Kronikë e zezë

Mbyllet një biznes dhe dënohen 23 të tjera për mosrespektim të masave antiCOVID

Published

5 years ago

May 14, 2021

Betim Gashi

Inspektorët sanitar të Agjencisë së Ushqimit dhe Veterinës, bashkë me pjesëtarët e Policisë së Kosovës, mbrëmë gjatë inspektimeve në bizneset e gastronomisë për mosrespektim të masave Covid-19, kanë shqiptuar 15 gjoba në Prishtinë dhe 8 të tjera në regjion të Ferizajt.

Zëdhënësi i AUV, Lamir Thaçi theksoi për KosovaPress, se agjencia përmes inspektoratit sanitar, edhe para festave dhe gjatë festës së djeshme të Fiter Bajramit, kanë monitoruar dhe bërë apel se mbi çdo festë, është ruajtja e shëndetit dhe jetës së qytetarëve. Ai tha se autoritetet kompetente kanë vepruar në terren në gjithë vendin gjatë gjithë kohës për të mbikëqyrë zbatimin e masave antiCOVID, bazuar në vendimin e fundit të Qeverisë.

“Edhe gjatë natës së mbrëmshme ne kemi gjobitur disa lokale të gastronomisë, të cilat nuk kanë krijuar kushte për ruajtje të distancës. Vetëm në Prishtinë janë gjobitur 15 lokale dhe gjysma prej tyre jo vetëm që janë gjobitur, por edhe janë zbrazur dhe mbyllur për natën e mbrëmshme, sepse ka qenë qe pa mundur që të krijohen kushtet për ruajtje të distancës. Kontrollet për mbikëqyrje të zbatimit të masave antiCovid do të vazhdojnë në gjithë territorin e Kosovës. Ne bashkë me policinë jemi përgjegjës për mbikëqyrjen e tyre dhe do të vazhdojmë punën që të ndikojmë në rënie të vazhdueshme të numrit të infektuarve. Falë kontrolleve që ne kemi realizuar bashkë me policinë e Kosovës dhe rreptësisë që kemi treguar sidomos në muajin e fundit, ne kemi arritur që të kemi një rënie drastike të numrit të infektuarve”, theksoi ai.

Thaçi thotë se mbrëmë në Ferizaj kanë mbyllur një lokal të gastronomisë dhe kanë gjobitur tetë sosh.

“Vetëm gjatë natës së mbrëmshme në regjionin e Ferizajt janë shqiptuar 8 gjoba juridike, 4 prej tyre janë në Kaçanik dhe 4 të tjera në Ferizaj. Një lokal është mbyllur për shkak se ka shkelur masat antiCovid. Ne tani përveç gjobave që jemi duke i shqiptuar për bizneset, këto kur shkelin masat, veprimi i ynë gjithmonë do të jetë mbyllja e tyre, sepse qëllimi nuk është vetëm të shqiptojmë gjoba, por masat duhet të respektohen që të kemi një sukses në luftën ndaj Covid19”, thekson Thaçi.

Ai shtoi se si organe mbikëqyrëse ligj zbatuese do të punojnë sipas mandatit për të ndikuar në uljen e numrit të të prekurve nga Covid-19. Për këtë, ai thekson se gjithmonë duhet bashkëpunimi i qytetarëve dhe bizneseve që ato ta ndiejnë veten përgjegjëse për respektimin e masave, sepse vetëm në këtë formë mund të luftohet kjo dukuri që e ke kapluar gjithë globin.

Sa i përket gjobave, zëdhënësi i AUV ka thënë se varësisht nga shkeljet dhe llojet e bizneseve janë të kategorizuara me ligj masat ndëshkuese që fillojnë nga 200 deri në 2000 euro.

Lajmet

Nuk deklaroi mbi 10 mijë euro, Dogana i konfiskon 25% të mjeteve monetare

Published

7 hours ago

July 22, 2026

UBT News

Dogana e Kosovës ka konfiskuar 25 për qind të mjeteve monetare të padeklaruara, të zbuluara gjatë një kontrolli rutinor në Pikën e Kalimit Kufitar Vërmicë.

