Profesorët e UBT-së, Hazir S. Çadraku, Pajtim Bytyqi dhe Osman Fetoshi, në bashkëpunim me studiues nga universitete vendore dhe ndërkombëtare, kanë publikuar një artikull shkencor në revistën ndërkombëtare Limnological Review scientific journal.

Studimi, i titulluar “Assessment of Groundwater Quality in Some Regions of Kosovo Based on Physico-Chemical and Microbiological Parameters”, analizon cilësinë e ujërave nëntokësore në disa rajone të Kosovës përmes parametrave fiziko-kimikë dhe mikrobiologjikë.

Rezultatet tregojnë se, megjithëse shumica e parametrave fiziko-kimikë janë brenda kufijve të lejuar, në shumë zona është evidentuar ndotje mikrobiologjike, përfshirë praninë e bakterit Escherichia coli, duke e bërë ujin të papërshtatshëm për konsum pa trajtim.

Studimi thekson ndikimin e faktorëve si aktivitetet bujqësore dhe mungesa e trajtimit të ujërave të zeza, si dhe nënvizon nevojën për masa urgjente në menaxhimin dhe trajtimin e burimeve ujore.

Ky publikim përfaqëson një kontribut të rëndësishëm shkencor dhe dëshmon angazhimin e UBT-së në kërkime me ndikim në nivel vendor dhe ndërkombëtar.

Fakulteti i Dizajnit në UBT në Prizren ka realizuar një vizitë studimore me studentët në ambientet e brendshme të kompanisë së modës ndërkombëtare “Baroni” në Prizren, nën udhëheqjen e profesoreshës Nertila Memaj.

Kjo vizitë kishte për qëllim afrimin e studentëve me praktikat reale të industrisë së modës, si dhe zhvillimin dhe avancimin e aftësive të tyre profesionale në një mjedis konkret pune.

Studentët u pritën nga drejtoresha ekzekutive e “Baroni”, znj. Suela Behluli, si dhe menaxherja për marrëdhënie ndërkombëtare, znj. Ghalia Hijazi, të cilat me përkushtim të veçantë prezantuan nga afër proceset kryesore të funksionimit të kompanisë.

Gjatë vizitës, studentët patën mundësinë të ndjekin në mënyrë të detajuar të gjithë ciklin e zhvillimit të një produkti të modës, duke filluar nga përzgjedhja dhe prerja e materialeve, procesi i qepjes dhe dizajnimit, deri te kompletimi final dhe përgatitja për treg.

Kjo përvojë praktike u mundësoi studentëve të ndërlidhin njohuritë teorike të fituara gjatë studimeve me aplikimin e tyre në praktikë, duke forcuar kompetencat profesionale dhe duke kontribuar në përgatitjen e tyre për tregun e punës dhe sfidat e industrisë së dizajnit bashkëkohor.

Rektori i UBT-së, Prof. Dr. Edmond Hajrizi po merr pjesë në takimin e palëve të interesit dhe në Konferencën Vjetore të EU4Dual 2026, e cila po mbahet në Heilbronn të Gjermanisë.

EU4Dual është një aleancë evropiane universitare e përkushtuar në forcimin e arsimit të lartë dual, duke integruar ekselencën akademike me përvojën praktike në industri. Kjo iniciativë bashkon universitete dhe partnerë të industrisë nga e gjithë Evropa për të nxitur inovacionin, zhvillimin e aftësive dhe rritjen e qëndrueshme.

Rektori është riemëruar si anëtar i Këshillit për Bashkëpunim me Industrinë (Industry Cooperation Council – ICC) për mandatin e ardhshëm.

Në këtë rol, ai do të vazhdojë të kontribuojë në ndërtimin e urave të forta ndërmjet akademisë dhe industrisë, duke mbështetur zhvillimin e zgjidhjeve praktike dhe të orientuara drejt së ardhmes, në përputhje me nevojat shoqërore dhe ekonomike.

Ai shprehet i përkushtuar për të vazhduar bashkëpunimin me partnerët dhe kolegët, duke kontribuar në përpjekjet e përbashkëta për të formësuar të ardhmen e arsimit dual në Evropë.

Ekosistemi i UBT-së dhe koncepti i UBT Smart City janë shembuj konkretë se si mund dhe duhet të zhvillohet një bashkëpunim i tillë ndërmjet akademisë dhe industrisë.

Me përvojën e tij të gjerë si themelues, CEO, profesor universitar, sipërmarrës dhe ekspert në dizajnin e sistemeve dhe politikave, ekosistemet e inovacionit, sistemet inteligjente dhe inteligjencën artificiale, si dhe në menaxhimin e cilësisë dhe projekteve, ai është i angazhuar si anëtar i bordeve këshillimore dhe ekzekutive në shumë konsorciume globale, kompani dhe organizata në mbarë botën.

Gjatë vizitës, Rektori Hajrizi ka zhvilluar takime dhe diskutime të ndryshme për thellimin e bashkëpunimit me universitete evropiane nga Gjermania, Franca, Austria, Spanja, Malta, Kroacia, Hungaria dhe Finlanda, si dhe me përfaqësues të lartë nga industri të njohura globale.

Në kuadër të qasjes së tij inovative dhe të orientuar drejt praktikës, programi Art dhe Media Digjitale në UBT po vazhdon të krijojë ura të forta lidhëse ndërmjet akademisë dhe industrisë kreative. Në këtë frymë, në lëndën “Praktika në Studio 3”, studentët patën mundësinë të marrin pjesë në një ligjëratë të veçantë nga ekspertja e dizajnit grafik, Jetë Dobranja.

Ky aktivitet solli një perspektivë të drejtpërdrejtë nga industria, duke i njohur studentët me procesin e plotë të dizajnimit të librave dhe katalogëve të ekspozitave – nga hulumtimi fillestar dhe zhvillimi i konceptit vizual, deri te bashkëpunimi profesional me kuratorë, artistë dhe shtypshkronja, si dhe përgatitja e publikimeve për shtyp sipas standardeve bashkëkohore.

Përmes shembujve konkretë dhe përvojës së saj profesionale, Dobranja ndau praktika reale të punës në dizajnin grafik, duke u mundësuar studentëve të kuptojnë më qartë sfidat, kërkesat dhe dinamikën e industrisë kreative. Ky bashkëbisedim interaktiv shërbeu si një platformë frymëzuese për studentët, duke i inkurajuar ata të zhvillojnë qasje kreative dhe profesionale në projektet e tyre.

Ligjërata vuri në pah rëndësinë e komunikimit vizual dhe bashkëpunimit ndërdisiplinor në art dhe dizajn – elemente kyçe që programi Art dhe Media Digjitale në UBT i integron në mënyrë të vazhdueshme në kurrikulë, për të përgatitur studentët për tregun e punës dhe industrinë globale kreative.

Aktivitete të tilla dëshmojnë përkushtimin e UBT-së për të ofruar një edukim bashkëkohor, ku teoria dhe praktika ndërthuren në mënyrë të natyrshme, duke u mundësuar studentëve të ndërtojnë kompetenca të qëndrueshme dhe të aplikueshme në karrierën e tyre.

UBT mbetet një nga institucionet lider në zhvillimin e talenteve të rinj në fushën e artit dhe medias digjitale, duke sjellë vazhdimisht profesionistë të industrisë për të ndarë njohuri, përvoja dhe inspirim me gjeneratat e reja.

Në përfundim, studentët dhe stafi akademik shprehën mirënjohje për Jetë Dobranjën për kontributin, përkushtimin dhe gatishmërinë për të ndarë përvojën e saj me studentët e UBT-së.