Prokurorët në Mbretërinë e Bashkuar kanë konfirmuar për herë të parë se kanë autorizuar 21 akuza kundër Andrew dhe Tristan Tate, duke përfshirë përdhunim, dëmtim trupor dhe trafikim qeniesh njerëzore.
Shërbimi i Prokurorisë së Kurorës tha se kishte autorizuar akuzat kundër vëllezërve më 2024, para se të lëshohej urdhër ekstradimi për t’i sjellë nga Rumania.
Dy britaniko-amerikanët janë nën hetim në Rumani, duke u përballur me një numër akuzash, që i mohojnë e CPS tha se “çështjet penale të brendshme në Rumani duhet të zgjidhen së pari”. Vendimi i CPS-së për ngritjen e akuzave erdhi pasi mori dosje me prova nga Policia e Bedfordshire në lidhje me akuzat e bëra në Mbretërinë e Bashkuar.
CPS tha se Andrew Tate, një influencues 38-vjeçar dhe ish-kikbokser, përballet me 10 akuza të lidhura me tre viktima të dyshuara, duke përfshirë përdhunim, dëmtim trupor, trafikim qeniesh njerëzore dhe kontrollim të prostitucionit për qëllime fitimi. Tristan Tate, 36 vjeç, përballet me 11 akuza të lidhura me një viktimë të supozuar, duke përfshirë përdhunim, dëmtim trupor dhe trafikim qeniesh njerëzore.
Dyshja u lindën në SHBA, por u zhvendos në Luton të Mbretërisë së Bashkuar me nënën pasi prindërit e tyre u divorcuan. Vitet e fundit, Andrew Tate ka ndërtuar prani masive online, duke përfshirë 10 milionë ndjekës në X, duke ndarë stilin e tij të jetesës me makina të shpejta, avionë privatë dhe jahte.
Ai dhe vëllai u arrestuan për herë të parë në Rumani në dhjetor 2022, me Andrew-n të akuzuar për përdhunim dhe trafikim qeniesh njerëzore dhe Tristan-in të dyshuar për trafikim qeniesh njerëzore.