Lajmet

Mbi 80 shkolla në mësim online, vetëm në Prishtinë rreth 1 mijë nxënës të infektuar

Numri total i nxënësve të imunizuar ndaj COVID-19 në të gjithë vendin është mbi 47 mijë.

Published

on

Edhe këtë javë po vazhdon mësimi online në shumë shkolla në vend. Aktualisht 81 shkolla janë duke ndjekur mësimet në distancë për shkak të infektimit me COVID të nxënësve dhe mësimdhënësve. Vetëm në Prishtinë janë 16 shkolla. Në kryeqytet numri i nxënësve të infektuar është rreth 1000 ndërsa i mësimdhënësve 175. Numri total i nxënësve të imunizuar ndaj COVID-19 në të gjithë vendin është mbi 47 mijë.

Zëvendësministri i Arsimit, Dukagjin Pupovci deklaroi se për dallim nga e enjtja dhe e premtja e javës së kaluar, numri i shkollave që janë në mësim online është më i ulët.

“Ne kemi raportin e ditës së djeshme pasdite, pra kanë qenë 81 shkolla për dallim nga 94 sa ishin të premten dhe 99 sa ishin të enjten. Domethënë numri po shpresojmë që po shkon duke u zvogëluar edhe pse mund të jetë pak e hershme të japim një përfundim të tillë, por janë shkollat ato që marrin vendime nëse do të shkojnë online ose do punojnë me prezencë fizike. Përveç këtyre shkollave nëpër shkollat të ndryshme janë edhe një numër klasash që punojnë online, këtu nuk kemi një evidencë shumë të saktë sepse në shumë shkolla ka klasa të tilla por ndodh që diku janë një ose dy klasë varësisht nga numri i infeksioneve që i kemi brenda”, ka deklaruar Pupovci.

Pupovci shtoi se numri i fëmijëve dhe të rinjve të vaksinuar nuk është i kënaqshëm. Sipas të dhënave nga Ministria e Shëndetësisë numri i nxënësve të imunizuar kundër COVID-19 është 47157.

Prishtina është komuna me më së shumti shkolla që po funksionojnë sipas skenarit C si pasojë e infektimeve me COVID të nxënësve dhe mësimdhënësve. Përmes një përgjigje me shkrim, Komuna e Prishtinës thotë se janë 16 shkolla si dhe tri çerdhe.

“Institucionet edukative arsimore dhe aftësuese të Komunës së Prishtinës që kanë kaluar në skenarin C janë SHFMU ‘Meto Bajraktari’, SHFMU ‘Xhemail Mustafa’, SHFMU ‘Pjetër Bogdani’, SHFMU ‘Mehmet Gjevori’, SHFMU ‘Ganimete Tërbeshi’, SHFMU ‘7 Marsi’, SHFMU ‘Azemi e Salihu’, SHML ‘Sami Frashëri’, SHML ‘Xhevdet Doda’, SHML ‘Prenk Jakova’, SHMM ‘Dr. Ali Sokoli’, SHML ‘Ahmet Gashi’, SHML ‘Eqrem Çabej’, SHML ‘Gjin Gazulli’, SHML ‘7 Shtatori’, SHFMU ‘Zenel Hajdini’ dhe çerdhet IP ‘Dielli’, IP ‘Gëzimi Ynë’, IP ‘Xixëllonjat’, thuhet në përgjigje.

Komuna e Prishtinës ka treguar edhe për numrin e nxënësve dhe mësimdhënësve të infektuar me COVID.

“Numri i mësimdhënësve aktivë me COVID-19 janë 175. Numri i personalit tjetër aktiv me COVID-19 është 45. Numri i nxënësve aktivë me COVID-10 është 988”, vijoi përgjigjja.

Nënkryetarja e SBAShK-ut, Vjollca Shala thotë se masat në shkollë nuk po respektohen sa duhet, sidomos nga nxënësit, përkundër thirrjeve të vazhdueshme për një gjë të tillë.

