Policia e Kosovës ka arrestuar të martën një person në Ferizaj, i cili dyshohet se është marrë me kontrabandë të emigrantëve.

“Ferizaj 08.10.2024-15:00. Është arrestuar i dyshuari mashkull kosovar, nën dyshimin e bazuar se i njëjti është marr me kontrabandë me emigrantë”, thuhet në raportin 24 orësh të Policisë së Kosovës.

Më tej thuhet se me vendim të prokurorit i dyshuari është dërguar në mbajtje./UBTNews/

Presidentja Vjosa Osmani, me ftesë të Kryeministrit të Kroacisë, Andrej Plenković, ka udhëtuar në Dubrovnik për ta përfaqësuar Republikën e Kosovës në Samitin Ukrainë-Evropë Juglindore.

Në këtë samit, presidentja Vjosa Osmani do të pritet nga Kryeministri kroat Plenković dhe Presidenti i Ukrainës, Volodymyr Zelensky, teksa do t’u bashkohet liderëve të tjerë nga Evropa Juglindore në seancën plenare.

“Gjatë këtij samiti, pritet të riafirmohet mbështetja e palëkundur për integritetin territorial dhe sovranitetin e Ukrainës, rëndësia e sanksioneve kundër Rusisë, bashkëpunimi me BE-në dhe mbështetja e vendeve të Evropës Juglindore për Ukrainën. Përveç pjesëmarrjes në seancën plenare ku Presidentja do të mbajë një fjalim, ajo do të zhvillojë takime edhe me homologët e saj”, thuhet në komunikatën e lëshuar nga presidenca./UBTNews/

UBT priti me krenari kampionet olimpike në xhudo, duke shënuar një moment të rëndësishëm për institucionin. Rektori i UBT-së, Prof. Dr. Edmond Hajrizi, mirëpriti medalistet Distria Krasniqi dhe Laura Fazliu, si dhe trajnerët Driton Kuka dhe Majlinda Kelmendi, në Qytetin e Mençur të UBT-së në Lipjan.

Rektori Hajrizi përgëzoi ekipin e Kosovës për arritjet e tyre të jashtëzakonshme, duke nënvizuar angazhimin e UBT-së për të promovuar ekselencën në performancë dhe sport. Ai theksoi rëndësinë e rritjes së bashkëpunimit ndërmjet kampionëve dhe liderëve në arsim, duke inkurajuar të gjithë studentët që të ndjekin shembujt e këtyre kampionëve.

“Me punë të palodhur dhe përkushtim, çdo qëllim mund të arrihet,” tha Hajrizi, duke theksuar se sukseset e kampionëve janë një burim frymëzimi për të gjithë studentët.

Nga ana e tij, Driton Toni Kuka njoftoi vazhdimin e bashkëpunimit të fuqishëm me UBT-në, e cila është e njohur si universiteti kampion i performancës. Kuka theksoi se ky partneritet është thelbësor për zhvillimin e sportit dhe edukimit në vend.

Duke forcuar lidhjet mes sportit dhe arsimimit dhe duke motivuar të rinjtë që të ndjekin ëndrrat e tyre me përkushtim dhe pasion, UBT mbetet një bastion i ekselencës, duke kontribuar në suksesin e sportistëve të ardhshëm./UBTNews/

Zëvendësministri i Zhvillimit Rajonal, Ali Tafarshiku ka shkaktuar mbrëmë një aksident trafiku.

Zëvendësministri i Qeverisë Kurti ka goditur me veturë një motoçiklist, nga burimet brenda policisë merret vesh se i njëjti ka qenë në gjendje të dehur në momentin kur e ka shkaktuar aksidentin.

Rasti ka ndodhur mbrëmë rreth orës 22:00 në rrugën “Ali Pashë Tepelena” në Gjakovë. Motoçiklisti i goditur nga vetura zyrtare me të cilën po udhëtonte zëvendësministri Tafarshiku, raportohet se është një 15 vjeçar nga Gjakova.

Ai ishte me veturë zyrtare kur duke mos përshtatur shpejtësinë me kushtet e rrugës ka goditur motoçiklistin, të cilit i ka shkaktuar lëndime trupore.

Pas rastit, Tafarshiku është shoqëruar në polici ku i është bërë edhe testi i alkoolit dhe ka rezultuar pozitiv, dhe se kishte konsumuar 2.30% promil.

I njëjti pas rastit dhe intervistimit në polici është liruar në procedurë të rregullt./reporteri.net/