Sport

Medaljet e ditës së gjashtë, Ariarne Titmus ul nga froni Katie Ledecky-n

Tokio vijon të dhurojë emocione me disiplinat e Olimpiadës që evidentojnë më të mirët e çdo kategorie.

Published

5 years ago

July 27, 2021

Betim Gashi

Tokio vijon të dhurojë emocione me disiplinat e Olimpiadës që evidentojnë më të mirët e çdo kategorie. Adam Peaty u bë i pari notar britanik që mbrojti një titull olimpik, duke fituar medaljen e artë në stilin 100m bretkosë për meshkuj, me kohën e pestë më të shpejtë në gjithë historinë.

26-vjeçari konsiderohej favorit dhe justifikoi pritshmëritë, duke ndalur kronometrin në 57 sekonda e 37 të qindtat, para holandezit Arno Kamminga, që realizoi distancën për 58 sekonda, ndërsa medalja e bronzit shkoi për Italinë, e fituar nga Nicolo Martinenghi, që u rendit i treti.

Kanadezja Margaret MacNeil shpërtheu në garën e femrave 100 metra stil flutur, për të fituar medaljen e artë me kohën e tretë më të shpejtë në histori, duke rrëzuar nga froni suedezen Sarah Stjorsom, që ishte kampionia në fuqi dhe mbajtësja e rekordit botëror. MacNeil dhuroi një paraqitje fantastike me një shpejtësi mbresëlënëse në 50 metrat e fundit, për të arritur në finish me kohën 55 sekonda e 59 të qindtat, duke lënë pas kinezen Zhang Youfei me kohën 55 sekonda e 64 të qindtat, ndërsa australiania emma McKeon mori medaljen e bronzit.

Ariarne Titmus e bëri ditën më të bukur për britanikët pas triumfit të Adam Peaty, pasi triumfoi ndaj notares së madhe amerikane, Katie Ledecky, duke fituar medaljen e artë në garën e 400 metrave stil i lirë për femra. Ledecky vinte në Japoni pasi kishte fituar 4 medalje të arta dhe një argjendi në “Rio 2016”, por Titmus e ka sfiduar gjatë gjithë këtyre viteve pasi i rrëmbeu titullin botëror në 2019, ndërsa tani dhe medaljen e artë në Olimpiadë.

Ylli amerikan, Caeleb Dresel, bëri debutimin e tij në Tokio me një nisje fantastike të garës 4 X 100 metra stafetë për meshkuj, duke udhëhequr skuadrën e tij në fitimin e medaljes së artë me një paraqitje e denjë për stilin e Michael Phelps. Dressel, 13 titujt botërorë të të cilit kanë sjellë krahasimet e paevitueshme me Phelps, fitues i 8 medaljeve të arta dhe 23 medaljeve në total, në këtë Olimpiadë synon 7 medalje.

Kristian Blummenfelt i Norvegjisë fitoi medaljen e artë në triathlon në një garë të trazuar nga një start fals. 27-vjeçari, i pari Norvegjez që fiton një medalje në Triathlon, arriti në finish me kohën 1 orë, 45 minuta dhe 4 sekonda, para se të shpërthente në festime, edhe pse i sfilitur, për këtë arritje fantastike.

Japonezja Momiji Nishiua u bë një nga medalistet më të reja olimpike në histori, pasi fitoi medaljen e artë në garën inauguruese të skateboardit për femra në moshën 13 vjeç e 330 ditë. Nishiya fitoi ndaj rivales braziliane Rayssa Leal, e cila në moshën 13 vjeç e 203 ditë, mund të bëhej medalistja më e re olimpike në histori, ndërsa në vend të tretë u rendit japonezja tjetër, Funa Nakayama, 16-vjeçare.

Favoritja e shtëpisë, Naomi Osaka, vazhdon rrugëtimin e saj në kërkim të arit olimpik, pasi kaloi në raundin e tretë të tenisit në Lojërat e Tokios me një fitore në shifrat 6-3, 6-2 ndaj Zviceranes Viktorija Golubic. Fiji nisi mbrojtjen e titullit të 7 olimpik në regbi për meshkuj me një ndeshje ku për pak u eliminua nga dy lojtarë nga Fiji, por që përfaqësojnë Japoninë në Olimpiadën e Tokios.

Dy atletët e lindur në Fixhi, Lote Tuqiri dhe Kameli Soejima çuan Japoninë në avantazh 19-12, duke i rënë kambanave të alarmit për favoritët e mëdhenj, por më pas Ishujt Fixhi u rikthyen fuqishëm edhe falë përpjekjeve të Waisea Nacuqu rimorën kryesimin për ta fituar ndeshjen me rezultatin 24-19.

Sport

Anis Mehmeti refuzon Wrexhamin, synon transferimin në Premier League

Published

6 hours ago

August 31, 2026

UBTNews

Anis Mehmeti ka refuzuar një tjetër mundësi për të vazhduar karrierën në Championship, pasi sulmuesi shqiptar synon të bëjë hapin e madh drejt Premier League.

