Sipas raportit 24-orësh të Policisë së Kosovës, një rast i dhunimit është raportuar të ketë ndodhur në Komunën e Istogut.

Viktima, burrë, ka deklaruar në polici se fillimisht është sulmuar fizikisht nga tre persona të dyshuar, po ashtu meshkuj kosovarë, e më pas është dhunuar seksualisht prej tyre.

Për shkak të lëndimeve të pësuara, viktima ka marrë trajtimin e nevojshëm mjekësor në Spitalin e Pejës.

Lidhur me ngjarjen është njoftuar prokurori i shtetit, me urdhër të të cilit rastit i është hapësiruar hetimi dhe njësitë kompetente po punojnë për zbardhjen e plotë të rrethanave dhe identifikimin e të dyshuarve. /E.A/

Gjatë kryerjes së punimeve rrugore në Gjilan, janë hasur disa mjete të pashpërthyera dhe pajisje ushtarake, të cilat dyshohet se i përkasin periudhës së luftës.

Sipas raportit zyrtar, në vendngjarje janë gjetur granata dore, armë të gjata, karikatorë, fishekë si dhe uniformë ushtarake.

Njësitë policore kanë reaguar menjëherë duke bërë sigurimin e plotë të zonës, ndërsa njësitë e specializuara për deminim nga KFOR-i dhe Forca e Sigurisë së Kosovës (FSK) kanë dalë në vendin e ngjarjes. Mjetet e dyshimta janë tërhequr në mënyrë të sigurt nga punonjësit e deminimit, pa shkaktuar asnjë incident. /E.A/

Një person ka humbur jetën dhe dy të tjerë kanë mbetur të lënduar si pasojë e një aksidenti trafiku të ndodhur mbrëmjen e së mërkurës në autostradën “Ibrahim Rugova”.

Aksidenti ka ndodhur rreth orës 20:25, në kilometrin e 29-të të autostradës, ku janë përfshirë një kamion dhe një veturë.

Viktima është drejtuesi i kamionit, vdekjen e të cilit e ka konstatuar ekipi mjekësor në vendin e ngjarjes. Ndërkaq, drejtuesi i veturës dhe një pasagjere kanë pësuar lëndime trupore dhe janë dërguar për trajtim mjekësor.

Në vendin e ngjarjes kanë dalë njësitë policore, ekipi mjekësor dhe prokurorja kujdestare, me urdhër të së cilës trupi i pajetë është dërguar në Institutin e Mjekësisë Ligjore për obduksion. Rasti po hetohet nga njësitë përkatëse. /E.A/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

27 gusht 1993

Skenar i mundshëm i “Indipendentit” për luftën në Kosovë

Gazeta e Londrës “Indipendent”, botoi një vështrim të gjatë rreth pesë luftërave të mundshme në botë, në mesin e të cilave parasheh edhe luftën në Kosovë dhe rreth Kosovës.

Duke përshkruar situatën e tanishme në Shqipëri e në Kosovë dhe në vise të tjera etnike shqiptare, kjo revistë shkruan:

Shqipëria ka 3 milionë banorë, kryesisht të besimit mysliman. Megjithatë, në Shqipëri, në një të tretën e vendit jetojnë edhe 400 mijë pjesëtarë të minoritetit grek. Greqia këtë rajon e quan Epiri Verior dhe për të i bëri kërkesë Konferencës së paqes në Paris më 1946. Partisë politike kryesore të grekëve në Shqipëri “Omonia” iu ndalua pjesëmarrja në zgjedhje. Këshilli i shenjtë i kishave protestoi kundër ndjekjes së Kishës pansllave dhe dëbimit të paradokohshëm të arhimandritit Majdonis.

Vetëm para gjashtë vjetësh u hoq edhe teknikisht gjendja e luftës midis Greqisë dhe Shqipërisë, e cila zgjati që nga viti 1945. Greqia para do kohësh përzuri 26 mijë shqiptarë, të cilët këtu u vendosën ilegalisht dhe për këtë i bëri ultimatum Tiranës. Athina në fakt kërkon shtet grek në kuadër të Shqipërisë.

