Kandidatët që synojnë të garojnë për postin e kryetarit të komunës në zgjedhjet lokale të 12 tetorit 2025, duhet të plotësojnë një sërë kriteresh ligjore, përfshirë kushtin që të kenë qenë banorë të komunës për së paku tre vite.

Zëdhënësi i Komisionit Qendror të Zgjedhjeve, Valmir Elezi, ka bërë të ditur se ky kriter përcaktohet nga Ligji për Zgjedhjet Lokale dhe vjen përveç kushteve të përcaktuara në nenin 30 të Ligjit për Zgjedhjet e Përgjithshme. Sipas tij, neni 9, paragrafi 2 i Ligjit për Zgjedhjet Lokale kërkon që kandidati të ketë pasur vendbanimin në komunën përkatëse për së paku tri vite, për të pasur të drejtë të kandidojë për kryetar.

Elezi ka theksuar se, sipas nenit 30 të Ligjit për Zgjedhjet e Përgjithshme, një person nuk mund të certifikohet si kandidat nëse: është funksionar me status të veçantë sipas Ligjit për Zyrtarët Publikë; është pjesë e shërbimit të jashtëm apo përfaqësues diplomatik; është anëtar i KQZ-së apo Komisionit Komunal të Zgjedhjeve; është zyrtar i PZAP-it; i është ndaluar e drejta e kandidimit me vendim gjyqësor ose të PZAP-it; është dënuar me burgim efektiv në tre vitet e fundit; nuk ka përmbushur pagesën e gjobave të shqiptuara nga PZAP-i ose KQZ-ja; apo nuk ka respektuar ndonjë urdhër të këtyre institucioneve.

Për verifikimin e përmbushjes së këtyre kushteve, KQZ do të kërkojë bashkëpunim me institucione të ndryshme shtetërore.

Afati për aplikim të subjekteve politike nis më 26 qershor dhe përfundon më 13 gusht 2025. Gjatë kësaj periudhe, partitë politike, koalicionet, iniciativat qytetare dhe kandidatët e pavarur mund të dorëzojnë kërkesën për certifikim në Zyrën për Regjistrim, Certifikim dhe Kontroll Financiar të Subjekteve Politike.

Sipas Elezit, është në vullnetin e subjekteve politike që të vendosin se në cilat komuna do të garojnë dhe nëse do të paraqesin kandidatë për kryetar komune, për kuvend komunal, apo për të dyja.

Presidentja e Kosovës, Vjosa Osmani, ka caktuar datën 12 tetor 2025 për mbajtjen e zgjedhjeve lokale për kryetarë dhe kuvende komunale.

Vazhdimi i seancës për konstituimin e Kuvendit të ri të Kosovës do të mbahet sot nga ora dhjetë (10:00).

Tridhjetetre vazhdimet e deritanishme kanë dështuar për formimin e legjislaturës së nëntë të dalë nga zgjedhjet e nëntë shkurtit.

Përveç betimit të deputetëve të zgjedhur, Kuvendi i ri ka mbetur i pa konstituar në mungesë të zgjedhjes së kryetarit të ri dhe nënkryetarëve.

Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe NISMA nuk po i japin votën kandidates së propozuar për kryetare nga Lëvizja Vetëvendosje, Guxo e Alternativa.

Albulena Haxhiu në gjashtë tentime ka dështuar të kalojë provimin dhe në mungesë të kësaj Lëvizja Vetëvendosje, Guxo e Alternativa po kërkojnë komision për votim të fshehtë, për të cilën gjë Aleanca për Ardhmërinë e Kosovës ka kërkuar interpretim nga Gjykata Kushtetuese.

