Lajmet

Lista Guxo në Ferizaj kundër deklaratës së Gërvalles: Në zgjedhje garojmë vetëm

Published

4 years ago

July 7, 2021

Betim Gashi

Zyrtarët e Listës Guxo nuk janë duke u pajtuar sa i përket garës në zgjedhjet lokale që do të mbahen në vjeshtë.

Së fundmi ushtruesja e detyrës së kryetares së kësaj iniciative, Donika Gërvalla pohoi se do të garojnë me një listë të përbashkët me Lëvizjen Vetëvendosje më zgjedhjet e 17 tetorit.

E ndaj kësaj deklarate ka reaguar Lista Guxo në Ferizaj, ku thotë se do të garojnë të vetëm dhe jo me LVV-në.

Në reagimin e bërë për media, thuhet se vendimi i tyre është që të garojnë si subjekt i veçantë në zgjedhjet lokale për Asamblenë Komunale.

“Lista Guxo në Ferizaj me qëllim të informimit të drejtë , të saktë dhe sqarimit të opinionit publik, e rikonfirmojmë se me datën: 3 Korrik 2021 është marrë vendim që të garojmë si subjekt i veçantë në zgjedhjet lokale për Asamblenë Komunale. Procedurat e regjistrimit si iniciativë janë tashmë në proces sikurse edhe përgatitjet teknike”, thuhet në reagim.

Më tej, në reagim thuhet se “ne do të garojmë me 45 kandidatë për Asamblenë Komunale dhe kandidatin për Kryetar të Komunës e kemi lënë të hapur si mundësi”.

“Ky vendim ka ardhur pas kërkesave të parreshtura të votueseve dhe aktivistëve tonë, të cilët na kanë mbështetur në zgjedhjet nacionale. Të dashur votues, ne e dërguam në vend premtimin ndaj juve dhe si rezultat i pakënaqësive që kishim me lidershipin e vjetër të LDK-së, u përcaktuam që ta përkrahim znj. Vjosa Osmani dhe kandidatët tjerë për deputetë si alternativë, kemi konsideruar se kemi vepruar mirë e drejtë dhe nuk jemi penduar, sepse kemi dashur ta bëjmë ndryshimin dhe ta ndjekim rrugën rugoviane për shtetndërtim. Por, në asnjë moment ne nuk jemi zotuar para elekroratit se do të shkrihemi brenda Lëvizjes Vetëvendosje apo cilit do subjekt politik, përkundrazi i kemi premtuar elektoratit se do të formojmë subjektin tonë politik dhe do ta vazhdojmë aktivitetin tonë politik si subjekt në vete”, bëhet e ditur në deklaratën për media.

Tutje, Lista Guxo në Ferizaj, thekson se “vendimi ynë është përmbushje e premtimit tonë ndaj elektoratit për ta vazhduar frymën rugoviane dhe angazhimi ynë do të jetë gjithmonë në përkrahje të personaliteve politike, të cilët ja duan dhe punojnë për të mirën e shtetit”.

“Ne shumë shpejtë do ta publikojmë listën me 45 kandidatë. Ne jemi të hapur të bashkëpunojmë me Lëvizjen Vetëvendosje dhe çdo subjekt tjetër e personalitet politik, që punon për të mirën e shtetit të Kosovës dhe për qytetarët e komunën sonë, por asnjëherë nuk do të punojmë për interesa të ngushta personale dhe nuk do të devijojmë nga rruga e Presidentit Historik Dr.Ibrahim Rugova”, thuhet mes tjerash në këtë komunikatë.

Ndryshe, zgjedhjet lokale do të mbahen më 17 tetor të këtij viti.

Lajmet

Shtatë raste dhune në familje brenda një dite – viktima kryesisht gra

Published

6 minutes ago

June 24, 2025

UBTNews

Policia e Kosovës ka raportuar një numër shqetësues të rasteve të dhunës në familje gjatë datës 23 qershor, me incidente të ndodhura në disa komuna të vendit.

