Në vijim të qëndrimit të tij në Bolonjë, Rektori i UBT-së, Prof. Dr. Edmond Hajrizi, është takuar me ish-presidentin e Interportos dhe Acer-it, Dr. Alessandro Alberani – një nga portet më strategjike për tregtinë dhe transportin në rajon.

Gjatë këtij takimi u diskutuan mënyrat e bashkëpunimit në fushat e logjistikës, inxhinierisë së infrastrukturës, menaxhimit të transportit dhe zhvillimit të qëndrueshëm urban dhe industrial – fusha këto të cilat janë të përfaqësuara në UBT përmes departamenteve si: Inxhinieria e Ndërtimit, Infrastruktura, Planifikimi Hapësinor, dhe të tjera.

UBT synon që përmes këtyre lidhjeve të forcojë komponentën praktike të studimeve, duke sjellë përvojat e Portit të Bolonjës si model për zhvillimin e logjistikës së avancuar dhe portit të thatë të Kosovës.

Gjatë qëndrimit të tij zyrtar në Itali, Rektori i UBT-së, Prof. Dr. Edmond Hajrizi, ka zhvilluar një takim të rëndësishëm me Luigi Laffusa, kontabilist dhe ekspert financiar me prejardhje arbëreshe, i cili menaxhon aspektet kontabël dhe financiare për qindra kompani të njohura në tregun italian dhe më gjerë.

Gjatë këtij takimi, Rektori Hajrizi theksoi rëndësinë e ndërlidhjes së institucioneve arsimore me rrjetin ndërkombëtar të profesionistëve financiarë, si një mundësi për të forcuar bashkëpunimin ndërkombëtar dhe për të ofruar mbështetje për të rinjtë shqiptarë në procesin e tyre të zhvillimit profesional dhe integrimit në tregun evropian të punës.

Luigi Laffusa, një arbëresh i përkushtuar dhe i suksesshëm në fushën e tij në Itali, është gjithashtu anëtar aktiv i Shoqatës së diasporës shqiptare dhe arbëreshe “Korabi”, duke dhënë kontribut të çmuar në ruajtjen e identitetit dhe përforcimin e lidhjeve mes diasporës dhe atdheut.

Rektori i UBT-së, Prof. Dr. Edmond Hajrizi, gjatë një vizite zyrtare në Itali, ka vizituar fabrikën industriale “Pensi” në qytetin e Bolonjës – një ndërmarrje moderne që është ndërtuar dhe drejtohet me profesionalizëm nga sipërmarrësit shqiptarë me origjinë nga Shkodra, Genc dhe Ervin Podgorica.

Gjatë vizitës, Rektori Hajrizi u njoh nga afër me teknologjitë më të avancuara që përdoren në fabrikë, organizimin modern të punës si dhe me gamën e gjerë të produkteve që zhvillohen në këtë qendër të prodhimit industrial.

Ai i përgëzoi vëllezërit Podgorica për suksesin e arritur dhe për kontributin e tyre si model frymëzues i diasporës shqiptare në botë, duke theksuar rëndësinë e bashkëpunimit mes bizneseve shqiptare në diasporë dhe institucioneve të arsimit të lartë në Kosovë.

Rektori Hajrizi shprehu gjithashtu gatishmërinë për thellimin e bashkëpunimit të ndërsjellë, sidomos në drejtim të shkëmbimit të përvojave dhe zhvillimit të projekteve të përbashkëta në fushat e industrisë, mekanikës, robotikës dhe inovacionit teknologjik – fusha në të cilat UBT po përgatit kuadro të rinj dhe të specializuar prej vitesh.

Rektori i UBT-së, Prof. Dr. Edmond Hajrizi, me ftesë nga organizatorët, ishte folës kryesor në Konferencën e 4-t Ndërkombëtare për Sistemet Biomjekësore dhe Inteligjente (IC-BIS 2025), e cila u mbajt në Spitalin e Mjekësisë “Aula Viola”, pranë Universitetit të Bolonjës, në Itali.

Kjo konferencë mblodhi së bashku ekspertë nga fusha të ndryshme të shkencës, teknologjisë, mjekësisë dhe industrisë, për të diskutuar zhvillimet më të fundit në fushën e inovacionit dhe integrimit të inteligjencës artificiale në biomjekësi.

Rektori Hajrizi prezantoi konceptin vizionar të ekosistemit të UBT Smart City, si një model gjithëpërfshirës që ndërthur arsimin, kërkimin shkencor, inovacionin dhe zhvillimin ekonomik.

Ai theksoi se UBT, përmes departamenteve të brendshme dhe qendrave të specializuara, është angazhuar fuqishëm për të nxitur zhvillimin, me shembuj konkret të edukimit, shkencës dhe inovacioneve në fushën e mjekësisë, sistemeve inteligjente, biomjekësisë, farmacisë dhe mikrobiologjisë.