Presidenca e Kosovës e ka cilësuar si “urgjencë shtetërore” krijimin e institucioneve pas publikimit të aktgjykimit të plotë të Gjykatës Kushtetuese, duke kërkuar konstituimin e menjëhershëm të këtyre institucioneve.

“Presidenca e konsideron urgjencë shtetërore konstituimin sa më të shpejtë të institucioneve të dala nga vullneti i popullit. Në këtë periudhë të zhvillimeve dinamike në kontinent dhe sfidave globale që e prekin edhe rajonin tonë, krijimi sa më i shpejtë i institucioneve të reja në përputhje me procedurat e parapara në aktgjykimin e Gjykatës Kushtetuese është jetik për stabilitetin, përfaqësimin demokratik dhe për adresimin e interesave të qytetarëve”. Zvarritja e deritanishme ka dëmtuar jo vetëm kredibilitetin e institucioneve e zhvillimin e vendit, por edhe përparimin e vendit në arenën ndërkombëtare.”, thuhet nga presidenca.

Gjithashtu u  tha se ky institucion apelon tek të gjithë deputetët që të veprojnë me përgjegjësi të plotë, në frymën e bashkëpunimit dhe të mirëbesimit, në mënyrë që shteti të ecë përpara i konsoliduar dhe t’i përmbushë me sukses proceset e rëndësishme që e presin Kosovën në forcimin e pozitës së saj si brenda ashtu edhe ndërkombëtarisht.

Kuvendi ka njoftuar se nesër, e mërkurë në ora 11:00, do të vazhdojë seanca konstituive.

Prokuroria Speciale ka konfirmuar se ka kërkuar nga Gjykata Themelore e Prishtinës të lëshojë urdhër-arrest ndaj Goran Rakiqit, ish-kryetar i Listës Serbe. Arsyeja ka të bëjë me vendosjen e barrikadave në pjesën veriore të vendit, gjatë vitit 2022, kur Rakiqi ishte edhe deputet i Kuvendit të Kosovës.

Në kuadër të zhvillimit të hetimeve për këtë rast, PSRK thotë se i ka ndërmarrë dhe është duke i ndërmarrë të gjitha veprimet e nevojshme hetimore, përfshirë intervistimin e të pandehurve në këtë rast penal.

Arbnora Luta, zëdhënëse e PSRK-së, tha se tashmë ka përfunduar intervistimi edhe i të pandehurve Zllatan Ellek (kryetar aktual i Listës Serbe), Igor Simiq dhe Sllavko Simiq.

Ndërsa, sa i përket intervistimit të Goran Rakiqit, Luta tha se “i njëjti është ftuar tri herë, por nuk është paraqitur, fillimisht duke arsyetuar mungesën me probleme shëndetësore, ndërsa për dy ftesat e tjera nuk ka dhënë ndonjë arsyetim”.

“Andaj, me qëllim të sigurimit të prezencës së G.R, Prokuroria Speciale e Republikës së Kosovës ka parashtruar kërkesë në Gjykatën Themelore të Prishtinës për lëshimin e urdhër-arrestit ndaj tij”, tha Luta .

Hetimet që është duke i zhvilluar PSRK kanë të bëjnë me rastin e barrikadave në vitin 2022, për veprat penale “pengim i personit zyrtar në kryerjen e detyrave zyrtare”, “thirrje për rezistencë” dhe “bashkimi për veprimtari kundër kushtetuese”, ndërsa kjo Prokurori ka kërkuar urdhër-arrest edhe ndaj 11 personave të tjerë.

Zllatan Ellek, Igor Simiq dhe Sllavko Simiq janë deputetë aktualë të Kuvendit të Kosovës, kurse Goran Rakiq është deputet në Kuvendin e Serbisë nga radhët e SNS-së.

Pesë vatra zjarri janë evidentuar në Shqipëri gjatë 24 orëve të fundit, tre prej të cilave janë aktive, ndërsa dy të tjerat po monitorohen.

Ministria e Mbrojtjes bën me dije se vatrat aktive janë në Malin e Bërzhitës në fshatrat Ibë dhe Durisht në terren të vështirë dhe në pamundësi për ndërhyrje nga toka; në fshatrat Damjan e Isufaj të Tiranës edhe në zonën e Pezë–Helmës; si dhe Në Parkun Natyror Gërmenj.

“Qendra Kombëtare Operacionale e Emergjencave Civile (QKOEC) në AKMC, raporton 5 vatra zjarri nga të cilat: 3 vatra janë aktive, dhe 2 vatra janë në monitorim, si më poshtë:

Vatra e zjarrit në Malin e Bërzhitës në fshatrat Ibë dhe Durisht të njësive administrative Bërzhitë dhe Petrelë ndodhet në një terren shumë të largët dhe të vështirë për ndërhyrje nga toka. Aktualisht, nuk përbën rrezik për banesat apo zonën pyjore.

Zjarri i nisur më datë 10.08.2025 në fshatrat Damjan dhe Isufaj të Tiranës dhe i përhapur prej datës 13.08.2025 edhe në zonën e Pezë – Helmës, vijon të jetë aktiv në disa vatra të minimizuara, por që po mbahen nën mbikëqyrje deri në fikjen përfundimtare.

Në Parkun Natyror Gërmenj, njësia administrative Leskovik të bashkisë Kolonjë situata paraqitet më e qetë si pasojë e punës se forcave operacionale por dhe për shkak të reshjeve të shiut të rëna pasditen e djeshme”, thuhet në njoftim.

Vatrat të cilat janë në monitorim prej efektivëve të MZSH dhe Forcave të Armatosura ndodhen në Ternovë dhe fshatrat Kulumri dhe Lumi i Trunit në bashkinë Fushë-Arrëz.

Çdo vit, më 19 gusht, shënohet Dita Botërore Humanitare, një ditë që synon të rrisë vetëdijen për nevojat humanitare me të cilat përballet bota.

Sipas të dhënave të publikuara me këtë rast, 753 milionë njerëz jetojnë në varfëri ekstreme, ndërsa rreth dy miliardë njerëz në botë jetojnë me më pak se 3.2 dollarë në ditë.

Vetëm vitin e kaluar, për shkak të konflikteve dhe fatkeqësive natyrore, mbi 200 milionë njerëz në 134 vende u gjendën në nevojë urgjente për ndihma humanitare ndërkombëtare. Organizata për Iniciativën e Zhvillimit raporton se krizat humanitare të vitit të kaluar kanë vazhduar edhe këtë vit në të paktën 21 vende, ku popullata vazhdimisht përballet me probleme të rënda jetësore.

Konfliktet e armatosura në Siri, Jemen dhe Sudanin e Jugut kanë detyruar miliona njerëz të braktisin shtëpitë e tyre, duke shtuar numrin e atyre që kërkojnë ndihmë dhe mbështetje ndërkombëtare.

Këto të dhëna tregojnë përmasat e krizës globale dhe nevojën për solidaritet më të madh humanitar në mbarë botën.