Në krahinën serbe të Kosovës, e cila në jug kufizohet me Shqipërinë, jetojnë 2 milionë të nacionalitetit shqiptar. Ata përbëjnë 90 për qind të popullsisë së Krahinës dhe kanë formuar Qeverinë etnike të papranuar si përgjigje në represionin e Serbisë, e cila Kosovën e konsideron si pjesë historike dhe të patjetërsueshme, shkruan kjo revistë.

Gazeta “Indipendent” parasheh edhe skenarin e katastrofës: Meqë Serbia mori pjesën e vet të Bosnjës, në pranverën e vitit 1994 kërkon provokime të reja. Kryetari Slobodan Milosheviq, i cili që më 1989 i deklaroi pakicës serbe në Kosovë se “Askush dhe kurrë më nuk guxon t’ju rrahë”, provokon një rund të ri të konflikteve midis dy bashkësive.

Milosheviqi atje dërgon ushtrinë serbe për të rikthyer kontrollin mbi administratën e paligjshme të shqiptarëve. Në fakt qëllimi i tij i fshehtë është spastrimi etnik dhe dëbimi i shqiptarëve kosovarë përtej kufirit në vet Shqipërinë.

Shqipëria do të mobilizohet për t’i mbrojtur bashkatdhetarët e vet – ndoshta përmes kundëraksionit, duke iu përgjigjur kërkesës së shqiptarëve kosovarë, të cilët administrimin e tyre e proklamuan si “Qeveri rajonale”. Milosheviqi shkon në Athinë të bisedojë rreth kësaj krize me premierin grek Konstantin Micotaqis. “Omonia” 24 orë më vonë “spontanisht” i drejtohet Greqisë për ndihmë, me insistim se ithtarët e saj frikësohen për jetën e tyre. Greqia mobilizohet dhe jep afat Tiranës 48 orë që ta pranojë “Republikën greke të Epirit”. Shqipëria përgatitet për luftë në dy fronte kundër ushtrive më të mëdha dhe ushtarakisht më të forta të Ballkanit. Turqia, që konsiderohet si mbrojtëse historike e shqiptarëve myslimanë në Ballkan, fillon fluturimet provokative dhe mbikëqyrëse mbi siujdhesat greke në Dardanele dhe mbi Greqinë veri-lindore në Thrakia, ku jeton pakica e madhe në numër turke.

Po qe se Kombet e Bashkuara nuk intervenojnë urgjentisht ushtarakisht, bota do të ballafaqohet ose me luftën e përgjithshme rajonale, nëse Turqia sulmon Greqinë, ose me ndarjen e paevitueshme të Shqipërisë, nëse Turqia përmbahet. Shqipëria në këtë mënyrë do të bëhej Bosnja e dytë me katër milionë shqiptarë të varfër. Në të do të vendoseshin refugjatët nga viset e spastruara etnikisht të Kosovës dhe të Epirit Verior, përfundon skenarin e vet revista londineze “Indinpendent”, të cilin e boton “Borba” e sotme.

27 gusht 1994

U burgosën mbi 2 mijë refugjatë shqiptarë në Greqi

Shumica nga agjencitë kryesore të lajmeve dje bënë të ditur se ministri i jashtëm grek, Papulas, hodhi poshtë propozimin e kryetarit shqiptar Sali Berisha për dialog ndërshtetëror, pas ndërmjetësimit të Komisionarit të Lartë të KSBE-së Maks Vander Shtolit, me pretekst se më parë duhet liruar pesë shtetasit shqiptarë me kombësi greke të akuzuar për spiunim.

Dhe derisa diplomacia greke tregohet kaq arrogante ndaj propozimit shqiptar, vetëm për shkak të burgosjes së pesë minoritarëve grekë, agjencia greke MPA njofton se sipas deklaratës së shefit të policisë së Selanikut, Kostin Bres, i cili është edhe shef për çështjen e refugjatëve në Greqinë Veriore, që nga 15 gushti u burgosën 2 mijë refugjatë shqiptarë, bile vetëm në këtë zonë veriore. Po ky shef policie vërtetoi gjithashtu se për çdo ditë burgosen nga 250 qytetarë shqiptarë.

