Lajmet

Mashtrimi me origjinën e produkteve, për tre muaj gjobiten 30 biznese

Qytetarët e shumtë e kanë vërejtur këtë mashtrim dhe kanë fotografuar produktet e maketeve.

Published

3 years ago

May 2, 2023

Betim Gashi

Mashtrimet nga disa pronarë të marketeve në vend me origjinën e produkteve po i vënë në konfuzion qytetarët konsumatorë. Kjo duke u ndryshuar origjinën produkteve me flamuj nëpër rafte, dhe duke i vënë ato mallra mbi produktet serbe.

Qytetarët e shumtë e kanë vërejtur këtë mashtrim dhe kanë fotografuar produktet e maketeve si dëshmi faktike të mashtrimeve nga ana e tyre, kështu duke i shpërndarë në të gjitha rrjetet sociale sidomos në fushatën “Besa-Besë”. Fushatë kjo për bojkotimin e produkteve serbe.

Nga Ministria e Industrisë, Ndërrmarresisë dhe Tregtisë, kanë thënë se për këtë lloj shkelje, inspektorati i tregut gjatë periudhës janar-mars 2023 ka realizuar 119 inspektime dhe ka shqiptuar 30 gjoba ndaj bizneseve.

Po ashtu sipas kësaj ministrie, gjatë vitit 2022 inspektorati ka realizuar 663 inspektime dhe ka shqiptuar 181 gjoba dhe 40 kërkesa për inicim të procedurës kundërvajtëse në gjykatat kompetente.

“Vetëm inspektorët në sektorin e tregut ( i cili sektor është përgjegjës për inspektimin edhe të marketeve) , gjatë vitit 2022 ka realizuar 663 inspektime dhe janë shqiptuar 181 gjoba dhe 40 kërkesa për inicim të procedurës kundërvajtëse në gjykatat kompetente, kurse nga muaji janar-mars 2023 janë realizuar 119 inspektime dhe janë shqiptuar 30 gjoba”, thuhet në përgjigjen e MINT-it.

Për më tepër sipas MINT-it, Inspektorati i Tregut, çdo ditë pranon ankesa dhe njoftime të konsumatorëve, po ashtu edhe për mungesë apo ndërrim të etiketës së flamurit të shtetit të origjinës së produkteve.

Për mashtrimet e origjinës së mallrave, masat ndëshkuese janë prej 1 mijë euro deri 10 mijë euro.

“Inspektorati i Tregut çdo ditë pranon ankesa dhe njoftime të konsumatorëve, ndër të tjera edhe për mungesë apo ndërrim të etiketës së flamurit të shtetit të origjinës së produkteve. Vendosja e etiketës, që tregon flamurin e shtetit të origjinës së produktit është obligim me Ligjin për Mbrojtjen e Konsumatorit dhe ka për qëllim të njoftohet konsumatori në mënyrë sa më të qartë dhe të lehtë lidhur me origjinën e produkteve që blen apo konsumon. Inspektorati i Tregut, në çdo rast kur konstaton se etiketa e flamurit e shtetit të origjinës së produktit nuk është vendosur sipas ligjit apo etiketa është ndërruar me flamurin e ndonjë shteti tjetër. Operatori ekonomik urdhërohet të veprojë sipas obligimit ligjor dhe ndaj të njëjtit shqiptohen masa ndëshkuese”, thuhet në përgjigje me shkrim.

Pas fushatës kundër prodhimeve serbe, Burim Piraj nismëtar i grupit “Besa – Besë”, thekson se nuk ka rritje të deficitit tregtarë, por siç shton ai për shkak të rritjes së çmimeve po figurojnë statistikat e se ka import më të lartë nga Serbia. Ai ka akuzuar disa pronarë të bizneseve se nuk i vendosin flamuj fare rafteve ku janë të vendosura produktet për t’i shitur produktet serbe, të cilat edhe kanë në fund të afatit të skadencës.

