Lajmet

Letra e Kurtit drejtuar BE-së për zgjedhjet serbe të 3 prillit

Sipas Kurtit, Beogradi po tregohet destruktiv në shumë aspekte.

Published

3 years ago

on

Kryeministri i Kosovës, Albin Kurti, ka radhitur një varg siç i ka quajtur ai vështirësish, lidhur me kërkesën e autoriteteve të Serbisë që Kosova të bashkëpunojë me OSBE-në për mbajtjen e zgjedhjeve të 3 prillit në komunat me shumicë serbe në Kosovë.

Në letrën e tij dërguar ambasadorit të BE-së në Kosovë, Tomáš Szunyog, Kurti ka vlerësuar se Beogradi në kërkesën e tij as që e përmend Qeverinë e Kosovës, por e quan atë “autoritet relevant qeverisës të Kosovës”. Sipas Kurtit, është për keqardhje që derisa Kosova punon me BE-në dhe vendet e Quint-it për të gjetur një zgjidhje të pranueshme ndërmjet dy qeverive, strukturat ilegale të Serbisë mundohen të organizojnë zgjedhje në Kosovë sikur të mos ekzistonte Qeveria e saj.

“Është për keqardhje që, derisa Kosova është duke punuar në mirëbesim me BE-në dhe Quint-in për të gjetur një zgjidhje reciprokisht të pranueshme ndërmjet qeverive tona, strukturat ilegale të Serbisë po mundohen të përgatisin dhe të organizojnë zgjedhjet në territorin tonë sikur të mos ekzistonte Qeveria jonë. Dhe janë duke e bërë këtë me financim nga Beogradi, natyrisht. Kjo mbase është arsyeja pse propozimi (në paragrafin e tij të parë) përcakton se zgjedhjet “do të mbahen”, në vend që të kërkojë që të mbahen, duke e marrë kështu si të mirëqenë kompetencën e Beogradit për të vendosur në lidhje me territorin e Kosovës”, thuhet ndër të tjera në letrën e Kurtit.

Kurti po ashtu ka theksuar se Beogradi në kërkesë e tij e përdor termin “votues me të drejtë vote” në vend se ta përdorte “votuesit jashtë vendit”. Sipas tij, është e rëndësishme që kjo përpjekje e Serbisë të mos legjitimohet nga autoritetet e BE-së apo OSBE-së.

Sipas tij, Beogradi po tregohet destruktiv në shumë aspekte, duke përmendur këtu moszbatimin e disa marrëveshjeve e po ashtu refuzimin e Serbisë për të vendosur sanksione ndaj Federatës ruse.

“Për më tepër, kjo përpjekje për ta nënçmuar Kosovën dhe institucionet e saj shtetërore, është duke ndodhur në një kohë kur Beogradi po tregohet destruktiv në shumë drejtime: duke refuzuar të zgjidhë problemin e mospagimit të energjisë elektrike në veri të Kosovës; mungesa e marrëveshjes për targat e Kosovës dhe Serbisë; duke emëruar struktura ilegale si komisionerë zgjedhorë; duke përdorur mjete administrative për të kryer spastrim etnik kundër shqiptarëve në Preshevë, Medvegjë dhe Bujanovc përmes deregjistrimit të tyre si banorë; dhe duke refuzuar t’u bashkohet sanksioneve të BE-së dhe ShBA-ve kundër Federatës Ruse për agresionin e saj ushtarak dhe pushtimin e Ukrainës. Me gjithë këto vështirësi, më lejoni që ta përsëris falënderimin dhe vlerësimin tim për përpjekjet e vazhdueshme të BE-së dhe Quint-it për të na ndihmuar që ta zgjidhim këtë çështje sfiduese”, përfundon letra e Kurtit, drejtuar ambasadorit të BE-së në Kosovë, Szunyog, të cilit i ka shkruar zyrtari ndërlidhës i Qeverisë së Serbisë.

“Në përputhje me Aranzhimet Ndërlidhëse, ju lutem që t’i informoni autoritetet relevante qeverisëse të Kosovës, se Serbia do t’i mbajë zgjedhjet parlamentare dhe presidenciale më 3 prill 2022. Serbia i kërkon Kosovës që të bashkëpunojë për t’ia mundësuar OSBE-së organizimin e një operacioni të “mbledhjes së fletëvotimeve”, e cila do t’i lejojë votuesit me të drejtë vote që banojnë në Kosovë, që të votojnë ditën e zgjedhjeve. Serbia u kërkon autoriteteve relevante të Kosovës që ta lehtësojnë operacionin e “mbledhjes së fletëvotimeve”, duke përfshirë në lidhje me lokacionet fizike të nevojshme për procesin e votimit”, thuhet ndwrkohë në letrën e zyrtarit ndërlidhës të Serbisë.

