Një raport i Wall Street Journal ka ngritur polemika të forta, duke pretenduar se administrata e presidentit amerikan Donald Trump ndërhyri te presidenti i FIFA-s, Gianni Infantino, për të anuluar pezullimin e sulmuesit të SHBA-së, Folarin Balogun, pas kartonit të kuq të marrë në ndeshjen ndaj Bosnje-Hercegovinës.

Sipas raportit, zyrtarë të lartë të Shtëpisë së Bardhë e konsideruan përjashtimin e Balogun si një goditje për shanset e kombëtares amerikane në Botëror dhe bindën Trump të kontaktonte drejtpërdrejt Infantinon. Pas bisedimeve, FIFA vendosi të anulonte pezullimin, duke u mbështetur në një dispozitë të rregullores që i jep Komisionit Disiplinor diskrecion për rishikimin e sanksioneve.

Vendimi ka shkaktuar reagime të forta në botën e futbollit. Federata Belge e Futbollit e quajti zhvillimin “tronditës” dhe njoftoi se po shqyrton opsionet ligjore, ndërsa trajneri i Belgjikës, Rudi Garcia, dhe ai i Norvegjisë, Ståle Solbakken, kritikuan ashpër FIFA-n, duke paralajmëruar se vendimi dëmton besueshmërinë e Kupës së Botës.

Sipas Wall Street Journal, Trump u bind të telefononte Infantinon pasi u informua nga Sekretari i Tregtisë Hoëard Lutnick dhe Andreë Giuliani, drejtues i grupit të punës së Shtëpisë së Bardhë për Kupën e Botës dhe djali i ish-kryebashkiakut të Nju Jorkut, Rudy Giuliani.

Ata argumentuan se kartoni i kuq ndaj Balogun ishte i padrejtë dhe se mungesa e sulmuesit kryesor do të dëmtonte seriozisht shanset e SHBA-së në ndeshjen vendimtare ndaj Belgjikës. Raporti shton se Trump, i cili e konsideron organizimin e Botërorit në SHBA si një çështje prestigji kombëtar dhe personal, urdhëroi bashkëpunëtorët e tij të gjenin një mënyrë për të kundërshtuar vendimin, përpara se të kontaktonte presidentin e FIFA-s, Gianni Infantino.

Nga ana e saj, FIFA mohoi se ka pasur ndikim politik, duke këmbëngulur se vendimi është marrë në mënyrë të pavarur nga Komisioni Disiplinor. Shtëpia e Bardhë nuk komentoi mbi raportin. Nëse pretendimet e Wall Street Journal konfirmohen, rasti mund të hapë një debat të gjerë mbi kufijtë e ndërhyrjes politike në vendimmarrjen e institucioneve sportive ndërkombëtare. /E.A/

Belgjika ka siguruar një vend në çerekfinalet e Kupës së Botës 2026, pasi mposhti Shtetet e Bashkuara me rezultat bindës 4:1 në fazën e një të tetës së finales. Ndeshja e zhvilluar mes shumë diskutimesh nisi me lajmin se FIFA pranoi ankesën e SHBA-së për të anuluar pezullimin e Folarin Balogun, i cili luajti nga minuta e parë, por pa arritur të linte gjurmë ndaj dominimit belg.

Ylli i mbrëmjes ishte Charles De Ketelaere, i cili shkëlqeu me dy gola dhe një asistim. Ai zhbllokoi sfidën që në minutën e 9-të dhe riktheu epërsinë në minutën e 33-të, pasi Malik Tillman kishte barazuar përkohësisht për amerikanët nga një goditje dënimi në minutën e 31-të.