“Produktet me origjinë të vendeve të tjera nuk ka pasur ndryshim të flamujve, pikërisht në produktet serbe po ka të tilla probleme, do të thotë se pronarët e marketeve po i ndryshojnë ato ose edhe punëtorët. Firmat të cilat po i importojnë këto produkte po mundohen në mënyra të ndryshme të bëjnë manipulime që produktet të shiten me origjinë nga Serbia, të cilat janë në fund të afatit të skadencës. Dhe këtë duket se shitësit kanë panik të shitjes së këtyre produkteve… Ka markete që nuk i ka vendosur flamujt fare, ne sa kemi pasur mundësi kemi bërë raportime tek inspektorati i tregut… Nuk ka rritje të deficiti tregtarë, ka rritje imagjinare, sepse janë rritur çmimet, për shkak të rritjes së çmimeve po figurojnë se ka import më të lartë nga Serbia. Nëse e llogarisim me sasi ka më pak në bazë të bisedave që kemi pasur me përfaqësues të doganës, pra sasia është më e vogël, por çmimi është më i madh, po kështu po figurojnë që po rritet, por në fakt ka rënie të produkteve serbe”, tha Piraj.

Deputeti nga radhët e PDK, Hisen Berisha tregon për një fenomen që po ndodhë në pejesë veriore të vendit. Berisha thekson se në pjesën veriore të vendit disa punëtorë paguhen me nga 20 euro për ndërrimin e tiketave të pijeve serbe, sic thotë ai për t’iu vendosur tiketa me origjinë të Shqipërisë, me qëllim që të rikthehen sërish në shitje në tregun e Kosovës. Ai thekson se ndërrimi i origjinës dhe simboleve kombëtare është e turpshme.

“Kjo është më e pakta që mund të ndodh, dhe më e turpshmja ndërrimi i simboleve kombëtare për t’i identifikuar ose identitet të rrejshëm produkteve. Por ajo që është më tragjike, ajo që kam ngritur në Kuvendin e Kosovës, është për mbledhjen e të gjitha produkteve serbe, “Coca cola”, “Fanta” dhe “Sprite”, dërgimi i tyre në pjesën veriore të vendit, dhe aty disa punëtorë që paguhen nga 20 euro i ndërrojnë tiketat e këtyre pijeve. Vetëm në një dorë informacioni i imi, 200 mijë tiketa të “Coca cola” dhe pijeve serbe janë ndërruar me 200 mijë tiketa nga Shqipëria, “Made in Albania”, që iu kanë vendosur produkteve serbe dhe janë kthyer prapë në Kosovë. Kjo është loja që është bërë brenda Kosovës”, thotë Berisha.

E ky i fundit tha se mungesa e patriotizmit është mosedukim i vlerave nacionale.

“Kur kam folur për nevojën për ndryshimin e korrikulave arsimore në lëndën e historisë, ka qenë pikërisht ideja së është dashtë sistemi i vlerave të konsoliduar në Kosovë të kodifikohet ligjërisht dhe kur ke sistem të konsoliduar vlerash dhe edukimi i të rinjve behët ne frymën e vlerave nacionale, dhe mos edukimi i vlerave nacionale do të thotë mungesë e patriotizmit tek rinia… Dashuria ndaj shtetit nënkupton edhe dashurinë ndaj vendit, e cila shtynë për të braktisur produktet e vendeve tjera”, theksoi ai.

Ndërsa qytetari Shpetim Kastrati thotë se mashtrimet nga marketet po ndodhin çdo herë. Ai thekson se sa herë që shkon në market ballafaqohet me ndërrime të flamujve nëpër produkte dhe po ashtu çmimi tek arka nuk rezultojnë të jenë njësoj sikur tek rafti.

“Jo vetëm flamujt që po ndryshohen, por po ndryshohet edhe çmimi, tek rafti e vendosin me zbritje kurse tek arka e vendosin me çmimin tjetër, se ajo që i ndërrojnë flamujt nuk diskutohet, ajo më ndodh çdo herë sa herë shkojë në markete…Unë nuk po habitem, sepse jemi mësuar, vetëm me mashtrime pothuajse prej që e mbaj mend vetën kemi pasur kësi mashtrime të tilla, me dal ndonjë herë e vërteta mund që të habitem se për të tilla raste jo”, tha Kastrati.