Letra e plotë e Kurtit:

I nderuar Ambasador Szunyog,

Ju faleminderit që ma përcollët propozimin e Beogradit mbrëmjen e së premtes.

Zgjedhjet e 3 prillit e Serbisë mund të mbahen në Republikën e Kosovës vetëm në përputhje me një marrëveshje ndërmjet dy Qeverive tona përkatëse. Për këtë qëlliim, ishim duke pritur një kërkesë nga Qeveria e Serbisë drejtpërdrejt Qeverisë së Kosovës. Zyrat ndërlidhëse (për dallim nga ‘zyrtarët’) janë vetëm mjete për bartjen e komunikimeve ndërqeveritare, jo zëvendësime politike apo institucionale të komunikimeve të tilla. Për më tepër, Beogradi as që e përmend Qeverinë tonë, porse na quan “autoritetet relevante qevërisëse të Kosovës”.

Është për keqardhje që, derisa Kosova është duke punuar në mirëbesim me BE-në dhe Quint-in për të gjetur një zgjidhje reciprokisht të pranueshme ndërmjet qeverive tona, strukturat ilegale të Serbisë po mundohen të përgatisin dhe të organizojnë zgjedhjet në territorin tonë sikur të mos ekzistonte Qeveria jonë. Dhe janë duke e bërë këtë me financim nga Beogradi, natyrisht. Kjo mbase është arsyeja pse propozimi (në paragrafin e tij të parë) përcakton se zgjedhjet “do të mbahen”, në vend që të kërkojë që të mbahen, duke e marrë kështu si të mirëqenë kompetencën e Beogradit për të vendosur në lidhje me territorin e Kosovës.

Në veçanti, Beogradi e përdor termin “votuesit me të drejtë vote” për t’iu referuar serbëve të Kosovës që kanë shtetësi të dyfishtë. Mirëpo, kjo është sipas regjistrit civil të përcaktuar dhe të poseduar nga strukturat komunale ilegale të Serbisë në Kosovë, duke shkelur kështu Kushtetutën dhe ligjet tona. Është me rëndësi që kjo orvajtje të mos legjitimohet nga autoritetet e BE-së apo të OSBE-së. Po ashtu, referimi i tyre te ‘votuesit me të drejtë vote’ dhe jo ‘votuesit jashtë vendit’, është në shpërputhje me praktikat më të mira ndërkombëtare.

Për më tepër, kjo përpjekje për ta nënçmuar Kosovën dhe institucionet e saj shtetërore, është duke ndodhur në një kohë kur Beogradi po tregohet destruktiv në shumë drejtime: duke refuzuar të zgjidhë problemin e mospagimit të energjisë elektrike në veri të Kosovës; mungesa e marrëveshjes për targat e Kosovës dhe Serbisë; duke emëruar struktura ilegale si komisionerë zgjedhorë; duke përdorur mjete administrative për të kryer spastrim etnik kundër shqiptarëve në Preshevë, Medvegjë dhe Bujanovc përmes deregjistrimit të tyre si banorë; dhe duke refuzuar t’u bashkohet sanksioneve të BE-së dhe ShBA-ve kundër Federatës Ruse për agresionin e saj ushtarak dhe pushtimin e Ukrainës.

Me gjithë këto vështirësi, më lejoni që ta përsëris falënderimin dhe vlerësimin tim për përpjekjet e vazhdueshme të BE-së dhe Quint-it për të na ndihmuar që ta zgjidhim këtë çështje sfiduese.

Nderimet më të larta,

Albin Kurti

Related Topics:
Continue Reading

Lajmet

Gjykata e Apelit redukton sërish orarin e punës për shkak të temperaturave të larta

Published

11 minutes ago

on

July 22, 2025

By

Gjykata e Apelit ka njoftuar se nga e marta, 22 korrik, do të punojë me orar të reduktuar, si pasojë e temperaturave të larta që kanë përfshirë vendin. Ky vendim është marrë në përputhje me vendimin e Këshillit Gjyqësor të Kosovës, të datës 27 qershor 2025, si dhe në bazë të paralajmërimeve të institucioneve kompetente për valë të të nxehtit ekstrem në ditët në vijim.

