Lajmet

Mbi 14 mijë aplikime për regjistrim për zgjedhje

Published

5 years ago

January 19, 2021

Betim Gashi

Mbi 14 mijë aplikacione për regjistrim kanë arritur deri sot në Komisionin Qendror të Zgjedhjeve nga personat që duan të regjistrohen për votime në zgjedhjet e 14 shkurtit, dhe prej tyre 10 mijë e 172 aplikacione janë aprovuar. Në mbledhjen e sotme të KQZ-së u bë e ditur se deri më tani janë telefonuar 8 mijë votues në diasporë.

Kryeshefi i Sekretariatit në KQZ, Burim Ahmetaj tha se nga 14 mijë e 307 aplikacione që kanë arritur për regjistrim, është bërë vlerësimi i zotësisë juridike për 13 mijë e 138 prej tyre.

“Lidhur me periudhën e aplikimit për regjistrim dhe votim jashtë vendit deri më sot, raporti i referohet orës 12:00, në sistem janë të futura gjithsej 14 mijë e 307 aplikacione për regjistrim, prej tyre 13 mijë e 138 aplikacione është bërë vlerësimi i zotësisë juridike. Prej këtyre, të aprovuara janë 10 mijë e 172 aplikacione. Në statusin momental të refuzimit janë 2 mijë e 426 aplikacione për regjistrimin e të cilave duhet të dërgojnë dokumente mbështetëse, me qëllim të aprovimit”, tha ai.

Ndërsa janë rreth 68 mijë emaile ende të pa hapura, por u tha se gjatë verifikimit do të mund të dihet numri i saktë i tyre, meqë aplikuesit po dërgojnë më shumë se një email dhe mund të ketë duplifikime në aplikim.

Kryetarja e KQZ-së, Valdete Daka tha se të gjitha aplikacionet do të shqyrtohen derisa u bëri thirrje qytetarëve që mos të dërgojnë më shumë se një email për aplikim.

“Lus qytetarët jashtë Kosovës që të mos ngarkojnë emalin duke i dërguar nga tre herë të njëjtat aplikime, sepse siç duket e kanë keqkuptuar që do të ketë ndonjë pengesë dhe tani për t’u siguruar dërgojnë emailin e njëjtë në tri emaile tona zyrtare dhe bllokojnë pa nevojë emailin. Të gjitha aplikacionet do të shqyrtohen”, tha Daka.

Ndërsa, anëtari i KQZ-së nga Lëvizja Vetëvendosje, Sami Kurteshi tha se ka pranuar ankesa nga qytetarët në diasporë se të njëjtit janë telefonuar anonim.

“Kemi pasur mesazhe të ndryshme për një pjesë të atyre njerëzve që kanë marrë telefonata dhe ato telefonata kanë dalë si anonime, ka prej tyre me gjasë që kanë kundërshtuar me dhënë të dhëna sepse është numri anonim”, tha ai.

Ndërkohë Ahmetaj nuk e përjashtoi mundësinë për gabime të tilla, që sipas tij janë teknike.

“Deri më dje janë telefonuar apo janë marrë konfirmime diku rreth tetë mijë votues që konsiderojmë që nuk kemi stagnim në këtë aspekt, kemi pasur problem teknik që në raste të caktuara ka mundur edhe të mos u shfaqet numri, mirëpo besoj që ky problem teknik besoj që posta veç e ka rregulluar. Sa u përket thirrjes së votuesve, sigurisht që nuk do të ngelet vetëm me një thirrje, por do të tentohet prapë me thirrjen e dytë, thirrjen e tretë”, tha ai.

Në mbledhjen e sotme të KQZ-së u kërkua kujdes në çështjen e votave që vijnë me postë nga mërgata, duke theksuar nevojën e respektimit të ligjeve në fuqi.

Në mbledhjen e sotme të KQZ-së gjithashtu u tha se nga aplikacionet për certifikim të subjekteve politike, përfshirja e grave është 33.5%.

Ylli Buleshkaj nga Këshilli i Pavarur Mbikëqyrës për Shërbimin Civil të Kosovës tha se nuk ka ndonjë përmirësim sa i përket aspektit gjinor.

“I kemi 28 aplikacione për certifikim të subjekteve politike si total i kemi 1081 kandidatë, nga ta janë 362 gra apo 33.5% dhe 719 burra apo 66.5%. Nga aspekti gjinor nuk është që ka ndonjë përmirësim tepër të madh nga hera e kaluar”, tha ai.

Ndryshe, KQZ ka miratuar edhe Fondin për Mbështetjen e Partive Politike.