Sipas raportit të fundit të Agjencisë së Statistikave të Kosovës(ASK), importet nga vendet e CEFTA-së, në muajin mars 2023, arritën në 92.5 milion euro, ose 18.2% të importeve të përgjithshme, me një rënie prej 0.7%. Vendet me pjesëmarrje më të lartë për import ishin: Serbia me 5.8%, Shqipëria me 5.5%, dhe Maqedonia e Veriut me 5.0%.

Vetëm në muajin mars të këtij viti, Kosova ka importuar mallra nga Serbia në vlerë prej 29 milionë e 286 mijë euro.

Të dhënat nga Tregtia e Jashtme të Mallrave në Kosovë tregojnë për një deficit tregtar më të lartë për 5.3% në muajin mars 2023, në raport me periudhën e njëjtë të vitit 2022, përkatësisht në vlerë prej 426.8 milionë euro, krahasuar me deficitin prej 405.3 milionë euro në vitin 2022. Ndërsa eksporti mbulon importin me 16.1%.

Vendi

Reformat në drejtësi dhe zgjedhja e Kryeprokurorit: Haxhiu pret në takim kryesuesin e Këshillit Prokurorial

Published

38 minutes ago

April 22, 2026

UBTNews

Ushtruesja e detyrës së Presidentes së Kosovës dhe njëherësh Kryetarja e Kuvendit, Albulena Haxhiu, ka pritur sot në takim Kryesuesin e Këshillit Prokurorial, Arian Gashi.

Pjesë e këtij diskutimi ishin sfidat dhe arritjet me të cilat po përballet sistemi prokurorial në Kosovë. Në takim u diskutua edhe për reformat e nevojshme në drejtësi dhe për procesin e zgjedhjes së Kryeprokurorit të Shtetit.

“Folëm për reformat në drejtësi dhe domosdoshmërinë e përmbylljes sa më të shpejtë të procesit për zgjedhjen e Kryeprokurorit të Shtetit”, shkruan Haxhiu.

Ndërsa, një temë tjetër që u ngrit në këtë takim ishin edhe nevojat buxhetore e infrastrukturore, si dhe nevojat për më shumë prokurorë dhe staf mbështetës, çështje që ndikojnë në efikasitetin institucional, sipas Haxhiut.

Tutje, u.d. presidentja Haxhiu, drejtuesit të Këshillit Prokurorial ia ka riafirmuar përkushtimin për pavarësinë institucionale dhe forcimin e sundimit të ligjit në Republikën e Kosovës.

Aktualitet

Përurohet renovimi i Klinikës së Kardiologjisë në QKUK

Published

1 hour ago

April 22, 2026

UBTNews

Sot është përuruar transformimi i Klinikës së Kardiologjisë në Qendrën Klinike Universitare të Kosovës, pas përfundimit të punimeve për modernizimin e hapësirave të saj.

Në këtë ceremoni morën pjesë përfaqësues të institucioneve të vendit dhe Ambasadori i Luksemburgut, shtet ky që mbështeti financiarisht projektin.

Projekti ka përfshirë renovimin e një hapësire prej rreth 400 metrash katrorë, e cila është përshtatur për nevojat e shërbimeve kardiologjike.

Pjesë e këtij investimi është edhe funksionalizimi i Cath-Lab-it (Laboratorit të Kateterizimit) dhe vendosja e një angiografi të ri, pajisje këto që shërbejnë për diagnostikimin dhe trajtimin e sëmundjeve të zemrës.

Sipas njoftimit, ky transformim ka përfshirë edhe njësinë gjysmë-intenzive, punimet e së cilës kishin nisur në prill të këtij viti.

Ministri i Shëndetësisë, Arben Vitia, bëri të ditur se ky renovim synon rritjen e kapaciteteve për trajtimin e pacientëve dhe përmirësimin e kushteve të punës për stafin mjekësor.

Lidhur me rëndësinë e këtyre punimeve, Kryeministri Albin Kurti u shpreh se ky ndryshim është komfort standardeve moderne.

“Një hapësirë prej rreth 400 metrash katrorë është transformuar sipas standardeve moderne spitalore, duke krijuar kushte më të mira për mjekët, specialistët, infermierët dhe mbi të gjitha, kushte më dinjitoze për shërim të plotë e më të shpejtë për pacientët tanë”, deklaroi Kryeminstri Kurti.

