Ruanda ka rënë dakord të presë deri në 250 persona të dëbuar nga Shtetet e Bashkuara të Amerikës, në bazë të një marrëveshjeje të re me administratën amerikane.

Lajmi u bë i ditur nga autoritetet ruandeze, të cilat theksuan se kjo iniciativë shënon një kapitull të ri në përpjekjet e SHBA-së për të zhvendosur emigrantët në vende të treta.

Sipas burimeve zyrtare, ky është një hap i rëndësishëm në kuadër të strategjisë më të gjerë të emigracionit të SHBA-së, që synon të bashkëpunojë me vende partnere për të menaxhuar më mirë flukset migratore.

Korrespondentja e FRANCE 24, Juliette Montilly, raportoi nga Kigali se marrëveshja është pjesë e një qasjeje më të gjerë ndërkombëtare, që përfshin zhvendosjen vullnetare të personave të përjashtuar nga territori amerikan drejt vendeve që janë të gatshme t’i pranojnë.

Agjencia e Mbrojtjes Civile në Gaza ka njoftuar se 20 persona humbën jetën dhe dhjetëra të tjerë u plagosën pasi një kamion që transportonte ndihma humanitare është përmbysur pranë kampit të refugjatëve Nuseirat, në qendër të Rripit të Gazës.

“Sipas informacioneve tona, rreth mesnatës, një kamion që mbante ndihma u përmbys ndërsa qindra civilë po prisnin për ndihma. Si pasojë, 20 persona humbën jetën dhe shumë të tjerë mbetën të plagosur,” ka thënë zëdhënësi i agjencisë Mahmud Bassal për agjencinë franceze të lajmeve AFP.

Hamasi e ka akuzuar Izraelin se po i detyron shoferët e kamionëve të ndjekin rrugë të pasigurta për të arritur në qendrat e shpërndarjes së ndihmave.

“Kjo çon shpesh në grumbullimin e turmave të dëshpëruara që rrethojnë kamionët,” është thënë nga zyra mediatike e Hamasit në një deklaratë.

Ndërkohë, shoferë lokalë kanë konfirmuar për mediat se turma të uritura njerëzish kanë hequr ndihmat nga kamionët në lëvizje, ndërsa disa mjete janë sulmuar nga persona të armatosur të lidhur me banda që më pas i shesin ndihmat në tregjet lokale me çmime shumë të larta.

Një tërmet me magnitudë 5.4 ballë tronditi Iranin juglindor herët të martën në mëngjes, me epiqendrën rreth 139 kilometra në jug të Bamit në provincën Kerman.

Tërmeti ndodhi në orën 08:36 të mëngjesit sipas kohës lokale (05:06GMT), në një thellësi prej afërsisht 56.7 km (35.2 mi), sipas Shërbimit Gjeologjik të SHBA-së, shkruan Anadolu.

Megjithatë, deri më tani nuk janë konfirmuar lëndime ose dëme strukturore.

Irani ndodhet në një rajon sizmikisht aktiv dhe ka përjetuar shumë tërmete shkatërruese në vitet e fundit. Më katastrofik në historinë e kohëve të fundit të vendit ndodhi në vitin 2013, kur një tërmet me magnitudë 6.7 ballë goditi qytetin e Bamit, duke vrarë të paktën 34,000 njerëz.

Në korrik 2022, një tërmet me magnitudë 6.1 ballë goditi provincën jugore të Hormozgan, përgjatë bregdetit të Gjirit Persik, duke vrarë të paktën pesë persona dhe duke plagosur më shumë se 80 të tjerë.

Një grup prej rreth 600 zyrtarësh izraelitë të sigurisë, që kanë dalë në pension, përfshirë ish-krerë të agjencive të shërbimit sekret, i kanë shkruar presidentit të SHBA-së Donald Trump për të ushtruar presion mbi Izraelin që të përfundojë menjëherë luftën në Gaza, shkruan BBC.

“Është bindja jonë profesionale se Hamasi nuk përbën më një kërcënim strategjik për Izraelin”, theksuan zyrtarët.

“Besueshmëria juaj me shumicën dërrmuese të izraelitëve rrit aftësinë tuaj për të drejtuar kryeministrin Benjamin Netanyahu dhe qeverinë e tij në drejtimin e duhur: për t’i dhënë fund luftës, për të kthyer pengjet dhe për t’i dhënë fund vuajtjeve”, shkruanin ata.

Apeli i tyre vjen në një kohë kur thuhet se Netanyahu po shtyn përpara zgjerimin e operacioneve ushtarake në Gaza, ndërsa bisedimet indirekte për armëpushim me Hamasin kanë ngecur.

Mundësia e një përshkallëzimi të ri në Gaza mund të zemërojë më tej aleatët e Izraelit, të cilët kanë kërkuar një armëpushim të menjëhershëm, ndërsa raportet për palestinezë që vdesin nga uria ose kequshqyerja po tronditin botën.

Grupi kryesor që mbështet familjet e pengjeve dënoi idenë e një ofensive të re ushtarake, duke deklaruar se “Netanyahu po e çon Izraelin dhe pengjet drejt shkatërrimit”.

Ky qëndrim u shpreh në mënyrë të qartë në letrën drejtuar Trump nga ish-shefi i Mossadit, Tamir Pardo, ish-shefi i Shin Bet, Ami Ayalon, ish-kryeministri Ehud Barak dhe ish-ministri i Mbrojtjes, Moshe Yaalon.

“Në fillim, kjo luftë ishte një luftë e drejtë, një luftë mbrojtëse, por kur arritëm të gjitha objektivat ushtarake, kjo luftë pushoi së qeni një luftë e drejtë”, thekson Ayalon.

“Ndalo luftën në Gaza! Në emër të CIS, grupit më të madh të Izraelit të ish-gjeneralëve të IDF-së dhe ekuivalentëve nga Mossadi, Shin Bet, ju nxisim të përfundoni luftën në Gaza. Ju e bëtë në Liban. Është koha ta bëjmë edhe në Gaza”, i shkruan ata presidentit të SHBA-së.

Izraeli përballet me një izolim ndërkombëtar në rritje, ndërsa shkatërrimi i përhapur në Gaza dhe vuajtjet e palestinezëve shkaktojnë zemërim.

Sondazhet në të gjithë botën sugjerojnë se opinioni publik është gjithnjë e më negativ ndaj Izraelit, duke ushtruar presion mbi udhëheqësit perëndimorë për të vepruar.