Sipas njoftimit të Doganës, zyrtarët doganorë kanë ndaluar për kontroll një automjet me targa vendore në hyrje të Republikës së Kosovës, pasi drejtuesi i tij kishte hyrë në pikën kufitare me shpejtësi të lartë, duke ngjallur dyshime.

Gjatë intervistimit fillestar, drejtuesi kishte deklaruar se nuk posedonte mallra apo mjete monetare që i nënshtroheshin deklarimit. Megjithatë, pas një kontrolli të detajuar, zyrtarët doganorë kanë gjetur mjete monetare që tejkalonin kufirin ligjor prej 10 mijë eurosh dhe nuk ishin deklaruar pranë autoriteteve.

Në përputhje me legjislacionin në fuqi për parandalimin e pastrimit të parave dhe financimit të terrorizmit, Dogana ka ndërmarrë masat ligjore, duke konfiskuar 25 për qind të shumës së padeklaruar, ndërsa për pjesën tjetër është kërkuar dokumentacion që dëshmon origjinën e ligjshme të mjeteve.

Sipas Doganës, rasti është proceduar sipas kompetencave ligjore dhe procedurat do të vazhdojnë deri në përfundimin e shqyrtimit administrativ dhe ligjor.

Dogana e Kosovës rikujton se çdo person që hyn ose del nga Republika e Kosovës me 10 mijë euro ose më shumë, në para të gatshme ose mjete të tjera monetare të bartshme, është i obliguar t’i deklarojë ato pranë autoriteteve doganore. Mosdeklarimi përbën shkelje të ligjit dhe mund të sjellë konfiskim të pjesshëm të mjeteve, si dhe procedura të mëtejshme për verifikimin e origjinës së tyre./A.K/

Lajmet

Të shtëna me armë e përleshje fizike në Kosuriq të Pejës: Lëndohet një kalimtar, arrestohen dy të dyshuar

Published

11 hours ago

July 22, 2026

UBTNews

Dy persona janë arrestuar nga Policia e Kosovës në Pejë, pasi dyshohen se janë përfshirë në një përleshje fizike dhe kanë shtënë me armë zjarri, me ç’rast ka pësuar lëndime trupore një kalimtar i rastit.

Ngjarja ka ndodhur gjatë ditës së djeshme në fshatin Kosuriq të Pejës.

Sipas njoftimit zyrtar të Policisë nga rajoni i Pejës, pas marrjes së informacionit për të shtëna me armë, njësitet policore kanë dalë menjëherë në vendngjarje ku kanë takuar victimën. Ai ka deklaruar se pas një përleshjeje fizike me një person, ky i fundit së bashku me një të dyshuar tjetër kanë shtënë me armë zjarri.

Si pasojë e të shtënave, një kalimtar i rastit ka pësuar gërvishtje dhe është dërguar menjëherë në Spitalin Rajonal në Pejë për të marrë trajtimin e nevojshëm mjekësor.

Gjatë këqyrjes së vendit të ngjarjes, policia ka gjetur një gëzhojë. Më pas, me urdhër të prokurorit të shtetit, është ushtruar kontroll dhe bastisje në shtëpinë e të dyshuarve, ku janë gjetur dhe sekuestruar: Një (1) armë zjarri; Një (1) gëzhojë; Një (1) karikator.

Pas arrestimit dhe intervistimit nga hetuesit, me vendim të Prokurorit të Shtetit, njëri nga të dyshuarit është dërguar në mbajtje për 48 orë, ndërsa i dyshuari tjetër është liruar në procedurë të rregullt.