Rajoni

Shkodër: Humb jetën 27-vjeçarja pas lindjes së binjakëve

Published

2 hours ago

April 22, 2026

UBTNews

Një 27-vjeçare me inicialet M.S. ka ndërruar jetë në spitalin e Shkodrës, pak orë pasi solli në jetë fëmijët e saj binjakë.

Vdekja e të resë erdhi si pasojë e komplikimeve shëndetësore që u shfaqën menjëherë pas procesit të lindjes.

Për shkak të gjendjes kritike, gjatë ditës ishte bërë një apel urgjent për sigurimin e gjakut të grupit 0 negativ, në përpjekje për të stabilizuar gjendjen e saj. Siç raporton “Top Channel”, pavarësisht ndërhyrjes së stafit mjekësor dhe trajtimit intensiv, e reja nuk arriti t’i mbijetojë krizës shëndetësore.

Deri më tani nuk ka një njoftim zyrtar nga autoritetet spitalore mbi shkaqet specifike mjekësore që çuan në fatalitet.

Lajmet

DITARI: Çfarë lajmesh kemi lexuar në çdo 22 prill, në vitet nëntëdhjetë

Published

3 hours ago

April 22, 2026

UBTNews

22 prill 1993

Lajmet kryesore:

Dr. Bujar Bukoshi në Ankara

Konferencë për shtyp për Kosovën në Pallatin e Kongresit të Shteteve të Bashkuara të Amerikës

Në Prishtinë policia serbe rrahu dy studentë

Kryetari i Degës së LDK-së së Suharekës në “bisedë informative”

Në “bisedë informative” edhe aktivistët e komunës së Lipjanit

Në Sekiraqë të Podujevës u bastis një familje

Një anije e Hondurasit provoi të shkelë hapësirën detare të Shqipërisë

Vizitat në Kosovë vetëm me përcjellje

Këmbëngulje për vendosjen e refugjatëve serbë në Deçan

Pesë gjykatës serbë nga Jagodina në Mitrovicë

22 prill 1994

Lajm i plotë:

Konferencë për gazetarë e kryetarit të Republikës së Kosovës dr. Ibrahim Rugova

Javën që po shkon e karakterizoi një sulm represiv e terror. Vështirë se mund të numrohen viktimat e këtij represioni që po zgjat qe sa vite në Kosovë, tha në konferencën e sotme për gazetarë kryetari i Republikës së Kosovës dr. Ibrahim Rugova.

U intensifikuan bastisjet me pretekst të kërkimit të armëve në rrethinat e qyteteve të Podujevës, Gjakovës, Lipjanit, Vitisë, Malishevës, Mitrovicës, Skënderajt, Istogut, Klinës, Vushtrrisë, Ferizajit, Prizrenti, Gjilanit, Kamenicës, Prishtinës e Deçanit. Bastisjet përcillen me demolime, me maltretime, arrestime e dënime të njerëzve. Për shkak se kërkoheshin armë prej tij, u dënua me burg Ymer Bala, deputet nga Mitrovica. Ndërsa në lokalitete të ndryshme të Kosovës, si në fshatin Bokshiq të Klinës, në aeroportin e Dumoshit afër Podujevës dhe në disa shkolla, forcat serbe shtinë edhe me armë.

Gjatë javës u bë një represion i madh ndaj nxënësve shqiptarë, në shkollat e Deçanit, Klinës e Kijevës. Janë kërcënuar e janë rrahur nxënës e arsimtarë dhe është djegur një pjesë e dokumentacionit të shkollës. Po shfaqet alergji aq e madhe ndaj shkollës shqipe dhe ndaj nxënësve shqiptarë, theksoi kryetari Rugova.

Pati lëvizje të ushtrisë në kufirin me Shqipërinë, në Vërmicë – në vendkalimin kufitar të Kosovës me Shqipërinë, i cili më nuk është vendkalim, por është i mbyllur, ndërsa në Dragash pati vendosje të reja të ushtrisë, tha dr. Rugova dhe shprehu keqardhje për vrasjen e dy qytetarëve shqiptarë javën e kaluar në kufirin Shqipëri – Kosovë. Ai theksoi se qytetarët ishin të paarmatosur. Kjo do të thotë se kufiri i Kosovës me Shqipërinë vazhdon të jetë mur i fundit i Berlinit dhe mur mjaft i rrezikshëm në Evropë.

