Kronikë e zezë

Lëshuan çeqe pa mbulesë dhe keqpërdorën kartela të bankës u ngritet aktakuzë

Sipas aktakuzës, të pandehurit në vazhdimësi me qëllim kanë keqpërdorur pozitën.

Published

4 years ago

August 9, 2022

UBT news

Dy të dyshuarve iu është ngritur aktakuzë pasi që dyshohet se kanë lëshuar çeqe pa mbulesë ose të rremë dhe keqpërdorën kartela të bankës apo të kreditit.

Sipas aktakuzës, të pandehurit në vazhdimësi me qëllim që vetit t’i sjellin dobi pasurore të kundërligjshme, kanë keqpërdorur pozitën dhe besimin e klientëve duke iu vjedhur dhe fotografuar të dhënat e kartelave të tyre bankare, të cilat i kishin përdorur për të bërë blerje në dyqan.

“Prishtinë, 9 gusht 2022– Prokuroria Themelore në Prishtinë, njofton opinionin publik se Prokurori i Shtetit, pas zhvillimit të hetimeve, mbledhjes dhe analizimit të provave, ka ngritur aktakuzë ndaj të pandehurve A.S. dhe E.B., në drejtim të veprës penale “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”, nga neni 301 lidhur me neni 31 të Kodit Penal të Republikës së Kosovës. Sipas aktakuzës, i pandehuri A.S., në vazhdimësi, në cilësinë e personit përgjegjës të ndërrimit në subjektin afarist “NEPTUN”, me qëllim që vetit t’i sjellë dobi pasurore të kundërligjshme, ka keqpërdorur pozitën dhe besimin e klientëve duke iu vjedhur dhe fotografuar të dhënat e kartelave të tyre bankare, të cilat i kishin përdorur për të bërë blerje në dyqanin e lartcekur, e i cili pastaj këto të dhëna i ka përdorur duke bërë blerje të monedhave – kriptovalutave, ku më pas i ka shitur dhe i ka shndërruar në para kesh/euro, çka të dëmtuarve iu ka shkaktuar dëm material në shumën prej 6,124.1€. Me këtë i pandehuri në vazhdimësi e ka kryer veprën penale “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”, nga neni 301, paragrafi 3 lidhur me paragrafin 2 dhe me nenin 77 të KPRK-së. Ndërsa, të pandehurit A.S. dhe E.B., në bashkëkryerje, me qëllim që vetit t’i sjellin dobi pasurore të kundërligjshme, kanë keqpërdorur kartelën e bankës së një të dëmtuare, në atë mënyrë që i pandehuri A.B., në cilësinë e personit përgjegjës të ndërrimit në lokalin e lartcekur ka keqpërdorur pozitën dhe besimin e klientëve, respektivisht të dëmtuarës, duke ia vjedhur dhe fotografuar të dhënat e kartelës bankare të cilën e kishte përdorur për të bërë blerje në dyqanin e lartcekur, e i cili pastaj këto të dhëna i ka përdorur duke bërë blerje të monedhave – kriptovalutave, përmes e-mail adresave dhe llogari të tjera, të cilat ia kishte siguruar i pandehuri E.B., në këmbim të një shume të hollash/përqindje, ku pastaj i pandehuri A.S., kriptovalutat e krijuara në këto llogari më pas i ka shitur dhe i ka shndërruar në para kesh/euro çka të dëmtuarës i ka shkaktuar dëm material në shumën prej 1.236.07€. Me këtë të pandehurit në bashkëkryerje e kanë kryer veprën penale “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”, nga neni 301, paragrafi 2 lidhur me nenin 31 të KPRK-së. Prokurori i çështjes me rastin e ngritjes së aktakuzës, i ka propozuar Gjykatës që të pandehurit e lartcekur të shpallen fajtorë dhe të dënohen sipas ligjit për veprat penale të cila iu vihen në barrë”, thuhet në njoftimin e prokurorisë.

Kronikë e zezë

Vushtrri: Arrestohet një person për armëmbajtje pa leje

Published

17 hours ago

March 4, 2026

UBTNews

Një aksion kontrolli i Policisë së Kosovës në një shtëpi në Vushtrri ka rezultuar me gjetjen e një arme zjarri mëngjesin e së martës. Rreth orës 07:25, zyrtarët policorë kanë arrestuar një të dyshuar pasi gjatë bastisjes në pronën e tij u gjet një armë e paligjshme.

