Kombëtarja e Spanjës ka përmbyllur me sukses fazën përgatitore para nisjes së Kupës së Botës 2026, duke triumfuar me rezultat 3:1 ndaj Perusë në një ndeshje miqësore të zhvilluar në Puebla të Meksikës.

Pavarësisht mungesave të rëndësishme në repartin ofensiv, skuadra e drejtuar nga Luis de la Fuente tregoi cilësi dhe dominim, duke siguruar një fitore bindëse vetëm pak ditë para debutimit në Botëror.

Spanja kaloi në epërsi që në minutën e dytë falë golit të Mikel Oyarzabal, ndërsa Pedri dyfishoi rezultatin pas gjysmë ore lojë. Goli i tretë erdhi si pasojë e një autogoli të portierit peruan Pedro Gallese, duke i dhënë “La Rojas” avantazhin 3:0. Peruja arriti të ngushtojë rezultatin në pjesën e dytë, por pa rrezikuar fitoren e spanjollëve.

Në këtë ndeshje munguan disa prej emrave më të rëndësishëm të ekipit, përfshirë Lamine Yamal, Nico Williams dhe Victor Munoz, të cilët po rikuperohen nga lëndimet dhe mbetën në qendrën stërvitore të kombëtares në Tennessee.

Megjithatë, selektori Luis de la Fuente është optimist se të tre lojtarët do të jenë të gatshëm për ndeshjen hapëse të Spanjës në Kupën e Botës, kundër Kepit të Gjelbër, e cila do të zhvillohet më 15 qershor në Atlanta.

Edhe pse prania e tyre do të ishte një shtysë e madhe për ekipin, paraqitja ndaj Perusë tregoi se Spanja disponon një skuadër të thellë dhe me alternativa të shumta, duke e konfirmuar statusin e saj si një nga pretendentet për sukses në Botërorin 2026.

D.L

Klubet e Ligës Profesionale Saudite vazhdojnë përpjekjet për të tërhequr emra të mëdhenj të futbollit evropian, ndërsa objektivi më i ri i tyre është një nga lojtarët kyç të Barcelonës, braziliani Raphinha.

Sipas raportimeve të medias spanjolle Mundo Deportivo, Al Hilal dhe Al Nassr, me mbështetjen e Fondit të Investimeve Publike të Arabisë Saudite (PIF), janë duke përgatitur një ofertë të jashtëzakonshme për ta bindur sulmuesin anësor të largohet nga “Camp Nou”.

Raportohet se 29-vjeçari mund të përfitojë një pagë neto prej rreth 48 milionë eurosh në sezon, shifër që është katër herë më e lartë se ajo që fiton aktualisht te Barcelona. Në të njëjtën kohë, klubi katalanas do të arkëtonte rreth 80 milionë euro nga transferimi i kartonit të tij.

Raphinha ka qenë një nga shtyllat kryesore të skuadrës së drejtuar nga Hansi Flick dhe deri më tani ka shprehur vazhdimisht dëshirën për të vazhduar karrierën te gjiganti katalanas. Megjithatë, sipas raportimeve të fundit, braziliani po e shqyrton me kujdes të ardhmen e tij pas një sezoni të vështirë, i cili u karakterizua nga lëndime dhe presion i vazhdueshëm.

Klubet saudite besojnë se kjo situatë mund t’u krijojë hapësirë për të realizuar një prej transferimeve më të bujshme të verës. Në rast se zgjedh Al Hilalin, Raphinha do t’i bashkohej një skuadre të mbushur me emra të njohur të futbollit botëror. Ndërsa te Al Nassr, ai do të kishte mundësinë të luante krah yjeve si Cristiano Ronaldo, Sadio Mane dhe Joao Felix.

Kontrata e Raphinhas me Barcelonën është e vlefshme deri në verën e vitit 2028, por mbetet të shihet nëse oferta milionëshe nga Arabia Saudite do të mjaftojë për ta bindur brazilianin të largohet nga “Camp Nou” dhe të nisë një kapitull të ri në karrierën e tij.

D.L

Omar Abdulkadir Artan, i cili pritej të bëhej somalezi i parë që do të drejtonte ndeshje në një Kupë Bote, është hequr nga lista e arbitrave të Kampionatit Botëror 2026 pasi autoritetet amerikane i mohuan hyrjen në Shtetet e Bashkuara të Amerikës.

Artan, i shpallur “Gjyqtari i Vitit 2025” në Afrikë për kategorinë e meshkujve, ndodhet aktualisht në Turqi, pasi u ndalua të hynte në Aeroportin Ndërkombëtar të Miamit. Sipas raportimit të BBC-së, autoritetet amerikane të imigracionit nuk kanë dhënë një arsye zyrtare për riatdhesimin e tij. Megjithatë, Somalia figuron në listën e vendeve ndaj të cilave administrata e presidentit Donald Trump ka vendosur kufizime udhëtimi.