Vazhdoi ndjekja e aktivistëve politikë të të gjitha partive politike, ndërsa këtu në Prishtinë filloi edhe një proces i montuar politik kundër 14 shqiptarëve. Ky proces, si dhe ato nga fundi i vitit të kaluar dhe fillimi i këtij viti, bëhet me qëllim që të diskreditohet lëvizja paqësore e shqiptarëve dhe e popullit të Kosovës.

Pasi përkujtoi se gjatë javës që shkoi pati plaçkitje të mëdha të mallit, përzënie të njerëzve nga banesat e dërgime me dhunë në ushtri, kryetari Rugova konstatoi se është mjaft e rrezikshme kjo peshë e represionit që po e rëndon Kosovën.

Në vazhdim, ai kërkoi që bashkësia ndërkombëtare ta ketë parasysh situatën në Kosovë, e cila mund të eskalojë.

Dr. Rugova dënoi maltretimin e znj. Adelajde Felike – Timan, gazetare e “Dojçe Veles”, e cila ishte në Kosovë dhe e cila u keqtrajtua nga policia serbe derisa po kalonte në vendkalimin kufitar Kosovë – Shqipëri.

Në vazhdim, kryetari Rugova shfaqi keqardhje për tragjedinë në Gorazhde. Kjo tragjedi po e habit gjithë botën, edhe për shkak të paaftësisë së institucioneve ndërkombëtare që ta ndalojnë atë. Edhe në këtë kontekst Kosova u përmend si një vatër e krizës në ish-Jugosllavi që kërkon zgjidhje.

“Ne na vjen keq në rast se legalizohet dhuna dhe agresioni në Bosnjë. Nëse bëhet kjo atëherë do të ketë probleme në Ballkan dhe në gjithë Evropën. Të gjitha parimet e institucioneve ndërkombëtare dhe të Kombeve të Bashkuara janë që të mos shpërblehen dhuna dhe agresioni, por përpjekjet për paqe. Dje edhe sekretari i shtetit amerikan Kristofer shprehu pikëpamjet për rrezikun e shpërthimit të luftës në Kosovë apo në Maqedoni. Nëse vazhdon projekti i krijimit të Serbisë së Madhe në Bosnjë, ai mund të vazhdojë edhe në pjesët tjera”, theksoi kryetari Rugova.

Ai përshëndeti planin e presidentit Klinton për intervenime më të gjëra në Bosnjë. Ai shfaqi shpresën se bashkësia ndërkombëtare do të bëjë çmos që ta pengojë këtë tragjedi dhe se do të gjindet një zgjidhje për të gjitha problemet në ish-Jugosllavi.

Në rast se mbahet një samit në nivelin më të lartë midis SHBA-ve, Bashkimit Evropian dhe Rusisë, siç është propozuar, kryetari Rugova tha se do të kërkojmë me ngulm që Kosova patjetër të jetë pjesë e kësaj zgjidhjeje, pasi Kosova ishte pjesë e ish-federatës jugosllave, ishte njësi federale, që kishte statusin e barabartë me njësitë e tjera. Kosova edhe si vatër e krizës, po të mos zgjidhet në bazë të vullnetit politik të popullit dhe të konteksteve ballkanike, do të jetë një rrezik i vazhdueshëm.

Në fund, kryetari Rugova pasi përkujtoi zhgënjimet që ndodhën me institucionet ndërkombëtare, kërkoi që Kosova të vihet në mbrojtje ndërkombëtare të Kombeve të Bashkuara apo të institucioneve të tjera ndërkombëtare.

Duke u përgjigjur në pyetjen se a është shpërblyer lëvizja paqësore e shqiptarëve në Kosovë dhe se a mund të ketë kjo lëvizje alternativë, kryetari Rugova tha se tash kjo lëvizje, udhëheqja dhe populli i Kosovës gëzojnë në botë një autoritet për qëndresën dhe durimin që kanë treguar deri më tash. “Shpresoj se do të shpërblehet kjo politikë. Kryesore është të ndalet lufta e tragjedia në Bosnjë dhe të pengohet përhapja e konfliktit në Kosovë. Ne e kemi thënë edhe shumë herë më parë se duke pasur parasysh situatën tonë prej vitit 1990 e këndej, çdo alternativë e lëvizjes paqësore do të ishte katastrofale”, theksoi ai.