“Masat që janë duke u respektuar të cilat janë të përcaktuara nga Instituti Kombëtar i Shëndetësisë Publike, natyrisht që pak a shumë janë duke i respektuar mësimdhënësit dhe nxënësit por kur flitet për nxënësit, nxënësit më pak i respektojnë ato masat edhe pse janë të këshilluar qoftë nga mësimdhënësit, prindërit apo edhe Ministria e Shëndetësisë. Mirëpo tani se fundmi ka një numër të rritur të mësimdhënësve dhe të nxënësve të cilët janë të prekur nga pandemia apo virusi COVID-19,dhe një numër goxha i madh i shkollave ka kaluar në mësimin online”, ka thënë ajo.

SBASHK mendon se mësimi me prani fizike dhe me numër të plotë të nxënësve është më efikas.

“Kërkesa jonë e vazhdueshme mbetet që të punohet me prani fizike dhe me numër të plotë të nxënësve, mirëpo nëse numri i nxënëseve që janë të infektuar apo i mësimdhënësve është i lartë atëherë task-forcat janë ato që e bëjnë raportimin e numrit të nxënësve të infektuar, numrin e mësimdhënësve dhe ato janë që e përcaktojnë një klasë, një shkollë apo edhe nivel të gjithë komunës si duhet të punohet”, theksoi ajo.

Në 24 orët e fundit 2 mijë e 33 qytetarë kanë rezultuar pozitivë me virusin COVID-19, ndërsa janë shënuar edhe gjashtë raste të vdekjes.

Lajmet

Protestë e re kundër shtrenjtimit të rrymës në Prishtinë

Published

on

By

Grupi “Asnjë cent më shumë” ka njoftuar se do të organizojë një protestë të re më 19 prill, kundër rritjes së çmimit të energjisë elektrike. Protesta do të mbahet në sheshin “Skënderbeu” në orën 12:00, dhe organizatorët kanë ftuar qytetarët të marrin pjesë në masë.

Besnik Shabiu, organizatori i protestës, ka deklaruar se protesta është një reagim ndaj vendimit të ZRRE-së për rritjen e çmimit të energjisë elektrike, duke theksuar se, nëse autoritetet nuk reagojnë, grupi nuk përjashton mundësinë e përshkallëzimit të aksioneve. Ai paralajmëroi se mund të ndodhin bllokime të rrugëve dhe institucioneve, për të siguruar që zëri i qytetarëve të dëgjohet.

Shabiu ka shtuar se protesta e nesërme vjen në një moment të rëndësishëm, pasi të njëjtën orë mbahet edhe vazhdimi i seancës konstituive të Kuvendit të Kosovës. Ai bëri thirrje për deputetët e zgjedhur që, sapo Kuvendi të konstituohet, të thirret komisioni për energji dhe ZRRE-ja për të raportuar mbi çështjen e rritjes së çmimit të energjisë.

“Zëri i qytetarëve duhet të dëgjohet pa ndërprerë. Ne do të vazhdojmë të jemi të zëshëm, dhe nëse pas kësaj proteste nuk ka reagim, do të jemi të detyruar të përshkallëzojmë aksionet”, tha Shabiu.

Ai gjithashtu njoftoi se po shqyrtohen mundësitë e pezullimit të pagesave për energjinë elektrike për qytetarët si një masë për të mbrojtur interesat e tyre. “Ky është një kërkesë legjitime e qytetarëve. Kur institucionet nuk punojnë për qytetarët, pse duhet të funksionojnë?”, shtoi ai.

Në anën tjetër, Ardian Bajraktari, një nga përfaqësuesit e grupit, ka bërë të ditur se ekipi i tij po punon për hartimin e padisë për anulimin e vendimit të aktit administrativ nga ZRRE. Sipas tij, ky vendim është marrë në shpërputhje me autorizimet e këtij institucioni dhe ka dëme të mëdha për qytetarët. Ai ka njoftuar se janë duke përgatitur gjithashtu një propozim për një masë të përkohshme, për të shtyrë ekzekutimin e vendimit derisa të shqyrtohet nga gjykatat.

