të prekin punonjësit në SHBA.

Vetëm në Hillsboro, Oregon, kompania punëson mbi 20,000 persona. Lajmi vjen pas vendimeve të ngjashme nga Microsoft dhe Amazon, që po shkurtojnë staf për shkak të ndikimit të teknologjisë së Inteligjencës Artificiale.