Policia e Kosovës ka raportuar disa raste të përdorimit të armëve të zjarrit dhe armëmbajtjes pa autorizim në Podujevë, Prishtinë, Shtime, Prizren dhe Gjakovë, ku janë sekuestruar armë dhe municion, ndërsa disa persona janë arrestuar.

Në fshatin Shtedim të Podujevës, policia ndërhyri pas raportimit për të shtëna me armë zjarri në një aheng familjar. Gjatë kontrollit u gjet dhe u sekuestrua një pistoletë me gaz, ndërsa një i dyshuar u arrestua. Me vendim të prokurorit, ai u lirua më pas në procedurë të rregullt.

Në Prishtinë, në rrugën “Drenova”, një qytetar raportoi se një predhë arme kishte goditur derën hyrëse të shtëpisë së tij. Predha u sekuestrua nga policia, ndërsa rasti po hetohet.

Dy raste të tjera u regjistruan në Shtime. Në fshatin Petrovë, pas raportimit për të shtëna në një aheng familjar, një i dyshuar dorëzoi vullnetarisht një pistoletë me dy fishekë. Ndërkohë, në rrugën “Fazli Grajqevci”, një person u arrestua pasi dyshohet se kishte shtënë me armë zjarri dhe më pas dorëzoi një pistoletë me gaz. Pas konsultimit me prokurorin, ai u lirua në procedurë të rregullt.

Në fshatin Korishë të Prizrenit, gjatë hetimeve për një rast, policia gjeti dhe sekuestroi një pistoletë me gaz në stallën e një të dyshuari. Hetimet për këtë rast janë në vazhdim.

Rasti më i rëndë u raportua në Gjakovë, në rrugën “Gasper Karaqi”, ku policia ndaloi një automjet të drejtuar nga një i dyshuar. Gjatë kontrollit u gjetën një pistoletë dhe shtatë fishekë, ndërsa drejtuesi i automjetit rezultoi të ishte nën ndikimin e alkoolit. Me vendim të prokurorit, ai është dërguar në mbajtje.

Policia e Kosovës ka rikujtuar se përdorimi i armëve në ahengje dhe posedimi i paautorizuar i tyre përbëjnë vepra penale dhe ka apeluar te qytetarët që të respektojnë ligjin dhe të shmangin veprime që rrezikojnë jetën dhe sigurinë publike.

D.L

Policia e Kosovës ka raportuar për disa raste të dhunës në familje gjatë 30 korrikut.

Në Fushë Kosovë, rreth orës 02:00, është arrestuar një person i dyshuar pasi dyshohet se ka sulmuar fizikisht vëllain e tij. Nuk raportohet për persona të lënduar, ndërsa me vendim të prokurorit i dyshuari është dërguar në mbajtje.

Në Prishtinë, rreth orës 21:30, është raportuar se pas një konflikti verbal me bashkëshortin, një grua është sulmuar fizikisht. I dyshuari, pas intervistimit në stacionin policor dhe me vendim të prokurorit, është liruar në procedurë të rregullt.

Ndërkaq, në Deçan, dy persona janë arrestuar nën dyshimin se kanë ushtruar dhunë në familje ndaj prindërve të tyre. Njëri nga viktimat ka pësuar lëndime të lehta trupore dhe ka pranuar tretman mjekësor. Me vendim të prokurorit, njëri nga të dyshuarit është dërguar në mbajtje, ndërsa tjetri është liruar në procedurë të rregullt./A.K/

Në Rahovec është arrestuar një person pasi dyshohet se, së bashku me familjarët e tij, ka sulmuar fizikisht zyrtarët policorë gjatë një intervenimi.

Sipas Policisë, të dyshuarit nuk i kanë respektuar urdhrat e zyrtarëve policorë dhe më pas kanë ndërmarrë sulm fizik ndaj tyre.

I dyshuari është arrestuar dhe me vendim të prokurorit është dërguar në mbajtje. Rasti po hetohet./A.K/

Njësitë policore të Drejtorisë për Hetimin e Krimeve Ekonomike dhe Korrupsionit, në bashkëpunim me Administratën Tatimore të Kosovës dhe Prokurorinë e Shtetit, kanë realizuar një aksion inspektimi në 65 auto-parkingje në rajonin e Prishtinës.

Gjatë kontrolleve janë evidentuar shkelje të ndryshme, të cilat do të trajtohen nga institucionet përkatëse në përputhje me kompetencat ligjore.

Aksioni është zhvilluar në kuadër të luftimit të shmangies nga tatimi dhe respektimit të obligimeve ligjore nga bizneset./A.K/