27 gusht 1995

Ushtarët serbë vranë Ymer Agushin nga Gërqina e Gjakovës

Mbrëmë në orën 18:45 ushtarët serbë vranë me armë zjarri Ymer Dervish Agushin (1973) nga fshati Gërqinë e Gjakovës, afër kufirit me Shqipërinë.

Komisioni për Informim i Degës së LDK-së në Gjakovë njoftoi se ky i ri u qëllua me armë derisa po punonte me disa bashkëfshatarë në hapjen e një vije në lagjen Gutaj për të shpëtuar fshatin nga vërshimet e ujit.

Tre ushtarë, në gjendje të dehur, u ndalën afër fshatarëve dhe pasi i ofenduan e filluan t’i rrahin, qëlluan me armë dhe vranë Ymer Agushin.

Pas vrasjes së këtij të riu, baba i një fëmije, fshati u bllokua nga ushtria serbe.

Varrimi i të ndjerit bëhet sot në fshatin Gërqinë në orën 15:00.

Dervish Agushi është viktima e njëmbëdhjetë e terrorit shtetëror serb në Kosovë.

Vitin e kaluar forcat serbe patën vrarë 18 shqiptarë.

27 gusht 1997

Gjashtë të vrarë gjatë gushtit në zonën kufitare Kosovë-Shqipëri

Gjashtë shqiptarë të vrarë e shumë të plagosur vetëm gjatë muajit gusht, është bilanci i zi i terrorit në zonën kufitare të Kosovës me Shqipërinë në rrethin e Gjakovës. Tre janë vrarë nga forcat ushtarake e policore serbe të përqëndruara përgjatë kufirit, ndërsa tri vrasje të tjera nuk janë sqaruar. Të vrarët dhe të plagosurit janë nga të dy anët e kufirit, shkruan “Bujku” i sotëm.

Njoftohet se në zonat kufitare të Kosovës me Shqipërinë mbretëron një situatë tejet e rëndë dhe e tensionuar nga terrori sistematik shtetëror serb. Situatën e rëndojnë edhe grupe të armatosura plaçkitëse nga zonat e afërta të Shqipërisë.

27 gusht 1998

Shtime: Forcat serbe qëlluan me granatë anëtarët e familjes Asllani

KMDLNJ njofton për 11 të vrarë, në mesin e tyre tetë fëmijë

KMDLNJ njoftoi sot në mëngjes se forcat serbe qëlluan me granatë nga tanku anëtarët e familjes Asllani që po largoheshin nga Grapci i Shtimes, duke vrarë Jalldyze Asllanin (62), Halide Asllanin (37), Ajshe Asllanin (27), Burim Asllanin (13), Lumni Asllanin (11), Ejup Asllanin (9), Luljeta Asllanin (7), Shpend Asllanin (5), Xhafer Asllanin (3), Antigonë Asllanin (1) dhe Albionë Asllanin (6 muajshe).

Janë lënduar rëndë vëllezërit Isak Asllani, Musa Asllani dhe Ekrem Asllani.

Ky akt kriminal ndodhi dje në mes orës 13 e 14.

Deri më tash nuk ka njoftim nga burime të tjera.

Në Duhël të Suharekës forcat serbe ekzekutuan 4 dhe plagosën 1 shqiptar

Dje në fshatin Duhël të Suharekës, forcat e ushtrisë dhe të policisë serbe në lagjen e Sopajve vranë vëllezërit Isuf Ahmet Çatani (30) dhe Ridvan Ahmet Çatani (25), njofton KI i Degës së LDK-së në Suharekë.

I njëjti burim bën të ditur se forcat e ushtrisë dhe të policisë serbe kanë marrë rob dhe pastaj e kanë ekzekutuar Ruzhdi Ymer Çatanin (25) nga Duhla. Po ashtu bëhet e ditur se forcat serbe e kanë ekzekutuar edhe një civil tjetër shqiptar, emri i të cilit nuk dihet.

Njoftohet se forcat serbe kanë plagosur edhe Jahir Perteshin po ashtu nga Duhla.