Edon Zhegrova vazhdon të mos fitojë besimin e trajnerit Luciano Spalletti te Juventusi, pasi ende nuk ka regjistruar asnjë paraqitje si titullar në Serie A.

Edhe në ndeshjen ndaj Fiorentinës, të zhvilluar të dielën, futbollisti kosovar u aktivizua nga banka rezervë, por pa arritur të lërë gjurmë në lojë.

Pas ndeshjes, trajneri i Juventusit, Luciano Spalletti, foli hapur për paraqitjet e Zhegrovës, duke vlerësuar cilësitë e tij, por edhe duke theksuar mangësitë në lojën pa top dhe aspektin taktik.

“Edoni ka cilësi dhe ato janë të rëndësishme, por ai humb gjëra gjatë lojës. Ai humb qetësinë në mbrojtje dhe pozicionimin, si dhe kur ndjek një kundërshtar. Në këtë nivel nuk mund ta përballosh këtë. Ke nevojë për lojë të vazhdueshme për 90 minuta. Paraqitjet individuale nuk janë të mjaftueshme”, ka deklaruar Spalletti, sipas “Goal”.

Nga 36 paraqitjet e zhvilluara me fanellën e Juventusit, Zhegrova në 35 prej tyre ka hyrë si zëvendësues. E vetmja ndeshje si titullar ishte ajo ndaj Pafosit në Ligën e Kampionëve, ku u zëvendësua pas përfundimit të pjesës së parë.

Ndërkohë, sipas “Goal”, e ardhmja e reprezentuesit të Kosovës në Torino mund të vihet në pikëpyetje që në afatin kalimtar të janarit. Juventusi thuhet se po shqyrton mundësinë e transferimit të një futbollisti që përshtatet më mirë me filozofinë e Spallettit.

27-vjeçari ka realizuar dy gola dhe ka dhuruar dy asistime në Serie A, ndërsa me Juventusin ka kontratë të vlefshme deri në qershor të vitit 2030.

D.L

Gjatë takimit me lojtarët, presidentja u ka uruar atyre fat dhe suksese në përballjet e ardhshme, duke shprehur besimin dhe përkrahjen e saj për përfaqësuesen e Kosovës.

Shiroka Pula ka vlerësuar paraqitjet e futbollistëve si në klubet ku aktivizohen në vende të ndryshme të botës, ashtu edhe me fanellën e Kombëtares, duke theksuar se ata vazhdojnë ta bëjnë vendin krenar.

“Vendi ynë beson në ju dhe do të jetë gjithmonë përkrah jush. Shumë fat dhe suksese në ndeshjet e ardhshme. Forca Kosova”, ka deklaruar presidentja.

Kosova do të përballet me Izraelin të shtunën, në ndeshjen e parafundit të këtij cikli, ndërsa tri ditë më vonë do të luajë ndaj Irlandës në udhëtim.

D.L

Galatasaray ka nderuar kujtimin e legjendës së klubit, Xhevat Prekazit, i cili ndërroi jetë në moshën 69-vjeçare, duke publikuar një video me disa nga momentet më të bukura të tij me fanellën e skuadrës turke.

Në videon e publikuar, klubi nga Stambolli ka rikthyer në vëmendje golat spektakolarë të futbollistit nga Mitrovica, i cili shquhej për teknikën, goditjet e fuqishme nga distanca dhe aftësitë e jashtëzakonshme individuale.

Prekazi ishte një prej figurave të rëndësishme në historinë e Galatasarayt, me të cilin fitoi dy tituj të kampionit të Turqisë, në sezonet 1986/87 dhe 1987/88. Para ardhjes së tij, klubi turk kishte pritur plot 17 vjet për të fituar titullin e kampionit.

Gjatë periudhës 1985–1991, Prekazi regjistroi 229 paraqitje me fanellën e Galatasarayt, duke shënuar 44 gola.

Videoja e publikuar nga klubi përmban edhe një deklaratë të veçantë të vetë Prekazit, ku ai kishte shprehur dëshirën që edhe pas vdekjes të mbetet i lidhur me dy klubet e zemrës, Galatasarayn dhe Partizanin.

“Kur të vdes, pasi të gjithë asaj rruge jemi, i them gruas time, dua të ma vendosin në arkivol fanellën e Galatasarayt, por edhe të Partizanit, natyrisht”, dëgjohet duke thënë Prekazi në videon e publikuar.

Me golat, teknikën dhe kontributin e tij, Xhevat Prekazi la gjurmë të pashlyeshme në historinë e Galatasarayt, duke mbetur një emër i paharruar për tifozët e klubit turk.

D.L

KV Ferizaj ka bërë të ditur destinacionin e radhës, duke paralajmëruar pjesëmarrjen në garat evropiane të volejbollit, CEV Challenge Cup.

Përmes një postimi në rrjetet sociale, klubi ferizajas ka publikuar mesazhin “Next Stop to Czech Republic”, duke konfirmuar se Çekia do të jetë ndalesa e radhës për ekipin.

KV Ferizaj do të ketë mundësinë të përfaqësojë volejbollin kosovar në arenën ndërkombëtare, në një tjetër sfidë të rëndësishme evropiane.

D.L