Në Prishtinë, janë regjistruar tri raste të ndara të dhunës në familje:

Në një rast, një mashkull është arrestuar pasi dyshohet se ka sulmuar një femër. Viktima është trajtuar mjekësisht, ndërsa i dyshuari është dërguar në mbajtje me vendim të prokurorit.

Në një tjetër incident, një burrë dyshohet se pas një mosmarrëveshjeje ka sulmuar fizikisht një tjetër mashkull. Viktima është dërguar në QKUK për trajtim, ndërsa rasti është nën hetim.

Po ashtu, një tjetër burrë u arrestua pas dyshimeve për ushtrim dhune ndaj një gruaje. Ai u dërgua në mbajtje pas intervistimit.

Në Gjilan, një mashkull u arrestua për dhunë ndaj një gruaje pas një konflikti verbal e fizik. Edhe ai është dërguar në mbajtje.

Në Pejë, dy burra u arrestuan pasi dyshohet se ushtruan dhunë ndaj një gruaje. Pas intervistimit, ata u liruan në procedurë të rregullt.

Në Gjakovë, një burrë u arrestua për dhunë ndaj bashkëshortes. Pas konsultimit me prokurorin, ai është liruar në procedurë të rregullt.

Ndërkaq, në Vushtrri, një tjetër rast i dhunës në familje ka rezultuar me arrestimin e një burri, i cili është dërguar në mbajtje. Viktima është trajtuar mjekësisht.

Policia e Kosovës vazhdon të apelojë për raportim të menjëhershëm të çdo forme të dhunës dhe fton qytetarët të bashkëpunojnë për parandalimin e rasteve të tilla.

Lajmet

Dy persona të dyshuar për sulm seksual në Viti, një në mbajtje

Published

11 minutes ago

June 24, 2025

UBTNews

Një rast i dyshuar për sulm seksual është raportuar në komunën e Vitisë, ku dy persona janë shoqëruar për intervistim nga Policia e Kosovës. Sipas informacioneve zyrtare, dy të dyshuarit, meshkuj kosovarë, dyshohet se kanë kryer veprën penale të sulmit seksual ndaj viktimave femra.

Pas procedurave fillestare, me urdhër të prokurorit, njëri prej të dyshuarve është dërguar në mbajtje, ndërsa rasti është duke u trajtuar nga njësitet përkatëse hetimore.

Hetimet po vazhdojnë për zbardhjen e plotë të ngjarjes.

Lajmet

Policia raporton 68 aksidente trafiku në 24 orët e fundit

Published

14 minutes ago

June 24, 2025

UBTNews

Gjatë 24 orëve të fundit në Kosovë janë regjistruar gjithsej 68 aksidente trafiku, prej të cilave 31 me të lënduar dhe 37 me dëme materiale. Fatmirësisht, nuk është raportuar asnjë aksident me fatalitet.

Policia e Kosovës ka shqiptuar gjithsej 1,995 tiketa trafiku për shkelësit e rregullave në komunikacion.

Në kuadër të veprimeve të tjera operacionale, janë arrestuar 22 persona, ndërsa 11 të tjerë janë dërguar në mbajtje. Aktualisht, 3 persona ndodhen në vuajtje të dënimit.

Autoritetet u bëjnë thirrje qytetarëve të respektojnë rregullat në trafik dhe ligjet në fuqi, për të kontribuar në rritjen e sigurisë në vend.

Lajmet

Raportohet i zhdukur një burrë në Prizren

Published

17 minutes ago

June 24, 2025

UBTnews

Një person në Prizren raportohet se ka dalë nga shtëpia dhe më nuk dihet për vendndodhjen e tij.

Në raportin 24 orësh të Policisë, thuhet se viktima është zhdukur nga e diela.

“Prizren / 22.06.2025 – 19:45. Më 23.06.2025 është raportuar se një person mashkull kosovar ka dalur nga shtëpia dhe nuk dihet për vendndodhjen e tij. Në konsultim me prokurorin kujdestar rasti po hetohet nga njësitë relevante”, thuhet në njoftim. /BetimipërDrejtësi