Kosova do të jetë nikoqire e mbledhjes së Komitetit “HatTrick” të UEFA-s më 13 mars, një ngjarje shumë e rëndësishme për futbollin në nivel ndërkombëtar.

Komiteti “HatTrick” është një nga organet më të rëndësishme të UEFA-s, i cili ofron mbështetje për projekte të shteteve anëtare me qëllim përmirësimin e standardeve të futbollit, rritjen e mundësive për zhvillimin e lojës në të gjitha nivelet, duke nisur nga futbolli amator deri te ai profesional, si dhe infrastruktura.

Komiteti “HatTrick” drejtohet nga nënkryetari i UEFA-s, suedezi Karl Eric Nilsson, ndërsa nënkryetar i komitetit është Armand Duka, njëherësh zëvendëspresident i parë i UEFA-s, pwrcjellw KosovaPress.

Ata do të udhëheqin këtë mbledhje të rëndësishme, në të cilën do të diskutohet dhe vendoset për avancimin e futbollit nëpërmjet mbështetjes financiare dhe projekteve të tjera zhvillimore.

Kjo ngjarje e nivelit të lartë vendimmarrës do të grumbullojë në Kosovë të gjithë anëtarët e Komitetit “Hat Trick”, si dhe figura të tjera të njohura, presidentët dhe sekretarët e përgjithshëm të federatave më të mëdha të futbollit botëror, përfshirë ato të Anglisë, Gjermanisë, Portugalisë, Francës, Italisë, Norvegjisë, Polonisë, Belgjikës dhe shumë shteteve të tjera.

Mohamed Salah ka marrë një hap të madh drejt fitimit të Këpucës së Artë për këtë sezon, duke u shkëputur në krye të renditjes pas një performance të shkëlqyer kundër Southamptonit. Egjiptiani shënoi dy gola në këtë ndeshje, duke i dhënë Liverpool-it një fitore të rëndësishme dhe duke e çuar në 54 pikë, 10 më shumë se Mateo Retegui, i cili tani ndodhet në vendin e dytë.

Salah tashmë ka një epërsi të konsiderueshme ndaj konkurrentëve të tij, por gara për Këpucën e Artë mbetet e hapur, pasi shumë lojtarë të tjerë janë në ngushticë për të arritur vendet më të larta. Retegui, sulmuesi i Atalantës, ka grumbulluar 44 pikë, ndërsa Harry Kane i Bayern Munich dhe Robert Lewandowski i Barcelonës janë të barabartë me 42 pikë secili, duke qenë të katërt në renditje.

Një tjetër konkurent i fortë është Victor Gyokeres i Sporting-ut, i cili ka 40.5 pikë (me koeficient 1.5), duke e kaluar Erling Haalandin i Manchester City, i cili tani ka 40 pikë. Ousmane Dembélé i PSG, gjithashtu me 40 pikë, është një tjetër rival i mundshëm për titullin e Këpucës së Artë.

Gjithashtu, disa lojtarë të tjerë kanë shënuar progres, si Alexander Isak i Newcastle, i cili ka 38 pikë, dhe Mika Biereth i Sturm Graz/Monaco me 36.5 pikë. Chris Wood i Nottingham Forest, Omar Marmoush i Eintracht Frankfurt/Manchester City, dhe Kylian Mbappé i Real Madrid gjithashtu janë në renditje me nga 36 pikë secili.

Në rangun më të ulët, Patrik Schick (Bayer Leverkusen) ka 32 pikë, Moise Kean (Fiorentina) dhe Mason Greenwood (Marseille) janë me nga 30 pikë, ndërsa Victor Osimhen i Galatasaray ka 25.5 pikë, duke patur një koeficient 1.5.

Lufta për Këpucën e Artë mbetet shumë e ngushtë, dhe kjo renditje do të vazhdojë të ndryshojë ndërsa sezoni vazhdon, me Salah që ka marrë një epërsi të dukshme, por me shumë konkurrentë të fortë pas tij./UBTNews/

Xhudistja e Kosovës, Distria Krasniqi, ka vazhduar me paraqitje të jashtëzakonshme në Grand Prix “Upper Austria”, duke siguruar një vend në gjysmëfinale.

Në çerekfinale, Krasniqi e mposhti pa asnjë telashe serben Nikolina Nisheviq, duke e përfunduar duelin për vetëm 29 sekonda me një Ippon të bukur.

Më herët, Distria pati një tjetër paraqitje të fuqishme, duke mposhtur amerikanen Jenna Schurr me Ippon pas 1 minutë e 34 sekonda luftë.

Me këtë formë të shkëlqyer, Krasniqi synon të vazhdojë rrugëtimin drejt medaljes së artë në këtë garë prestigjioz