Pas komunikimeve me autoritetet amerikane, FIFA konfirmoi se arbitri somalez nuk do të mund të marrë pjesë në Botëror.

“FIFA mund të konfirmojë se gjyqtari Omar Abdulkadir Artan nuk do të jetë në gjendje të drejtojë ndeshje në Kupën e Botës pasi iu mohua hyrja në Shtetet e Bashkuara”, thuhet në deklaratën e organit qeverisës të futbollit botëror.

FIFA sqaroi se nuk ka rol në procedurat e imigracionit të vendit organizator dhe se është informuar nga autoritetet amerikane se statusi i Artanit nuk do të ndryshojë për momentin.

“Në përputhje me praktikat e ngjarjeve të mëparshme të FIFA-s, qeveria e vendit organizator ka fjalën përfundimtare lidhur me lëshimin e vizave dhe lejimin e hyrjes në territorin e saj”, thuhet më tej në reagimin e FIFA-s.

Një këshilltar i lartë në Ministrinë e Rinisë dhe Sportit të Somalisë konfirmoi për BBC se Artan kishte udhëtuar me dokumentacion të rregullt dhe se, për t’ia lehtësuar udhëtimin, autoritetet somaleze i kishin lëshuar edhe pasaportë diplomatike pas problemeve të mëhershme me vizat.

Vetë Artan reagoi për agjencinë Reuters, duke deklaruar se mbetet i fokusuar në të ardhmen pavarësisht zhgënjimit.

“Dua të falënderoj FIFA-n dhe Konfederatën Afrikane të Futbollit për gjithë mbështetjen. Premtoj se do të vazhdoj ta mbaj në nivel të lartë arbitrimin tim, ndërsa fokusohem në sfidat e ardhshme”, ka thënë ai.

Arbitri somalez u ka uruar sukses kolegëve të tij në Kupën e Botës dhe ka shprehur shpresën se do t’u bashkohet atyre në kompeticionet e ardhshme ndërkombëtare.

Ndërkohë, Andrew Giuliani, drejtues i Task-Forcës së Shtëpisë së Bardhë për Kupën e Botës, deklaroi për BBC se vendimi i autoriteteve kufitare amerikane ishte i drejtë dhe se ai e mbështet atë, pa dhënë detaje shtesë.

Artan ishte njëri nga 52 gjyqtarët e përzgjedhur nga FIFA për Kampionatin Botëror 2026. Ai mban stemën e FIFA-s që nga viti 2018 dhe ka drejtuar ndeshje në kompeticione prestigjioze, përfshirë Kupën e Kombeve të Afrikës.

Tetë vjet pas ndarjes nga jeta të legjendës së futbollit kosovar, Fadil Vokrri, figura e tij vazhdon të mbetet e gjallë në kujtesën e sportdashësve dhe të gjithë atyre që e njohën kontributin e tij të jashtëzakonshëm për futbollin dhe shtetndërtimin sportiv të Kosovës.

Me rastin e tetëvjetorit të vdekjes së tij, presidenti i Federatës së Futbollit të Kosovës, Agim Ademi, ka publikuar një mesazh përkujtimor, duke e vlerësuar Vokrrin si një prej personaliteteve më të rëndësishme në historinë e sportit kosovar.

Sipas Ademit, Vokrri nuk ishte vetëm një futbollist i madh dhe një ikonë e gjelbërimit kosovar, por edhe arkitekti i njohjes ndërkombëtare të futbollit të Kosovës, duke udhëhequr procesin historik të anëtarësimit në UEFA dhe FIFA.

“Ka emra që nuk i përkasin vetëm historisë, por bëhen pjesë e identitetit të një kombi. E një emër i tillë është padyshim Fadil Vokrri. Sot, tetë vjet më vonë, kujtimi për të mbetet po aq i fortë sa dita kur na la”, ka shkruar Ademi.

Ai ka theksuar se trashëgimia e Vokrrit vazhdon të jetë burim frymëzimi për brezat e rinj të futbollistëve dhe sportistëve kosovarë, ndërsa numri 9, që ai e mbajti me krenari gjatë karrierës së tij, mbetet simbol i suksesit, lidershipit dhe përkushtimit ndaj futbollit të Kosovës.

“Fadil Vokrri mbetet më shumë se një emër në historinë e futbollit tonë. Ai është frymëzim, krenari dhe pjesë e përhershme e identitetit të futbollit të Kosovës”, ka përfunduar Ademi në mesazhin e tij përkujtues.

Fadil Vokrri ndërroi jetë më 9 qershor 2018, duke lënë pas një trashëgimi të jashtëzakonshme si në fushën e blertë ashtu edhe në drejtimin e futbollit kosovar. Emri dhe vepra e tij vazhdojnë të zënë një vend të veçantë në historinë sportive të Kosovës.

Foto: Kosovapress

D.L