Sipas raportit njëditor, policia ka konfiskuar një pushkë gjysmë-automatike së bashku me një karikator që përmbante gjashtë fishekë.

Pas shoqërimit në stacionin policor dhe intervistimit, me vendim të prokurorit i dyshuari është liruar.

Rasti po vazhdon të trajtohet në procedurë të rregullt.

Kronikë e zezë

Viti: Arrestohen dy persona për sulm ndaj zyrtarit policor

Published

17 hours ago

March 4, 2026

UBTNews

Në raportin 24-orësh të Policisë së Kosovës bëhet e ditur se janë arrestuar dy persona në Viti, nën dyshimin se më 1 mars të këtij viti kanë sulmuar një person zyrtar gjatë kryerjes së detyrës.

Të dyshuarit pas intervistimit me vendim të prokurorit janë dërguar në mbajtje.

“Pas hetimeve të zhvilluara lidhur me rastin, me 03.03.2026 janë arrestuar dy të dyshuar meshkuj kosovarë dhe të njëjtit pas intervistimit me vendim të prokurorit janë dërguar në mbajtje”, thuhet ne raport.

Kronikë e zezë

Zbulohen mjete shpërthyese në Rahovec dhe Gjakovë, ndërhyjnë njësitë e deminimit

Published

18 hours ago

March 4, 2026

UBTNews

Një mjet i dyshuar shpërthyes është gjetur mëngjesin e së martës në një shtëpi në Rahovec. Rreth orës 08:10, një qytetar ka njoftuar policinë pasi ka hasur në mjetin e rrezikshëm derisa po pastronte oborrin e tij.

Policia e Kosovës ka dalë menjëherë në vendngjarje për të siguruar zonën, ndërsa njësiti i specializuar për deminim (EOD) ka bërë tërheqjen e mjetit pa shkaktuar ndonjë incident.

Një rast i ngjashëm është regjistruar edhe në qytetin e Gjakovës rreth orës 09:25. Një person ka raportuar në polici se gjatë pastrimit të një objekti ka hasur në dy mjete të dyshuara shpërthyese.

Në këtë rast, përveç njësiteve policore, ka ndërhyrë edhe njësiti për deminim i KFOR-it, të cilët kanë bërë largimin e mjeteve në mënyrë të sigurt nga lokacioni.

Kronikë e zezë

Katër raste të dhunës në familje brenda 24 orëve në Kosovë

Published

18 hours ago

March 4, 2026

UBTNews

Në raportin 24-orësh të Policisë së Kosovës janë raportuar katër raste të dhunës në familje. Rastet e regjistruara kanë ndodhur në Prishtinë, Pejë, Gjakovë dhe i fundit në Zubin Potok.

Në Prishtinë raportohet se një person është shoqëruar në polici, pasi i njëjti dyshohet se ka ushtruar dhunë ndaj viktimës grua. Me vendim të prokurorit, pas intervistimit të palëve, rasti ka vazhduar të trajtohet në procedurë të rregullt (gjendje të lirë).

Ndërsa në Pejë, një person është në kërkim nga policia pasi dyshohet se ka sulmuar një burrë. “Viktima ka pranuar trajtim mjekësor, ndërsa i dyshuari gjendet në kërkim policor. Lidhur me rastin është njoftuar prokurori, i cili ka urdhëruar fillimin e hetimeve”, thuhet në raport.

Në Gjakovë është arrestuar një burrë nën dyshimin se, pas një mosmarrëveshjeje, ka sulmuar një person tjetër. Viktima ka pranuar trajtim mjekësor, ndërsa rasti po hetohet me urdhër të prokurorit të shtetit.

Rasti i fundit është regjistruar në Zubin Potok, ku është arrestuar një person pasi dyshohet se ka ushtruar dhunë ndaj një gruaje. Sipas policisë, viktima ka pranuar trajtim mjekësor, ndërsa i dyshuari, me vendim të prokurorit, është dërguar në mbajtje.