Shqipëria do të kërkojë të rikthehet në krye të Grupit C1 të Ligës së Kombeve të UEFA-s, teksa në shtëpi pret San Marinon, përfaqësuesen që ende nuk ka marrë asnjë pikë në këtë edicion.

Kuqezinjtë vijnë në këtë përballje pas humbjes 2-1 ndaj Finlandës. Shqipëria ishte e para që kaloi në epërsi, por kartoni i kuq i marrë menjëherë pas golit ndryshoi rrjedhën e ndeshjes. Finlanda e shfrytëzoi epërsinë numerike dhe arriti ta përmbysë rezultatin për të marrë tri pikët.

Kjo ishte humbja e parë e Shqipërisë në këtë edicion dhe bëri që Finlanda të ngjitej në krye të grupit. Megjithatë, gara për vendin e parë mbetet e hapur dhe kuqezinjtë kanë ende mundësi të rikthehen në pozitën e kreut dhe të synojnë ngjitjen automatike në Ligën B.

Në këtë aspekt, sfida ndaj San Marinos shihet si një mundësi e artë për Shqipërinë. Kuqezinjtë kanë dy nga tri ndeshjet e fundit në shtëpi dhe një fitore në këtë përballje do t’u jepte një shtysë të rëndësishme në garën për kreun e grupit.

Për Shqipërinë ekziston edhe një tjetër motiv. Një triumf ndaj San Marinos do t’i mundësonte të fitonte dy ndeshje radhazi në shtëpi për herë të parë që nga tetori i vitit 2023. Gjithashtu, kjo do të ishte fitorja e katërt radhazi në shtëpi për kuqezinjtë në Ligën C.

Në anën tjetër, San Marino po kalon një tjetër fushatë të vështirë në arenën ndërkombëtare. Përfaqësuesja e vogël i ka humbur të tri ndeshjet e zhvilluara deri më tani, pa arritur të shënojë asnjë gol, dhe ndodhet në fund të Grupit C1.

Humbja e fundit 4-0 ishte një tjetër goditje për San Marinon, i cili nuk ka fituar në 17 ndeshjet e fundit ndërkombëtare. Gjatë kësaj serie, ata kanë regjistruar vetëm një barazim dhe 16 humbje, ndërsa kanë shënuar vetëm gjashtë gola dhe kanë pranuar plot 63.

Megjithatë, San Marino e ka të sigurt qëndrimin në Ligën C, pasi në këtë edicion nuk parashihet rënia nga ky nivel i garës. Për këtë arsye, objektivi kryesor i tyre mbetet kërkimi i një rezultati pozitiv dhe përmirësimi i paraqitjeve në ndeshjet e mbetura.

Sa i përket Grupit C1, Finlanda aktualisht mban kreun pas fitores ndaj Shqipërisë, ndërsa kuqezinjtë janë në ndjekje dhe kanë mundësi të rikthehen në pozitën e parë me rezultate pozitive në ndeshjet e ardhshme.

Për Shqipërinë, sfida ndaj San Marinos nuk është thjesht një mundësi për të marrë tri pikë. Një fitore do të ishte një hap i rëndësishëm drejt objektivit për ta mbyllur ciklin në vendin e parë të Grupit C1 dhe për të siguruar ngjitjen në Ligën B.

Ndeshja Shqipëri – San Marino nis në ora 20:45.

D.L

Milot Rashica e ka përmbyllur një cikël të ngarkuar me Përfaqësuesen e Kosovës, duke e cilësuar periudhën e fundit si dinamike, por të veçantë për shkak të mundësisë për ta përfaqësuar vendin.

Megjithatë, ky cikël nuk ishte ndër më të ngarkuarit për Rashicën sa i përket minutave të luajtura. Sulmuesi u paraqit në tri nga katër ndeshjet e Kosovës dhe në të gjitha rastet u inkuadrua nga banka rezervë.

Në fitoren 1-0 ndaj Irlandës, Rashica luajti 18 minuta, ndërsa nuk u aktivizua fare në humbjen 3-1 ndaj Austrisë në Vjenë. Më pas, ndaj Izraelit në Debrecen luajti 22 minuta, ndërsa në barazimin 1-1 ndaj Austrisë në “Fadil Vokrri” u inkuadrua në minutën e 67-të.

Pas përfundimit të këtij cikli, Rashica ka reaguar përmes një postimi në rrjetet sociale.

“Dy javë shumë dinamike, me katër ndeshje jo të lehta, por gjithmonë kënaqësi ta përfaqësoj Kosovën. Krenari e madhe të jap gjithçka për Kosovën, çdo herë dhe në çdo formë. Gjithmonë me zemër për këtë fanellë, në rrugën që po ndërtojmë dhe me ëndrrën që kemi para nesh”, ka shkruar ai.

Kjo periudhë vjen në një moment jo të lehtë edhe për Rashicën në nivel klubesh. Futbollisti po kalon një situatë të komplikuar te Beşiktaşi, ku kishte pasur probleme me klubin dhe për një periudhë ishte larguar nga ekipi i parë, pasi nuk kishte pranuar të ndërpriste kontratën gjatë verës.

