Me një sërë ngjarjesh dhe aktivitetesh të shumta, filloi puna e Akademisë Verore për Ndërmarrësi dhe Inovacion, një iniciativë e krijuar për të fuqizuar studentët me njohuri dhe aftësi praktike në fushat e ndërmarrësisë dhe inovacionit.

Hapjen zyrtare të kësaj akademie e bëri Prof. Kestrim Avdimetaj, i cili theksoi rëndësinë e përgatitjes së të rinjve për sfidat e një tregu gjithnjë e më dinamik dhe të pasigurt. Kjo akademi përfshin module të strukturuara me kujdes, që kombinojnë ligjërata akademike dhe profesionale me vizita në industri, duke ofruar një përvojë të pasur dhe gjithëpërfshirëse.

Në kuadër të akademisë, Dr. Syed Asif Mehdi nga Shri Ramswaroop Memorial University në Indi ligjëroi mbi rolin dhe rëndësinë e krijimit të ndërmarrjeve inovative, nga ideja deri te ndikimi. Ai ndau përvoja praktike dhe strategji të suksesshme për ndërtimin e ndërmarrjeve që nuk janë vetëm fitimprurëse, por gjithashtu adresojnë sfida reale, kontribuojnë në përmirësimin e jetës së njerëzve dhe rritjen ekonomike.

Ndërkohë, Prof. Gonxhe Beqiri trajtoi rëndësinë e SEO-së (optimizimi për motorët e kërkimit) dhe lidhjen e saj me marketingun e ndërmarrjeve. U shqyrtuan disa nga brendet e Kosovës në raport me marketingun përmes SEO-së, duke analizuar se cilat platforma dhe të dhëna duhet të shfrytëzohen për të targetuar konsumatorët potencialë, për të gjeneruar më shumë trafik organik, si dhe sa efektiv është përdorimi i fjalëve kyçe nga ana e tyre.

Ligjërata e Prof. Engelbert Zefaj ishte e fokusuar në Total Quality Management (TQM) dhe zbatimin e kësaj filozofie në Ndërmarrjet e Vogla dhe të Mesme (NVM). Profesori u përqendrua në parimet kryesore të TQM-së dhe në veglat dhe teknikat për zbatimin e saj me sukses në një biznes. Përveç prezantimeve teorike, ai demonstroi zbatimin e Analizës Pareto 80/20, duke identifikuar problemet kyçe të një biznesi që pengojnë arritjen e cilësisë së plotë në prodhim.

Akademia Verore vazhdoi me ligjëratën tematike “Ndërmarrësia Sociale”, të udhëhequr nga Prof. Ermira Shehu. Para pjesëmarrësve u prezantua një pasqyrë e thelluar dhe praktike mbi ndërmarrësinë sociale si një model biznesi që shkon përtej fitimit dhe synon të krijojë ndikim të qëndrueshëm në komunitet. Në thelb të saj qëndrojnë inovacioni, qëllimi social dhe vetëqëndrueshmëria.

Nga industria, Lavdim Beqiri trajtoi ndikimin e teknologjisë dhe inovacionit në zhvillimin e ndërmarrjeve në Kosovë, përmes një rasti studimi mbi Dukagjini Group. Ndërsa nga Elkos Group, Driton Rrahmani ofroi një analizë praktike për pjesën e distribuimit dhe furnizimeve, si dhe ndikimin e teknologjisë në këto procese.

Më 9 korrik 2025, në ditën e tretë të Akademisë Verore të Fakultetit Juridik në UBT, studentët patën mundësinë të ndjekin një ligjëratë të veçantë nga avokati Alban Krasniqi, përfaqësues i kompanisë ligjore “Nexus Legal Services”.

Tema e ligjëratës ishte: “Hulumtimi Ligjor dhe Ndikimi i Teknologjisë”, me fokus të veçantë në rolin që po luan Inteligjenca Artificiale (IA) në praktikën bashkëkohore ligjore.

Av. Krasniqi ndau përvojën e tij profesionale në përdorimin e mjeteve digjitale për kërkime juridike, analizën e rasteve dhe menaxhimin e informacionit ligjor. Ai solli shembuj konkretë nga përvoja e tij në sektorin privat, ku Inteligjenca Artificiale po përdoret për të përshpejtuar dhe përmirësuar procesin e përgatitjes së dosjeve ligjore dhe ofrimin e shërbimeve efikase për klientët.

Gjatë ligjëratës, u diskutuan edhe aspektet etike dhe ligjore të përdorimit të IA, siç janë: transparenca e algoritmeve, ruajtja e privatësisë së të dhënave dhe përgjegjësia juridike në rast të vendimmarrjes së automatizuar.

Studentët u angazhuan në diskutime të gjalla, duke ngritur pyetje rreth përgatitjes profesionale për të punuar në një sistem ligjor gjithnjë e më të ndikuar nga teknologjia.

Ky aktivitet është pjesë e përpjekjeve të Fakultetit Juridik në UBT për t’i ekspozuar studentët ndaj trendeve moderne të së drejtës dhe për t’i përgatitur ata për sfidat e së ardhmes në fushën juridike.

Akademia Verore me titull: “Shkenca dhe inovacioni në shërbim të cilësisë së ushqimit dhe prodhimit të qëndrueshëm” u zhvillua më 8 dhe 9 korrik 2025, duke përfshirë ligjërata, prezantime dhe diskutime me profesorë universitarë dhe ekspertë të industrisë. Aktivitetet ofruan njohuri kohezive dhe të mirëstrukturuara për pjesëmarrësit në fushat e bujqësisë dhe teknologjisë ushqimore.

Akademia përfshiu dy ditë të plota aktivitetesh akademike, ku një ditë u mbajt në UBT Kampus në Lipjan dhe dita tjetër në UBT Prizren. Sipas agjendës, janë realizuar gjithsej 10 prezantime, të cilat kanë trajtuar tema të ndryshme me interes të lartë për këtë fushë.

Pjesëmarrësit në GLOBAL UBT Fest 2025 kanë përfituar përvoja të vlefshme praktike dhe teorike, duke përfshirë projektimin dhe zbatimin e praktikave të sigurta dhe të qëndrueshme nga perspektiva e shkencave të bujqësisë dhe teknologjisë ushqimore.

Kjo Akademi Verore ka shërbyer si një mundësi e shkëlqyer për të nxitur inovacionin, shkëmbimin e ideve dhe krijimin e rrjeteve profesionale mes studentëve dhe profesionistëve të fushës. Ajo ka kontribuar në mënyrë domethënëse në zhvillimin e mëtejshëm të sektorit të bujqësisë dhe ushqimit në Kosovë dhe më gjerë.

Përmes një qasjeje ndërdisiplinore, pjesëmarrësit janë angazhuar në diskutime të gjalla rreth sfidave aktuale si ndryshimet klimatike, sigurimi i cilësisë së ushqimit dhe përdorimi i teknologjive të reja në prodhim. Përfshirja aktive e studentëve në këto procese ka rritur kapacitetet e tyre për zgjidhje kreative dhe të qëndrueshme, duke i përgatitur ata më mirë për tregun e punës dhe sfidat e së ardhmes.