Kujtojmë, zgjedhjet parlamentare janë mbajtur më nëntë (9) shkurt. Mbledhja e parë për konstituimin e Kuvendit të ri është mbajtur më pesëmbëdhjetë (15) prill. Që nga ajo datë çdo dyzetetetë (48) orë po mbahen vazhdime të seancës konstituive pa arritur ndonjë rezultat konkret./kosovapress/

Deputetët e Kuvendit të Kosovës kanë shpenzuar afro 40 mijë euro gjatë vitit 2024 për mbushje telefonike nga kompania publike “Vala”, një shifër që mbulohet nga buxheti i shtetit, pra nga taksat e qytetarëve.

Sipas të dhënave zyrtare të siguruara nga “Interaktiv Talks”, shuma e përgjithshme e këtyre shpenzimeve ka arritur në 38,190 euro, vetëm gjatë këtij viti.

Në krye të listës së shpenzuesve është nënkryetari i Kuvendit nga radhët e PDK-së, Enver Hoxhaj, i cili ka shpenzuar mbi 1,000 euro për mbushje, duke e tejkaluar edhe kufirin mujor prej 100 euro që u takon deputetëve.

Në mesin e atyre që kanë shpenzuar më së shumti janë edhe Mimoza Kusari-Lila nga Lëvizja Vetëvendosje, Besnik Tahiri nga AAK dhe Arben Gashi nga LDK, me nga 720 euro secili.

Edhe Valon Ramadani, deputeti i VV-së që njihet për pasurinë e tij milionëshe, ka përfituar 480 euro mbushje telefonike nga Kuvendi.

Ndërkohë, mbetet për t’u parë kush ka qenë deputeti më kursimtar dhe cilët liderë politikë kanë pranuar ose kanë refuzuar përfitimin e kësaj mbështetjeje telefonike nga Vala.

Gjatë vizitës zyrtare në Hungari, presidentja Vjosa Osmani, iu drejtua studentëve dhe profesorëve të Universitetit Eötvös Loránd.

Ajo me këtë rast ka folur mbi prioritetet strategjike të politikës së jashtme të Republikës së Kosovës, përfshirë për marrëdhëniet ndërmjet Kosovës dhe Hungarisë, raporton KosovaPress.

Në fjalimin e saj, Osmani theksoi se Kosova është e vendosur të bëhet pjesë e plotë e familjes së shteteve euroatlantike dhe se aleanca me SHBA-në, Bashkimin Evropian dhe partneriteti me aleatët e NATO-s përbëjnë shtylla të qëndrueshmërisë rajonale dhe kontribuojnë drejtpërdrejt në sigurinë e hapësirës euroatlantike.

Në një nga universitetet më prestigjioze të Evropës Qendrore, presidentja Osmani u ndal te roli i arsimit si urë lidhëse mes kombeve dhe si themel për bashkëpunim afatgjatë. Ajo shprehu mirënjohje për mbështetjen që studentët nga Kosova kanë marrë ndër vite nga Universiteti Eötvös Loránd dhe nga institucionet hungareze.

Duke vënë në pah dimensionin historik të marrëdhënieve shqiptaro-hungareze, presidentja solli në vëmendje kontributin e dy figurave emblemë – Gjergj Kastrioti Skënderbeu dhe Janos Hunyadi.

“Në shekullin e pesëmbëdhjetë, shqiptarët dhe hungarezët qëndruan krah për krah për mbrojtjen e qytetërimit evropian. Ishte një aleancë mbi vlera shpirtërore, e ndërtuar mbi vlera të përbashkëta si liria, identiteti dhe dinjiteti. Sot, në një Evropë që po ndryshon, ky trashëgim frymëzues na udhëzon për të ndërtuar partneritete që reflektojnë vizionin e përbashkët për një të ardhme paqësore dhe të bashkuar.”

Osmani theksoi gjithashtu se marrëdhëniet ndërmjet Kosovës dhe Hungarisë kanë potencial të madh për t’u thelluar në fusha si energjia e ripërtërirë, turizmi, teknologjia dhe arsimi, duke nënvizuar se përparimi i qëndrueshëm ndërtohet mbi investimin në rini dhe në krijimin e urave të mirëkuptimit ndërkulturor.