Në njoftimin zyrtar të publikuar nga Gjykata e Apelit thuhet se masat kanë hyrë në fuqi menjëherë, duke filluar nga sot.

“Këto masa do të rishikohen në vazhdimësi, varësisht nga kushtet klimatike dhe vlerësimi i menaxhmentit të gjykatës, në bazë të rrethanave teknike”, thuhet në njoftimin e publikuar në faqen zyrtare të Gjykatës në Facebook.

Vendimi vjen si masë mbrojtëse për të garantuar mirëqenien e stafit dhe qytetarëve në kushte të motit ekstrem.

 

Continue Reading

Lajmet

Akademia Verore e Shkencave Kompjuterike në UBT – Qendër e ekselencës për inovacion, teknologji dhe bashkëpunim ndërkombëtar për një të ardhme të gjelbër digjitale

Published

22 minutes ago

on

July 22, 2025

By

UBT u shndërrua në një pikëtakim strategjik të dijes dhe teknologjisë, përmes edicionit më madhështor të Akademisë Verore 2025, organizuar nga Fakulteti i Shkencave Kompjuterike dhe Inxhinierisë, në bashkëpunim të ngushtë me menaxhmentin dhe partnerët ndërkombëtarë. Kjo ngjarje e rangut ndërkombëtar u realizua me mbështetjen e projektit IoT-ECO dhe mblodhi në një platformë unike ekspertizën shkencore, energjinë rinore dhe bashkëpunimin ndëruniversitar, për të ndërtuar një ekosistem të qëndrueshëm të teknologjive të gjelbra dhe digjitalizimit.

Gjatë shtatë ditëve intensive në Qendrën Dukagjini – Prishtinë, programi përfshiu ligjërata të thelluara, punëtori praktike, tryeza strategjike dhe sesione demonstrative që sollën në fokus avancimet më të fundit në Internet of Things (IoT), sistemet kibernetike-fizike, infrastrukturat inteligjente, robotikën, sigurinë kibernetike dhe prototipimin virtual.

Programi i Akademisë Verore 2025 përfshiu një varg sesionesh të avancuara, ku kontribuuan profesorët e UBT-së, si dhe ekspertë e akademikë ndërkombëtarë nga universitete prestigjioze të Evropës. Këta profesionistë ofruan njohuri të thella dhe përvoja praktike rreth trendeve më të fundit në teknologji, digjitalizim dhe zhvillim të qëndrueshëm.

  • Dr. Edmond Hajrizi – Opening Session: Welcome Speech and Digital Twin – UBT Smart City IoT-Eco
  • Dr. Galia Marinova – IoT-ECO Project Achievement and Implementation
  • Dr. Zhilbert Tafa (UBT) – Towards Smart Environmental Monitoring: Artificial Intelligence of Things (AIoT) for Air Quality Surveillance
  • Kostas Berberidis, Christos Mavrokefalidis (University of Patras) – Distributed Machine Learning for IoT Applications: Challenges and Perspectives (IoT-ECO)
  • Andreas Hoermer, Pasha Bekhrad (TU Graz) – Satellite IoT: Connecting the Unconnected Planet dhe Advancing Green Technology in Optical and Hybrid Networks
  • Elita Hajrizi (UBT) – Hands-on Workshop: Robotics Programming Innovations at UBT Smart City
  • Startup Innovation from UBT – UBT Student Startups: From Idea to Prototype – Virtual model of the UBT university campus
  • Lecture from Polytechnic University of Tirana – IoT-Eco: Green Cloud IoT
  • Galia Marinova, Vasil Guliashki (Technical University of Sofia) – IoT in Smart Microgrids – Monography presentation
  • Dr. Pasquale Daponte, Francesco Pepe (University of Sannio, Italy) – Presentation of International activities of University of Sannio
  • Manjola Zeneli, Frida Gjermeni (University “Alexander Moisiu”, Durrës) – Virtual Prototype of Port of Durrës dhe IoT in industry, academy and more
  • Saranda Dreshaj (UBT) – AR/VR Integration in IoT-Enabled Urban Environments – Virtual model of UBT Smart City
  • Lecture from Mediterranean University of Podgorica – PV Plants, Smart Inverters, and Electric Vehicles as IoT Cyber-Physical Entities in Modern Power Systems and Smart Grids
  • Zana Limani Fazliu, Jeta Dobruna (University of Prishtina) – Green Wireless Communications
  • Abian Morina, Dion Mulaj (UBT) – Cyber-Physical Systems & IoT Security
  • Lecture from University of Montenegro – Virtual Prototyping for Sustainable Infrastructure – Virtual model of UoM campus
  • Round Table with Partners – New courses and trainings for green transformation in the WB
  • Blockchain Day with Binance Representative – Decentralized Technologies for Future Cities
  • Startup Innovation – Fuqizimi i Rinisë për të Ardhmen Digjitale