Lajmet

IKSHPK bën thirrje për kujdes nga temperaturat e larta, këto janë udhëzimet

Published

12 minutes ago

July 26, 2025

UBTnews

Instituti Kombëtar i Shëndetësisë Publike (IKSHPK) bën thirrje që sot qytetarët të kenë kujdes nga temperaturat e larta.

Nga IKSHPK ka dale sot me udhëzime për mbrojtje nga të nxehtit dhe temperaturat e larta, që pritet të arrijnë deri në 40 gradë.

“Vala e të nxehtit që po mbizotëron këto ditë mund të ndikojë negativisht në shëndetin dhe mirëqenien e qytetarëve, veçanërisht të grupeve të cenueshme. Periudhat e gjata me temperatura të larta gjatë ditës dhe natës krijojnë stres në trup dhe rrisin rrezikun e sëmundjeve apo vdekjeve nga ekspozimi ndaj nxehtësisë”, thuhet në njoftim.

Sipas IKSHPK-së, veprimet që duhet të ndërmerren për t’u mbrojtur janë: Qëndroni larg të nxehtit: Shmangni daljet dhe aktivitetet e rënda gjatë orëve më të nxehta. Qëndroni në hije dhe kaloni 2-3 orë në një vend të freskët.

“Mbajeni trupin të freskët dhe të hidratuar: Përdorni veshje të lehta (pambuku), bëni dush të freskët, lagni lëkurën dhe pini ujë rregullisht (1 gotë/orë – 2-3 litra/ditë). Mbajeni shtëpinë të freskët: Ajroseni gjatë natës kur jashtë është më freskët. Ditën mbyllni dritaret dhe përdorni perde për të penguar rrezet e diellit”, thuhet në njoftim.

Po ashtu IKSHPK bën thirrje për kujdes për grupet e cenueshme: Për të moshuarit mbi 65 vjeç: Kontaktoni rregullisht sidomos ata me sëmundje kronike, paaftësi apo që jetojnë vetëm.

Po ashtu për fëmijët: Mos i lini kurrë në automjete të parkuara. Shmangni ekspozimin në diell gjatë orëve më të nxehta (10:00–17:00).

Lajmet

Sot shënohet Dita memoriale e policëve të rënë në detyrë

Published

13 minutes ago

July 26, 2025

UBTnews

Nën përkujdesjen e ministrit në detyrë të Punëve të Brendshme Xhelal Sveçla dhe drejtorit të përgjithshëm të Policisë së Kosovës Gazmend Hoxha, sot do të mbahen një sërë aktivitetesh me rastin e Ditës memoriale e punonjësve policorë të rënë në krye të detyrës.

Më 11 gusht të vitit 2021, Qeveria e Kosovës kishte propozuar dhe miratuar që 26 korriku të shënohet si Dita e Policëve të rënë në krye të detyrës. Kjo ditë ishte shënuar për herë të parë në korrik të vitit 2022 dhe përkon me rënien heroike të Enver Zymerit 14 vjet më parë.

Agjenda e aktiviteteve:

08:00 – Vizita te familja e zyrtarit policor të rënë në kryerje të detyrës Muhamed Lika. (Familja e Lika – në Kaçanik. Pjesëmarrës drejtori i Përgjithshëm i Policisë Gazmend Hoxha dhe menaxhmenti i PK-së)

09:00 – Homazhe shtetërore. (Lapidari i Policëve të rënë – Drejtoria e Përgjithshme e Policisë. Pjesëmarrës personalitetet e larta shtetërore)

10:00 – Homazhe te varri i Heroit Afrim Bunjaku. (Samadrexhë, Vushtrri. Pjesëmarrës personalitetet e larta shtetërore)

10:15 – Vizitë në familjen e Heroit Afrim Bunjaku. (Samadrexhë, Vushtrri. Pjesëmarrës personalitetet e larta shtetërore)

10:45 – Homazhe te varri i Heroit Enver Zymeri. (Dubovc, Vushtrri. Pjesëmarrës personalitetet të larta shtetërore)

11:30 – Vizitë në familjen e Heroit Enver Zymeri. (Familja e Heroit Enver Zymeri– në Vushtrri. Pjesëmarrës personalitetet e larta shtetërore)

12:30 – Homazhe tek lapidari në vendin e rënies së Heroit Enver Zymeri. (Varage – Zubin Potok, pjesëmarrës: personalitetet e larta shtetërore)

Në shënim të 14-vjetorit të rënies së Hero Enver Zymeri dhe Ditës Memoriale të zyrtarëve policorë të rënë në krye të detyrës, do të organizohen aktivitete sportive që përfshijnë ecje, çiklizëm, vozitje me motorë dhe gara me kajak. Marshutat e ekipeve përfshijnë zona/komuna nga jugu drejt veriut të Kosovës, përmes vendit të rënies së Heroit Enver Zymeri, Varage-Zubin Potok.