Sipas gazetarit Ben Jacobs, Mehmeti ka vendosur të mos e pranojë ofertën e Wrexhamit, pavarësisht se klubi uellsian kishte arritur marrëveshje me Ipswich Town për transferimin e tij.

“Për momentin, Anis Mehmeti nuk ka dashur të luajë në Championship. Mehmeti ka refuzuar gjithashtu Wrexhamin, pasi ata kishin arritur marrëveshje me Ipswich Town”, ka raportuar Jacobs.

25-vjeçari, i cili është pjesë e Ipswich Town, ka tërhequr vëmendjen me paraqitjet e tij në futbollin anglez dhe duket se objektivi i tij kryesor është të luajë në elitën e futbollit anglez.

Refuzimi i Wrexhamit e lë të hapur të ardhmen e Mehmetit, i cili pritet të shqyrtojë alternativa të tjera para përfundimit të afatit kalimtar.

Nëse synimi i tij është një transferim në Premier League, ditët e fundit të afatit kalimtar mund të sjellin zhvillime të reja për të ardhmen e sulmuesit shqiptar.

D.L

Sport

Basketbolli kosovar në lëvizje, afati veror sjell ndryshime të mëdha

Published

7 hours ago

August 31, 2026

UBTNews

Afati kalimtar veror në basketbollin kosovar ka sjellë një numër të konsiderueshëm lëvizjesh, me skuadrat e ProCredit Superligës që kanë bërë ndryshime të rëndësishme në përbërjet e tyre për sezonin e ri.

Peja është skuadra që ka regjistruar më së shumti basketbollistë gjatë këtij afati kalimtar, duke synuar të ndërtojë një ekip konkurrues për sezonin e ri.

Një prej lëvizjeve më të veçanta është rikthimi i Edmond Azemit te Sigal Prishtina. Në moshën 45-vjeçare, Azemi rikthehet te klubi me të cilin ka shkruar një pjesë të rëndësishme të historisë së basketbollit kosovar.

Ndryshime ka edhe në basketbollin e femrave. Bashkimi ka regjistruar dy basketbolliste të huaja, duke e përforcuar skuadrën për sezonin e ri dhe duke synuar rezultate më të mira në garat vendore.

Afati kalimtar ka sjellë lëvizje të shumta te klubet kosovare, ndërsa vëmendja tashmë është te sezoni i ri dhe mënyra se si përforcimet e reja do të ndikojnë në garën për trofetë e basketbollit kosovar.

D.L

Sport

Baton Zabërgja protagonist me dy gola në fitoren e Metalist Kharkiv

Published

7 hours ago

August 31, 2026

UBTNews

Baton Zabërgja ka qenë protagonist i fitores së Metalist Kharkiv, duke realizuar dy gola në triumfin 3:0 ndaj Zorya Luhanskit.

Sulmuesi i Kosovës shënoi golin e dytë në minutën e 54-t, ndërsa vetëm 11 minuta më vonë realizoi edhe golin e tretë të skuadrës së tij.

Zabërgja luajti deri në minutën e 76-të, ndërsa në këtë ndeshje u aktivizua edhe Ermir Rashica, i cili hyri në lojë në minutën e 62-të.

Këto ishin dy golat e parë të Zabërgjës në edicionin e ri të kampionatit ukrainas. Ai ka kontribuar edhe në Kupën e Ukrainës, ku ka regjistruar një gol dhe dy asistime.

Një paraqitje e madhe për Zabërgjën, i cili po e nis sezonin duke lënë gjurmë te Metalist Kharkiv.

D.L

Sport

Kosova e mbyll me fitore garimin në hendboll në Taranto 2026

Published

7 hours ago

August 31, 2026

UBTNews

Hendbollistët e Kosovës e kanë përfunduar me fitore paraqitjen në Lojërat Mesdhetare Taranto 2026.

Kosova triumfoi të hënën ndaj Qipros me rezultat 31:27, në ndeshjen për vendin e shtatë, duke regjistruar fitoren e parë në këtë turne pas katër humbjeve radhazi.

Egzon Gjuka, Arbios Mushkolaj dhe Jon Vokshi ishin golashënuesit më të mirë të Kosovës, me nga gjashtë gola secili. Suad Pajaziti shënoi pesë gola, ndërsa Alban Haziri realizoi katër. Në portë, Olt Kabashi regjistroi shtatë pritje.

Kosova e kishte përfunduar fazën grupore me tri humbje, ndaj Italisë, Egjiptit dhe Portugalisë, ndërsa në ndeshjen për plasman pësoi humbje edhe nga Tunizia.

Megjithatë, fitorja ndaj Qipros i dha Kosovës mundësinë që ta mbyllë turneun me një rezultat pozitiv dhe me vendin e shtatë në konkurrencën e hendbollit për meshkuj, ku garuan gjithsej tetë përfaqësuese.

D.L