Në kuadër të sesionit “Startup Innovation from UBT”, studentët e UBT u shndërruan në protagonistë të inovacionit, duke prezantuar idetë e tyre para profesorëve dhe partnerëve ndërkombëtarë. Këto prezantime ishin dëshmi konkrete e kapacitetit krijues dhe të ardhmes premtuese që po ndërtohet në UBT.

Përveç komponentëve shkencorë, akademia ofroi hapësira për diplomaci akademike, përmes round table me partnerët e projektit IoT-ECO, si dhe aktivitete kulturore e shoqërore në UBT Innovation Campus në Lipjan dhe qytete të ndryshme të Kosovës. Po ashtu, u nënshkruan memorandume mirëkuptimi me kompani dhe institucione akademike, duke zgjatur bashkëpunimin për projekte të përbashkëta të së ardhmes.

Ky edicion i Akademisë Verore dëshmoi edhe njëherë fuqinë organizative të UBT-së, nën udhëheqjen vizionare të stafit të Fakultetit të Shkencave Kompjuterike dhe Inxhinierisë dhe përkrahjen e pakursyer të menaxhmentit. UBT konfirmoi statusin e saj si një qendër lider e ekselencës akademike dhe inovacionit teknologjik në rajon dhe më gjerë.

Continue Reading

Lajmet

​Drita përballet sot me Copenhagen në Ligën e Kampionëve

Published

53 minutes ago

on

July 22, 2025

By

Skuadra e Dritës do të luajë sot sfidën e parë të raundit të dytë kualifikues në Ligën e Kampionëve kundër gjigantëve danezë të FC Copenhagen, ku ndeshja do të zhvillohet në “Parken Stadium” të Kopenhagës, me fillim nga ora 19:00.

Kjo është një sfidë e rëndësishme për ekipin nga Gjilani, që synon të shkruajë një kapitull të ri në historinë e saj evropiane përballë një kundërshtari me përvojë të madhe në arenën ndërkombëtare..

Për të kaluar në këtë fazë, Drita në raundin e parë e eliminoi skuadrën Differdange.

Continue Reading

Lajmet

KFOR vendos tabela të reja paralajmëruese përgjatë kufirit Kosovë–Serbi

Published

1 hour ago

on

July 22, 2025

By

Misioni paqeruajtës i NATO-s në Kosovë, KFOR, ka nisur vendosjen e tabelave të reja paralajmëruese dhe rinovimin e atyre ekzistuese përgjatë vijës kufitare ndërmjet Kosovës dhe Serbisë. Në një njoftim, KFOR-i bëri të ditur se ky veprim ka për qëllim përmirësimin e dukshmërisë dhe uljen e rrezikut për kalime të paqëllimshme të kufirit.

“Sapo janë vendosur shenja për të paralajmëruar qytetarët se po i afrohen vijës administrative (ABL). Për shkak të terrenit malor dhe të pyllëzuar, këto tabela ndihmojnë në shënimin e qartë të zonës së operacioneve të KFOR-it, duke reduktuar mundësinë e kalimeve aksidentale”, thuhet në njoftim.

KFOR-i njofton se vendosja e këtyre tabelave do të vijojë gjatë javëve të ardhshme, si pjesë e angazhimit të tyre për të ofruar një mjedis të sigurt për të gjitha komunitetet në Kosovë.

Ky aktivitet vjen si pjesë e përkushtimit të vazhdueshëm të KFOR-it për të ruajtur paqen dhe sigurinë në rajon, në përputhje me mandatin e dhënë nga Kombet e Bashkuara.

Continue Reading

Të kërkuara