Duke komentuar një lajm për ngritjen e shtëpive për refugjatët eventualë ose fatkeqësitë natyrore në verilindje të Shqipërisë, kryetari Rugova, pasi tha se nuk ka informacione të tjera pos atyre që janë publikuar shtoi: “Nuk kisha dëshiruar të ndodh diçka këtu në Kosovë, pasi, siç kemi thënë, nëse ndodh diçka në Kosovë, pak do të ketë edhe refugjatë. Nuk duhet ta marrim me ndonjë panik këtë lajm që mund të ndikojë negativisht te popullata. Me siguri Kryqi Kuq ka menduar që të marrë masa preventive për çdo rast eventual”, përfundoi kryetari Rugova.

Lajme të tjera:

Qeveria e Kosovës kërkon përfshirjen e Kosovës në bisedimet për paqe

Amerikanët pohojnë se është diskutuar edhe mundësia e bombardimit të pozicioneve në Serbi

U.Kristofer: Serbia synon të përhapë konfliktin në Kosovë

Në Vërbicë të Kamenicës serbët provokojnë me të shtëna armësh

Ushtria dhe policia serbe bastisi disa shtëpi në Dimcë të Hanit të Elezit

Policia konfiskoi librezat e nxënësve të SHF “H.Dobruna” në Junik

Vdiq Mehmet Hajrullahu, i cili ishte torturuar para dy javësh në polici

Represioni në Kosovë

Kaçanik: Në “cirilikë” edhe mbishkrimet e firmave private

Të hënën fillon procesi kundër 10 shqiptarëve në Shkup

U ndërprenë punimet e Parlamentit të Maqedonisë

Shaban M.Çelaj për Fondin e Qeverisë së Kosovës dha 5.000 dollarë

Në Prizren katër shqiptarë u dënuan për armë

Serbët e Varvarinit u shitën armë shqiptarëve

Komunistët serbë ftojnë shqiptarët për bisedime

22 prill 1995

Lajmet kryesore:

Kryetari Rugova u takua me Sabri Godon dhe monsinjor Rok Mirditën

Delegacioni i Kosovës u takua me delegacionin parlamentar të Këshillit të Evropës

Ish-policët në Pejë mohojnë akuzën

B.Luzha: Në polici kërkonin që me çdo kusht t’i pranojmë akuzat

Plaçkitje e re përmes taksave për ujë

Dhuna e përditshme në Kosovë

Plaçkitje në tregun e Istogut

Republika e imagjinuar serbe në Bosnjë i shtriu duart edhe në Kosovë

Si u plaçkit ndërmarrja “Luks” e Mitrovicës

22 prill 1997

Lajmet kryesore:

Dr. Esat Stavileci u takua me kryetarin e Gjykatës Kushtetuese të Austrisë

Konferencë për gazetarë në PSHDK

Nano nuk është deklaruar rreth statusit të Kosovës as të shqiptarëve në Maqedoni

Në vend të refuzimit, reklamim i ndërmarrjeve të pushtuesit

Gjermani: Një refugjat kthehet e dhjetë shkojnë

Katër shqiptarë po mbahen në aeroportin e Beogradit

Në Irzniq u përkujtua studenti martir Armend Daci

E burgosura Shukrie Rexha merret edhe më tutje në pyetje

U mor në pyetje kryetari i Degës së UNIKOMB-it në Suharekë

Dhuna e përditshme në Kosovë

Në Gjykatën e instaluar serbe në Suharekë u nxor në gjyq një inkasant i KKF-së

Një qytetari nga Podujeva iu plaçkitën cigare në vlerë prej 5. 000 DM

Rënie e vlerës së markës gjermane – çmimet në rritje

Në Gllogoc policia ndërpreu ndeshjen midis Ferronikelit dhe Prishtinës

Vllasi akuzoi regjimin serb për ligjet diskriminuese ndaj shqiptarëve

Në komunën e Podujevës u ndihmuan 505 familje shqiptare

Lajm i plotë:

Policia srebe në Klinë vrau një djalosh serb

Pardje policia serbe vrau në Klinë djaloshin 14 vjeçar Zharko Dubiq nga fshati Llukavc, njofton gazeta “D. telegraf”.