17:00 – Ceremonia e pritjes së marshuesve në Qendrën për trajnim për kërkim-shpëtim “Berim”, Zubin Potok- Ujman.

Lajmet

Sot tentimi numër 53 në Kuvend

Published

15 minutes ago

July 26, 2025

UBTnews

Deputetët e zgjedhor do t’iu drejtohen sërish sot ulëseve të tyre në përpjekjen e radhës, e pesëdhjetë e treta, për të konstituuar legjislaturën e nëntë, të dalë nga zgjedhjet e 9 shkurtit.

Vazhdimi i radhës mbahet nga ora katërmbëdhjetë, për herë të parë në më pak se dyzetetetë orë pasi Gjykata Kushtetuese ka vendosur masë të përkohshme ndaj seancave të Kuvendit, që nga e diela 27 korrik deri më 8 gusht.

Kuvendi sipas kësaj mase të përkohshme do t’i konsumojë ditët e mbetura të afatit 30 ditorë, por nuk do të mund të merr asnjë vendim tjetër deri më 8 gusht. Kjo masë ndërlidhet me kërkesat e parashtruara nga PDK dhe LDK.

Kujtojmë, Lëvizja Vetëvendosje, Guxo e Alternativa në seancat e deritanishme kanë dështuar të sigurojnë votat për kryetar të Kuvendit.

Lajmet

Arrest shtëpiak ndaj katër të pandehurve për keqpërdorim të pozitës zyrtare në Gjakovë

Published

17 hours ago

July 25, 2025

UBTnews

Gjykata Themelore në Gjakovë ka caktuar masën e arrestit shtëpiak në kohëzgjatje prej një (1) muaji ndaj të pandehurve A.B., E.B., A.L. dhe A.K., shtetas të Republikës së Kosovës, për shkak të dyshimit të bazuar se kanë kryer veprën penale “’Keqpërdorim i pozitës apo autoritetit zyrtare”.

Sipas kërkesës, gjatë viteve 2018 dhe 2019, ekziston dyshimi i bazuar se të pandehurit A.B., Drejtor i Drejtorisë për Urbanizëm dhe Mbrojtje të Mjedisit, dhe E.B., Udhëheqëse e Sektorit Urbanistik në Komunën e Gjakovës, duke shfrytëzuar pozitën zyrtare dhe në bashkëkryerje, me dashje dhe në kundërshtim me interesin publik, kanë lëshuar pëlqime për parcelim të paligjshëm të pronave publike në dobi të palëve të treta A.L., M.Ll. dhe Sh.B., duke u mundësuar këtyre bartjen e pronës publike në emër të tyre dhe duke dëmtuar pasurinë e Komunës së Gjakovës dhe KBI-së në Gjakovë.

Po ashtu, ekziston dyshimi se gjatë vitit 2019, A.L., Drejtoreshë për Kadastër, Gjeodezi dhe Pronë, dhe A.K., jurist, kanë tejkaluar kompetencat duke miratuar regjistrime të reja të parcelave në kundërshtim me ligjin për kadastër dhe atë për të drejtat e pronës së paluajtshme, duke i bartur në mënyrë të kundërligjshme parcela dhe objekte në emër të palëve A.L., M.Ll. dhe Sh.B., duke dëmtuar interesin publik dhe pronën e institucioneve publike.

“Me këto veprime të gjithë të pandehurit dyshohen se kanë kryer veprën penale të keqpërdorimit të pozitës apo autoritetit zyrtar, në bashkëkryerje”, thuhet në njoftim.

Në këtë procedurë Prokuroria Themelore e Gjakovës, ka kërkuar caktimin e masës së paraburgimit ndaj të pandehurve por gjyqtari i procedurës paraprake, Sulltan Dobraj, ka vlerësuar se në këtë fazë të procedurës penale masa e arrestit shtëpiak është e mjaftueshme për të siguruar praninë e katër personave të pandehur, të parandalojë përsëritjen e veprës penale dhe të sigurojë zbatimin e suksesshëm të procedurës penale.

Të pandehurit do të mbahen në arrest shtëpiak në kohëzgjatje prej një muaji, i cili do të llogaritet prej kohës së arrestimit më 23 korrik 2025 dhe do të zgjasë deri më 23 gusht 2025.