Raportuesi i përhershëm i Parlamentit Evropian për Serbinë, Tonino Picula, pas vizitës së tij në Beograd, gjatë së cilës nuk u takua me zyrtarët më të lartë shtetërore, tha se presidenti i Serbisë, Aleksandar Vuçiq, kishte planifikuar një gjë të tillë.

“Vendimin që kontaktet e drejtpërdrejta me mua, në emër të pushtetit, të reduktohen ekskluzivisht në bisedime në Kuvendin Popullor dhe në Ministrinë për Integrime Evropiane e mori, natyrisht, presidenti Vuçiç, pasi vetëm ai vendos për lëvizje të tilla,” konfirmoi Picula për Radio Evropa e Lirë.

Picula shkoi në Beograd pasi që më 20 shkurt, në Komisionin për Politikë të Jashtme të Parlamentit Evropian, u prezantua draft-raporti, i cili u përball me kritika nga autoritetet serbe.

Takimin me raportuesin për Serbinë e refuzoi Vuçiqi, i cili e quajti Piculën “gënjeshtar”. Përveç Vuçiqit, takimin e refuzoi edhe kreu i grupit parlamentar “Aleksandar Vuçiq – Serbia nuk duhet të ndalet” në Kuvendin e Serbisë, Milenko Jovanov.

Picula pretendon se qëndrimi negativ i qeverisë ndaj draft-raportit për situatën në vend ishte promovuar që para mbërritjes së tij.

“Nga ana tjetër, nuk do të ishte e drejtë të reduktohej kuptimi dhe rezultatet e qëndrimit tim në Serbi vetëm në takimet që nuk pata me presidentin e shtetit, kryeministren në detyrë dhe ministrin e Punëve të Jashtme”, tha Tonino Picula.

Gjatë qëndrimit të tij në Serbi, ndodhi gjithashtu një aksion policor në ambientet e disa organizatave joqeveritare në Beograd.

Picula konfirmon se edhe ky element, së bashku me të gjitha përshtypjet nga vizita, do të përfshihen në vijimin e punës për raportin mbi gjendjen në Serbi.

Ai vlerësoi se misioni katërditor në kapacitetin e raportuesit të përhershëm të Parlamentit Evropian për Serbinë ka treguar se nuk do të jetë e mundur të kapërcehen lehtësisht dallimet në vlerësimet për situatën në vend mes tij dhe përfaqësuesve të pushtetit me të cilët nuk pati mundësinë të bisedojë.

“Ngjarjet më të rëndësishme në Serbi prej muajsh janë protestat masive të udhëhequra nga studentët, të cilët po bllokojnë institucionet arsimore. Protestat janë përhapur pothuajse në të gjithë vendin. Sipas mendimit tim, bëhet fjalë për një presion të përgjithshëm shoqëror mbi politikën, me qëllim çlirimin e institucioneve të shtetit nga gjithçka që i ka bllokuar për vite me radhë”, thekson Picula.

Sipas tij, zhvillimet e ardhshme do të varen nga marrëdhëniet mes katër faktorëve që ai i konsideron më me ndikim: pushtetit, i cili nuk po arrin t’i shpërndajë protestat; opozitës institucionale, e cila nuk i drejton zhvillimet; komunitetit ndërkombëtar, që kryesisht po mban distancë; dhe studentëve, të cilët kanë një bazë të gjerë legjitimiteti, por ende nuk kanë zgjeruar listën e kërkesave përtej atyre fillestare.

Studentët, të cilët nga fundi i nëntorit kanë bllokuar më shumë se 60 fakultete në të gjithë vendin, kërkojnë përgjegjësi penale dhe politike për tragjedinë në Novi Sad, ku më 1 nëntor 2024 u rrëzua çatia e Stacionit Hekurudhor, duke shkaktuar vdekjen e 15 personave.

Studentët kërkojnë gjithashtu ndjekjen penale të përgjegjësve për sulmet ndaj tyre dhe qytetarëve të tjerë gjatë protestave.

Pushteti, i udhëhequr nga presidenti Vuçiq, pretendon se në Serbi po tentohet një “revolucion me ngjyra” dhe këmbëngul se kërkesat e studentëve janë plotësuar. Studentët dhe opinioni akademik i hedhin poshtë këto pretendime./REL/

Në një reagim të fundit në rrjetet sociale, Zelensky akuzon Rusinë për vazhdimin e asaj që ai e quan “terror ajror” kundër Ukrainës.

“Ukraina po lufton për një jetë normale dhe të sigurt, të cilën e meriton, për paqe të drejtë dhe të qëndrueshme. Ne duam që kjo luftë të përfundojë. Por Rusia nuk e bën dhe ajo vazhdon terrorin e saj ajror. Gjatë javës së kaluar, më shumë se 1,050 drone sulmuese, pothuajse 1,300 bomba dhe më shumë se 20 raketa u hodhën kundër Ukrainës për të shkatërruar qytete dhe për të vrarë njerëz.