Pranë djaloshit të vrarë është gjetur një pushkë gjuetie. Sipas kësaj gazete ai gjoja ka dashur ta marrë hakun e xhaxhait të tij Dragolubit, i cili para katër vjetësh ishte vrarë para stacionit të policisë në Klinë.

Organet serbe nuk kanë dhënë kurrfarë njoftimi për këtë vrasje.

22 prill 1998

Edicioni i parë (ora 10:00)

Lajm i plotë:

GJENDJE SHUMË E RREZIKSHME NË DEÇAN

Barikadim i forcave serbe dhe të shtëna sporadike në fshatin Baballoq

Sot në mëngjes forca të mëdha ushtarako-policore janë stacionar dhe janë barrikaduar në vendbanimin e kolonëve, kurse në rrugën magjistrale që kalon afër vendbanimit të kolonistëve serbë në Baballoq janë ngritur postblloqe të policisë dhe po vazhdon kontrollimi rigoroz.

Baballoqi është një fshat shqiptar, me 180 familje dhe rreth 1600 banorë, ndërsa rreth 300 metra larg tij është ngritur kampi i kolonistëve serbë.

Komisioni për Informim i Degës së LDK-së në Deçan njofton se nga fshati Baballoq edhe sot po dëgjohen të shtëna sporadike.

Në orën 7. 30 një konvoj ushtarak, i pajisur me armatim të rëndë, arriti në Deçan nga Peja dhe pastaj shkoi në drejtim të këitj fshati.

Baballoqi ishte cak i një sulmi gjatë ditës së djeshme prej orës 10:45 deri në orën 20:15. Në sulmin nga largësia kishin marrë pjesë policë, ushtarë dhe kolonistë serbë të vendosur në kampin e refugjatëve serbë, rreth 300 metra larg fshatit Baballoq.

Për konfrontime të armatosura gjatë ditës së djeshme njoftojnë sot edhe gazetat serbe, duke e hedhur përgjegjësinë për këto në anën e shqiptarëve. Thuhet se në kampin e refugjatëve, afër Baballoqit në rrugën për Gramoçel e Glloxhan policia e Deçanit ka formuar një punkt të policisë, të cilin e kanë sulmuar shqiptarët. Policët janë përgjigjur me zjarr, ndërsa anën e policisë nuk ka të vrarë e të plagosur.

Aktivistët e LDK-së shkuan mbrëmë vonë në Baballoq. Ata i thanë QIK-ut se nuk dihej për të vrarë ose të plagosur gjatë sulmit të djeshëm serb.

Sulmi i djeshëm kundër fshatit Baballoq është i pari sulm masiv pas atij kundër fshatit Glloxhan më 24 mars, kur në shtëpitë e veta u vranë tre të rinj shqiptarë dhe disa të tjerë u plagosën.

Ka disa ditë që gjendja në Deçan është para shpërthimit. Politika dhe forcat serbe kanë bërë përgatitje të gjithanshme për një sulm masiv kundër fshatrave shqiptare, të cilat kanë mbetur etnikisht të pastra pasi nga shtëpitë e veta me urdhërin e policisë serbe janë larguar serbët e malazezët.

Lajme të tjera:

Pozicionime të forcave ushtarake në brezin kufitar

Policia u largua nga stacioni në Irzniq

Edicioni i dytë (ora 13:00)

Lajmet kryesore:

Forcat serbe vazhdojnë të shtijnë kundër banorëve të Baballoqit

Përforcime të ushtrisë jugosllave në kufi me Shqipërinë dhe në Dushkajë të Gjakovës

U rrah përkthyesi shqiptar i gazetarit të sevrisit anglisht të “Dojçe veles”

Çështja e Kosovës – me rëndësi të jashtëzakonshme për paqen në Evropë

Gjendje e tensionuar në kufirin verilindor të Shqipërisë

Parakalime të ushtrisë nëpër fshatin Shkabaj

Rreth stacioneve të policisë në Podujevë janë vendosur thasë me rërë