Ky zhvillim vjen pas njoftimit të ZRRE-së për një rritje të çmimit të energjisë elektrike për 16%, që do të hyjë në fuqi nga muaji maj. Ky vendim ka shkaktuar reagime të shumta nga qytetarët, bizneset dhe subjektet politike, që po kundërshtojnë një rritje të tillë. Protesta të ngjashme janë mbajtur tashmë dhe grupet e aktivistëve po kërkojnë anulimin e këtij vendimi.

Për më shumë, grupi “Asnjë cent më shumë” ka paralajmëruar se do të vazhdojnë aksionet deri në arritjen e kërkesave të tyre dhe kanë ftuar qytetarët të bashkohen në protestën e nesërme për të shprehur pakënaqësinë e tyre ndaj shtrenjtimit të rrymës.

Continue Reading

Lajmet

Osmani dekoron me medalje tre të mbijetuar të dhunës seksuale gjatë luftës

Published

on

By

Presidentja e Republikës së Kosovës, Vjosa Osmani, ka dekoruar me medaljen “Nderi i Republikës së Kosovës” tre të mbijetuar të dhunës seksuale gjatë luftës së fundit në Kosovë. Në një ceremoni të organizuar në Presidencë, medalja iu dorëzua Vasfije Krasniqi-Goodman, Shyrete Tahiri-Sylejmani dhe Ramadan Nishori, të cilët kanë folur publikisht për përvojat e tyre të dhunës nga forcat serbe gjatë luftës.

Në fjalimin e saj, Presidentja Osmani ka vlerësuar guximin e të mbijetuarve për të ndarë me publikun përvojat e tyre dhe ka theksuar rëndësinë e dëshmive të tyre për drejtësinë dhe të vërtetën historike të Kosovës. Ajo ka shtuar se këta individë janë dëshmi e gjallë e luftës për drejtësi dhe kanë kontribuar në ndriçimin e rrugës së drejtë të historisë së vendit.

“Ka momente ku fjalët nuk mjaftojnë për të shprehur mirënjohjen, siç ka edhe njerëz që me guximin e tyre të lënë pa fjalë. Sot jemi këtu për t’iu përulur me respektin më të thellë përballë tre individëve që janë më shumë se thjesht individë, sepse me dhimbjen e tyre kanë ndriçuar rrugën e drejtë së vërtetës, drejtësisë dhe shpresës. Ju jeni zëri që keni zgjedhur dinjitetin, jeni zëri i të mbijetuarve që kanë zgjedhur heshtjen. Ky është një premtim i gjallë se historia nuk do t’i harrojë,” tha Osmani.

Pas dekoratës, Ramadan Nishori shprehu mirënjohjen për përkrahjen nga populli, duke theksuar se ndihej mirë që kishte marrë mbështetje në këtë rrugëtim të vështirë. “E përshëndes gjithë popullin tonë që më ka përkrahur këto ditë,” tha ai shkurt.

Vasfije Krasniqi, një tjetër e dekoruar, bëri thirrje që viktimat e dhunës seksuale të flasin hapur dhe të kërkojnë drejtësi. “Dua të falënderoj për qasjen, angazhimin. Të dashura viktima, ju lutem, ku do që jeni, ka ardhur koha të kërkojmë drejtësi. Lirojeni shpirtin që të mos ia falim Serbisë krimin që ka kryer,” tha Krasniqi.

Shyrete Tahiri-Sylejmani, gjithashtu e dekoruar, theksoi rëndësinë e drejtësisë për arritjen e paqes. “Kur të kemi drejtësi, kemi paqe. Faleminderit për kurajën që na jepni,” përfundoi ajo.

Continue Reading

Lajmet

Prokuroria kërkon vazhdimin e paraburgimit për Selimin dhe Krasniqin

Published

on

By

Prokuroria në Hagë ka kërkuar vazhdimin e paraburgimit për Rexhep Selimin dhe Jakup Krasniqin edhe për dy muaj të tjerë.

Në kërkesën për Krasniqin e ngjashëm edhe për Selimin, Prokuroria thotë se përfundimi i paraqitjes së provave nga ana e tyre rrit rrezikun e pengimit të drejtësisë dhe kryerjes së krimeve të tjera.

