Ministri i Punëve të Jashtme të Maqedonisë së Veriut, Bujar Osmani, ka folur për Klan News në lidhje me ngjarjen tragjike ku të paktën 46 turistë nga Maqedonia e Veriut humbën jetën në një aksident me autobusin ku udhëtonin.

Osmani është shprehur se të mbijetuarit kanë thënë se ka pasur një goditje anësore të autobusit dhe më pas kanë shpërthyer menjëherë flakët që e kanë përfshirë për disa sekonda të gjithë mjetin.

Shtatë personat që kanë mbijetuar kanë qenë të ulur në fund dhe kanë pasur mundësinë që të thyejnë xhamat. Të tjerët që kanë qenë të ulur përpara janë përfshirë menjëherë nga flakët. Mes viktimave ka edhe fëmijë të moshës pesëvjeçare.

“Tragjedi e rëndë. Jam këtu që nga mëngjesi, kisha mundësi t’i takoj të mbijetuarit. Janë 7 të 2 familjeve që kanë mundur të dalin nga flakët e autobusit dhe tani janë në gjendje të mirë, por mbi 40 nuk kanë pasur këtë mundësi dhe tani janë të vdekur. Trupat e tyre po identifikohen nga institucionet.

Ne kemi përshtypjet preliminare nga ajo që biseduam me të mbijetuarit. Më e drejtë do jetë të presim hetimet profesionale. Institucionet e dy vendeve i kanë filluar  këto hetime. Njerëzit na thanë që pas një goditje anësore të autobusit me bankinat kanë shpërthyer flakët të cilat nga pjesa e përparme e autobusit dhe për disa sekonda kanë kapur tërë autobusin. Ata që kanë qenë ulur në fund të autobusit kanë pasur disa sekonda mundësi për të dalë dhe këta janë ata 7 të mbijetuarit nga të cilët janë dy familje në fakt, një vajzë 16 vjeçare, kurse të tjerët nuk kanë mundur t’i mbijetojnë. Për fat të keq ka edhe shumë fëmijë. Ka nga ata që ishin vetëm 5 vjeç”, tha Osmani.

Ministri i Jashtëm ka thënë se kryesisht në autobus kishte shqiptarë të Maqedonisë së Veriut, por edhe të komuniteteve të tjera. Osmani u shpreh se ka nisur puna mes të dy prokurorive për të zbuluar shkaqet e tragjedisë.

“Shtetas të Maqedonisë së Veriut, mirëpo shqiptarë kryesisht. Por edhe ka pasur edhe të komuniteteve të tjera. Ka qenë për shkak se dje ishte festa e alfabetit dje dhe nuk punohet. Ishte fundjavë e zgjatur dhe njerëzit shfrytëzuan këtë mundësi për të dalë. Kryesisht njerëz të rinj, kryesisht çifte të reja, të cilët kanë dalur për të shëtitur në Stamboll dhe për fat të keq përfundoi kjo tragjedi kështu. Ministria e Brendshme ka rënë në kontakt me ta, por herët është për të dhënë konkludime. Po presim që ekspertë të mjekësisë ligjore nga Shkupi të dërgohen në Sofje. Fillimisht duhet të identifikohen trupat e pajetë që t’i marrin familjarët. Familjarët janë mbledhur rreth spitalit në Sofje, kërkojnë informacione shtesë. Ka qenë një konvoj prej 4 autobusësh. Ata duan të dinë se në cilin autobus kanë qenë familjarët e tyre. Mendoj që kjo duhet të jetë prioritet. Janë vënë kontaktet nëpërmjet prokurorive të dyja vendeve dhe po punohet në të gjitha pistat për të identifikuar shkaqet e kësaj ngjarje të rëndë.  Pothuajse të gjithë kanë familjarë të tyre që ende nuk i dinë ku janë. Tani me rëndësi është që të stabilizohet gjendja e tyre shëndetësore, që 1 ditë ose 2 të rrinë në Sofje dhe pastaj të transportohen në Shkup. Kur të bëhet identifikimi i viktimave do i njoftojmë këta të lënduar”, tha Osmani.

Osmani tha se po kthehet së bashku me Zaev në Shkup dhe pritet që të merret një vendim për të shpallur ditë zije ditën e sotme.

“Po kthehemi në seancë të qeverisë dhe do marrim vendim për të shpallur ditë zije dhe masat e tjera për të ndihmuar familjet. Do ketë shumë punë këto ditë për t’u dalë në ndihmë familjeve dhe të lënduarve”, tha Osmani.

Pavarësisht përplasjeve politike me Bullgarinë prej qëndrimit të kësaj të fundit për veton në BE, Osmani tha se “Kryeministri i Bullgarisë ka qenë i pari që ka dalë dhe ka informuar kryeministrin e RMV. Bashkë kemi qenë gjatë gjithë ditës sot. Bashkë kemi vizituar të lënduarit. Jemi dakorduar që të funksionojmë si një që të lehtësojmë dhimbjen e familjarëve të viktimave”./tvklan