Lakers arritën fitore të rëndësishme në derbin e Los Anxhelos, duke mundur Clippers me rezultatin 108-102, për të siguruar fitoren e gjashtë radhazi dhe për t’u ngjitur në vendin e dytë në Konferencën e Perëndimit. Luka Dončić ishte shënuesi më i mirë për Lakers me 29 pikë, ndërkohë që stoli kontribuoi me 36 pikë, duke e bërë të pavlefshme performancën e shkëlqyer të Kawhi Leonard, i cili realizoi 33 pikë për Clippers.

Ndërkohë, Cleveland vazhdon dominimin e tij, duke kryesuar si në Konferencën e Lindjes ashtu edhe renditjen e përgjithshme të NBA-së pas fitores 133-129 ndaj Portland, ku Hunter shkëlqeu me 32 pikë. Miami pësoi një disfatë zhgënjyese në shtëpi, duke u mundur 116-112 nga New York, ku Jalen Brunson ishte protagonist me 32 pikë. Kampionët e Boston fituan 110-103 ndaj Denver, me Brown që shënoi 22 pikë dhe Horford 19. Oklahoma vazhdon të kryesojë në Perëndim pas një ndeshje spektakolare ndaj San Antonio-s, që përfundoi 146-132, me Jalen Williams që mbylli me 41 pikë dhe Shai me 31 pikë.

Rezultatet e tjera të NBA-së:

• Boston – Denver: 110-103
• Cleveland – Portland: 133-129
• Indiana – Charlotte: 127-112
• Miami – New York: 112-116
• Orlando – Toronto: 102-104
• San Antonio – Oklahoma: 132-146
• Utah Jazz – New Orleans: 121-128
• Lakers – Clippers: 108-102
• Phoenix – Minnesota: 98-116

Cristiano Ronaldo ka shmangur udhëtimin në Iran për ndeshjen e AFC Champions League mes Al Nassr dhe Esteghlal për të evituar rrezikun e ndëshkimit me 100 goditje me kamxhik. Vendimi ka lidhje me një incident të vitit 2023, kur Ronaldo bëri një gjest të papërshtatshëm në Iran, duke puthur në ballë një artiste me aftësi të kufizuara, Fatemeh Hammami Nasrabadi. Sipas ligjeve iraniane, ky gjest me një grua që nuk është bashkëshortja e tij mund të interpretohet si tradhti bashkëshortore dhe ndëshkohet me 100 goditje me kamxhik.

Pasi çështja u bë e njohur në mediat iraniane dhe në rrjetet sociale, Al Nassr kërkoi që ndeshja të luhej në një terren neutral për të mbrojtur Ronaldo-n, por kërkesa u refuzua nga klubi iranian Esteghlal. Pavarësisht garancive nga autoritetet iraniane për një qëndrim të sigurt, Ronaldo ka vendosur të mos udhëtojë dhe nuk është përfshirë në listën e lojtarëve të grumbulluar nga trajneri Stefano Pioli për këtë ndeshje./UBTNews/

Kryeministri i Kosovës, Albin Kurti, ka thënë se medalja e artë e fituar nga boksierja Donjeta Sadiku në turneun ndërkombëtar të boksit “Strandja” në Bullgari ka rëndësi të veçantë për Kosovën pasi ajo është fituar pas 48 vitesh.

Kurti ka shtuar se në këtë turne Sadiku tregoi formë të lartë duke shënuar tri fitore radhazi dhe duke ndjekur kështu gjurmët e legjendës së boksit kosovar Mehmet Bogujevci.

Xhiroja e 22-të e AlbiMall Superligës së Kosovës në futboll do të përmbyllet sot me ndeshjen kryesore që do të zhvillohet në stadiumin “Fadil Vokrri” në Prishtinë.

Në stadiumin legjendat në kryeqytet do të ballafaqohen dy klubet e mëdha kosovare, Prishtina dhe Llapi.

Derisa Prishtina po vazhdon luftën për të siguruar një vend që dërgon në garat evropiane sezonin e ardhshëm, skuadra e Tahir Batatinës synon ikjen nga zona e rrezikshme e rënies një kategori më poshtë në futbollin vendor.

Bardhekaltërit kanë momentalisht 29 pikë në vendin e pestë, ndërsa skuadra nga Podujeva është e parafundit me vetëm 22 pikë pas 21 ndeshjeve të zhvilluara.

Kjo ndeshje do të zhvillohet me fillim nga ora 20:00 nën ndriçimin e refelktorëve në stadiumin “Fadil Vokrri”.