Në pjesën e dytë, Belgjika e vulosi triumfin. De Ketelaere asistoi për Hans Vanaken në minutën e 57-të për rezultatin 3:1, ndërsa Romelu Lukaku, i futur si zëvendësues, shënoi golin e katërt në minutën e 93-të. Pas kësaj fitoreje, Belgjika kalon në çerekfinale ku do të luajë në një përballje të madhe kundër Spanjës. /E.A/

Eliminimi dramatik i Portugalisë në minutën e 90-të nga Spanja nuk solli vetëm biletën e çerekfinales për spanjollët, por edhe mbylljen e përlotur të një epoke të jashtëzakonshme.

Menjëherë pas vërshëllimës së fundit në Arlington të Teksasit, superylli Cristiano Ronaldo ka shpërthyer në lot, i vetëdijshëm se kjo humbje 1:0 shënon fundin e rrugëtimit të tij në Kupën e Botës.

Ndonëse ky Botëror i gjashtë — i cili pritet të jetë edhe i fundit për të siç kishte paralajmëruar para turneut — u mbyll me eliminim të parakohshëm, Ronaldo largohet me kokën lart duke thyer sërish rekorde historike në skenën botërore.

Megjithatë, as pritjet e Diogo Costas dhe as tentativat e fuqishme të vetë Ronaldos në pjesën e parë nuk mjaftuan për të ndalur golin e Mikel Merinos në sekondat e fundit, duke lënë portugezët pa trofeun e madh dhe kapitenin e tyre në lot përpara miliona fansave. /E.A/

UEFA ka reaguar ashpër ndaj vendimit të FIFA-s për të pezulluar zbatimin e dënimit automatik me një ndeshje për Folarin Balogun, duke e cilësuar atë si një precedent të rrezikshëm që cenon integritetin dhe besueshmërinë e futbollit.

Në një deklaratë zyrtare, qeveria e futbollit evropian theksoi se pezullimi automatik pas një kartoni të kuq është një rregull i qartë, i parashikuar në rregullore dhe nuk mund të ndryshohet apo interpretohet gjatë zhvillimit të një turneu.

“Vendimi i djeshëm për të pezulluar për një periudhë prove prej një viti zbatimin e pezullimit automatik me një ndeshje pas kartonit të kuq të dhënë për Folarin Balogun kaloi një vijë të kuqe”, thuhet në reagimin e UEFA-s.

Sipas saj, futbolli mbështetet te rregulla të qarta, të cilat garantojnë një garë të drejtë, të ndershme dhe transparente.

“Pezullimi automatik minimal me një ndeshje pas një kartoni të kuq nuk është një opsion diskrecional dhe nuk kërkon vendimin e një organi kompetent për të hyrë në fuqi. Është një parim i përfshirë në rregullore, që nuk mund t’i nënshtrohet përjashtimeve, aq më pak në mes të një turneu, kur lojtarë të tjerë kanë qenë në të njëjtën situatë dhe e kanë vuajtur rregullisht pezullimin”, thekson UEFA.

Shtëpia e futbollit evropian paralajmëroi se vendimi i FIFA-s mund të dëmtojë seriozisht besueshmërinë e garës dhe të krijojë një precedent për raste të ngjashme gjatë Kupës së Botës.

“Kur siguria e zbatimit të rregullave nuk garantohet më nga vetë kujdestarët e tyre, integriteti i lojës vihet në pikëpyetje dhe besueshmëria e një gare dëmtohet”, thuhet më tej në deklaratë.

UEFA shton se ky vendim hap rrugën që raste të ngjashme të kërkojnë trajtim të barabartë, gjë që sipas saj mund të ndikojë negativisht në zhvillimin e turneut.

Në fund të reagimit, organizata evropiane shprehu habinë dhe kundërshtimin e saj ndaj vendimit të FIFA-s.

“Futbolli është sporti më i dashur në botë sepse është një lojë e bukur dhe gëzon besimin e njerëzve, pasi luhet kudo sipas të njëjtave rregulla. Shprehim mosbesimin tonë për një vendim kaq të paprecedentë, të pakuptueshëm dhe të pajustifikueshëm”, përfundon deklarata e UEFA-s.

D.L