Të dyshuarit ngarkohen me veprat penale “Shkaktim i rrezikut të përgjithshëm”, “Kanosje”, “Mbajtje në pronësi, kontroll ose posedim i paautorizuar i armës” si dhe “Sulm”. /E.A/

Lajmet

Raportohet se një polic i Kosovës është gjetur i vdekur në Kukës

Published

13 hours ago

July 22, 2026

UBT News

Një zyrtar i Policisë së Kosovës raportohet se është gjetur i vdekur në varrezat e fshatit Morinë, në Kukës.

Sipas Abc News e cila citon informacione të Policisë së Shtetit, rreth orës 08:25 është konstatuar i pajetë shtetasi 35-vjeçar, banues në Prizren, punonjës policie në Njësinë e Reagimit të Shpejtë në Prizren.

Një grup i posaçëm hetimor, nën drejtimin e Prokurorisë, po vijon veprimet për zbardhjen e plotë të rrethanave të ngjarjes.

Bëhet me dije se Policia e Shtetit bëri të ditur se po bashkëpunon me Policinë e Kosovës për të verifikuar nëse arma e sekuestruar është arma e shërbimit të efektivit, si dhe për sigurimin e të gjitha të dhënave që do t’i shërbejnë dokumentimit të plotë ligjor të rastit./A.K/

Kronikë e zezë

Policia sekuestron armë e drogë, disa persona arrestohen

Published

14 hours ago

July 22, 2026

UBTNews

Policia e Kosovës ka realizuar një sërë operacionesh në qytete të ndryshme të vendit, ku janë sekuestruar armë zjarri, narkotikë dhe municion, ndërsa disa persona janë arrestuar e të tjerë janë proceduar në gjendje të lirë.

Në Podujevë, gjatë një kontrolli në shtëpinë e një të dyshuari, policia gjeti dhe konfiskoi një armë zjarri. Pas intervistimit, me vendim të prokurorit, i dyshuari u lirua në procedurë të rregullt.

Po në Podujevë, në kuadër të hetimeve për një rast të vrasjes në tentativë, janë bastisur shtëpitë e dy personave të dyshuar. Gjatë bastisjes u sekuestruan tri pistoleta, tri armë të gjata, 67 fishekë dhe pjesë të ndryshme armësh, ndërsa të dyshuarit ndodhen ende në kërkim policor.

Në Qendrën Korrektuese në Lipjan, gjatë një kontrolli është gjetur një substancë e dyshuar narkotike. Lidhur me rastin është njoftuar prokurori dhe hetimet janë në vazhdim.

Në Gjilan, një person u arrestua pasi gjatë kontrollit iu gjetën 1.35 gram marihuanë dhe 0.54 gram kokainë. Pas intervistimit, ai u lirua në procedurë të rregullt me vendim të prokurorit.

Në Kaçanik, pas hetimeve për posedim të paautorizuar të narkotikëve dhe armëve, policia arrestoi dy persona, një shtetas të Kosovës dhe një shtetas të huaj. Njëri prej tyre u dërgua në mbajtje, ndërsa tjetri u lirua në procedurë të rregullt.

Ndërkohë, në fshatin Gjonaj të Prizrenit, policia ndërhyri pas raportimeve për të shtëna me armë në një aheng familjar. Nga të dyshuarit u sekuestruan një pistoletë me gaz, 21 gëzhoja të armës me gaz, shtatë gëzhoja të armës së zjarrit, si dhe një armë automatike AK-47 me 20 fishekë, e gjetur në një veturë. Të dy të dyshuarit u arrestuan dhe, me vendim të prokurorit, u dërguan në mbajtje.

Një tjetër aksion u zhvillua në fshatin Temeqin të Malishevës, ku gjatë kontrollit në shtëpitë e dy të dyshuarve u konfiskuan një pushkë automatike AK-47 me karikator dhe 10 fishekë, një pistoletë TT me karikator, si dhe një pjesë e një pushke automatike. Pas intervistimit, të dy u liruan në procedurë të rregullt.

Policia e Kosovës ka bërë të ditur se hetimet për të gjitha rastet janë duke vazhduar në koordinim me prokuroritë kompetente.

D.L