Presidenti francez Emmanuel Macron këtë javë u përball me akuza për përkrahje të agresorëve seksualë pasi tha se ikona e filmit Gerard Depardieu, i akuzuar për përdhunim dhe i cili përballet me një sërë pretendimesh për sulme seksuale, ishte objektivi i “një gjuetie njerëzore”.

Depardieu, i cili ka bërë më shumë se 200 filma dhe seri televizive, u akuzua për përdhunim në vitin 2020 dhe është akuzuar për ngacmim seksual dhe sulm nga gjithsej 13 gra.

Ai aktualisht përballet me një shqyrtim të ri mbi komentet seksiste të kapura në kamerë gjatë një udhëtimi në Korenë e Veriut në vitin 2018, të cilat u transmetuan për herë të parë në një dokumentar në televizionin kombëtar në fillim të këtij muaji.

I pyetur në një intervistë televizive të mërkurën nëse Depardieu duhet t’i hiqet çmimi më i lartë shtetëror i Francës, të cilin e mori gati tre dekada më parë, Macron tha: “Nuk do të më shihni kurrë të marr pjesë në një gjueti njerëzore. Unë e urrej këtë lloj gjëje. Prezumimi i pafajësisë është pjesë e vlerave tona”.

Macron tha se kishte “admirim të madh” për Depardieun, të cilin ai e quajti “një aktor të jashtëzakonshëm”.

Por Generation.s Feministe, një kolektiv feminist, tha se komentet e Macron ishin “një fyerje” për të gjitha gratë që kishin pësuar dhunë seksuale, “para së gjithash ato që akuzuan Depardieun”.

Sandrine Rousseau, një deputete e Partisë së Gjelbër, i quajti komentet “një fyerje për lëvizjen që u jep zë viktimave të dhunës seksuale”.

“Emmanuel Macron ka zgjedhur anën e tij – atë të agresorëve”, tha ajo në platformën X.

Zëdhënësja e Partisë së Gjelbër, Sophie Bussiere, akuzoi Macron duke e quajtur “promovuesi kryesor i kulturës së përdhunimit”.

Udhëheqësi i partisë socialiste Olivier Faure, gjithashtu në X, tha se lufta ndaj dhunës ndaj grave supozohej të ishte “një nga kauzat e mëdha” të mandatit të dytë të presidentit.

Por, tha Faure, “presidenti nuk beson në asnjë nga gjërat që ai deklaron, pavarësisht nga tema”.

Anne-Cecile Mailfert, e cila drejton një shoqatë të quajtur Fondacioni i Grave, tha: “Një postim i vetëm në Twitter nuk mjafton për të thënë se sa e turpshme dhe e neveritshme është kjo për viktimat”./UBTNews/​