Vetëm në ndeshjen e fundit ndaj Amedsporit, Rashica mori minuta, duke u aktivizuar në pjesën e dytë.

Pavarësisht situatës te klubi, ai vazhdoi të ishte pjesë e Kosovës dhe kontribuoi në tri paraqitje gjatë këtij cikli.

Në ndeshjen ndaj Austrisë në Prishtinë, Rashica ishte shumë pranë golit pak minuta pas epërsisë së Kosovës. Ai goditi shtyllën, ndërsa topi u rikthye në zonë, por gjuajtja e Veldin Hoxhës u ndal nga portieri austriak.

Kosova e mbylli këtë seri prej katër ndeshjesh me pesë pikë, pas fitores ndaj Irlandës, humbjes nga Austria dhe dy barazimeve ndaj Izraelit dhe Austrisë.

“Dardanët” tani i presin edhe dy ndeshje në muajin nëntor, ndaj Izraelit dhe Irlandës, ku synojnë ta përmbyllin sa më mirë këtë edicion të Ligës së Kombeve.

D.L

Përfaqësuesja e Kosovës në futbollin e femrave do të përballet me Austrinë në dy ndeshje të raundit të parë të plejofit kualifikues për Kupën e Botës 2027.

Ndeshja e parë do të zhvillohet të premten, nga ora 18:00, në stadiumin “Fadil Vokrri” në Prishtinë, ndërsa sfida e kthimit do të luhet më 13 tetor, në të njëjtën orë, në Vjenë.

Skuadra që do të jetë më e suksesshme pas dy ndeshjeve do të avancojë në raundin e dytë dhe të fundit të plejofit.

Në letër, Austria shihet si favorite, pasi në fazën e rregullt të kualifikimeve garoi në Ligën A, ku përfundoi e treta në grup, pas Gjermanisë dhe Norvegjisë.

Kosova, në anën tjetër, garoi në Ligën C, ku e përfundoi grupin në vendin e parë, duke lënë pas Kroacinë, Bullgarinë dhe Gjibraltarin.

Federata e Futbollit të Kosovës ka publikuar të hënën listën e futbollisteve të grumbulluara për këto dy përballje. Pas dorëheqjes së Sami Sermaxhajt, përfaqësuesen A të Kosovës në këto ndeshje do ta drejtojë Sanije Krasniqi.

Në rast se Kosova arrin ta eliminojë Austrinë, në raundin e fundit të plejofit do të përballet me fituesin e çiftit Zvicër–Izrael.

Kosova dhe Austria janë përballur së fundmi edhe me përfaqësueset e meshkujve. Në ndeshjen e zhvilluar në Vjenë, Austria fitoi 3-1, ndërsa sfida e së dielës në “Fadil Vokrri” përfundoi 1-1. Këto ndeshje u zhvilluan në kuadër të Ligës B të Ligës së Kombeve.

D.L

Me 95 vota për, asnjë kundër dhe asnjë abstenim, Kuvendi i Kosovës ka miratuar projektligjin për ratifikimin e marrëveshjes ndërmjet Republikës së Kosovës dhe Agjencisë Franceze për Zhvillim (AFD), që parasheh një kredi prej 60 milionë eurosh për renovimin dhe zgjerimin e kampusit të studentëve të Universitetit të Prishtinës.

Investimi lidhet edhe me përgatitjet për organizimin e Lojërave Mesdhetare “Prishtina 2030”, ku kampusi universitar pritet të shërbejë përkohësisht si fshati i atletëve.

Ministri në detyrë i Financave, Hekuran Murati, gjatë prezantimit të marrëveshjes në Kuvend, tha se projekti përfshin renovimin dhe zgjerimin e infrastrukturës së konvikteve, si dhe ndërtimin e renovimin e objekteve sportive në institucionet arsimore përreth kampusit.

Sipas Muratit, gjatë Lojërave Mesdhetare, kampusi do të përdoret për akomodimin e sportistëve, ndërsa objektet sportive të shkollave përreth do të shërbejnë si qendra stërvitore.

“Projekti do të sjellë përfitime për studentët, duke mbështetur njëkohësisht organizimin e Lojërave Mesdhetare që do të mbahen në vitin 2030 në Prishtinë”, deklaroi Murati.

Përveç kredisë prej 60 milionë eurosh, marrëveshja parasheh edhe mundësinë e përfitimit të një granti investiv shtesë prej 10 milionë eurosh.

Investimet pritet të përmirësojnë ndjeshëm infrastrukturën e kampusit universitar dhe hapësirave sportive përreth. Pas përfundimit të Lojërave Mesdhetare, objektet e rinovuara do të mbeten në shërbim të studentëve të Universitetit të Prishtinës dhe komunitetit.

Projekti synon që investimi të mos shërbejë vetëm për organizimin e “Prishtina 2030”, por të krijojë infrastrukturë të qëndrueshme për studentët dhe qytetarët edhe në vitet pas përfundimit të garave.

D.L