Veç kësaj, ZPS ka thënë se kjo justifikon edhe rishqyrtimin e rrezikut të arratisjes në vendimet për vazhdimin e paraburgimit. E njëjta gjë është theksuat edhe tek vendimi për Rexhep Selimin.

Sipas tyre vazhdon të ekzistojnë dyshime të bazuara se Jakup Krasniqi ka kryer një ose më shumë prej krimeve që bien në jurisdiksiomin e DHSK-së. Madje, Prokuroria thotë se ky dyshim është përforcuar edhe nga provat e ZPS-së që tashme janë përfshirë në dosjen e gjykimit.

Ata thonë se, fakti që Krasniqi dhe Selimi tani kanë njohuri të veçantë mbi rastin dhe provat kundër tij e rrit rrezikun që ai mund të kryejë krime të tjera, përfshirë kundër dëshmitarëve që kanë dhënë ose mund të japin dëshmi në çështje dhe/ose që mund të paraqiten para këtij Paneli në faza të ardhshme të procedurave.

“Për më tepër, Selimi tashmë është në dijeni të identitetit të të gjithë dëshmitarëve të ZPS-së dhe të provave të tyre. Përfundimi i çështjes së ZPS-së nuk e zvogëlon rrezikun e pengimit, por e rrit atë, pasi i akuzuari tashmë ka njohuri të plotë për përmbajtjen e çështjes ndaj tij. Siç është theksuar nga Trupi Gjykues, ekziston rreziku që ndërhyrjet me qëllim për të siguruar tërheqje të dëshmive dhe/ose për të dekurajuar dëshmitarët e ardhshëm nga dhënia e dëshmive mund të pengojnë përparimin e procedurës. Më tej, ekziston mundësia që dëshmitarët të thirren sërish, duke i bërë ata të cenueshëm ndaj përpjekjeve për ndërhyrje”, thuhet në kërkesën e Prokurorisë për Selimin.

Përveç rrezikut të arratisjes dhe pengimit të procedurave, Prokuroria ka thënë se masat e vendosura ne objektet e paraburgimit kanë ofruar garanci kundër vizitave dhe komunikimeve të pa-monitoruara si masa për të minimizuar rreziqet përkatëse.

Ata thonë se paraburgimi mbetet proporcional dhe i arsyeshëm veçanërisht që procedurat tashmë kanë përparuar.

Ndryshe, Prokuroria më 15 prill 2025 ka njoftuar se ka përfunduar paraqitjen e provave në këtë rast.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /Betimi për Drejtësi/

Continue Reading

Lajmet

Rama: Vendimi për ndërprerjen e projektit në shesh nuk është i mbështetur ligjërisht

Published

on

By

Kryetari i Prishtinës, Përparim Rama, ka deklaruar se vendimi për ndalimin e punimeve në sheshin “Xhorxh Bush” është i paligjshëm dhe i pambështetur në argumente juridike. Ai tha se institucionet që morën këtë vendim po ndikohen nga qëllime politike, edhe pse duhet të veprojnë në mënyrë të pavarur.

“Për herë të dytë janë ndërprerë punimet në një projekt të planifikuar për transformimin e hapësirës publike. Arsyetimet për këtë ndërhyrje nuk qëndrojnë në bazë ligjore dhe nuk janë ngritur nga palët përkatëse,” tha Rama në një konferencë për media.

Ai theksoi se projekti ka për qëllim përmirësimin e hapësirës publike dhe integrimin e trashëgimisë kulturore në zhvillimin urban të qytetit.

“Ka munguar përgjigjja nga Ministri për një debat publik për këtë çështje, edhe pse kemi qenë të hapur për diskutim,” shtoi ai.

Rama njoftoi se Komuna e Prishtinës do të ndjekë rrugë ligjore ndaj veprimeve që, sipas tij, bien ndesh me ligjin.

“Kryeqyteti do të vazhdojë procedurat ligjore ndaj të gjithë atyre që shkelin ligjin,” përfundoi ai.

Continue Reading

Të kërkuara