Nëse doni bisedime, mos i synoni njerëzit me raketa balistike. Për ta bërë Rusinë të ndalojë sulmet, ne kemi nevojë që bota të jetë më e bashkuar dhe më e fortë,” shton Zelensky.

Policia ukrainase thotë se dy persona dhe tre të tjerë u plagosën në sulmet ruse në rajonin e Donetsk gjatë 24 orëve të fundit, të cilat kanë dëmtuar ose shkatërruar dhjetëra shtëpi.

Ata shtojnë se pesë u vranë në rajonin jugor të Khersonit dhe 13 të tjerë u plagosën, duke përfshirë tre oficerë policie që po evakuonin trupin e një 63-vjeçari të vrarë në një sulm me dron.

Christian Stocker është betuar këtë të hënë si kancelari i ri i Austrisë, duke udhëhequr një qeveri koalicioni trepartiak pas një ngërçi politik pesëmujor që pasoi zgjedhjet e vitit të kaluar, të fituara nga partia e ekstremit të djathtë, Freedom Party.

Koalicioni i ri qeverisës do të përbëhet nga Partia Popullore e Qendrës së Djathtë (ÖVP), Social Demokratët (SPÖ), dhe partia liberale Neos.

Në ceremoninë e betimit, presidenti austriak Alexander Van der Bellen e përshëndeti me një shaka formimin e qeverisë, duke thënë “Gjërat e mira vijnë për ata që presin”.

Stocker, një avokat pa përvojë të mëparshme në ekzekutiv, tani udhëheq qeverinë e parë trepartiake të Austrisë që nga fundi i viteve 1940. Ai është kancelari i tretë i ÖVP-së që merr detyrën për herë të parë pa udhëhequr partinë gjatë fushatës zgjedhore.

Stocker është një politikan austriak, anëtar i Partisë Popullore (ÖVP). Ai ka shërbyer si anëtar i Këshillit Kombëtar nga viti 2019 deri në emërimin e tij si kancelar dhe ka mbajtur postin e sekretarit të përgjithshëm të Partisë Popullore nga 21 janari deri më 22 shtator 2022. Më 5 janar 2025, ai u zgjodh kryetar i parkohshëm i Partisë Popullore, pas dorëheqjes së kancelarit Karl Nehammer.

Marrëveshja e koalicionit u ra dakord javën e kaluar dhe pengesa përfundimtare u zhbllokua të dielën, kur u miratua nga asambleja e përgjithshme e partisë liberale Neos.

Edhe pse tri partitë kanë arritur një marrëveshje për një program qeveritar prej 200 faqesh, ato do të duhet të hartojnë shumë politika të tjera gjatë mandatit, duke krijuar mundësinë për tensione brenda aleancës.

“A do të jetë e lehtë? Jo. A kanë përfunduar negociatat? Jo,” tha Beate Meinl-Resinger, kreu i Neos, në një takim partie të dielën.

Partia e Lirisë (FPÖ) do të bëjë presion vazhdimisht dhe ka filluar këtë që nga e hëna.

“E vetmja gjë që bashkon këtë koalicion humbës, është etja për pushtet,” tha FPÖ në X, duke iu referuar koalicionit trepalësh.

Të paktën 2 persona kanë humbur jetën ndërsa 3 të tjerë janë plagosur si pasojë e zjarrit të hapur dhe sulmit ajror të ushtrisë izraelite në Rripin e Gazës.

Sipas lajmit të agjencisë zyrtare palestineze të lajmeve, WAFA, ushtarët izraelitë kanë hapur zjarr ndaj civilëve në jug dhe veri të Rripit të Gazës.

Në lajm bëhet e ditur se si pasojë e zjarrit të hapur në qytetin Rafah kanë humbur jetën 2 palestinezë, ndërsa një sulm ajror është kryer ndaj qytetit Khan Yunis.

Më tej thuhet se tre persona u plagosën në një sulm ajror të ushtrisë izraelite në zonën Al-Mawasi të qytetit Khan Yunis.

Mjetet ajrore pa pilot të ushtrisë izraelite vazhdojnë fluturimet intensive në rajonin e Rafahut.

Që nga 19 janari, kur hyri në fuqi armëpushimi, në shkeljet e vazhdueshme të Izraelit, kanë humbur jetën 116 palestinezë ndërsa 490 të tjerë janë plagosur.

Kryeministri izraelit Benyamin Netanyahu tha se ka vendosur ndalimin e hyrjes së të gjitha ndihmave humanitare në Rripin e Gazës.

Një marrëveshje armëpushimi dhe shkëmbimi i të burgosurve ka qenë në fuqi që nga janari, duke ndalur luftën gjenocidale të Izraelit në Gaza që ka vrarë më shumë se 48.380 palestinezë, kryesisht gra dhe fëmijë, dhe e ka lënë enklavën në gërmadha.