Kapiteni i Koresë së Jugut, Son Heung-min, është pranë një arritjeje historike, pasi pritet të thyejë rekordin e vendit të tij për më shumë paraqitje me ekipin kombëtar, në ndeshjen miqësore kundër Brazilit.

Sulmuesi i Los Angeles FC do të zhvillojë paraqitjen e tij të 137-të me fanellën e përfaqësueses, duke kaluar kështu ish-mbrojtësin Hong Myung-bo dhe ish-sulmuesin legjendar Cha Bum-kun, me të cilët aktualisht ndan kuotën e 136 ndeshjeve.

Ndeshja kundër Brazilit, e drejtuar nga Carlo Ancelotti, shërben si përgatitje për Kupën e Botës 2026 në Amerikën e Veriut, ku Koreja e Jugut tashmë është kualifikuar.

Nëse Son nuk aktivizohet në këtë përballje, ai do ta ketë mundësinë të thyejë rekordin në sfidën ndaj Paraguait të martën, e cila do të shoqërohet edhe me një ceremoni përkujtimore për këtë arritje të veçantë.

Son, i cili debutoi me kombëtaren në dhjetor të vitit 2010, ka shënuar deri më tani 53 gola.

Gjithashtu, ai është në Kupën e Botës së katërt të karrierës, ndërsa me kalimin në MLS këtë verë, ish-kapiteni i Tottenhamit ka filluar një kapitull të ri në karrierën e tij.

Në përballjen e fundit mes dy ekipeve, Brazili kishte triumfuar 4-1 ndaj Koresë së Jugut në fazën e 1/8 së finales të Botërorit “Katar 2022”./S.K/KP/

Federata e Futbollit e Kosovës ka njoftuar për aktivitetet zyrtare të Kombëtares së Kosovës dhe asaj të Sllovenisë për ditën sotme në kuadër të përgatitjeve për ndeshjen mes dy përfaqësueseve.

Në orën 16:30 do të mbahet konferenca për media e Kombëtares së Kosovës, ku para gazetarëve do të dalë përzgjedhësi Franco Foda.

Ndërkaq, në orën 17:00 “Dardanët” do të zhvillojnë stërvitjen zyrtare në stadiumin “Fadil Vokrri” në Prishtinë.

Më vonë, në orën 20:00, do të mbahet edhe konferenca për media e Kombëtares së Sllovenisë, po ashtu në të njëjtin stadium./S.K/KP/FFK/

Kombëtarja e Shqipërisë po zhvillon përgatitjet e fundit për sfidën e rëndësishme kundër Serbisë, që do të luhet më 11 tetor në Leskovc.

Në një prononcim për mediat, sulmuesi Armando Broja u shpreh se atmosfera në ekip është shumë pozitive dhe se skuadra është e bashkuar për të dhënë maksimumin në fushë.

“Siç tha edhe Ajeti, është një ndeshje shumë e rëndësishme. Jemi të fokusuar dhe të përqendruar. Do të dëgjojmë trajnerin dhe do të japim gjithçka për të marrë fitoren,” – tha Broja.

I pyetur për mungesën e golit, ai theksoi se objektivi kryesor është suksesi i skuadrës: “Sigurisht që kam qejf të shënoj, por për mua më e rëndësishme është që Shqipëria të fitojë. Dua të ndihmoj me gola, pasime apo çdo mënyrë tjetër që mundem. Më mungon goli, por fokusi im është tek ekipi dhe tek 3 pikët.”

Sa i përket objektivit për t’u kualifikuar në Botëror, Broja u shpreh optimist: “Kemi shanse reale. Grupi është i vështirë, me Anglinë dhe Serbinë, por do të luftojmë deri në fund. Besojmë te forca jonë dhe te mundësia për të realizuar ëndrrën e Botërorit.” /A.Z/UBT News/

Ylli portugez i futbollit, Cristiano Ronaldo, është bërë futbollisti i parë në histori që kap shifrën e një miliard eurosh, sipas të dhënave të portalit të biznesit dhe marketingut, Bloomberg.

40-vjeçari arriti këtë rekord pas zgjatjes së kontratës me klubin Al Nassr në Arabinë Saudite, me vlerë pak më pak se 360 milionë euro.

Bloomberg vlerëson pasurinë e tij totale në pak mbi 1.2 miliardë euro, duke e bërë atë futbollistin e vetëm që thyen këtë rekord sipas Indeksit të Miliarderëve të Bloomberg.

Ronaldo ka fituar mbi 470 milionë euro në paga midis viteve 2002 dhe 2023, ndërsa marrëveshjet e tij me markat si Nike, Armani dhe Castrol kanë shtuar mbi 150 milionë euro të tjera në pasurinë e tij.

Transferimi te Al Nassr më 2023 i solli rreth 172 milionë euro në pagë vjetore pa taksa, plus bonus nënshkrimi prej pak më shumë se 25 milionë eurosh. Gjatë karrierës, Ronaldo dhe rivali i përhershëm, Lionel Messi, kanë pasur paga të ngjashme, por situata ndryshoi më 2023.

Ronaldo u transferua në Arabinë Saudite, ndërsa Messi iu bashkua Inter Miami në MLS. Megjithatë, Messi do të përfitojë nga aksionet e klubit amerikan pas pensionimit, gjë që mund ta vendosë atë përsëri në një nivel të ngjashëm me Ronaldon. Sipas Bloomberg, Messi ka fituar mbi 515 milionë euro në paga gjatë karrierës, përfshirë 17.2 milionë euro në vit nga 2023.

Ronaldo ka përfituar nga inflacioni i pagave të futbollistëve, duke fituar rreth 480 milionë euro nga kontratat e klubeve midis viteve 2002-2023, pothuajse dyfishin e kësaj shume vetëm në pak vite në Arabinë Saudite. Ai është gjithashtu lider në ndjekësit e mediave sociale midis atletëve, me 660 milionë ndjekës aktualisht. /A.Z/UBT News/